You Cannot Download this book untill you login but you can read it .

---

Login Register

Aunty Saratu, ita kad'aice na san zata iya tsayawa a gaban ko waye ta bada shaidar da zata wanke ni, sai dai a yanzu tayi min nisan da ganinta zai min wuya, don watanni shida baya tayi aure a can jihar Kaduna.

Ba zan iya da wannnan halin ba ya Allah ka taimakeni!... zuciyata tayi ta nanata hakan kamar istigfari.

Tsawon lokaci ina kwance a cikin d'akin nan ina kallon k'ofar dake k'ulle, na san cewa bada dad'ewa ba Kawu Ibrahim zai dawo da bayanin da aka tattauna na yadda k'arshen rayuwata zai kasance, saboda haka na cigaba da jira ina kuma k'okarin kar bacci ya d'auke ni saboda zazzab'in dake jikina.

Kwakwalwata nata juya yadda zamana yanzu a gidan zai kasance, don duk fad'in garin bani da wajen zuwa in ba Babban gida ba, amma a yanzu rayuwa da mutanen da suka tsaneni tare kuma da abinda ya faru yau zai zama kamar yadda yaro ke hango jahannama ne.

Tunaninnika da yawa suka cika kaina amma duk da haka bacci b'arawo ya tsame ni daga cikin koginsu!

_______

03:15 AM

"Lokacin da aka kai gawar Hajiya asibiti, likitocin sunk'i tab'ata sai da shaidar 'yan sanda shi yasa ba yadda aka iya dole abin ya kai gaban hukuma, saboda haka Kawu Danjuma yace in gaya muku keda Habiba, 'yan sandan zasu zo gobe su tafi daku."

Ina zaune gaban Kawu Ibrahim a lokacin da yake fad'in hakan, ya dawo ne ya tashe ni da tsakar dare yake gaya min labarin da na kasa fahimta, don sai da ya kai k'arshen zancensa sannan naji ma'anar kowacce kalma na bi ta kan fatata tana isa cikin kwakwalwata.

Za'a kaini ofishin 'yan sanda gobe!

Kalaman suka yita maimaitawa a kaina amma suka gagara nutsewa, abin da mamaki, kamar mafarki... wai ni za'a kai ofishin 'yan sanda gobe? me yasa rayuwata take cike da masifa ne?

Subahanallahi! wani yankin zuciyata yayi saurin kwab'ata.

"Kar kisa damuwa a ranki, ba wani babban abu bane, kawai za'ayi muku wasu 'yan tambayoyi ne shikenan."

Ya fad'a don kwantar da hankalina, amma kalaman suka tafi can bayan kaina suka yi matsugunni, ban yi girman da zan iya tsallakewa maganarsa ba, amma rayuwa ta koya min wayon da na san meye matsayin zuwa ofishin 'yan sanda a matsayin wanda ake zargi da kisa, kamar a shafe mutum ne da gishiri sannan a jefa shi cikin kejin mayunwatan kuraye!

"Na san baki yi wannan abin ba Bintu, sai dai abinda ya d'aure mun kai shine yadda kika ce Habiba ce ta dama kokon Hajiya da safen, na san Habiba tsawon lokacin da aka auro ta gidan nan, bata tab'a damuwa da harkar mutane ta wannan fannin koda 'ya'yanta ne kuwa."

A lokacin da Mamana take gab'ar mutuwa kuma ina rik'e da hannunta, akwai wani irin bugu da zuciyata keyi, a lokacin da Kawu Yahya yazo sanar damu rasuwar Baba, irin wannan bugun zuciyar yana nan, a lokacin dana had'a ido da Hajiya ranar da na dawo gidan nan, ba abinda ya canja game da bugun zuciyar.

Sannan a yanzu ma da Kawu Ibrahim mutum d'aya da nake samu sassauci a gurinsa ya fad'i wannan maganar, irin wannan bugun zuciyar dai na sake ji, bugun zuciyar da kullum ke gaya min cewa wani shafi na k'addarar rayuwata ya bud'e.

Idona ya sake cika da kwalla, amma meye amfanin kukan? bayan tun safe nake yinsa kuma babu abinda ya canja?

"Ina son ki gaya min gaskiyar abinda kika sani Bintu, ta haka ne kad'ai zan samu kwarin gwiwar cigaba da taimakonki, kuma idan akwai wani abun ma ki yarda dani ba wanda zan gayawa."

