You Cannot Download this book untill you login but you can read it .

---

Login Register

ya yi ne wanda ze sa ta gane ya yi laushi? Me take jira? Ya ya ze yi da wannan ɓacin ran da yake ji shi kam? Waɗannan abubuwan dake gabansa ya san yana sha ze ɗan ji sauƙi ko ya ya ne. Se dai ya kasa sha. Tun ɗazu suke gabansa amma ya kasa ko da ƙoƙarin ɗauka ne ya sha. Ya fesar da zazzafar iska daga bakinsa yana miƙewa. Ɗaukar bottles ɗin ya yi har lokacin bugun zuciyarsa be saitu ba. Ko me yake ji ze haƙura, tun da dai har mahaifiyar da ta haife shi ce ta ga hukuncin da ta yanke shi ne daidai ya haƙura. Ba ze sha wani abu ba, amma fa ko me ya samu zuciyarsa toh tabbas silar soyayyar Didi ne. A hankali ya soma takawa dan ficewa daga ɗakin da niyyar dubawa ko babu kowa dan ya fita ya je ya fasa su gaba ɗaya. Se dai a daidai wannan lokacin ne Didi ta shigo ɗakin da sallama ɗauke a bakinta cikin siririyar muryarta. Dakatawa ya yi yana kallanta cikin matuƙar mamakin ganinta. Ya zuba mata lumsassun idanunsa kamar wadda ya ga baƙuwar halitta. Se ya lumshe idanunsa dan tabbatar da da gasken ita ɗin ce ko kuwa idanunsa ne suka soma masa gizo. Tabbatar da da gasken ita ce shi ne ya sanya shi matsawa gefe ya ajje bottles ɗin yana juyowa inda take cikin maɗaukakin farin ciki. Daidai lokacin da ita kuma idanunta suka sauka a kan kwalaben. Wallahi ba ta san lokacin da abincin hannunta suka tarwatse ba. Cikin lokaci ƙanƙani kowanne ya yi nasa wajen. A take jikinta ya ɗauki rawa. Shin wannan wane irin ɗa ne? Shi kam wane irin miji ne? Wane irin uba kuma yake son zama? Yanzu duk yanda Mommah ta gama yabo da kuma fatan a ce ya dena har abada, wanda hakan ne ya sa ta aikota da kanta ashe be dena ba?

Shi ganinta ma gaba ɗaya ya sa ya manta abubuwan da ya ajiye. Duk kuma da zubar da abin da ta yi shi kam wannan ba damuwarsa ba ce. Damuwarsa ɗaya a ce duk sun yarda da ya tuba ya kuma yi laushi. Matsawa ya yi kusa da ita ya saka hannu ya riƙo hannunta cikin nasa. Ita dai kallansa kawai take yi jikinta na cigaba da rawa, idanunta na soma tara ƙwalla.

"Me ya sa kike min haka Afrah? Me ya sa ba za ki tausaya min ba? Me ya sa ba za ki ji ƙaina ba? Ki kalle ni ki ce kin yafe min kuma kin amince da soyayyata ba? Na faɗa miki wallahi ina sonki. Ina sonki, ina sonki. Ya kike so na yi da zuciyata Uhmm?" Ya ƙare maganar gwanin ban tausayi. Duk da yanda zuciyarta ke rawa hakan be hanata fuzge hannunta ba. Idanunta sun cika taff da ƙwalla. Ko ba dan abin da Mommah tace mata ba, ita ma kanta za ta so a ce mijinta ya zama kintsatstse shiryayye wanda za ta yi alfahari da shi. Cikin ƙarfin hali da kuma dakewar zuciya tace

