You Cannot Download this book untill you login but you can read it .

---

Login Register

Mallam Mahmud yace “ To ai abin naku ne ya fara ba ni tsoro matuƙa, ( ya dubeta sosai) ko kinsan duk wannan halinda musaddiƙ ya ke ciki na lalacewa kilishi ce ta yi masa asiri shekara da shekaru, rayuwarsa ta lalace ya kuma zama abin ƙyama, wannan abin da liman ya ƙona asirin ne da aka tono”. Mama Hauwa ta yi salati ta sanar da ubangiji tace “ Amma lalle Haj kilishi ta yi asara, bata jidaɗin rayuwarta ba ta kuma taɓe Allah ya yi mana tsari da irin wannan baƙar rayuwar”, Inna Halima ta watsa mata harara tace “ Allah yasa abinda ki ke faɗa har cikin zuciyarki ne, don dai lokaci ya yi da yakamata kema kisan Annabi ya faƙu”, a fusace tace “ kinga Halima ka da ki ɓata min rai, me ki ke nufi ne?”, tace “ Ina nufin ƙiyayyar da ki ke yi ma Afrah ki ajeta hakanan, don babu wani amfani”, nan da nan mama Hauwa ta ƙara harzuƙa tace “ Dama irin kallon da kuke yi min kenan na maƙiyiyar Afrah?”, Inna Halima tace “ ƙwarai kuwa, tunda ba ki taɓa jin tausayin maraicin Afrah ba, kamar yadda ba ki taɓa yi mata kallon ya ba, yarinyar nan har fargabar zuwa gidan nan take saboda mugun idon ki a kanta, kuma ai ba sai kin buɗe baki kince ba ki sonta ba ayyukan ki ne ke tabbatar da hakan”, jikin mama Hauwa ya yi laƙwas ta juya ba tare da ta ƙara cewa uffan ba ta shige ɗakinta domin ta fi kowa sanin Inna Halima ba zata raga mata ba, da alama kuma yau a shirye take da ta yi mata tonon silili. Na’ima ta saki labulen ɗakin da tun dazu take riƙe da shi tana hangen abinda ke faruwa, duka tare da mama Hauwa suka shige cikin ɗakin.

Inna Halima ta matsa inda Afrah take ta dafa bayanta, ta juyo da sauri tana ƙoƙarin goge hawayen da ke sauka a kuncinta.
Ganin hawayenta yasa nan da nan Inna Halima ta ji matuƙar damuwa, da sauri tace “Afrah menene kuma?”, shi ma mallam Mahmud da sauri ya matso yana ɗora ta shi tambayar akan na ta “ me yasa ki ke kuka?”.
Afrah tace “ Ina jin wani irin yanayi a tare da ni , Inna ina jin tamkar yaya Musaddiƙ yana cikin wata matsala, saboda bai taɓa fita aiki bai dinga kirana akai akai ba, musamman idan garin su ka bari, amma tun ɗazu da mu kayi waya har yanzu bai ƙara kirana ba, kuma abin damuwar shine yadda wayarsa take a kashe”.
Mallam Mahmud cikin damuwa, ya fito da ta sa wayar ya shiga kiran wayar Musaddiƙ, amma shi ma a kashe ya sameta.Inna Halima ta dubi Afrah tace “ Ba ki da nambar Haj Hudah, a kirata aji ko lafiya”, ta girgiza kai tace “ Ba ni da nambarta Inna”, ta ƙarasa maganar cikin nuna nadamar rashin aje nambarta ta a wayarta, gaba ɗaya sun shiga damuwa domin rashin sanin halin da Musaddiƙ ya ke ciki, daga bisani Inna Halima ta yanke shawarar ta tafi da Afrah gidanta, zuwa lokacin da za’a san halin da musaddiƙ ya ke ciki.Domin tana da yakinin in dai lafiya da kansa idan ya dawo zai taho gidanta ko gidan Mallam Mahmud din neman matarsa.