Kun san ma'anar kalamansa? Bai yarda dani ba kawai, don lokacin da na d'aga ido na kalle shi, zargi ya haska sosai cikin nasa idon.

"Wallahil azeem Kawu, na san darajar rai kuma na san laifin kisa, ba zan tab'a iya cutar da hajiya ba kome take min kuwa, ina sonta a matsayin kakata da kuma mutum mafi kusanci da nake dashi na b'angaren Baba, na san hukuncin kashe mutum wallahi Kawu ba zan tab'a iya kashe ta ba, wannan tunanin ma bai tab'a zuwa kaina na...."

A lokacin kukan da nake rik'ewa ya fito cikin 'yancinsa.

"Ya isa, ya isa, nima na san baza ki iya ba Bintu, kiyi shiru komai zai daidaita insha Allah."

Ya fad'a a hankali kamar bai yarda da abinda yace d'in ba.

"Wani yaro Abdul yazo nemanki d'azu amma Kawu Bashir yace kar a bar kowa ya ganki."

Ya fad'a bayan wani lokaci, Sai naji k'arar wani abu ya tarwatse a k'irjina daya fad'i sunan mutumin da ya shigo cikin rayuwata ya karb'e ni da dukkan tabona, ta yaya zan iya kallonsa a yanzu da wannan sabon tabon da ba zai goge ba. Na san a lokacin Kawu Ibrahim zai so sanin waye Abdul da kuma alak'a ta dashi, amma ba hakan ne mafi amfani a sannan ba.

"Kici wannan na san ba abinda kika ci tun safe."

Ya fad'a yana mik'o min wani faranti a rufe, sai a sannan nima na tuna banci komai d'in ba tun safe, na zame murfin a hankali sanda hoton wata damammiyar shinkafa da na san ta wajen zaman makokin ce ya fito.

"Nagode."

Na fad'a a hankali ina jan farantin kan cinyata.

"Zanyi dukkan k'ok'arina in taimake ki insha Allah."

Ya sake fad'a kafin ya bar d'akin, sai dai wannan karon bai k'ulle k'ofar ba, ina jin maganganunsa shi Aunty Hassana a k'ofar kafin su tafi.

Wata kwalla mai d'umi ta fad'a cikin abincin, Ba zan tab'a bari rayuwata ta gintule iya nan ba, saboda zuwa ofishin 'yan sandan nan baya tab'a nufin dawowata, ba wanda zai tab'a yarda Aunty Habiba tana da hannu a lamarin nan, dalilan da suke nuna ni sunfi tasiri.

Kuma dole ne inyi wani abin, dole inyi dukkan iyawata don in fita daga wannan hargitsin, na cigaba da cusa abincin cikin bakina yayin da kwakwalwata ke bincike cikin kaina, neman mafita nake yi ko ta wace hanya kuwa.

A lokacin dana kai lomar k'arshe bakina, a lokacin wani tunanin ya dirar min, na damk'e farantin a hannuna zuciyata na maimaita shi, kuma da kowanne maimaici sai naji ina kara yarda dashi, Haka za'ayi kawai!

Na ajiye farantin da sauri sannan na lalubo k'arshen atamfata, na kwance d'aurin kud'in da nake tarawa tsawon watanni na sake k'irga su, sannan na mayar na k'ulle.

Na d'auki curkudadden hijabina da muka sha duka tare na saka sannan na nufi k'ofa, na tura ta a hankali amma k'arar net din ta cika tsakar gidan, sai da na tabbatar ba wanda yaji sannan na zura k'afa na fita. Iska mai sanyi ta busa kan fatata sanda na fita daga b'angaren, tunda gidan a rarrabe yake waje-waje ba wanda ke damuwa da rufe b'angarensa in dai an rufe k'ofar can waje.

K'afata ba ko takalmi na dinga wuce tabarmi da aka jingine da kuma butocin da akayi amfani dasu da rana, babu kowa kuma ba karar komai sai ta kukan gyare. Nayi ta tafiya a hankali har sanda na iso babban zauren dake rik'e da k'ofar fita, an sanya sakata a tsakaninsa.

Na tsirawa sakatar ido da zuciyata mai zurfi!