"Ka ba ni mamaki.. Ashe har yanzu ba ka dena ba? Ashe har yanzu ka na cigaba da shan wannan abar? Ashe ka yaudare mu ne da kalaman bakinka? Abin takaicin ma har ka saka Mommah ta yarda da kai, ta amince da kai? Har kuma ta tabbatar min da ka dena ɗin? Se ga shi ka watsa mata ƙasa a ido? Ka cigaba da abin da ka ga dama? Shin wai ka manta wace ce uwa? Ba ka san wace ce uwa ba ne? Ko kuwa ba ka tsoron haɗuwarka da Allah? Toh bari ka ji har abada ba zan taɓa amincewa da kai ba, ba kuma zan taɓa sonka ba har se ka dena shaye-shaye." Daga haka ta juya a guje ta fice daga ɗakin. Shiru ya yi na tsawon minti 1 ba tare da ya motsa daga inda yake ba. Kawai abubuwan da ta faɗa ne ke ta dawo masa a cikin kwanya. So ya yi ya gama fahimtar abin da take nufi ya bata amsa. Se dai tun kafin ma ya gama fahimta har ya fice. Cikin ƙanƙanin lokaci kansa ya shiga sara masa kamar ze rabe gida biyu. Jikinsa har wani rawa yake yi tamkar wanda zazzaɓi ke shirin rufewa. A hankali ya juya ya kalli inda ya ajje bottles ɗin nan, se a lokacin ya gane duk dalilan Didin na waɗannan maganganun nata da ya ji su can can cikin zuciyarsa. A hankali ya kai hannunsa ya kama kansa lokaci ɗaya yana runtse idanunsa. Wani irin zafi zuciyarsa take masa, kansa na cigaba da sarawa. Kawai se ya koma ya zube kan gado ya runtse idanunsa da suka yi mummunan ja, sam kansa ya kulle, ƙwaƙwalwarsa ta tsaya cakk da aiki. Komai ya koma masa a baibai. Ji yake kamar duniyar ma ta koma masa ƙasa a sama.

Sosai ya cigaba da kallansa yana nazarinsa.

"Duk yanda aka yi ba lafiya ba." Ya faɗa a kan laɓɓansa. Se ya ƙarasa da sauri ya ja side drawer ya zauna. A hankali ya ɗora hannunsa kan kafaɗar Bad Man ɗin yace

"Areef.." Har bayan shuɗewar fiye da minti 1 Bad Man be buɗe idanunsa ba. Se da Gwanin ya sake taɓa kafaɗarsa sannan ya buɗe jajayen idanunsa, har lokacin zuciyarsa babu abin da take yi ban da wani irin bugu. Hakan ne kuma ya sa ƙirjinsa ke ɗagawa da wani irin sauri.

"Ba ka da lafiya ne?" Gwani ya faɗa a ruɗe saboda yanda ya ga idanun nasa. Runtse idanunsa Bad Man ya sake yi har lokacin be ce komai ba. Sam ya ma rasa me ze ce. Shin wace kalma ze buɗe baki ya faɗa a yanzu? Ashe da ma ta ƙi shi ne saboda shaye shaye? Ta kuma sakko ta amince da shi saboda a tunaninta ya dena. Se ga shi a ranar ya jawa kansa. Wani rikitaccen al'amari ya faru. Shin da wane ido ze kalleta ya yi mata bayanin ba sha ze yi ba? Shin wace kalma yake da ita wadda ze iya kare kansa a wajenta? Ta yaya ze kalleta yace mata tun ranar da Mommah ta kama shi yana sha har yanzu be sake sha ba? Bayan ga shi ta kama shi dumu dumu da kwalbar giyar a hannunsa.

"Wai ba za ka faɗa min ba ne? Me ya faru? Wani abun na damunka ne?" Gwani ya sake tambaya a karo na barkatai. Se a lokacin ya lumshe idanunsa kafin ya buɗe, a hankali ya saka hannunsa a saitin zuciyarsa kafin yace komai Gwani ya katse shi da faɗin

"Uhmmm..?" Ya yi maganar cike da tsoro yana cigaba da kallansa.

