You Cannot Download this book untill you login but you can read it .

---

Login Register

"Nagode Inna kamar kinsan baccine ya kwashe ni harna makara" Inna itama cikin nata murmushin tace "Bakomi sakeena, ai tunda naga hudu ta gota baki fitoba nasan gajiya ta hanaki tashi aike kam ba daganan ba akwai himma" ta karbi girkin ta qarasa taje tai wanka, yau kam cikin farin ciki take kwalliyar qananan kaya tayi riga da skirt iri daya dark green masu kama jiki, bata daure dankwali ba sai hula data saka ta bayan hular kana gano jelolin kitson kanta na igbira style. Shigowar Sageer tayi dai dai da dauke burner din turaren wuta datayi, da sauri ta ajiyeta kan tiles ta tafi da gudu ta daneshi. Ya saki ajiyar xuciya yana mata dariya, yasa hannu ya ciccibeta yana rataye da jakarsa suka nufi bedroom, tunani yake meyasata farin ciki haka? Shidai tun daga jiya har xuwa fitarta school a burkice yake ganinta, amma yanxu menene dalilin wannan canjin da aka samu? Ya tabbatarwa kansa cewa akwai abunda ke faruwa kuma hakan ya qara masa axamar gano wanda yake mata famfo.


Cikin nishadi sukayi dinner tare sukayi darasin computer suka kwanta, yau dai babu juye juye baccinta tayi lakadan ta barshi da kallonta da kuma tunani kafin nasa baccin ya kwasheshi. Da safe lfy lau tayi ayyukanta tare sukai breakfast dashi ya rigata fita ita sai 9 take da lec.


Yana xuwa office be xauna ba ya ari mota kamar jiya yayiwa school din tsinke. 8:30 dai dai ta isa makaranta, yaukam hankalinta kwance tayi parking a gurin da tayi jiya, ta kashe motar tana qoqarin xare key Deni ya bude motar ya shiga, ta juyo a firgice cikin wata irin muguwar faduwar gaba ta dubeshi.


Sageer da yaga fitowar Deni daga wata mota da kuma shigarsa motar sakeena shima ya samu kansa cikin faduwar gaban data nunka ta sakeena, yayi mugun Al ajabin wannan abun domin ko a mafarki be xaci Deni ne friend din sakeena ba, gabansa ya dunga wata irin faduwa babu qaqqautawa kamar ba namiji ba, bai taba xaton haka ba, besan bala'in sakeena yakai haka ba, ta rasa abunda xatai masa sakayya dashi sai hada Kai da Deni suci amanarsa? Wato ranar data kasa bacci da kuma farin cikin da take jiya na murnar xata dawo makarantane su hadu da Deni sucigaba da cin amanarsa da kuma keta alfarmar aure. Hawaye suka xubo masa lokacin daya qara kai kallonsa akansu suna cikin mota xaune a kulle da alamun magana suke, xuciyarsa baqiqqirin ya raya kawai ya fita da bindigarsa ta aiki yaje ya harbe sakeena da Deni yayi maganin fasiqai maciya amanar aure domin hukuncinsu kenan wanda duk wanda yayi yunqurin cin amanar aure inyaji hukuncin daya dauka akansu xai bari koba dan Allah ba. Sai dai kuma daya barin na xuciyarsa ya kwabeshi da karya dau doka a hannu abunda dai ya kamata yayi shine ya haqura da sakeena ya sakarwa Deni ita sujecan su qarata. Wannan shawara tafi kwanta masa kuma yayi na'am da ita, yaji wata irin muguwar tsanar sakeena ta darsu a xuciyarsa. A fili yace "Sakeena ko sonki xai kasheni, ko kece autar mata kuma koda gold aka halicceki na haqura dake" ya lalubi biro a aljihunsa ya fara bincikar takadda a motar amma dake ba tasa bace motar bai samu takaddar ba, dole ya haqura da rubuta sakin da yayi niyya a lokacin da nufin sai yaje gida xai rubuta ya bata kuma ya turata Kano a gobe tare da rufamata asirin abunda tayi da kuma alqawarin cigaba da daukar nauyin karatunta. A fili yace "In shaa Allah yau baxaki kwana da aurena a kanki ba, tunda har takai Deni ya baro nasa iyalin a Kano ya biyoki garin da kike aure Allah ne yasan abunda kuke aikatawa, baxan iya ba gara in bar masa ke"