Fita daga gidan yana nufin guduwa kenan, guduwa kuma zai tabbatar musu da rashin gaskiyata, zai sa kowa ya yarda cewa da gaske ni mai laifi ce, amma ban damu ba yanzu, ban damu da abinda mutane zasu yi tunani akaina ba, abinda na sani kawai shine rayuwata ba zata rushe a haka ba, dole ne in tafi in samo wajen da zan cigaba da ginata!

Nasa hannuna na bud'e sakatar sannan na taka waje, taku daya kawai ya fitar dani daga cikin Babban gida, kantangarsa ta tsaya a bayana, sai naji na shak'i wata iska mai dad'i kamar ada ina rik'e da numfashina ne, na gyara fuskar hijabina sannan na nufi cikin duhun.

Ko'ina yayi shiru da fad'i, duhun daren da nake tsoro a da ya zama mai haske cikin idona a yanzu, na riga nasa zuciyata a abinda nayi niyya kuma ba abinda zai hanani. Burina shine inyi nisa da babban gida, inyi nisa da duk wanda ya san ni, inje wani wajen da mutane baza su lura dani ba, wajen da damuwar kowa ke kan rayuwarsa ba ta wani ba, zan iya rayuwa cikin duniya amma banda nan.

Tunani da yawa ya cika kaina akan wajen da zanje kafin fitowar rana wani tunanin yace in samu waje in b'oye amma na ture shi, wani zai iya fitowa ya ganni duk da cewa guduwa shine abu na k'arshe da kowa ke ganin zanyi.

Abinda yafi kawai shine in tafi wajen da zuciyata ke hank'oro, saboda haka na cigaba da mik'ar titin yayin da kukan karnuka ya cika kunnuwana.

______

06:20 AM.

Na sunkuyar da kaina a jikin tagar motar sanda direban ya tada injinta tayoyin suka shiga motsawa.

"Allah ya kaimu lafiya." kwandastan motar ya fad'a yana rufe k'ofar, muryoyi da yawa suka amsa da Ameen.

"Allah ya kiyaye oga!" wani mai talla ya fad'a yaana d'agowa direban hannu.

"Allah ya kaiku KANO lafiya." maigadin tashar motocin Ikara ya fad'a yana dukan bayan motar, naji zuciyata ta buga tare da k'arar.

Na sunkuyar da kaina lokacin da muka hau titi gudun hangen idon sani, na tuna lokacin dana iso cikin tashar bayan tafiyar kusan awa biyu a k'afa mai cike da 'yar b'uya duk sanda naji motsin wani abun, na hango Hamza daga cikin tashar wani abokin Yaya Sani, hakan yasa nayi saurin b'uya a k'asan wani karyayyen tebur. A lokacin tashar ba mutane sosai saboda haka anan nayi ta zama har sai da wajen ya cika da hayaniya.

"Kano! Kano!!" Wani mutumi nata ihu sanda na fito.

"K'anwata Kano zaki je? taho nan, motocin suna can." Ya fad'a sanda ya k'arasowa wajena, ba tare da musu ba nabi bayansa, don bani da tunanin inda zanje, abinda nake nema kawai taya ce da zata gangara dani na bar cikin garin Ikara.

"Subhaanal-lathee sakhkhara lanaa haathaa..."

Na jiyo muryar wata mata a gefe na tana biyawa 'yarta yayin da yarinyar ke maimaitawa cikin gwarancinta.

"....wa 'innaa'ilaa Rabbinaa lamunqaliboon." Tawa zuciyar ta k'arashe sanda na hango shafin hisnul muslim d'ina.

A take kuma tunani na ya gangara kan kayana dake d'akin Hajiya, Ya salam! kwata-kwata na manta da zancensu sai yanzu, ta yaya zan iya rayuwa da kaya d'aya kawai... sai na tuna ma ai ba ko takalmi a k'afata saboda haka na ajiye wannan tunanin a gefe, Kaya ba sune abinda ya kamata ya dame ni yanzu ba.

Na juya fuskata jikin tagar, ina kallon yadda hoton waje ke sulalewa cikin gudun motar, korayen bishiyu, k'auyuka da kuma digon mutane na yawo cikin safiyar. Naji zuciyata na washewa da kowanne hoto dana kalla, dukkan tsoro da damuwata suka dinga bajewa da kowanne motsi da tayar motar ke yi.

Bayan awa d'aya da rabi, zuciyata nata yawo cikin gajemaren tunani, na tsinci muryar wani yana k'orafi game da gyaran hanya da kuma bin titi d'aya.