"Bro ka taimaka min. Na rasa yanda zan yi, ban san abin da ya kamata na yi ba kuma. Na yi na yi iya ƙoƙarina amma abin na neman fin ƙarfina.. Ban san me ye laifin zuciyata ba da ta kamu da ƙaunar Afrah ba. Tabbas na san a da ba na sonta ko kaɗan, amma a hankali a hankali na fara koyon sonta, tun ba na yarda daga baya na haƙura na yadda haka ɗin ne. Se dai a yanzu ba na tunanin zuciyata za ta samu sukuni idan har ban sameta ba. Se dai na sani ko me ya faru laifina ne.. Amma wallahi na tuba, na kuma dena abin da take so na dena. Ka taya ni yi mata bayanin abin da take tunani ba haka ba ne. Wallahi ni kaɗai na san yanda zuciyata ke min zafi, na rasa yanda zan yi." Ya ƙare a raunane yana sake kwantar da kansa jikin gado yana ƙara dafe saitin zuciyarsa. Kallansa Gwani kawai yake yi, lallai Allah me yadda ya so da bawansa. Kwata kwata idan ka san Bad Man ba za ka taɓa cewa shi ne yanzu a gabanka ba. Ba za ka taɓa yadda shi ne mace ta juya ya yi laushi haka ba. Wani irin tausayinsa ya kama shi. Lallai tabbas yana buƙatar shawara, ga kuma dukkan alamu sun nuna abin da ke fitowa daga bakinsa haka yake a zuciyarsa.

"Shi kenan.. Ka dena saka damuwar nan a ranka, in Sha Allah komai ze yi daidai. Wannan damuwar sam ba ita ce mafita ba." Gwani ya faɗa a tausashe. Murmushin yaƙe ya yi wanda iyakarsa kan laɓɓansa bayan ya ɗago yana kallan Gwanin yace bayan ya girgiza kai.

"Ya zan yi?" Nan ya faɗa masa abin da ya faru ɗazun da zuwan Didi cikin ɗakin. Shiru kawai Gwani ya yi dan shi kansa ya ji abin sosai. Wato duk wannan abun ne ashe ya sanya shi cikin damuwa? Ya girgiza kai kafin ya sauke ajiyar zuciya yace

"Ka tabbatar ka dena abin da kake yi Areef?" Iska ya fesar daga bakinsa kafin yace

"Me ye ze sa na yi ƙarya Uhmm? Na dena wallahi In Sha Allah.. Ka taya ni da addu'a." Wani ƙawataccen murmushi ne ya wanzu a kan kyakkyawar fuskar Gwani. A kan laɓɓansa ya furta

"Alhamdulillah.." A fili kuma se yace

"In Sha Allah.. Allah Ubangiji Ya ƙara shiryaka.. Ya daidaita tsakaninka da Afrah. Afrah na da kyakkyawar zuciya, wato ka godewa Allah da ya baka mace irinta, macen da ke janyoka daga halaka, take nuna fushinta saboda ka dena saɓawa Ubangiji.." Daidai lokacin Mommah ta ƙarasa shigowa cikin ɗakin jikinta a matuƙar sanyaye. Duk suka kalleta kamar wasu marasa gaskiya. Se ta maida dubanta kan Bad Man da ta gan shi tamkar wani mara lafiya. Ta girgiza kai tana jin jikinta na ƙarasa mutuwa gaba ɗaya. Kamar ya san ta ji abubuwan da ya faɗa se ya maida dubansa kanta shi ma yace a hankali

"Mommah!" Se da ta sake kallansa cike da tausayawa sannan tace

"Na'am.."

