You Cannot Download this book untill you login but you can read it .

---

Login Register

ba, yake kuma yi wa magana ba. A mamakance Bad Man ke kallan Gwani, se ya sake maida dubansa kan wayar kamin ya girgiza kai, se ya koma jikin motar ya jingina yana tuna wannan ranar. Idan dai har be manta ba wannan ɗin Hero ne, ita kuma wadda ke jikin hoton ita ce wadda ke zaune cikin gidansu yanzu haka da suke kiranta da matarsa. Toh shi kuma wannan ɗin me ye haɗinsa da hoton kenan?

"Matata ce.." Gwani ya ba shi amsar tambayar da ya masa ransa a ɗan ɓace.

"Matarka..? How..? Oh dama matar aure ce? Waccan ɗin?" Ya yi maganar dukka lokaci ɗaya yana nuna Didi dake tsaye ɗan nesa kaɗan da su tana jira su gama maganar da za su yi. Kallan inda ya nuna Gwani ya yi se ya girgiza kai sannan yace

"A'ah.. er uwatta.." A'ah yanzu kam fa Bad Man kansa ya gama ɗaurewa. Me wannan mutumin ke nufi? Ita wannan ɗin ba ita ce wadda ta mare shi ba? Har ya je ramawa garin haka aka ƙaƙaba masa aurenta? Me kenan?

"Ba ka da abun faɗa kenan?" Gwani ya faɗa yana kallan Bad Man. Se a lokacin Bad Man ya buɗe murfin motarsa, ya shiga driver seat ya zauna gaba ɗaya ƙafafunsa a waje. Ya ɗan taɓe baki sannan yace

"Ba son maganar nake ba.. se dan son sanin gaskiya kawai.. En biyu ne?" Bad ya faɗa cike da mamakin dai. Waɗannan tambayoyin sun fara fusata Gwani, dan haka kamar ba ze amsa ba dan yana ganin ba su da amfani, se kuma yace

"Ehh.. se kuma me ye?" Iska ya fesar daga bakinsa kafin ya saki tsaki cike da takaici. Ashe ma wadda ta masa abu daban wadda ya je ɗaukar fansa kanta daban. Ya sake jan tsaki a karo na barkatai kafin ya buɗe baki kamar ba Bad Man ba ya soma faɗin

"Abokina ne wannan ɗin.. an samu misunderstanding ne.." Daga nan se ya faɗa masa abin da ya faru a taƙaice har lokacin fuskarsa babu yabo babu fallasa. Shiru Gwani ya yi na en wasu sakanni yana nazarin maganganun Bad Man ɗin. A zubin halitta be yi kama da wanda ze zauna ya tsaro shiryayyiyar ƙarya kamar haka ba. Be kuma yi kama da wanda ze yi ƙarya dan kare kansa ba.

"Ya za a yi na same shi..?" Gwani ya faɗa.

"Akwai abin da zan yi yanzun.. but ka bar ni da shi zan saka a kama shi.." Girgiza kai Gwani yace

"Na gode da hakan.. Amma ina son ganinsa ne da idanuna.. ina son jin dalilinsa na yin hoton, dan ba ze taɓa zama babu dalilin ɗaukar hoton ba.." Shi kansa Bad Man ya yadda da abin da Gwanin ya faɗa, musamman shi da ya san wane ne Hero. Ze yi wuya a ce babu wani dalili da ya sa aka yi hoton. Ɗan taɓe baki ya yi tunawa da ya yi dalilin hakan ne ya sanya shi cikin ruwa tsamo tsamo kamar ma shi ya aikata abin da Hero ɗin ya yi. Gwani dai ba su rabu da Bad Man ba se da suka yi exchanging contact, kafin Gwani ya masa sallama yana jin wannan nauyin da ya tokare ƙirjinsa na raguwa yana yin nasa wajen. Se da suka sake yin sallama da Didi sannan ta ƙarasa inda motar take tana mamakin abin da ya haɗa Gwani da kuma Bad Man ɗin har suka yi magana me tsawo irin wannan. Ni kaina yau har mamakin Bad Man ɗin nake yanda yake magana kamar ba shi ba, yanda ya saki jiki suka yi magana ta tsawon mintuna da mutumin da be sani ba, be ma taɓa gani ba.