Tun shigar Mama Hauwa ɗaki ta zuba tagumi, danasani ne fal a ranta, “ wai Mama yanzu ana nufin shikenan Musaddiƙ zai dawo yadda ya ke kamar da, dan gayu, mai hankali da natsuwa?” Mama Hauwa ta waiwayo tana kallonta tace “ Ni ma tunanin da na ke yi kenan, ki kaga nadama ta fara cika zuciyata, domin dai idan har zai dawo musaddiƙ ɗinsa na da, babu da wacce ya dace sai ke, nadama na ke yi sosai, da na bari kin aure shi a yadda yake kinga da yanzu mun ci riba”, Na’ima ta saki ajiyar zuciya tace “ Eh mana Mama da mun sani mun karɓi umarnin baba, don dai musaddiƙ babu abinda ya rage shi sai wannan shaye shayen idan kuma ya daina to ni dai nan ta kusa banga namiji kamarsa ba”, Mama Hauwa ta gyara zama cike da takaici tace “ Mun yi gajen haƙuri, gashi kamar anyi miki ƙauri da jaɓa, babu wanda ke zuwa neman aurenki ko saurayi tun bayan auren Afrah ba na jin an zo kiranki zance sau uku, ba ki da wani mashinshini, idan nace abin nan baya damuna na rantse miki na yi ƙarya kin isa aure kin kai munzali, Afrah ƙanwar ki ce amma ta manta tana gidan mijinta sai ke gotai gotai da ke kullum muna jera kafaɗa da ke a gida”.
Na’ima ta cika da fushi ta zumɓuro baki tace “ Ni mama na ji kamar ki na son ki yi min gorin aure ne”, ta kwaɗa mata harara tace “ Mara kunya, idan ma gorin ne ba za’a yi miki ba, ni bansan inda ki ka samo baƙin jini ba don ni zamani na farin jinin da na yi ba’a magana, amma ki dube ki ki gani ko biki ki ka je ba kya samo saurayi sannan ki ce wai zan miki gori to anyi miki gorin”.
Haushi da takaici ya ƙara kama Na’ima tace “ To idan kin san hakane me yasa ki ka hana baba aura min musaddiƙ ai da kin bari ya aura min shi tunda na dame ki ban sani ba”. Mama Hauwa ta cigaba da kallonta cike da mamakin yadda yar cikinta da ta ba dukkan gata ta ke gaya mata magana tamkar ba ita ta haifeta ba, ta manta duk sanda ka koyama ɗanka cin mutuncin wani, ƙarshe wata rana na ka mutuncin zai ci, tace ba tare da ta ɗauke idonta a kanta ba, “ Ni ki ke gayama haka, bayan alokacin da na hana ki auren nasa gata na yi miki”, Ta miƙe tana tunkuɗo baki tace “ Gata? wannan ba gata ba ne, gashi nan Afrah zata shiga rayuwar daɗi da kwanciyar hankali, ga martaba da ƙarin soyayya da ta samu da ga baba, to ni me na tsira da shi?, Kawai za ki sa ni a gaba kina min gorin aure, ni ma ai nafi ki son na yi auren, ko na samu wajen sakewa". bata tsaya sauraren amsar da zata bata ba ta ɗage labule ta yi ficewarta, tana kunkuni tabar Mama Hauwa baki a wangame cike da tsoro da mamakin Na’ima da zata iya cewa ta canja.