"Mommah na yi nadama, Mommah na yi nadama wallahi.. Sam ban san dagewa da waccan matar ta yi na tafi ƙasar waje cutata ta yi ba. Se yanzu da na gaza samun abin da nake so saboda ɗabi'ar da na koyeta a U.S. Mommah har na bar ƙasar nan ban taɓa sha'awar ko da shan taba ba ne ballantana a kai ga giya. Se da na je U.S na haɗu da abokai kala kala, waɗanda shan giya da neman mata a wajensu ba komai ba ne, a lokacin ne ni ma na soma shan giya. Ashe ban san babbar illa na yi wa kaina ba. Ga shi kuma tuntuni na san abin da nake yi ba daidai ba ne, shi ya sa ba na taɓa barin wani ya sani. Se dai ga shi Mommah kin sani kuma ki na fushi da ni saboda haka, Afrah ta sani ita kuma ta guje ni saboda hakan. Toh ya haɗuwata da Allah kuma kenan? Mommah na yi nadamar zuwana U.S, wallahi na yi nadama. Don Allah Mommah ki yafe min." Ya ƙare muryarsa a raunane kai ba za ka taɓa cewa Bad Man ba ne. Shiru Mommah ta yi lokacin da idanunta suka ida cika taff da hawaye, wani irin tausayin ɗan nata ya cigaba da nuƙurƙusar zuciyarta. A hankali ta ɗora hannunta a goshinta ta dafe, wani irin ƙunci cikin zuciyarta take ji. Haƙiƙa Mom ta cuceta, ko mene ne ya faru silar Mom ɗin ne. Shi kansa Gwani ya ma rasa me ze ce saboda tausayin ɗan uwansa. Yau soyayya ta sa duk ya zubar da makaman yaƙinsa, soyayya ta chanja shi, ta sauya shi gaba ɗaya. Ita kam Mommah tunani take ma me za tace masa? Shin bayan duk waɗannan abubuwan da ya faɗa za ta buɗe baki ne tace ba ta yafe masa ba? Kuma ba ta goyon bayan komawar Didi wajensa??


✨MHIZ INNOCENT✨
*AJTICHAPTERTWO77*

___Shin ita kam da ta kasance wata irin uwa kenan? Uwa mara tausayin ɗanta? Ko kuwa muguwar uwa wadda ba ta amsa sunan uwa ba? A hankali ta kamo hannun Bad Man tace muryarta a sanyaye

"Na yafe maka Areef, na yafe maka. Allah Ya ƙara shirya min ku gaba ɗaya." Se ta dakata a nan

"Ameen." Gwani ya amsa da hakan. Se a lokacin wani guntun murmushi ya suɓucewa Bad Man. Ya runtse idanunsa yana saurarar bugun zuciyarsa, kafin a hankali ya buɗe idanun nasa yace

"Na gode Mommah.." Ita ma murmushin ta masa kafin ta ɗora da faɗin

"Afrah amana ce a wajenka Areef.. Yarinya ce nutsatstsiya, kuma me hankali. Tun farkon aurenku na so ka karɓeta hannu bibbiyu amma Allah be ƙaddara hakan ba."

"Mommah yanzu na karɓeta hannu uku uku ma.." Ya yi maganar da iya gaskiyarsa yana marairaice fuska. Dariya Mommah da Gwani suka yi jin abin da ya faɗa. Mommah tace

"Na ji, na kuma amince.. Se dai ka sani ba komai da kake so ne kake samu a lokacin da kake so ba. Ka na sonta, se dai ita kuma ta kafa maka hujjar za ta soka ne matuƙar ka watsar da wannan ɗabi'ar. Saboda haka abin da nake so da kai ka yi ƙoƙarin karɓo soyayyarka daga wajenta. Ni kuma zan tayaka wajen fahimtar da ita ka dena abin da ba ta so. Kar ka ba ni kunya don Allah.. Na kuma yi maka alƙawarin idan dai har ta amince ni ba ni da matsala ko a ranar zan iya baka matarka.." Wata ƙatuwar ajiyar zuciya ya sauke, yana jin wani ɓangare na damuwarsa na raguwa. Duk da ba ita da kanta Didin ce ta masa magana ba, amma maganar Mommahn ta mugun kwantar masa da hankali, ta kuma tafi da wani kason daga cikin damuwarsa.

"Ba zan ba ki kunya ba in Allah Ya yarda Mommah.. Wallahi ina sonta sosai." Ya ƙare maganar yana dafe saitin zuciyarsa. Sakin hannunsa Mommah ta yi tana kai masa duka lokaci ɗaya tana murmushi. Kaucewa ya yi yana faɗin

"Oouhhh Mommah.." Ya yi maganar yana yana ɗora hannunsa a kan fuskarsa. Dariya dukkansu suka yi har da Gwani dake mamakin Bad Man da ba ya iya ɓoye ƙaunar da yakewa Didin har yake iya bayyanata gaban Mommah.