Be jira ƙarasowarta ba se tayar da motar da ya yi, ganin hakan ne ya sanyata dakatawa dan be nuna mata inda za ta shiga ba, kar ta je ta yi shishshigi. Shi kansa ta ɓangarensa gani yake kamar yace mata ta shiga baya, saboda kar a yi tunanin ko ita ɗin wata tasa ce. Se dai kuma ya zama Drivernta kenan? Mafitar dai ɗaya ta shiga gaban, dan haka ya saka hannunsa ya tura ƙofar dake gefensa. Hakan ne ya sanya ta riƙowa ta shiga duk da a ɗarare take. Ta kame jikinta a nutse ta shiga ta zauna. Babu ɓata lokaci ya tashi motar suka fice daga cikin asibitin. Cikin lokaci ƙanƙani ƙamshin turarensa da sassanyan dake tashi cikin motar, da kuma nata me sanyi mara hawa kai suka shiga gogayya da juna. Se dai saboda daɗin ƙamshin turarensa mara hawa kai ya sanya ya danne kowanne, se ya kasance duk wata shaƙa da fitarwa da za ta yi se ta shaƙi ƙamshin me sanyi. Haka kuma idan ta tashi fidda numfashi se ta fesar da ƙamshin nasa. Tilas ta lumshe idanunta tana sake kama jikinta waje ɗaya.



... Daidai lokacin da yake shirin shiga ɗakin Ummeey ma ta shiga. Se ya yi murmushi yana faɗin

"Ummeey.."

"Ka shigo kenan? Sannu da zuwa" Ta tambaya bayan ta maida masa da martanin murmushin.

"Yawwah Ummeeyna.." ya amsa da hakan yana murmushi. Tare suka ƙarasa cikin ɗakin Ummeey ta nemi waje ta zauna tana kallan Lulu dake kwance tana bacci.

"Ina fatan su sallame mu saboda jikin nata ya yi sauƙi sosai.."

"In Sha Allah.." Gwani ya faɗa yana jinjina kai.

"So nake na je gida wajen abeeynka jikin ba daɗi ya masa ba.. se dai kuma ina so na ga farkawar ɗiyata.."

"Za ki mata wani abun ne?" Gwani ya tambaya. Girgiza kai Ummeey ta yi tace

"A'ah.. ka san dai har yanzu jikin nata be koma daidai ba, babu ƙwari sosai.." Cikin fahimtar zancen Ummeeyn ya jinjina kai kafin yace

"Haka ne.. Amma idan babu damuwa Ummeey ki je kawai.. zan kula da ita In Sha Allah.."

"A'ah Affan.." ta yi maganar tana kallansa. Se ya yi murmushi sannan yace

"Babu komai Ummeey.." Ajiyar zuciya Ummeey ta sauke kamin tace

"Toh shi kenan.. Allah ya ƙara mata lafiya, ya sa su sallame mu.."

"Ameen" ya amsa mata da hakan. Kafin ya shiga taimakawa Ummeeyn dan haɗa wasu kayayyakin da za ta tafi da su gida dan rage shirgi.

Neman waje ya yi ya zauna tun bayan fitar Ummeey daga ɗakin. Har bayan wajen awa ɗaya tana cigaba da baccinta. Se zuwa can sannan ta soma ƙoƙarin buɗe ido. Da sauri ya miƙe ya ƙarasa zuwa bakin gadon yana kallan fuskarta da ta yi fayau ta ƙara haske. Ganin tana ƙoƙarin tashi zaune tun kafin ta ida buɗe idanunta ya sanya shi miƙa hannu a nutse ya taimaka mata dan miƙewar. Ba ta jin komai a jikinta yanzu haka se abin da ba a rasa ba. Tana kuma da ƙarfin da za ta iya yin komai. Se dai har ranta ba ta kawo shi ba ne, ta ɗauka Ummeey ce kamar yanda ta saba taimaka mata ko da ta nuna ba ta so. Shi kam be ce mata komai ba lokacin da ta buɗe baki cikin magagin baccin da ya mata daɗi, wanda ta daɗe ba ta yi irinsa ba tace