A wannan lokacin kuma naso da dukkan fatana direban nan bai juyo yayi magana ba.

Motar ta tarwatse, k'arfin shigowar gingimarin dake d'auke da itace ya haddasa wata k'ara kamar ta tashin bam, k'ofofin motor suka yage daga jikin bodin, gaba wajen zaman direba ya fita ta taga, injin motar ma yayi tsalle wani wajen. Ka'ra mai yawa ta cika iska, yadda k'arfe ke had'uwa da d'an uwansa, yadda k'arfe ke datsa bishiyoyin gefe da kuma yadda karfe ke k'onewa.

_______

FIKRAH WRITERS ASSOCIATION.

BAYAN NA MUTU..!

©AYSHA SHAFI'EE

(☆_☆)

01

BAYAN SHEKARU BIYAR!

WASHINGTON, AMERICA.

"Zaki iya tuna me kika gani bayan hakan?"

"Zan iya..."

Fadeelah ta amsa a hankali tana rufe idanunta, hotunan mafarkin da tayi a daren jiya ya haska tar cikin ganinsu.

"Ina gudu, a cikin wani daji mai yawan bishiyu, ganyen bishiyun suna da siffar fuskoki munana, bana iya jin me suke cewa amma suna ta ihu akaina... bana iya gani sosai amma na cigaba da gudun zuwa wajen wani abu, zuwa cikin duhun dake gabana, ban san me..."

Sai ta tsaya a daidai nan, kalaman suka gutsire a iska.

"All through the way, a voice was shouting 'kin kashe ta!"

"A cikin gudun na tsinci wata murya na fad'in 'kin kashe ta!"

"Me abinda kika fad'a na k'arshe yake nufi?"

Dr. Gilbert ya tambaya cikin harshen turanci yana kallonta.

Hakan yana nufin na kashe ta, nayi kisa a cikin wata rayuwar da ban santa ba, na kashe wata a can d'aya duniyar da idona ke nuna min, wata da ban san wacece ba.

A cikin kanta tayi wannan tunanin yayin da Dr. Gilbert ya cigaba da kallonta yana jiran amsa. "Miss Malik?"

"Me? Oh yi hak'uri, hakan na nufin kamar in gudu kenan."

Tayi k'arya cikin harshen turancin da suke magana, Dr. Gibert likitanta ne tsawon shekara guda, wanda ke bata tallafin warkar da ciwon kwakwalwarta, (Psyiotherapist.)

Saboda haka bata tab'a b'oye masa wani abu da ya shafi ciwon nata, amma abinda ta gani jiya a mafarkinta wani abu ne da bata tunanin akwai mahalukin da zata iya shaidawa, babu wanda zata iya tunkara tace mafarkanta na kwanan nan suna nuna mata ita mai kisa ce a wata rayuwar!

Tana iya jin yadda idanunsa ke nazarinta kafin yace.

"Wancan mafarkin da kika yi shima wani abu ne ya biyo ki koh?"

"Yes, wannan karon kuma muryoyi ne, Dr. Gilbert ban san ya zan maka bayani ba amma ina ganin abin k'aruwa yake, a baya ina dad'ewa kafin mafarkin yazo sai dai na zahiri kawai, amma wannan shine kusan na sha biyar fa a wata d'aya."

"Well, bari mu gwada wasu tambayoyi toh." Ya fad'a yana ajiye biron hannunsa akan k'aton littafin dake gabansa.

Sai ta kwantar da kanta kad'an a jikin kujerar da take zaune, wata kujera mai taushi da dad'i, kamar yadda komai na ofishin yake mai kyau, don shi kansa ginin a wani waje yake da zuwansa kad'ai zai sa maka nutsuwa.

"Tunda aka fara hayaniyar nan game da addininku, kin fuskanci wani k'alubale?"

Ta girgiza kanta.

"In banda kallon da mutane ke bina dashi duk sanda na fita, ban fuskanci komai ba."

"Wani na kusa dake fa?"

Ta d'an had'iye yawu kafin ta amsa wannan.

"Wancan satin an kori Mami Saffiya daga aiki akan tace baza ta daina zuwa da hijaab d'inta ba."

"A lokacin kin saka abin a ranki sosai?"

"Zuwa kwana biyu ne kawai na damu, amma yanzu Alhmdlilah mun manta shi, ya wuce kuma tana neman wani aikin."