... A ɓangaren Didi kuwa tana shiga ɗaki se ta kasa riƙe kukan da ya taho mata. Kawai se ta fashe da kuka tana faɗawa kan gado. Haka nan kawai ƙirjin Lulu ya buga da ƙarfi. Ta miƙe ta ƙarasa inda Didin take da sauri. Hannu ta saka ta ɗago kanta tana faɗin

"Didi me ya faru?" Ta faɗa muryarta a raunane kamar me shirin fashewa da kuka. Se a lokacin ma ta ida sakin kukan gaba ɗaya. Ta shiga raira shi zuciyarta na mata zafi. Ruɗewa Lulu ta yi dan ba kasafai ta saba ganin irin haka ba. A karo na biyu ta sake yin ƙarfin halin faɗin

"Don Allah me ya dame ki Didi? Ki dena kukan nan kin ji?" Ta ƙare tana kallan fuskarta. Jin yanda Lulun ta yi magana ne ya sanyata soma rage kukan nata. Dan ta san halin Lulun yanzu za ta fita shiga damuwa. A hankali ta koma sauke ajiyar zuciya duk da hawayen ba su dena zuba ba. Hannu Lulu ta saka tana goge mata hawayen, daga zarar sun sakko se ta ɗauke su da hannayenta.

"Didi ki faɗa min me ya faru?" Ajiyar zuciya Didi ta sauke bayan ta ƙarasa zama sosai. Ta lumshe idanunta kafin ta buɗe a hankali tace

"Lulu har yanzu be dena ba.. be dena ba ashe.." Ta ƙare wasu zafafan hawaye na sake sakkowa daga cikin idanunta. Rashin fahimtar zancen Didin ne ya sanya Lulu ƙura mata idanu tana nazarinta, gefe guda kuma tana nazarin abin da ta faɗa ɗin ko za ta fahimta ko da ba ta ƙara mata wani bayani ba.

"Lulu Areef fa.. Yace ya dena shan komai ashe be dena ba." Ta faɗa tana jin zafin abin da take faɗa ɗin.

"Inna lillahi..." Lulu ta faɗa. Hannun Didi ta kamo ta soma faɗin

"Don Allah ki kwantar da hankalinki komai me wucewa ne.. Ki dena saka damuwa a ranki. Allah ze shirye shi kamar yanda kike fata. Ze kuma zama kamar yanda kike so In Sha Allah." Murmushin yaƙe Didi ta yi kawai tana kallan Lulu. Se dai ta ɓangare guda kuma addu'ar ta burgeta, se take ganin kamar ba Lulunta ba. Cigaba suka yi da zama cikin ɗakin suna cigaba da tattaunawa. Har zuwa lokacin da dukkansu suka yi shiru. Shiru Lulu ta yi na tsawon lokaci kamar me tunani. Wai an ya idan ta cigaba da abin da take yi ba ta butulcewa Allah ba kuwa? Duk kirki da kyawawan hali irin na Didi se Allah Ya bata miji mashayi. Ita kuma da Didin ta fita a waɗannan wajajen se ga shi Allah Ya bata miji kintsatstse kuma shiryayye. Me ya kamata ta yi ita kam a yanzu? Yanzun da ta gano hakan. Shin ta cigaba da jan baya da shi, ko kuwa ta karɓe shi hannu biyu a matsayin mijinta? A haka Mommah ta zo ta same su. Ta ƙaraso ta nemi waje ta zauna. Se da ta kalli Lulu tace

"Daughter ya kike? Ya jikin naki?" Hannunta ta kama ta ɗan murza bayan ta yi ƙasa da kanta tace

"Alhamdulillah.."