Ƙarfe tara da rabi na dare, kofur Lawal ya ƙara leƙowa cikin cell ɗin fuska tamke ya dubi Haj Rakiya da Haj kilishi da suke zaune a takure cikin ƙaskanci, ya miƙa musu wayoyinsu yace “ Gashi nan ku ƙara gwada kiran nambobin mutanen da zasu yi belin ku”, gaban Haj Rakiya ya ƙara faɗuwa a karo da dama, numfashinta ya fara yin sama, bata taɓa sanin ta na tsoron mijinta haka ba irin wannan ranar, ko da wasa bata son yasan halin da take ciki, shi yasa ko ɗazu da aka kawo mata wayar ta kira me belinta ba ta kira shi ba, ƙawayenta biyu ta kira kuma babu wacce tace zata zo data gaya musu police station zasu zo su yi belinta sai su kama kame kame, har number Babaye dillali ta kira amma wayar shi na kashe, ta kira kawunta da shi kaɗai ya rage mata matarsa ta tabbatar mata da cewa suna asibiti tun rana hawan jininsa ya tashi , baisan wamda ke kansa ba, jin hakan yasa bata gayama matar kawunta komai ba. A yanzu bata da wani zaɓi da ya wuce ta kira mallam Tasi’u ta sanar da shi halin da take ciki. Cikin rawar hannu ta karɓi wayar, itama Haj kilishi cikin galabaita da rashin ƙarfin jiki ta amshi wayar, sannan kofur Lawal ya juya ya yi tafiyarsa. Haj kilishi ta kai hannu ta buge tarin sauron da suka yanyaɓe ƙafafunta, jikinta ya ƙara zugewa da zafi wani abu take ji a tsakiyar kanta ana fisgarsa, wanda idan aka fisga takan ji tamkar ana zare ranta ne saboda tsabar azaba.
Itama tunda ake kawo musu wayoyin su kira masu belinsu duka wayar Hassana da Hussaina akashe su ke tamkar waɗanda su ka haɗa baki, hakan yasa ta buga tagumi ta ƙurama wayar ido tana addu’ar Allah yasa ta same su yanzu, ko sa zo su cireta a cikin wannan masifar da take ciki, wannan cell da tashin hankali yake tun rana sauro ke kwasar rabonsa, tunda ko dare ya fara yi wasu irin manya manyan sauro bakake su ke yi tamkar zasu ja su, curi curi sauron ke sauka akan jikinsu, ga duhu babu haske, sai yanzu suka kunna hasken wayoyin su.
Su kansu basa jin daɗin kallon fuskokinsu saboda yadda suka fita hayyacinsu, itama Haj Rakiya har yanzu tagumi na kan kuncinta tana fargabar yadda zata kira mijinta.Bata sami ƙarfin guiwar kiransa ɗin ba har sai da ta ji Haj kilishi ta sami Hassana a waya cikin jigata daƙer maganarta ta ke fita saboda tsananin galabaitar yunwa da wahala da rashin sabo da zama a irin wannan wajen ta yi ma Hassana bayanin ta zo police station ɗin gangare ta yi belinta, hankalin Hassana ya yi matuƙar tashi ta so ta yi mata bayanin abinda ya kaita police station amma ta fahimci ba zata sami damar jin komai daga bakinta ba saboda ta fahimci tana cikin matuƙar tagayyara, don haka ta aje wayar tana kallon agogo dare ya yi amma bata da zaɓi da ya wuce ta tafi police station ɗin yanzu, gashi bata son mijinta yasan inda zata tafi wanda kuma tasan dole sai ya sani, ko da ba ta san laifin da tayi ba aka kaita wajen yansanda ba to fa tasan tabbas abin kunya ne da gori ace mahaifiyarka na ofishin yansanda a wannan daren. Tagumi kawai ta zuba tana tunanin ta yadda zata ɓulloma mijinta.
Cikin samun ƙarfin guiwa Haj Rakiya ta danna nambar Mallam Tasi’u, har ta ƙaraci kukanta ta katse bai ɗauka ba, a ƙalla sai da ta kira shi sau shida sannan ya ɗauka yana daga kwance gyefensa amaryarsa salaha tana danna masa ƙafafu yana lumshe ido ya na buɗewa yana jinsa kamar wani saurayi, sai da Haj Rakiya ta gama masa bayani, ta yi zaton zata ji shi cikin damuwa, ya na kuma tambayarta dalilin tsareta a wajen yansanda amma ga mamakinta sai ta ji yace “ Gaskiya bazan iya fitowa yanzu da daddaren nan ba sai dai ki yi haƙuri ki kwana sai gobe zan zo”, kawai ji ta yi ta fashe da wani kuka mai ƙarfin gaske tace “ Don Allah ka taimake ni ka taho yanzu, na rantse maka sauron wajen nan kaɗai ya isa ya yi ajalina”, tsawa ta ji ya daka mata abinda ba ta taɓa ji daga gare shi ba, nan da nan ta sami natsuwa, yace “ ke ba gidan uban da zan fito yanzu salon a sace ni, yadda babu tsaron nan, idan ba zaki bari sai gobe ba to ki san yadda za ki yi”, bata fita daga cikin mamakin da take yi ba kawai sai ta ji muryar mace tana cewa “wai wacece ne haka?”. Ta so jin abinda Mallam Tasi’u zai faɗa amma kawai sai ta ji ya katse wayar, kanta ya dinga juyawa jiri na fisgarta kamar zata faɗi, shin wacece a kusa da mijinta a wannan daren?, cikinta ya dinga ƙugi, shin me yake shirin faruwa ne?.