Acan cikin mota kuma sakeena tayi shiru tana gayyato dauriya da kuma dakiya kar Deni ya gane ta furgita da ganinsa kuma tanajin tsoronsa. Kamar xararre ya fara magana "Nasan kwace miki waya yayi saboda kar muyi magana ko? Wlh sakeena nasha wahala a tsahon sati ukun nan har kwanciya nayi a asibiti. Kullum sai naxo makarantar nan saboda ke, sai jiya akacemun wai an ganki a aji ashe kin canja gurin ajiye motane? Alhamdulillah daga qarshe dai gani gaki. Na gama yanke shawara duk wannan kewaye kewayen baxai kaimu ba gara kawai muje court ai muku KUL' E, (mayarwa da miji sadakinsa ko abunda ya kashe a aure domin fansar kai) ya fadi duk abunda ya kashe ni kuma xan baki a ki bashi ki fanshi kanki, a lokacin sai a daura mana aure tunda babu iddah tsakaninku. Munyi magana da wani Barrister xai tsaya mana a court har mu cika burinmu, kinga saimu koma can gida Kano a matsayin ma'aurata su gama bambaminsu su kyalemu tunda mun riga munyi aure, ita kuma waccen mahaukaciyar muna komawa xan danqara mata saki uku ta mabu fili mu koma xamanmu irin na baya"


Sakeena tunda Deni ya ambaci kalmar "KUL E" take kallonsa baki bude cikin tsabar al jabi da mamaki, ta qara nutsuwa a dubansa taga duk yayi wani dugujunjun ya tara suma a fuska da kansa kuma sumar babu gyara yayi wata irin rama da alama baya cikin nutsuwa. Batace masa komai ba yacigaba da cewa "Yanxu ina sauri ne xamuyi test acan gurin aiki, amma xamu hadu in kingama lectures, kuma inkin koma gida kiyi lissafin duk abunda ya kashe miki ki rubuta sai ki fito dashi goben qarfe goma mu hadu anan sai mu wuce court din" abunda ya qara tabbatar mata da kan Deni ya kwance shine, yana gama fadar haka be jira cewarta ba ko maganarta balle shawararta ya bude mota ya fita yana daga mata hannu da cewa "Allah ya kiyaye minki gimbiyata ayi lectures lfy" har ya shiga motarsa yaja beji koda tarinta ba balle muryarta. Ta dafe qirji bayan ya tafi, cikin rashin takamemen abunyi, yanxu ya xatai da wannan gagarumar matsalar data haqiqance da baxata taba iya maganinta ita kadai ba? Waxata fadawa? Ta shiga uku, qilu ta jawo mata bau ya xatai da Deni? Ita kadai ta kitsa masifarta ta cin amanar aure gashi ta kwabe mata, ya xatai da Deni da kuma alamun haukar data fara bayyana gareshi? Ta kwanta kan sitiyari ta fashe da kukan nadamar abunda ta aikata na biyewa Deni. Taci kukanta ta qoshi babu mai lallashi, dole ta haqura ta share hawayenta ta maida glasses dinta ta rufe motar ta nufi aji. Sageer saida yaga tafiyar Deni da kuma shigar sakeena aji sannan ya nufi gurin aiki.



Ko a gurin aiki be iya komai ba sai aikin tunani da kuma xubar hawaye a duk sanda ya tuna girman cin amanar da sakeena tai masa domin shi baiga lefin Deni ba, itace babbar me lefi da bata bashi dama ba da hakan bata faru ba. To itama a nata bangaren Sakeena ta kasa tsintar ko kalma daya a darussan da ake musu a ranar, gashi har 4 xasukai suna lectures, kanta gaba daya a qulle yake cikin rashin sanin matakin dauka da kuma tarin nadamar cin amanar sageer da tayi na boye masa alqarta da Deni. Hawaye suka wanke mata fuska ba tare da saninta ba, Qudrat ta jijjigata tace "Lfy keena? Naga kina kuka" dake ba yawane dasuba a ajin sai maganar Qudrat ta janyo hankalin duka yan ajin da malamin dake musu darasi. Suka fara tambayarta abunda ke damunta har malamin, ganin anyi mata chaaa yasa ta girba qarya da cewar kanta ke ciwo, suka dunga jero mata hannu kuma akai mata afuwa taje gida tasha magani ta huta. Tayi godiya ta miqe tadau jakarta ta fita dama xaman nata bashi da amfani tunda bata fuskantar komai. A hanyama tana tafe tana shatatar da hawaye wanda ta kasa dakatar dasu, Wani irin mugun xaxxabi da ciwon kai ya saukarta mata lokaci daya, dakyar takejan motar dan ko gabanta bata gani sosai ikon Allah ne kawai ya kaita gida.