"Banɗaki zan je.." Babu musu ya ƙarasar da ita zuwa banɗakin. Se da ya kaita sannan ya saketa yana shirin fitowa daga ciki ita kuma ta ida buɗe idanunta da niyyar ganin Ummeey. Se dai me? Se ganin mutum ta yi wanda ke shirin juyawa dan ficewa daga cikin toilet ɗin. A tsorace ba ta san lokacin da ta ƙwalla ƙara da iya ƙarfinta ba. Ganin mutum da ta yi a tsakiyar banɗakin dumu_dumu ba tare da ta ga fuskarsa ba. Cikin sauri ya sanya hannunsa ɗaya ya janyota, yayin da ya yi amfani da ɗayan wajen toshe bakin nata kafin ta ida kai ƙarshen ƙarar da ta soma. Ya ɗan matsar da ita cikin jikinsa lokacin da yake kai bakinsa saitin kunnenta yace a nutse

"Ki samu nutsuwa.. Ni ne.." ya yi maganar kamar me raɗa dai dai lokacin da ya runtse idanunsa saboda yanda ƙarar da ta saki ɗin ta ratsa cikin dodon kunnensa. Shi kam ya rasa se yaushe ne Lulun za ta girma...





Alhamdulillah! Mun gama azumi lafiya, Allah Ya sa mun yi ibada karɓaɓɓiya. Fatan kuma an yi sallah lafiya, Allah Ya maimaita mana, Ya sa muna da rabon ganin ta baɗi da rai da lafiya, Ameen. 🤗😍


MHIZ INNOCENT✨
*AJTICHAPTERTWO44*

___ Wata ƙatuwar ajiyar zuciya ta sauke wadda har se da ta fito fili lokacin da ta ji muryarsa cikin kunnenta. Se dai ta yi maza ta janye jikinta tana jin yanda bugun zuciyarta ke ƙaruwa, a lokaci guda kuma tana ƙoƙarin saita shi ya koma daidai. Be sake cewa komai ba se ficewa daga toilet ɗin da ya yi. Binsa ta yi da kallo lokacin da yake ficewa daga banɗakin. Tun jiya take jira ta ji ya yi mata magana a kan hoton nan amma shiru har yanzu. Dan tun jiya ma da ya fita ba ta sake ganinsa ba se yanzu. Cikin lokaci ƙanƙani ta ji ƙwalla ta tarar mata cikin idanu, se ta lumshe idanun tana jin wani rauni na zuwar mata.


... "Ko dai asibitin za mu je?" Ummeey ta yi maganar tana kallan Abeey. Murmushi Abeey ya yi kafin yace

"Zuwa asibitin nan ya isa haka.. ko zuwa wankin ƙodar nan ai ya ishe ni. Shi ma ɗin da da dama cewa zan yi a bar shi haka nan ai mun sha jar miya.." ya ƙare yana murmushi cikin kallan Ummeeyn. Ɓata rai Ummeey ta yi tace

"Kai dai ka na son maganar nan Malam.. don Allah ka dena.." Sake wani murmushin Abeey ya yi kana yace

"Toh shi kenan.." Daga haka ya sauke numfashi daga kishingiɗen da yake. Sallamar da aka yi cikin gidan ne ya katse Ummeey daga faɗin abin da ta yi niyyar faɗa. Se ta miƙe lokaci ɗaya tana faɗin

"Bari na leƙa na gani.." ta faɗa ba don tana buƙatar amsa daga wajen Abeeyn ba.

Sanye cikin atamfa da mayafi madaidaici wanda ta saka shi a wuya, ta riƙo jaka a hannunta. Jadwa ke gefenta ita ma sanye cikin atamfar se dai ita ɗinkin straight gown ne wanda ya bi lafiyar jikinta ya lafe.

"Gafaran ku dai.." Mami ta faɗa tana kallan cikin gidan a wulaƙance kamar ko da yaushe.

"Yawwah.." Ummeey ta faɗa lokacin da ta ƙaraso inda suke.

"Kuna ciki kenan? Ina Afaaf ɗin?" Mami ta yi maganar lokaci ɗaya.

"Ku shigo mana.." Ummeey ta faɗa fuskarta babu yabo babu fallasa.