Ya rubuta wani dogon layi cikin littafin kafin ya sake d'agowa ya kalle ta.

"Yaushe kika yi bacci jiya?"

"Ban tabbatar ba amma zai kai kusan sha d'aya da rabi."

"Me kika yi kafin ki kwanta?"

"Na k'arasa wani zane dana fara ne."

"Har yanzu kina gidan yayanki?"

"Eh."

"Akwai wani abu... ina nufin kina d'an takura ko yaya ne da hakan?"

Da sauri ta sake girgiza kanta.

"No, I'm Okay."

"Kina da matsala a makaranta?"

"A'ah na fara sabawa da komai, sai dai karatun kawai da yake min yawa."

"Fassara min kalmar 'yawa'"

"Yawa sosai, da sai in kai dare ina assignment."

"Kina ciwon kai?"

"Wani lokacin."

"Kina shan magani?"

"Sosai, yadda wata rana ma zan tashi cikin dare ne in sha."

"Kina--"

Wasu tambayoyin da yawa akan makaranta kafin ya fad'i abinda tayi hasashensa.

"Daga yadda na fahimta Miss Malik, yawan mafarkan yana faruwa ne saboda wata damuwa--"

Abinda yake shirin fad'a min shine gajiyar makaranta da kuma yawan karatun dake shiga kwakwalwata ne suka jawo min yawan mafarkan ba wai wani abu ba, saboda haka in ragewa kaina abubuwa sannan---"

"Kuma ki dinga hutawa, sai na ganki a wani appointment d'in."

Ya k'arashe tare da tata zuciyar.

"Thank you, zan k'okarta."

Ba wani taimako daya bani yau.

Zuciyarta ta ayyana sanda ta rataya jakarta ta nufi hanyar fita, sai dai kafin ta tura k'ofar wani dogon mudubi daga gefe ya d'auki hankalinta, ta juyo a hankali ta kalle shi, ta kalli kanta, sannan ta kalli siffarta dake tsaye sanda hoton wata 'yar siririyar matashiya ya kallota ta ciki.

Fuskarta d'auke take da kamanni irin na fulanin k'asar Nigeria da take gani a hoto, sai dai tata fes! babu irin tsagun fuskarsu da internet ke nuna mata. Ta cikin kalar ruwan k'asar idon tana iya hango damuwa fal da kuma rashin kwanciyar hankali a k'asan su, a kowacce rana dake wucewa, fuskarta na k'ara zama bak'uwa a wajenta ne, tana jin kamar wani ne daban yake son kwace jiki da zuciyarta, ya ture nata ruhin gefe.

A ranakun data fara zuwa wajen nan, lokacin da Daddy ya kawo ta da kansa ranar appointment d'inta na farko, zuciyarta na rike da wani fata ne, fatan cewa damuwarta zata yaye, rayuwarta zata haska kamar yadda komai na wajen yake cikin kala mai kyau, Amma a yanzu bayan shekara d'aya da watanni ta sarewa wannan fatan kamar yadda ta lura Dr. Gilbert ma ya fara sarewa al'amarinta... ya rage yi mata yawan murmushi da bata fatan warkewa. Watakila matsalarta tafi k'arfinsa ne.

Nayi sirranta da yawa.

Zuciyarta ta rad'a mata.

Dole ne in dinga cin abinci da yawa.

Tana fita daga office d'in, wata tsohuwar Baturiyar dake zaune ita kad'ai a waiting area ta mik'e ta shiga rik'e da sandar dogaronta, a lokaci d'aya kanta ya sara sanda ta kalli sandan, saboda haka tayi hanyar waje da sauri bata ko tsaya kiran da receptionist ke mata ba na tayi booking wani appointment kafin ta wuce.

Daga Clinic d'in zuwa Bus stop mafi kusa tafiyar minti goma ce, haka tayi ta bin hanyar idonta a k'asa, hannunta na dama damk'e da jakar ratayenta kamar hakan ne zai kare abinda take gudu kar ya faru.

Bai fi mutane sha biyu ba a Bus Stop d'in saboda haka ta sami damar tsayawa daga cikin 'yar rumfar, sai dai ta gefen idonta tana iya ganin yadda baturen dake tsaye a kusa da ita ke kallonta, wani tsoho ma ya kyallaro da idonsa ta saman jaridar da yake karantawa sannan wata mata ta sak'e damk'e hannun d'anta. Kamar ita d'in bomb ce dake shirin tashi a kowanne lokaci.