"Toh madallah.." Mommah ta faɗa. Se ta maida dubanta kan Didi tace

"Daughter kuka kika yi?" Ta tambaya a hankali tana kallanta. Da sauri Didi ta girgiza kai tana ƙaƙalo murmushi tace

"A'ah Mommah." Murmushi Mommah ta yi, murmushin nata da shi ma za a iya kiransa da na yaƙe kafin tace

"Ki dena ɓoyewa, idanunki, da duk wani yanayinki ya nuna kuka kika yi. Kuma na san Areef ne sila." Da sauri Didi ta ɗaga kai ta kalli Mommah, se dai ba tace komai ba. Dan ba ta san me za ta ce ba. Dan haka kawai se ta maida kanta ƙasa. Tashi Mommah ta yi ta matsa sosai kusa da Didin. A hankali ta soma faɗin

"Afrah. Kamar ko da yaushe ina miki magana ne a matsayina na mahaifiyar Areef kuma wadda take ɗaukarki a matsayin 'ya. Ina so ki sani kamar yanda wancan karon na zo na miki magana a kansa.. yau ma na dawo na miki magana a kansa. Ba wai dan kasancewarsa ɗana ba a'ah.. se dan sasanta rikici ko kuma nace rashin fahimtar da ya shiga tsakaninku.." Daga nan Mommah ta zayyane mata yanda suka yi da Bad Man. Daga nan kuma ta ɗora da faɗin

"Ina fata ina me kuma roƙon za ki amshi tubansa, ki yafe masa ko da ba duka ba ne.. Sannan duk kuma lokacin da na roƙi ki koma ɗakin ki za ki koma." Shiru Didi ta yi. I zuwa lokacin da Mommah ta kai ƙarshen zancenta na farko se ta lumshe idanunta tana jin wani irin sanyi na ratsata. Ta san Mommah ba za ta mata ƙarya ba ko da kuwa a kan waye. Ballantana ma a kan wannan abun da tafi kowa son ta ga ya dena. Idan dai kuwa har da gasken ya dena tana ɗaya daga cikin waɗanda za su fi kowa jin daɗin hakan. Dan ba ta san dalilin da ya sa al'amarin ya tsaya mata a rai ba. Har wataran ya kan hanata bacci.

"Mommah ni da ma ba abin da ya min.. Kawai ina so ne ya dena abin da yake yi."

"In Sha Allah ya dena Afrah." Mommah ta ƙare tana murmushi.


.. Gaba ɗaya ta rasa dalilin da ya sa tun da ta tashi take jinta kamar ba ita ba. Haka nan kawai take jin wani irin ɓacin rai kamar wadda akawa laifi. Didi na zaune a kan gado hannunta ɗauke da wani littafi tana karantawa. Tun ɗazu take tambayar Lulun dalilin fushinta amma tace mata babu komai. Tun tana rarrashinta har ta fusatata ta ƙyaleta ta mata banza. Ita kuma da gasken take ta rasa me ke damunta, kawai haka nan take jin haushi kowa.

"Didi.." ta faɗa tana kallan Didin. Juyar da kai Didi ta yi tana cigaba da karatunta. Kawai se ta juya ta fice daga ɗakin. Gaba ɗaya ma sashen take ƙoƙarin bari ta je waje ko sa ta ji ɗan dama dama. Daidai tana ƙoƙarin ficewa daga sashen gaba ɗaya ya shigo ciki. Yanda suka kusa karo ne ya sanyata komawa da baya tana dakatawa. Shi ma dakatawar ya yi yana aza idanunsa a kanta dan be yi tsammanin ganinta ba. Kamar ta wuce haka ta ji, se dai ta kasa kawai ta cigaba da tsayuwa. Kallo ɗaya ya mata ya fahimci ba lafiya ba. Dan yadda kafatanin fuskarta ke a haɗe kamar wadda ke shirin yi wa kowa duka.

