You Cannot Download this book untill you login but you can read it .

---

Login Register

ta je ta zauna tare da ita. Nan ma ji ta yi wani abu ya tsaya mata arai, haka nan ta ji a ranta tana son ganin wannan matar ta sa, da ta fahimci bai hala kowa da ita ba.
Taso ace mijinta Alh yusuf sanda ne yake yi mata irin wannan tarairayar.
Ta maida bayanta ta kwantar a jikin kujera, ya zama dole yau dai ta gano dalilin irin wannan rikicewar da tayi akan musaddiƙ.
Har su kayi taron suka tashi Haj Hudah bata cikin nutsuwarta, hatta abinci juya cokalin kawai take yi, ta kasa cin komai. Sosai Musaddiƙ ya lura da halin da take ciki, ko kaɗan bai kawo damuwar al’umma bace kwance a fuskar Haj Hudah ya fi yarda da cewa damuwar mijinta ke nuƙurƙusar zuciyarta. Tabbas ko shi ya na jin tausayinta domin ba ko wace mace bace zata ɗauki wannan ƙasƙancin na wofintarwa daga mijinta, duk da dai baisan wane tsari suka tsarawa kansu ba, to amma a ganinsa tamkar akwai ɗaukar hakki.
Don dai magana ta gaskiya a ɗan zaman da su kayi bazai taɓa yi mata shaidar tana bin maza ba, don haka a matsayinta na cikakkiyar mace tana da damar da zata shiga damuwar rashin miji a kusa da ita. Sauri ya yi ya watsar da tunanin , don ɗabi’ar sa ce rashin son shiga abinda babu ruwansa. Kawai dai yasan shi wani irin mutim ne da baya son ganin ɗan’uwansa musulmi cikin damuwa.
Ƙarfe shida na yammaci su ka shigo minna, har kuma zuwa wannan lokacin Haj Hudah bata saki ranta ba, damuwarta na nan a maƙale a fuskarta.
Bayan isar su gida, sallama kawai su kayi ta shige gida da sauri, ta haye sama ta yaye labulen windo ta zubama musaddiƙ ido, yana ta wasa da dariya da masu gadi, komai ya yi burgeta yake yi, ta daɗe tsaye tana kallonsa har sai da ya yi sallama da kowa ya buɗe get ya fice sannan ta saki ajiyar zuciya, ta sulale ƙasa ta yi zaman dirshan.

Hakanan ta ji wasu sanyayan haeaye suna fita babu ƙaƙƙautawa, ta ɗora kanta jikin kujera tayi kuka mai isarta, har sai da jikinta ya ɗauki zafi, domin dai a yau a cikin kuma wannan lokacin ta tabbatarma kanta da cewa son musaddiƙ take, ta runtse idanunta tana girgiza kai, zuciya ba ta da ƙashi, baka sanin sanda so yake shiga cikinta, idan banda haka ta yaya tana matsayin matar aure amma ace zuciyarta tana son wanin mijinta, subhanallahi! Wace irin ƙaddara ce wannan, ta yaya zata ba zuciyarta abinda ta ke so bayan bai kasance na ta ba, shin ta yaya zata cire son musaddiƙ a cikin zuciyarta bayan tana jin tamkar zata zauce akan son na sa, ta ya ya zata iya ɓoye wannan nannauyan al’amarin bayan idan tana tare da musaddiƙ bata iya mallakar tunaninta balle kanta .

Tana son mallakar musaddiƙ ko da na yini ɗaya ne, wata zuciyar ta shiga kwaɓa mata, ta yaya zaki faɗa mummunan hanya wacce bata da wajen ɓullewa, kin san girman zunubin da ki ke ɗaukar ma kan ki kuwa na kawai kina son sa, balle kuma ta kai ga kin keɓe da shi, shin bakya ganin irin ɗimbin girma da kima da musaddiƙ yake baki, bakya tsoron duk ranar da ki ka ne me shi da wannan maganar duk girman ki zai xuɓe karshema ya na iya maida ke wata abin kyama yadda kuma yake son matarsa abu ne mawuyaci ya iya cin amanarta, ƙarshe babu abinda zata tsira da shi sai kiyayyarta da zai zauna a cikin zuciyarsa.