"A'ah a'ah babu buƙata.. toh fa!!.." Mami ta ƙare maganar tana kallan Jadwa irin "Kin ji mun iyayi.." Jadwa ta taɓe baki ba tare da tace komai ba.

"Afaaf ɗin na asib.."

"Ko da yake ma dai na zo sake ganin ɗaki ne kawai saboda gobe da za a kawo kayan Afaaf cikin gidan nan.." Mami ta katse Ummeey da faɗin haka a yatsine.

"Ai shi ne nake faɗa miki Afaaf ɗin babu lafiya tana asibiti.. Idan kuma ɗakin kawai kika zo gani ga shi can.." Ummeey ta faɗa fuskarta babu yabo babu fallasa tana me nuni da ɗakin Gwani. Don sarai ta gane fuskar Mamin, ta kuma fahimci take_takenta na rashin daraja tun zuwanta na farko cikin gidan.

"Mami ki zo mu tafi don Allah.." Jadwa ta faɗa tana riƙo hannun Mamin.

"Kya bari dai in ji inda aka kwantar min da ɗiya koh?" Ta faɗa tana watsawa Jadwan harara, duk da gefe guda kuma ta tafi tunanin dalilin da ya sa Lulun ke asibiti. Kar dai daga kawo masa yarinya har ya ɗirka mata ciki? Idan kuwa haka ne lallai abubuwa sun kwaɓe musu. Kuma mamakinta ɗaya idan hakan ya kasance gaske da Lulun ta yi shiru ta ƙi faɗa mata kasancewar wani abu a tsakaninsu. Ko dai yaron nan ya juyawa Lulu ƙwaƙwalwa ne? Wata gauruwar ajiyar zuciya ta sauke tana jijjiga kai, a ranta tana sake ƙaryata hakan da zuciyarta ta ayyana mata.

"Allah ya sa dai wannan jinin talakawan be haɗa jiki da 'yata ba." Ta yi maganar a kan laɓɓanta.

"Let's go pls Mami." Jadwa ta faɗa a ƙage. Se a lokacin sannan Mami tace

"Ba ki ji me na ce miki ba ne?"

"Bayan wanda ta ba mu?" Jadwa ta faɗa tana kallanta. Taɓe baki Mami ta yi dan har ga Allah ba ta san lokacin da Ummeeyn ta yi magana ba saboda tunanin da ta faɗa. Saboda takaici ba ta san lokacin da ta ja tsaki ba tana jan hannun Jadwa suka fice daga gidan.

"Allah ya kyauta.." Ummeey ta faɗa tana komawa ɗakin Abeey.




... "Na shiga 3!! Daughter da gaske ba ki da lafiya? Me ke damun ki?" Mami ta faɗa da sauri tana ƙarasawa cikin ɗakin. Da sauri Lulu ta ɗaga kai ta kalli Mamin da tun kafin ta ƙaraso ta shaida muryar. Hannu Mami ta kai da niyyar taɓa Lulun, cikin sauri ta janye jikinta tana faɗin

"Kar ki taɓa ni.." ta faɗa tana matsawa sosai daga inda Mamin take. Da mamaki Mami ta kalli Lulun, wai an ya kan yarinyar nan ɗaya kuwa? Me ke damunta haka? An ya zuwanta gidan nan ba ta samu taɓin hankali ba?.

"Lulu.."

"Kar ki kuma kiran sunana.. ki fita a ɗakin nan ba na son ganin ki, ba na son ganin ki.." ta faɗa tana girgiza kai idanunta a kulle. Kallan Mami Jadwa ta yi cikin mamakin abin da take gani se dai ba tace komai ba.