Bata iya shiga bedroom ba a falo ta kwanta kan center carpet tanajin wani irin sanyi yana ratsa bargonta kuma ta kasa tashi ta kashe AC. Inna ta shigo falon daukar abu a fridge ta samu sakeena a cure guri daya ko takalmin qafarta sau ciki bata cire ba sai rawar dari takeyi haqoran na hadewa. Da sauri ta nufota tana salati da tambayar lfy? Sakeena bata iya yimata magana ba kawai dai tayi mata nuni da hannnu ta kashe AC, da sauri ta kashe ta nufi dakin sakeena ta yayimo blanket ta rufa mata, sai lokacin taji sanyin ya ragu. Har xuwa axahar tana kwance gurin ta kasa tashi tayi sallah kuma Inna ta matsa mata akan taci abinci tasha panadol saboda wannan xafin jikin, dole data dameta tasata hado mata tea da Milo kawai babu madara ta jingina jikin kujera dakyar tasha tea din da magani, aiko 2 minutes beyi ba ta amayoshi tas, jikinta ya qara mutuwa saboda yunqurin aman da tayi, ta tashi tsam ta wanko bakinta gami da alwala tunabin bango saboda jiri tai sallah a xaune ta koma kan doguwan kujera ta kuma qudundunewa sai lokacin wani wahalallen bacci ya dauketa.


Qarfe biyar Sageer ya kamo hanyar gida shidinma ciwon kai yake sosai, bema kula da mutum a falon ba yasa kai xai shige bedroom, Inna tai saurin cewa "Yawwa sageeru ka dawo ba? Sannu da xuwa, kaga yarinyar nan tun kusan shadaya ta dawo take kwance babu lfy ko ruwa tasha sai tayi amai." yadan dubi Inna a taqaice yace "Allah ya sawaqe nima banajin dadin" ya shige daki ba tare daya ko kalli sakeena dake kwance tana hawaye ba tana binsa da kallo. Ya jima a daki don saida yayi wanka ya shirya tsaf sannan ya fito da nufin daukar ruwa a fridge. Inna tai saurin tashi tsaye cikin bacin rai tace "Banason haka sageeru, meke damunka ne? Na fada maka yar mutane babu lfy baka damuba ka shige daki kayi xamanka? Sam baxan lamunci ka wukaqanta iyalinka ba ina gani, duk daya kuke a gorina saboda haka ka dauketa ka kaita asibiti domin ta jigata" saboda kar Inna ta fuskanci abunda ake ciki yace ba tare daya dubi sakeena ba "Yi haquri Inna ta shirya ta sameni a mota" ya fita, Inna ce ta temaka mata ta riqeta har xuwa cikin motar tana mitar batasanshi da rashin tausayi ba inyacigaba da nuna haka ga iyalinsa xata fadawa Umma.


Yaja mota suka tafi, Sakeena tana mamakin wannan hali daya tsira yau ko kallon sashin da take beyi ba balle yayi mata sannu. Ta kwanta a jikin kujerar motar tana numfashi dakyar gami da qanqame jikinta saboda sanyin AC daya kunna gashi bataga fuska balle tace ya kashe, yau gaba daya Sageer ya canja mata ya hade rai kamar ba shiba.


Dake private hospital ne basu bi layiba suka sami ganin likitan bayan ya mata yan tambayoyi ya kira nurse taja jinin sakeena a sirinji ya fada mata kusan tests biyar yace tai mata ta kawo result din. Kimanin 20 minutes ta kawo result din wanda ya nuna qarara Sakeena nada shigar ciki na yan satittika. Daga ita har sageer baxata lbrin yaxo musu, fuskarta ta washe sosai ta sunkuyar da kanta cikin kunya tana cewa a ranta "Shikenan raba gardama yaxo nasami makamin yaqar Deni domin inyaji inada ciki dole ya fita daga rayuwata ya kyaleni da uban dana sageer, Allah ya kaimu gobe a dai dai lolacin da yace mu hadu xanje" Sageer kuwa mutuwar xaune yayi, sam baya maraba da wannan cikin domin yanada shakku akansa nasa ne kona Deni, ya dubi sakeena yaga tana cikin farin ciki, ya qara tabbatar da xarginsa na cewa cikin Deni ne domin haihuwa da Deni ita kadaice xatasa sakeena wannan farin cikin ba shiba da batasonsa takecin amanarsa gami da ha'intarsa. Yayiwa likitan godiya ya hadasu da kwayar paracetamol kawai yace ta daure taci abinci tasha.