Duk wannan kashedi ne da tunatarwa daga zuciyarta, kawai Haj Hudah ji tayi ta ƙara rushewa da kuka mai tsanani, ita kanta tasan abar tausayi ce, domin duk wanda yake cikin saɓon Allah to lalle ya zama abin tausayi. A wannan daren duk abinda Haj Hudah ta saba yi bata yi ko ɗaya ba, hatta abinci bata iya fitowa ta ci ba, wanka kawai ta samu ta iya yi shi ma bata shafa ko mai ba, kayan bacci kawai ta zura ta haye gado ta ja bargo, wani ƙarin tashin hankali da zaran ta rufe ido babu wanda take gani sai musaddiƙ, karfe sha ɗaya da rabi na dare wayarta ta ɗauki ƙara , daƙer ta iya ɗago kai ta duba mai kiranta, ganin Alh yusuf sanda ne a hankali ta saki tsaki ta maida kanta ta kwantar.
Ji wani rashin adalci ba ka tare da mutum amma ka kira ka ji halinda matarka take ciki ya gagara, kira kawai fa, haba tun wayewar garin yau kwata kwata bai kira ba, itace dama ta saba kiransa to itama ta dake ta ƙi kira wanda hakan baisa shi ya kira ba, ta ƙara sakin tsaki a lokacin da ta tuna yadda yadda duk bayan awanni musaddiƙ ke kiran matarsa don kawai ya ji lafiyarta, tabbas da magidanta zasu san illar rashin kiran matansu a waya da sun daina. Ta yi zaton zai ƙara kira amma ga mamakinta bai ƙara kiranta ba. Ta maida idonta ta rufe tana addu’ar Allah ya kawo mata bacci.

Wasa wasa dai ciwon Haj kilishi sai gaba yake, bayan ciwon ƙirji da kai, yanzu harda ciwon ƙafa, kullum zuwa ganin likita wani lokacin ma har gado su ke bata na yan kwanaki kafin su sallameta, magunguna kuwa harda na banza, kuɗi take kashewa sosai akan neman lafiyarta, sai dai duk da tana cikin wannan halin ba ta yi tunanin saduda ba, domin tuni ta ɗora Haj Rakiya akan ta dinga wakiltarta a wajen boka Tsiduhu da mai Rakwacam, ita take ba duk kuɗin da ake buƙata ta kai to tana kai dai na Mai Rakwacam tunda shi Haj kilishi tana nambar wayarsa suna waya dole ta rufama kanta asiri ta dinga kai masa, sai dai duk da haka tana ƙarawa tana cire nata ta kai masa na shi. Na Tsiduhu kuwa sammasa take ta riƙe sauran, duniya ta zamar mata sabuwa, ta canja kujeru ta yi abubuwa da dama da zasu amfaneta, ta gane duk bin malaman da su ke yi ƙarya ce kawai sa’a ne , gaskiya ta dawo daga rakiyar abubuwa da dama.
So tari ma ji take kamar ta je ta raba kanta da nauyi ta hanyar tone asirin da su ka yi ma musaddiƙ, domin bata san dalilin da yasa take jin tausayinsa ba yanzu da zaran ta gan shi, domin yadda yanzu ya dage da yin yaƙi da ƙaddararsa ya sa ƙaimi wajen dawowa mutum nagari. Domin da kansa mai Rakwacam ya yi mata bayanin yanzu fa shi ma musaddiƙ tsaye yake da addu’a kuma akwai addu’ar da matarsa take bashi yana sha matuƙar yana sha kumq babu abinda zai iya yi masa, asalima idan ya cigaba da sha hatta asirin da aka taɓa yi masa da zai warware zai bar jikinsa ko da ba’ a tone asirin ba, me yiwuwa shi yasa a yanzu ake ganin canji a tattare da shi.
Alokacin da ta yi ma Haj kilishi wannan bayanin, hatta yawun bakinta sai da ya ƙafe, kirjinta ya shiga suya fiye da yadda yake yi. Afrah ta zamar mata ƙadangaren bakin tulu. Shin ina mafita, bata jin zata rungume hannu tabar abinda yake shirin faruwa ya faru, don haka ta dubi Haj Rakiya tace “ ki ƙara nemo min wasu gawurtattun malaman na yarda da ke da amanarki, yadda ki ke rike sirrina bana ɗar ko kaɗan wajen damƙa miki amanata, saboda haka ki je ki bincika min ko nawa ne zan iya kashewa don ganin bayan Afrah da musaddiƙ”. Haj Rakiya ta lumshe ido ji take kamar ta gama mallakar komai ta jinjina kai tace “zaki same ni me ƙara rike amanarki, zan kuma bincika miki kada ki damu ki kwantar da hankalinki kinga ba lafiya ce da ke ba”, kai ta haɗe da guiwa wasu hawaye masu ɗumi suna fitq matq, Haj Rakiya bata bata haƙuri ba barinta ta yi ta ci kukanta ta ƙoshi, ita kam babu abinda take saƙawa sai yadda zata dumbuli dukiyar Allah ya isan Haj kilishi, lalle an ba kura ajiyar nama, ta yi wani murmushi mai ƙayatarwa, lalle yadda musaddiƙ ya yi mata hanyar arziƙi, da zaran ta gama tatse Haj kilishi da kanta zata je ta haƙe asirin ƙasan kuka ta maida musaddiƙ yantacce, kamar yadda ya yi sanadoyyar maida rayuwarta yantacciya………………..