"Lulu me na miki? Wa ye ya shiga tsakaninmu? Ko dai wannan tsinannen da aka aura miki ne?" Mami ta faɗa cike da fargaba. Da ƙyar idan ba abin da take tunani ba ne ya faru. Buɗe idanunta Lulu ta yi a kan Mami daidai lokacin da Gwani ya shigo cikin ɗakin. Se ta yi maza ta kalle shi lokacin da idanunta suka cika taff da ƙwalla tace

"Ka ce mata ta fita ba na son ganinta, ba na so.." ta faɗa tana nuna Mamin. Kallan Mamin ya yi a fuzge dan fahimtar wace ce ita. Idan dai har be yi kuskure ba wannan ɗin er uwarsu Lulun ce. Amma me ye dalilinta na cewa ta fita ba ta son ganinta? Se ya shiga takawa zuwa inda take a nutse, ya ƙarasa ya ɗan ranƙwafa a nutse kamar me raɗa yace

"Me ya faru?" Ya faɗa yana kafeta da idanunsa. Girgiza kai Lulu ta yi cikin takaici dan a yanzu ba ta buƙatar komai se ta buɗe ido ta dena ganin Mamin a gabanta.

"Ka ce mata ta tafi don Allah.. kar ta sake zuwa inda nake." Shi ne abin da Lulu ta sake faɗa wanda jin hakan da Mami suka yi ita da Jadwa ya saka su kasa furta komai saboda tsananin mamaki. Lumshe idanunsa ya yi a nutse yana buɗe su lokaci ɗaya ya buɗe baki ze yi magana se jin hannunsa ya yi cikin lallausan hannun Lulu daidai lokacin da ta sanya ƙwayar idanunta cikin nasa tace

"Don Allah.." ta faɗa wasu hawaye masu ɗumi na kwarayowa daga cikin idanunta. Bin hannun ya yi da kallo cikin matuƙar mamaki. Ya ɗan sake lumshe idanunsa saboda yanda ya ji wani abu ya tsirga masa musamman da be tsammaci hakan ba, kafin ya miƙe tsaye. Se a lokacin sannan ta saki hannun nasa. A nutse shi kuma ya juya inda su Mamin suke waɗanda zuwa lokacin sun yi mutuwar tsaye daga ita har Jadwan.

"Idan babu damuwa ki ɗan je pls, tace ba ta san ganin ki.." Wani ashar ne ya zo wa Mami cikin ranta wanda take ƙoƙarin fiddo shi zuwa kan bakinta dan ta nanawa Gwani shi, se dai ta gaza aikata hakan saboda tsananin mamakin da ya kusa kasheta a wajen. Riƙe hannunsa da Lulu ta yi, wani kallo da ta ga sun yi wa junansu ba ƙaramin tsorata ta yi ba.

"Mu je koh?" Gwani ya faɗa yana soma takawa. Kamar wata doluwa se kuwa Jadwa ta soma takawa dan ficewa daga ɗakin. Lura da ta yi Mami ba ta taho ba ne ya sanya ta saka hannu ta riƙo ta.

"Sake ni don uban ki.." Mami ta faɗa a fusace. Ko bi ta kanta Jadwa ba ta yi ba, kamar za ta fice daga ɗakin se kuma ta saka hannu ta sake riƙo hannun Mamin tana faɗin

"Wai Mami me ye haka ne? Ki mu tafi mana se korar mu ake yi.." Shiru kawai Mami ta yi dan a lokacin mamakin Lulu ya kusa kasheta. Wato ita tana nan tana yaƙi a kan nemo mata 'yanci ashe ita tana nan tana zaman lafiya. Har da wulaƙantata gaban wannan wulaƙantaccen talakan. Ga shi nan shi ma har ya samu dama wajen faɗa mata magana. Lallai da sake a lamarin nan. Se ta ja ƙwafa tana sake hura hanci kamar wata saniya. Ita dai Jadwa ta janye ta suka fice daga cikin ɗakin.






... Sun kwashe awanni fiye da 3 cikin kitchen ɗin suna girki wanda Baba Atine ta saki jiki ta ci ƙarfin aikin kamar yanda Mommah ta umarceta. Se dai da yake Didin gwana ce kuma ba ta da wasa se ya kasance kusan komai tare suka yi shi. Sosai aikin ya yi mata daɗi se dai wanda ake yi wa girkin ne idan ta tuna waye shi duk se ta ji jikinta ya yi sanyi. Haka dai suka ida aikin jefi jefi suna hira, da yake Baba Atinen gwana ce wajen son hira. Se da suka gama komai suka kwashe suka zuba inda ya dace kafin Baba Atine ta bar sashen, ya yin da Didi ta wuce kai tsaye ta faɗa toilet dan yin wanka. Ta kwashi mintuna masu ɗan dama tana wankan kafin ta fito. Ta nemi waje ta zauna dan gyara jikinta. Ko minti 2 ba ta yi da zama ba Baba Atine ta yi sallama cikin ɗakin. Amsawa Didi ta yi sannan Baba Atinen ta shigo. Murmushi suka yi wa junansu kafin Didi tace

"Baba.."