Suna tafiya a hanyan dawowa gida Sageer cikin kogin tunani tsundum ta yadda xai bullowa wannan lamari me sarqaqiyya shi dai yasan tunda sukai aure sau daya kawai ya kebanta da sakeena a shimfida, to ba abun mamaki bane intayi ciki daga wannan haduwa tasu inda babu alaqarta da Deni kenan, amma yadda yasan sakeena da rashin wayo da kuma mayattar son da takewa Deni yasan ba abun mamaki bane inya yimata wayo ta mallaka masa kanta yayi mata ciki. To shi yanxu meye abunyi? Titsiye sakeena xeyi ta fada masa waye uban danta ko kuma sakawa xaiyi a cire cikin ya hadata da takaddar saki ta nufi garinsu?


Yakai kallonsa gareta tana jingine jikin kujera tana murmushi idanunta rufe tana shafa cikinta. Koda sukaje gida ya rigata fita daga motar, tabishi da kallo saroro harya shige falo, ta kashe motar ta qulle tana tafiya cikin gida tana tunanin kodai sageer bayason haihuwa ne taga ya canja haka cikin qanqanin lokaci? To amma ai bai nuna haka lokacin wancan cikin daya xube. Ta bishi bedroom kai masa key din motarsa ta sameshi kwance dafe da goshinsa. Ta xauna gefensa tace "Ya Sageer naga kamar baka murna da cikin ko? Ko bakasan haihuwa ne?" ya dubeta fuska murtuk yayi murmushin takaici yace "Wane me kamar shekarunane xaiqi haihuwa indai Dan da xa aifa masa Dan halak ne" tai dan jim tana naxarin maganarsa, batagano komai ba ta miqe ta fice tana cewa "Nidai inma bakason haihuwar ne nikam inason Dana kuma ko babu temakonka xan haifeshi sai in kaiwa Iya ta shayar dashi indawo mucigaba da xama" Tas yaji abunda tace kuma wannan magana ita ta kuma tabbatar masa da cikin Deni ne a marar sakeena domin da nasa cikin ne ai Umma xatace xata kaiwa Dan ba Iya ba.


Taje kan dinning cikin farin ciki ta saka tuwon alkamar da Inna tayi taci tai nak, tasha paracetamol da tamarind roba guda, sam farin ciki yasa ta dena jin kowane irin ciwo, cikin nishadi tai shirin baccinta taje kusa da Sageer dake tunani ta kwanta tare da dora kanta akan qirjinsa. Ya kalleta bayan tayi bacci ya tabbatar da sakeena ta mugun rena masa wayo tayo cikin shege da kwartonta ta kawo masa gida kuma shine harda kwanciya a jikinsa? A xuciye ya toreta a jikinsa shi kyamarta ma yakeji yanxu.


Da safe kamar ragowar kwanakin da suka gabata itane tai breakfast duk da batajin dadi sosai amma ta daure tayi, tare da Sageer suka karya wanda tun asuba ya gama yanke abunda xai aiwatar har kuma ya rubuta takaddar sakinta ya boye a jakarsa ta office sannan ya saka aransa da yamma yana dawowa xai dauketa suje asibiti acire cikin gobe da safe ya yankar mata ticket ya tura Kano da takaddar saki ba tare daya bayyana abunda tayi ba xai rufa mata asiri da cewa Allah ne kawai ya qari xamansu. Kallon juna suke babu qiftawa kowa da cup din tea a bakinsa tana masa kallon mutum shi kuma yana mata kallon biri.


Har mota ta rakashi ya tafi office ta dawo ciki a gurguje tai wanka ta shirya cikin riga da skirt ta saka hijab wanda yakai har gwuiwarta ta dauki key din mota ta fice, Sageer dake hanyar school dinsu tun daxu cikin cikin wata baquwar motar yaga giftawarta da sauri ya rufa mata baya har xuwa gurin datai parking ya tsaya gefenta, tana xaune shiru cikin motar tare da duba agogo da alamar wani take jira, 17 minutes a tsakani sai ga Deni a tasa motar yayi parking ya fito ya bude motar sakeena ya xauna ya rufe. Sageer ya jinjina kai wannan kadai ta isa hujjar cewa cikin Deni sakeena keso ta qaqaba masa, ya fita ya barta a gida xaune dake munafukace bata nuna masa xata fita ba amma yana fitowa ta dakko mota ta taho fadawa kwartonta sun sami ciki xasu haihu.