Cikin muguwar tsana da ƙiyayya ta juya tana yi ma Haj kilishi wani irin mugun kallon ta na ji tamkar bata taɓa tsanar wani abu ba sama da tsanar da ta yi ma Haj kilishi.ita kam Haj kilishi bata san ma me take yi ba domin kanta na ƙasa tun bayan gama wayarta da Hassana ta dafe kai tana jinta a wata duniya da bata saba da ita ba, inda kowa ke rayuwa irinta mahaukata wasu tsirara wasu suna dokin kara, wasu suna goye da tsummokara wasu ba ɗankwali, shin wannan wace irin duniya ce, nan da nan Haj Kilishi ta ɓalle gyelan kanta ta cire takalmanta ta goya su a bayanta. Cikin gigita Haj Rakiya ta yi baya tana faɗin “subhanallahi , lafiya kuwa Haj kilishi”, dariya ta fashe da shi tana nuna Haj Rakiya tana faɗin “ irin shigar mutanen duniyata kenan, nayi kyau ko”.
A gigice Haj Rakiya ta yi baya, tana kallonta tana so ta tabbatar da abinda take zargi, Haj Kilishi ta cire ɗankwaki ta wurgar ta yo kan Haj Rakiya ta shaƙe nan da nan idanun Haj Rakiya suka firfito ta shiga kakarin mutuwa, gami da ƙoƙarin yin ihu domin neman ɗauki, ihunta ya janyo hankalin jama’ar police station ɗin, da sauri kofur Lawal ya ɗauki makullin cell ɗin ya nufi cell ɗin a gaggauce domin sanin abinda ke faruwa da yasa Haj Rakiya irin wannan ihun me kama da na nemen ceton rai………………..



Yar gidan Imam✍️
https://chat.whatsapp.com/JUeJeOL9kA8AHOGOfXOnSZ



MUSABBABI BOOK 2

NA

HABIBA ABUBAKAR IMAM
( mrs Aliyu Mayere )