"Hola..!"

Direban Bus d'in data tsaya ya d'ago min hannu sanda na taka k'afarta cikin motar, tana yawan hawa motarsa saboda yana tsayawa a stop d'in kusa da makarantarsu, shi mutumin k'asar spain ne kuma kamar yadda yaren spanish yake mai mafi rinjaye akan duk wani yare bayan turanci a Washington, baya tab'a mata turancin... yace tayi kama da matan k'asarsu don haka shi yarensa zaiyi mata.

"Buenas tardes. (Barkanki da rana.)"

Murmushi ya sub'uce a fuskarta, ganin mutane basa tab'a zama d'aya, wasu na gudunta wani kuma na son yi mata magana.

"¿Cómo está? (Kana lafiya?)"

Ta tambaya sanda ta mik'a masa Metro-card d'inta, don zama tare da Romilda k'awarta a makaranta yasa ta fara iya maida gaisuwa.

"Estoy bien, gracias. (Lafiya k'alau, Nagode.)"

Ya mik'o mata katin bayan ya cire iya kud'insa, ta nufi can k'arshe ta zauna daidai sanda wayarta tayi k'ara.

"Kina ina?"

Sak'on ya fad'a daga lambar Mami Saffiya cikin yaren Hausa.

_"Minti Ashirin zata dawo dani yanzu."_

Ta tura mata hakan da turanci don bata iya rubuta Hausa sosai, sannan ta k'ara gyara zaman rolling d'in mayafinta tana kallon titinan da suke wucewa. Duk sanda ta fita da yamma sosai irin haka, lokacin da fitilun garin ke walk'awa cikin idanunta, sai taji kamar yaune rana ta farko data iso cikinsa.

Da tunanin hakan kuma, idonta ya hasko mata wad'annan iyalin da suka zama gatanta.

Ahmad Malik da suke kira da Daddy, Babban likitan hak'ori ne anan garin Washington, mahaifinshi asalin African-American ne na k'asar nan, Ya auri mahaifiyarshi 'yar Nigeria ne a wani course-work da suka je yi garin Kano na wayar da kan mutanen Nigeria akan shan magunguna asibiti tun a wancan lokacin, anan suka had'u a matsayin d'aya daga cikin Nurses d'in asibitin da suka sauka, ya aureta bayan shekara d'aya da zuwansu kuma tsawon rayuwar aurensu kaf! a America suka yi ta, sai bayan ya rasu ne sannan ta buk'aci Daddy ya maida ita Nigeria cikin 'yanuwanta.

Daddy shine kad'ai d'anta saboda haka shi ya cigaba da rayuwarsa a nan da matarsa Mami Saffiya wadda take 'yar uwar mahaifiyarsa itama. Soyayyarsu ta fara ne tun suna yara lokacin da duk suke zuwa Nigeria ziyara, amma bata yi k'arfi ba sai bayan da ita Saffiyan tazo karatu America ta zauna a gidansu, kasancewar duk wani d'anuwansu in wani abu ya kawo shi k'asar a gidan nasu yake zama.

Bata ko kammala karatun nata ba akayi auren nasu a lokacin shima mahaifin Daddy yana raye, saboda haka bayan rasuwarsa mahaifiyar tasa ta barshi da matarsa ta dawo wajen 'yanuwanta Nigeria inda itama ajalinta ya riske ta a can.

Daddy mutum ne mai kamala, nutsuwa da tsananin hakurin da yake iya jurewa halin matarsa Mami Saffiyya, don ita macece mai kaud'i da kuma mita, sai dai tana da tsanani kirki da kuma hira, ga hidima baza ka tab'a ganinta ta rasa abin yi ba.

Tana da mutuk'ar kishin yare da al'adarta, shi yasa bata tab'a bari yaren hausa ya mutu a gidan kasancewar duk wanda yaga 'ya'yanta ma ba zaice sun had'a jini da Africa ba, yanayin abinci, iskar can, kammanin mahaifinsu da kuma farar fatarta yayi rinjaye wajen rufe had'insu da hausawan Nigeria.

D'ansu na farko Faruq, kusan halin mahaifinsa ya d'auko, don bayan tsabar nutsuwarsa, murd'adden miskili ne da in ba Mami ta bud'e halwar fad'anta ba, sai yayi sati bai kula kowa a gidan ba bayan gaisuwa. Shekararsa 17, ita ta girme shi da shekaru biyu amma ya fita aji a makaranta.