"Na'am 'yata.. kin fito kenan? Allah ya sa dai ba ki gama shiryawa ba." Ta yi maganar tana kallanta. Girgiza kai Didi ta yi tace

"A'ah fitowata kenan.. Wani abun za a miki?"

"Wane ni? Matar uban masu gida..?" Ta faɗa cikin wasa saboda ta san Didin ba ta so ta dinga faɗa mata hakan.

"Kai Baba.." Didi ta faɗa.

"Toh shi kenan.. Yanzu dai Hajiya ce ta aiko ni.." ta yi maganar tana neman waje ta zauna. Kafin Didin tace komai se ta soma buɗe ledar dake hannunta sannan ta ɗora da faɗin

"Tace in kawo miki waɗannan kayan ki saka.." Da mamaki Didi ta bi kayan da kallo, kayan da kallo ɗaya za ka musu ka san an kashe kuɗi wajen siyar su da kuma ɗinka su. Ba ta san dalilin da ya sa Mommahn tace ta saka ba, se dai kuma ba ta so ta zama me ƙalubalantar umarnin Mommahn. Hakan ne ya sanyata karɓar kayan tace

"Toh bari na saka.."

"Yawwah 'yata.. Idan kin gama shiryawar se ki fito ki ɗauki abincin ki kai masa zan ƙarasa shirya komai." Lumshe idanunta Didi ta yi, gane dalilin da ya sa Mommahn tace ta saka kayan. Ta sauke ajiyar zuciya tana sake jin raunin dake tare da ita na ƙaruwa.

"Toh." Shi ne kaɗai abin da ta iya amsawa Baba Atinen da shi. Daga haka ta fice. A hankali ta saukar da kanta kan kayan tana kalla kamar me son gano wani abu daga jikinsu. Ta kai wajen minti 2 a haka ba tare da ta yi yunƙurin yin komai ba, se kuma ta sake sauke ajiyar zuciya a karo na barkatai sannan ta shiga saka kayan jikinta a matuƙar sanyaye.

Tsayawa ta yi tana kallan kanta lokacin da ta ida saka kayan, wani irin kyau ta yi kamar wadda ta saka wasu kayan na daban da ba ta taɓa saka irinsu ba. Murmushi ta saki tana tuna er uwatta, a irin wannan lokacin ita kaɗai ke kallanta tace mata ta yi kyau ta yadda. Idan kuwa har Lulun tace mata ba ta yi kyau ba toh ta yadda da hakan ko da kuwa kowa ze ce mata ta yi kyau. Se dai yanzu kam ko da Lulun ba ta kusa ita da kanta ta san ta yi kyau. Hijab ɗinta ta ɗauka madaidaici ta saka, wanda shi ma ya yi matuƙar karɓarta.

Kamar ko da yaushe a hankali ta isa ƙofar ɗakin ta shiga knocking. Se dai ta ji shiru babu alamar za a zo a buɗe. Abun hannunta ta ajje a ƙasa ta saka hannu ta taɓa ƙofar ɗakin. Ga mamakinta se ta ji ta a buɗe se dai ƙofar a jaye take. Kamar ta bar abincin a wajen, se kuma ta tuna wani abu dan haka kawai se ta saka hannunta a kan ƙofar ta tura cikin kula. Idanunta ta fara kaiwa cikin ɗakin dan ganin ko yana ciki? Cikin sa'a kuwa ba ta hangi kowa ba. Don haka se ta dawo ta ɗauki abinciccikan da suka dafa ta shigar da su cikin ɗakin inda ya kamata. Se ta shiga wuwwurga idanunta ko za ta gano wani abun da be dace ba ta yi maganinsu. Cikin sa'a kuwa se ga wasu kwalaben guda biyu a kan mirror se sheƙi suke alamar a sanyaye suke.