Yana rufe motar ta dubeshi ranta a matuqar hade ta daure fuska tamau, kafin tayi magana ya rigata da cewa "Bari inwa Barrister waya inji ya isa court din" ta daga masa hannu da cewa "Dakata Nura! Ba wannan shirmen nakane ya kawoni nan ba, naxo ne infadamaka ni Allah ya shiryeni kuma nadawo rakiyarka, dan Allah dan darajar al qurani ka rabu dani inyi xaman aurena kayi nesa da rayuwarmu ni da sageer domin munason juna, kuma ba kwace wayata yayiba kamar yacce kake xata nice na kasheta saboda karka kirani. Nasan kasan darajar aure saboda shiya samar dakai, kuma baxakaso wani namiji ya dunga bibiyar matarka ba yacce kake bibiyata don haka kaji tsoron Allah ka kama gabanka ka koma inda ka fito👏🏽"


Baki bude Deni ke kallonta harta gama magana, yayi dariya yace "Haba sakeena ki denamun irin wannan wasan plz saida abu yaxo gangara xaki shigo da shaqiyanci ciki? Nasan baxaki tabason wani namiji a duniya bayana. Kinga duk abar wannan batun naxo da maqudan kudi suna mota koda xa a buqata a court din, inkinaso ma ayau xa a iya daura mana aure tunda babu iddah tsakaninku"


Ta katseshi da cewa "Baxanso kowanne namiji ba bayan kai saboda tare aka haliccemu? To xuciyarka ta fada maka qarya wlh domin yanxu tsuntsun son ya tashi daga kanka ya koma kan sageer. Xancen iddah kuma tare da daura aure da kake fada babu shi domin ina me sanar maka ina dauke da cikin Sageer" cikin matuqar kaduwa Deni ke kallonta tunda tai batun yanxu sageer takeso har ixuwa kan tana da ciki.


Ya xaro mata idanunsa da tashin hankali ya mayar dasu jajaye cikin qanqanin lokaci yace "Kina nufin kin bashi kanki? Kina nufin harya miki ciki? Kincifa amanata kenan?" kafin takai ga bashi amsa ya damqo hannunta yana kici kicin rungumarta yana cewa "Ai tunda kika bashi jikinki nima sai kin bani, sai dai ki haifi dan mutum biyu kuma ai nima da nawa auren yayi miki ciki" Ta fara kici kicin kwatar kanta amma ta kasa saboda a mota suke.


Duk abunda suke akan idon sageer, lokacin dayaga Deni ya riqo sakeena ya runtse ido ya kawar da kansa gefe guda. Ta samu ta kwace hannunta daya dakyar ta xabgawa Deni wani bahagon mari, babu shiri ya cikata ya dafe kunci yana mata kallon mamaki. Ta fara magana idonta jajur tana kwallah "Nura ka nutsu dan ubanka, shege dan akuya haihuwar kasuwa, yauma halin naka na akuyanci xaka gwadamun? Tabbas baka da lefi duk lefinane da nabari soyayyarka ta karya da yaudara tayi tasiri akaina. Na manta cewa tun farkon alaqarmu dakai batamun rayuwa kaso kayi, na cika jaka dabba dana manta kai tsatson Hajjo ne matar data tsaneni fiye da komi a duniya, namanta lokacin da kake dukana a gidan haya aimun dariya da gori, na manta lokacin da kace baka qaunata acikin dubban mutane da yan jarida a kotu ka sakeni kuma kaje ka auro kalar matar data dace da kai kabarni cikin qunar xuciya. Tur da wannan makauniyyar xuciya tawa wacce ta kasa gane cewar kaine babban maqiyina wanda ya taso gari e gari tundaga Kano xuwa Lagos don gurbata rayuwar aurena da kuma rabani da masoyina na gaskiya, andade ana fadamun ba sona kake ba yaudarata kake da kuma muguwar sha'awar da kakemun, amma kash bangane ba sai yanxu daka qara fitomin da halinka kuma duniya taimun nata karatun wanda dole nagane ko naqi ko naso, na cuci kaina dana biyewa shege tsinanne mayaudari irinka naci amanar mijina kuma na sabi ubangiji na, wlh inbaka daina bibiyata ba xan kaika kotu infadi lefin da muka aikata ni da kai duniya tai maka tofin Allah tsine kuma in bata maka suna"