"Lafiya..? Me ya faru?" Ya tambaya yana jin ɗan tsoro tsoro na kama shi. Kawai se ta ji kuka na son ƙwace mata ba tare da sanin takamaiman dalilin hakan ba. Hannu ya saka ya kamo hannunta idanunsa a kan fuskarta kafin ya ɗan matsa yanda ze iya jinta sosai. A hankali kuma cikin nutsuwa yace

"Me ya faru Uhmm? Wani abun na damunki ne?" Ita kam ta rasa yanda za ta yi, duk yanda take babbasarwa take ƙoƙarin ƙin bin abin da zuciyarta ke raya mata ta yi a kan Gwani ta kaasa. So take ta cigaba da tafiya a yanda suke da, ko ba dan komai ba se dan abin da ta yi tunani tun ranar farko, wato ranar da ta gane shi ɗin jika ne ga sarki, kuma da ma ga shi ɗan gidan Alhaji Matawalle. Ba ta so ya yi mata wata fassarar, ba ta so ya yi tunanin wani abun. Duk da babu ko da makamancin haka ne cikin ranta. Se dai tana tsoro. Amma duk da haka yau ta kasa cigaba da halin da take yi. Girgiza kai ta yi kafin a hankali tace

"Ba komai." Ta faɗi hakan dan ita dai ba za tace ga takamaiman abin da ke damunta ba, kawai dai ta tashi ne da ɓacin rai. Girgiza kai Gwani ya yi damuwa na bayyana saman kyakkyawar fuskarsa yace

"A'ah kar ki ce haka.. Ki faɗa min don Allah.." Ɗaga narkakkun idanunta ta yi da ke cike da ƙwalla ta zuba masa idanunta. Shi ma kallan nata yake yi. Se kuma ta lumshe idanunta kafin ta buɗe tace

"Ni ma ban sani ba." Ta ƙare tana goge ƙwallar da ta soma sauka a kan fuskarta. Runtse idanunsa ya yi, har ga Allah ba ya son kukan nan ko kaɗan. Duk se yanzu ze rasa nutsuwarsa. Ba ya son ya ganta cikin damuwa, musamman ma kuma a irin yanayin nan da ya kasance ba ita ɗaya ba ce. Gaba ɗaya manta a inda suke ya yi dan kukan nata duk ya ruɗa shi. Ya saka hannunsa da sauri ya riƙota, janta ya yi cikin jikinsa ya rungume cikin rarrashi yace

"Kar ki yi kukan nan please.." Ya faɗa kamar me raɗa. Sauke ajiyar zuciya ta yi tana ƙoƙarin hana mara dalilin ƙwallar cigaba da zubowa. Daidai lokacin da Iftihal ta shigo. Wani irin turus ta yi ta ja ta tsaya ƙirjinta na bugawa. Ta kasa ko da ƙwaƙwaƙwƙwaran motsi ne. A daidai lokacin Lulu ta lura da tsayuwarta a wajen. Cikin lokaci ƙanƙani fushin da Gwani ya soma samun nasarar sauke shi, Iftihal ta taso da shi. Cikin ƙanƙanin lokaci fuskarta ta sake haɗewa kamar hadarin da ya kusa bada ruwa. Wani killer smile Lulu ta saki kafin a hankali ta ɗaga hannayenta ta zagaya da su jikin Gwani ta rungume shi. Buɗe idanunsa ya yi cike da mamakin abin da ya ji Lulun ta yi. Da gaske ita ɗin ce? Da gaske hakan ne ke faruwa? Be ida tunanin ba se ji ya yi ta sake rungume shi sosai kamar wadda za a ƙwacewa shi hadda wani komawa ta lafe a jikinsa tana lumshe idanunta. Duk da yanda kalmar da take haɗawa cikin ƙwaƙwalwarta zuciyarta na hanata. Tana kuma daƙirewa tana ji kamar ba za ta iya fitowa daga bakinta ba. Hakan be hanata yin watsi da komai ba, ta aro wata irin jarumta a hankali ta furta

"Ina..son..ka." Ta yi maganar a rarrabe, yanda ta san dole ko da bakinta kake kalla ka san abin da ta faɗa. Kafin ya gama dawowa daga wancan shock ɗin se ga wanda ya fi kowanne. Wanda ya sanya ya soma ƙaryata duk abin da ya faru ɗazu. Ya soma tunanin lallai ire-iren mafarkan da yake yi ne yau ma yake sake yin kalarsu. Se dai ya rasa dalilin da ya sanya wannan ɗin ya fita daban. Yake ji kamar gasken ne. Wata irin