Zahra ita ake kira da baibai d'in d'an uwanta, ta d'auko wasu halayen na Mami amma nata har sun zarta sun kai iyaka. Tana da magana, iyayi da kuma ji da kai, sannan idonta na kan kowa a gidan, ta san hanyar da zata yi ta san abinda mutum ke k'ullawa shi kad'ai a cikin d'aki. A shekara Goma sha hud'u kawai ta san duk wata harkar kwalliya da wani abu da zai saka mace kyau, Fadeelah zata iya cewa ma ta fita wayo a wasu abubuwan.

Iman 'yar shekara shida, yarinya ce da ba ruwanta, tana cin komai kuma tana yarda da duk abinda ka gaya mata, burinta a kullum baya wuce kallon cartoon d'in Disney da kuma fatan ta tashi watarana taga ta zama d'aya daga cikinsu.

***

"Aunty deela ta dawo!" Iman ta fad'a lokacin da Fadeelah ta bud'e k'ofar falon.

"Yey na dawo!" Ta amsa da irin muryarta sanda ta zube mayafi da jakarta a kusa da ita, tayi kissing kumatunta amma bata ko kalle ta ba don idonta na manne kan Tv tana kallon cartoon d'inta na yau da kullum, 'Wrect it Ralph'.

"Me ya tsaida ke har k'arfe biyar? the last time da zan iya tunawa baki ce min zaki ko'ina ba."

Mami Saffiya ta fad'a daga can k'ofar kitchen hannunta rike da cokalin girki, ta k'arasa gareta amma kafin tayi magana ta zura mata cokalin a baki da zummar taji mata yanayin girkin.

"Mhmmm, gishiri yaso yayi yawa, a yanka dankali a ciki."

Mami ta daki goshinta da tafin hannu.

"Hai Allah, yaushe zan dinga gane awon gishiri ne?"

"Kar ki damu Mami, da nayi kud'i zamu hayo chef, kin daina girki a gidan nan."

Muryar Zahra ta fad'a daga kan couch tana kokarin zana gira akan tata da ta fik'e.

"Me kike yi haka?" Fadeelah ta tambaya tana kallon yadda ta fente kumatunta da blush bayan hakan.

Zahra ta juya idanunta kafin ta d'ago ta kalleta.

"Duh! sabon style d'in saka blush ne, Karki damu zanyi miki anjima in nayi wa Iman nata." Ta fad'a tafin hannunta kantafi cikin iska.

Iman daga can gefe ta juyo tace.

"Amma nawa ya fito sosai kamar na Venoloppe." (yarinyar cartoon din da take kallo.)

"Kar ki damu honey, sai yafi nata ma kyau."

Ta amsa tana tand'e bakin da take shirina zana masa janbaki, Fadeelah ta girgiza kanta kawai sannan tabi bayan Mami kitchen d'in.

"So ya interview ya kasance?"

Ta tambaye ta sanda ta tsaya gaban gas ta shiga juya miyar dake kai, Mami na yanka dankalin, ta d'aga kafad'unta duka biyun sannan tace.

"Ban sani ba, amma dai sunce zasu neme mu."

"Ku?"

"Eh, zamu kai wajen mu sha biyar."

"And..."

"Ni kad'ai ce Musulma."

Fadeelah a girgiza kanta sanda Mamin ta juyo tana zuba dankalin a miyar.

"Baza su tab'a kiranki ba."

"Na sani, amma zan sake duba classfied adverts d'in, baza a rasa wani waje ba."

Ta fad'a idonta baya kallonta, tsaf kuma Fadeelah ta gane me hakan yake nufi.

Baza ta tab'a samun aiki ba in har ana cikin wannan rikicin na k'okarin hana musulmai irinsu rayuwa a America.

***

"Daddy, dan Allah!"

Zahra ta fad'a tana buga kafarta cikin shagwab'a sanda suke hanyar makaranta. Kullum da safe shi yake sauke su a makaranta kafin ya wuce wajen aiki, Zahra da Iman makarantarsu daban, Fadeelah da Faruq haka, sai dai babu nisa tsakani.

"Nace ba zai yiwu ba koh? you're fifteen ta yaya zan fara baki tuk'i? kalli yayanki ki gani, wata shekarar