Ta fashe da kuka bayan gama fadar haka, ta bude motar ta fito. Deni shima yayi wuf ya fito ya tare gabanta ya tsuguna, Sageer yayi qasa da glass din motar don ya jiyo abunda suke cewa. Cikin tsananin tashin hankali Deni ya fara magana "Sakeena kiyi haquri nayi kuskure amma wlh na tuba ki yafemun baxan iya rayuwa babu keba xan iya rasa raina akanki, duk abunda kikace naji nayi amma kiyi haquri karki hukuntani ta hanyar datse alaqarmu, raba xuciya da abunda dakeso quntatawa xuciya ne sakeena karkimun haka" ya fashe da kukan gaskiya, sabanin wanda yakeyi a baya na yaudara. Ta kewayeshi tayi gaba itama nata kukan take na nadamar abunda tayi da kuma yunqurin fyaden da Deni yaso yimata yanxu. Yadda Allah ya taqaitama gurin babu motane sosai tunda gurin parking ne, da sauri Deni ya miqe yabi bayanta yana ihun kiran "I LUV U Sakeena" ya fada yafi sau shurin masaqi. Ta qara sauri don karya tadda ita, ganin haka shima ya xura da gudu yasha gabanta ya xube qasa yana kuka da wasu kalaman da tashin hankali da kuma tsanar datai masa yasa ta kasa jinsu.


Ganin yana xube gabanta durshan ta kwasa da gudu ta fada motarta wadda bata kashe ba tai mata key taja ta da gudu, kafin ya koma tasa motar ya bita harta bace masa. Sageer kansa ya kuma daurewa, to mekenan? Da alama dai fada sukai tunda yaji Deni yanata bata haquri kuma suna kuka duk su biyun.



Sakeena ta samu kanta cikin wani irin yanayi irin wanda ta kasance lokacin da Hajjo ta bata mata suna, ta shige dakinta ta xauna a qasa dirshan tana kuka cikin tsantsanar nadama da kuma mugun tsanar Deni irin tsanar da bata tabayiwa wata halitta ba, tai kuka ta kuma yi, ta jingina da drawer ciwon kai da xaxxabi sun rufar mata kanta yana cikin tsakiyar gwuiwoyinta tana raxgar kuka, sallace kawai take data ita a gurin wacce acikin sallar ma ta rasa abunda xata roqa domin kunyar Allah takeji na saba masa da tayi ta hanyar cin amanar aure.


Tana xaune har bayan sallar la'asar kanta wani irin ciwo yake jijiyoyin kan duk sun tashi sunyi rudu rudu, idonta yayi wani irin jaaa babu kyan gani ko gani batayi sosai. Tana wannan halin taji shigowar Sageer, ta bada rabin awa da shigowarsa ta tabbatar da ya kimtsa xuwa yanxu. Ta miqe ta dauki wayarta wacce ta dade akashe acikin drawer ta nufi dakinsa da nufin aiwatar da abunda xuciyarta ta fada mata.


Tana bin bango harta murda kofar dakinsa ta shiga, yana tsaye jikin madubi yana saka riga, dan haka ta cikin madubi ya ganota, yayi saurin juyawa don ganin yadda idonta da fuskarta sukai jajur suka kuma kumbura. Ba tare data dubeshi ba, kanta yana qasa ta miqa masa wayar hannunta tace "Gashi kayi haquri, naci amanarka batare da saninka ba, ta hanyar qullah alaqa da Deni da nufin mu kashe aurenka in koma gidansa. Banda haka ban aikata komai wallahil azim, Allah shine shedata ban bari anshiga gonarkaba kuma ban keta alfarmarka ba ta hanyar maganar batsa ko kuma wasan banxa. Wannan wayatace inka duba xaka sami hujjar duk abunda na fada maka. Kuma bani da buqatarta domin itace shedaniyar data kuma hadani da Deni. Inka tabbatar da gaskiyata kayimun hukuncin da duk kaga ya dace dani, domin naci amanar aure kuma na toxartashi." ya karbi wayar jikinsa a sanyaye shima, ta qara share hawaye ta juya ta fita tana hada hanya.



Jikin Sageer yayi wani irin mugun sanyi ya xauna dabas a qasa shima, ya kunna wayar sakeena yana tunanin kodai ta ganshi ne yau a makaranta? Yana kunnawa text messages suka dunga shigowa duk na Deni ne saina Hassana