Page 9

Kofur Lawal ya na ƙoƙarin buɗe cell ɗin Haj Rakiya na ƙara sakin wani irin ihu, taga mutuwa ƙiri ƙiri duk idanunta sun firfito, ko da ya buɗe cell ɗin daƙer suka ɓamɓare hannun Haj kilishi a wuyan Haj Rakiya, aka fito da Haj Rakiya da sauri suka ƙara kulle Haj Kilishi.
Haj Rakiya na nurfarfashi tana ƙara jaddada musu cewa Haj kilishi fa ta haukace, ɗaya cell ɗin me mutane da yawa aka maida Haj Rakiya.
Insifekta da kofur Lawal da sauran yansanda haka suka tsaya cike da kaɗuwa suna tunanin yadda za suyi da Haj kilishi wacce ta cigaba da buge buge da sambatun maganganu wanda abin takaici duk irin mugun abun da ta yi ne take ta faɗa, kai Allah ka rufa mana asiri duniya da lahira, duk wanda ke cikin cell ɗin Allah wadai yake yi da halin Haj kilishi. Haka zalika babu wanda ya yi mamakin halub da ta tsinci kanta a ciki domin dai hauka itace ta dace da ita.
Duk sunyi jungum jugum suna tunanin yadda zasu karɓi wayar hannunta domin kiran yan’uwanta burinsu ɗaya ko babu kuɗin beli su zo su ɗauke musu Haj kilishi a police station. Kofur lawal ne ya koma wajen Haj Rakiya yana tambayarta ko tana da nambar wanin Haj kilishi da zasu kira, har zuwa lokacin Haj Rakiya ba ta dawo dai dai ba, ta dai gaya musu su jira ta riga ta kira yarta tasan tana hanyar zuwa.

Ba a ɗauki wani dogon lokaci ba bayan hakan, Hassana ta iso police station a cikin motarta, ta tadda tashin hankalin da ya fi wanda take ciki, dama ƙarya ta yi ma maigidanta ta taho, ta ce masa jikin Haj kilishi ne ya tashi shi yasa zata je gida cikin daren, to yanzu kuma ta zo ta tadda Haj kilishi cikin mugun hali na hauka tuburan, domin dai daƙer da taimakon sauran yansanda aka samu aka sanya Haj kilishi a cikin mota Hassanar ta ja motar cike da tsoro da fargaba. Har ta kai gida idanunta ba su tsagaita wajen fitar da hawaye ba, a gidan ma sai da taimakon baba maigadi aka samu aka shiga da ita cikin gidan, haka zalika baba maigadinnne ya bada shawarar a ɗaureta kafin gari ya waye asan abin yi da ita. Shi da kansa ya ɗaureta, sannan su ka yi zaman jugum a falon ko wannen su ya kafeta da idanu Hassana na kuka shi kuwa tunanin duniya ne ya cika zuciyarsa fal, lalle babu masifa irin ɗaukar hakkin wani, yau ku dubi yadda Haj kilishi ta koma mahaukaciya sai kace ba ita bace me izza da ji da kuɗi da take jin zata iya yin komai domin ta mallaki komai, yau ina ranar duk abinda ta tara, da ba za su iya yi mata amfanin komai ba. Duk yadda hankalin Hassana yake ya tashi ta rasa ta inda zata fara, ta san mahaufiyarta da son rai da son zuciya sai dai bata taɓa zaton zata iya lalata rayuwar musaddiƙ ba haka, duk da tasan bata ƙaunarsa, domin irin mugayen maganganun da Haj kilishi ke faɗa da bakinta na irin abinda ta aikatama musaddiƙ harda mahaifinsu, haka zalika tayi tayi ta hanata maganar amma hakan ya faskara, ga bacci ya ƙauracewa idanunta, haka Hassana tayi ta kuka har ta ba uku lada.
Baba Magadi ya cigaba da zama tare da su, domin ya na tsoron tashi yabar Hassana ita kaɗai da Haj kilishi, duk da dai tana ɗaure.