"Ya ilahy.." ta faɗa a sanyaye cikin ranta tana mamakin shi kam wane irin musulmi ne shi? Wane irin mutum ne shi? Wace irin halayya ce da shi haka? Shin ba ya tunanin ze mutu ne? A nutse ta ɗan lumshe manyan idanunta sannan ta buɗe su still a kan mudubin.

"Allah ka taimake ni.." ta faɗa bayan ta runtse idanunta. Se da ta buɗe idanun sannan ta shiga ƙarasawa a hankali zuwa wajen ta saka hannunta ta kwashi guda biyun, ta juya da niyyar ficewa daga cikin ɗakin, daidai lokacin shi kuma ya buɗe ƙofar toilet ɗin ya fito daga ciki. Jin motsin buɗe ƙofa da ta yi ne ya sanya ta dakatawa daidai lokacin da ƙirjinta ya buga da ƙarfin gaske. Ba ta san lokacin da ta saki kwalaben a ƙasa ba saboda tsananin firgicewa, cikin ƙarfin hali kuma ta ɗaga kai dan ganin motsin abin da ta ji. Ƙarar fashewar kwalaben da ya ji shi ne ya ankarar da shi wanzuwar wata halitta cikin ɗakin. Ya zame towel ɗin da yake tsane jiƙaƙƙiyar sumar kansa da ta kwanto har kan fuskarsa yana ɗaga fararan idanunsa zuwa inda Didi take. Daidai lokacin da ita ma ta kalli inda yake. Cikin lokaci ƙanƙani fuskarsa ta haɗe tsaff, se ya ida sauke towel ɗin yana sake kallanta cikin matuƙar mamaki. Ɗaure yake da towel daga kan ƙugunsa, ya yin da fafffaɗan ƙirjinsa ke a buɗe. Wanda kasancewar babu wani abu da ya saka dan lulluɓe shi ya sanya kwantacciyar tulin jiƙaƙƙiyar gargasar dake kwance muraran a kan ƙirjinsa ta gama bayyana kanta. Ta yi lankaf a kan farar fatarsa. Murɗaɗɗen jikinsa me kyawun gani da ɗaukar hankali ya fito fili. Tun da Ammi ta haifeta ba ta taɓa ganin namiji a irin yanda ta ga Bad Man ba. Cikin tsananin ruɗewa da gigicewar da ta haɗar mata da tsoron da ta ji ɗazun ta runtse idanunta da ƙarfi lokacin da ta fasa ƙarar rashin sanin mafita, lokaci ɗaya kuma tana zamewa a kan ƙafafunta lokacin da jikinta ya ɗauki rawa. Ita ba ma ta san kwalaben da ta yar sun fashe ba se da ta ji ƙafarta ɗaya ta taka wani abu me shegen zafi da tsini..


MHIZ INNOCENT✨
*AJTICHAPTERTWO45*


____Runtse idanunta ta yi da ƙarfin gaske lokacin da ta ji shigar kwalbar nan cikin ƙafarta. Ta shiga juya kanta har lokacin idanunta a rufe cikin rashin sanin abin yi.

"Inna lillahi.. wayyo Allah na.." shi ne abin da take faɗa cikin tsananin jin zafi da kuma haɗewar tsoron da ta ji da ta ga Bad Man, hannunta na riƙe da ƙafar tata da cikin lokaci ƙanƙani jini ya fara zubowa. Wani irin gumi ke kwaronyowa tun daga kanta har ƙafarta, ita kaɗai ta san me take ji, ban da juya kai babu abin da take yi.

Idanunsa ya sake buɗewa yana kallan kwalaben da ke zube a ƙasa abun cikin su ma a ƙasa. Wata zazzafar iska ya fesar daga bakinsa fahimtar tabbas wannan ɗin giyar da ya fito da ita ne ze sha ita ce yake gani a ƙasa.

"Wayyo.." Abin da ya ji Didi ta faɗa shi ne ya sanya shi ɗaga ido ya kalli inda take. Cikin lokaci ƙanƙani ransa ya ɓaci. Kaff cikin gidan nan babu wanda ya san yana shan wani abu, yanzu ga shi ita ta zo ta gano shi. Lallai