Ƙarfe ɗaya saura minti biyar na dare Afrah na zaune a tsakiyar gadon Inna Halima ta haɗe kai da guiwa, tunanin inda musaddiƙ ya shiga ya tsaya mata arai, tun tana kuka har hawayenta suka ƙafe, Inna Halima ta dafa kafaɗarta cike da tashin hankali tace, “ Afrah ki samu ki sami bacci ko ya ya ne, zuwa gobe ba zamu cigaba da rungume hannu ba, zamu nemi gidan Haj Hudah zamu je don sanin inda musaddiƙ ya ke”, ta saki ajiyar zuciya tace “ Inna bazan iya bacci ba ba tare da nasan halin da yaya musaddiƙ yake ciki ba”.Inna Halima tace “Haba Afrah, ki sassautama kanki wannan tunani da damuwar, in sha Allah babu abinda ya sami musaddiƙ”, Afrah ta yi saurin janyo waya ta kira Baba maigadi yana ɗauka kafin yace komai ta shiga tambayarsa ko Musaddiƙ ya dawo gida, yace “ Bai dawo ba Afrah, sai dai mu nan muna cikin tashin hankali”. Ta yi gaggawar cewa “ Me ya faru?”, sannu a hankali ya sanar da ita komai, fargaba da mamaki ya yi mugun kamata ta yi ƙasa da wayar, Inna Halima na tambayarta abinda ya faru, ita kuwa sunan Musaddiƙ kawai take ambata tunaninta ya ƙara tsananta akan halin da yake ciki, domin bata raba ɗaya biyu haukar Haj kilishi tana da nasaba da karyewar asirin, to idan hakane kuwa shi musaddiƙ ɗin me yake faruwa da shi a yanzu. Daƙer ta sami natsuwar gayama Inna Halima abinda yafaru da Haj kilishi.
Inna Halima itama ta firgita da jin hakan, wato yanzu tun a duniya Allah yake yin hisabi, ya Allah kasa mu gama lafiya, Allah yasa mu fi ƙarfin zuciyar mu ya ba mu ikon aikata alheri.Tun a wannan daren suka sanar da mallam Mahmud halin da Haj kilishi take ciki, yadda yace a wajen Allah su ke neman sakayya to ga shi nan Allah ya yi nasa sakayyar, duk da zafi da ƙiyayyar da yake ji na Haj kilishi bai hana shi yi mata addu’ar samun lafiya ba.

Haj Hudah tana gefen musaddiƙ har yanzu da agogo ya nuna ƙarfe biyu na dare bai dawo hayyacinsa ba, ta kasa tafiya ko’ina duk da akwai masu kula da marasa lafiya, ta ƙi tafiya ita kaɗaice ke zaune da shi. Ta ɗora kanta akan hannunsa wanda babu ƙarin ruwa tana jin ɗumin jikinsa, duk da ta ƙosa ya dawo hayyacinsa amma tana jin ina ma rayuwarta ta cigaba da kasancewa a haka tare da musaddiƙ. Lokaci ɗaya ta ji wani takaici ya rufeta alokacin da ta tuna musaddiƙ yana farfaɗowa to fa ya zama dole ta kira matarsa domin ta sanar da ita halin da mijinta yake ciki, ko a yanzu rashin sanin makullin sirrin da ya sa ma wayarsa ya hana mata kira duk da ba haka ranta ya ke so ba.
Sosai take ƙara jin ƙaunar musaddiƙ mai tsanani a cikin zuciyarta,
Tana jin tamkar ba zata iya cigaba da jure ɓoye soyayyarsa ba a cikin ranta.
Bacci ya fara kwasheta kenan wajen goshin asuba, kanta na kan hannunsa har zuwa lokacin, musaddiƙ ya saki wani dogon numfashi gami da yin salati wanda ya yi sanadiyyar farkawar Haj Hudah da sauri ta tashi tana cewa “ Alhamdulillah, musaddiƙ ka farka, sannu”, ya yi zumbur ya tashi ya zauna gami da zare oxcigine ɗin da ke fuskarsa ya na yi mata kallon mamaki ta ƙara matsowa kusa da shi sosai, irin kallon da yake mata yasa ta ji tana da buƙatar sanar da shi abinda ya faru da shi. Hakan yasa sannu a hankali ta warware masa dalilin kawo shi asibitin, da sauri ya shiga waige waigen neman wayarsa, ta tura hannu cikin jakarta ta fito da wayar ta miƙa masa.
A gaggauce ya kunna bayan ta kunnu ya ya cire makullan sirrin wayarsa, Afrah kawai yake ƙoƙarin kira, amma kafin ya sami damar kiran ,sakonnin Afrah ne ke ta kokawar shigowa cikin wayar tasa, hannu kawai Haj Hudah ta harɗe tana kallon yadda bai damu da halin da yake ciki ba fiye da kiran Afrah, bata ji zafi a ranta ba, har sai da ta ji yadda musaddiƙ da Afrah ke faɗama juna kalamai masu ratsa zuciya, tana jin yadda Afrah ke rusar kuka a waya tana faɗin zata taho Abuja.
Sun ɗauki tsawon lokaci a waya kafin su iya aje wayar, kawai Haj Hudah ji tayi hawaye na neman ɓalle mata saboda tsabar kishi, kishin da bata taɓa jin irinsa ba ko da akan mijinta ne.
Ta juya ta fice daga ɗakin ba tare da ta iya cewa uffan ba.
Mallam Mahmud Inna Halima ta fara gayama halin da musaddiƙ yake ciki, tare da gaya masa idan gari ya ƙara haske zasu tafi Abujan domin ganin halin da yake ciki. Hakan yasa tun bayan idar da sallar asubah, mallam mahmud ya yi ma Liman bayanin halin da Musaddiƙ yake ciki. Mallam Liman ya nuna masa kada ya damu, domin ga dukkan alamu , aman da ya yi aman irin abubuwan shaye- shayen da ya yi ne, aman kuma shaida ne, na cewa Musaddiƙ ya dawo cikin nutsuwarsa, ya dawo mutum kamar yadda ya ke da, haka zalika duk wani sihiri da ke jikinsa ya karye. Amma duk da haka Liman ya yi rubutu, an wanke an ɗura a cikin roba, ya kuma tabbatar ma Mallam Mahmud da sun je wajen musaddiƙ ɗin ya ba shi rubutun ya sha, ya kuma shafe jikinsa, Mallam Mahmud ya amsa cike da godiya me yawa.
Murtala Afrah ta kira ta sanar da shi halin da musaddiƙ ya ke ciki a Abuja, Murtala ya tabbatar mata da cewa zai taho yanzu su tafi Abujan.
Cikin ƙanƙanin lokaci kuwa Murtala ya iso, ya kwashi Afrah da Inna Halima sannan suka wuce su ka ɗauki Mallam Mahmud suka yi ma Abuja tsinke. Suka bar Mama Hauwa cikin damuwa da daburcewa, danasaninta ya ƙara yawa, tabbas Afrah ta yi dacen miji matuƙar ya dawo musaddiƙ ɗinsa na da, shin ina Na’ima zata sami miji kamarsa, ji take ta kasa samun natsuwa.
Musaddiƙ jinsa yake kamar wata sabuwar halitta ji yake kamar wanda ya farka da ga bacci, ita kanta Haj Hudan wani irin kallo yake mata tamkar wanda bai yarda da ita ba. Har su Afrah su ka iso asibitin bai dawo dai dai ba. Afrah ta ga yadda nan da nan ya rame, tamkar ya daɗe yana jinya. Idanunta cika su kayi da hawaye, idon Musaddiƙ na kanta yana jin soyayyarta ta na ƙara cika zuciyarsa, ya kirata da hannunsa, ya nuna mata kusa da shi, alamar ta zauna, cikin hawaye ta wuce ta je ta zauna, ya ƙura mata idanu na tsawon lokaci, idanunsa babu komai a ciki face tsananin ƙaunarta, “ sannu yaya Musaddiƙ” ta ƙarasa magana ta na goge hawaye, ya girgiza kai ba don idanun su Inna Halima ba tabbas da ya rungume Afrah a ƙirjinsa, yace “ ki daina kuka, ba ki ga na