Yar gidan imam✍️
https://chat.whatsapp.com/JUeJeOL9kA8AHOGOfXOnSZ



MUSABBABI BOOK 2
Na

HABIBA ABUBAKAR IMAM
( mrs Aliyu Mayere )

Page 4

Cikin alfarmar Allah, Afrah ta sami gurbin shiga makaranta, inda zata karanta acounting, murtala ya yi ƙoƙari sosai, domin hatta Mallam Mahmud da Inna Halima sai da suka yi masa godiya. Musaddiƙ ya ba kowa mamaki yadda bai nemi taimakon kowa ba da albashinsa ya samu ya gama yi ma Afrah duk hidimar makarantar.
Ana gobe zata fara zuwa makaranta kuwa musaddiƙ ya shigo mata da baƙar leda ɗauke da ɗinkakkun hijabai da sabbin niƙaf harda safa. Afrah jinta take kamar babu wanda ya fita sa,ar miji duk duniya, domin dai ta fahimci musaddiƙ bashi da buri sai na ya sanyata farinciki, tayi masa godiya mara adadi, haka zalika ya ƙara shiga ranta fiye da tunanin me tunani, soyayyarsa ta ƙara kamata bata da wani buri itama da ya wuce ta gan shi cikin farinciki da kwanciyar hankali gami da nutsuwa.
Komai yana tafiya yadda mafarkin Afrah ke nuna mata, abubuwan da bata taɓa zaton zata same su nan ta kusa ba. A ranar da zata fara zuwa makaranta ta shiga ɓangaren Haj kilishi domin ta dubata da jiki sannan kuma ta gaya mata batun fara zuwanta makaranta kamar yadda musaddiƙ ya yi mata umarni wanda ba don haka ba ba ta yi niyyar shiga ba balle ta gaya mata komai, tunda dai don ta ciwon da take yi ne abin yq kusa zama jiki.
Yau duka Hassana da Hussaina ne a gidan suna jinyarta tare, Afrah ba tayi mamakin ganin Hussaina ba, tunda musaddiƙ ya kirata a waya ya yi mata tatas akan taƙi zuwa ta gaida mahaifiyarta sai taga dama sannan zata leƙo sau ɗaya, tana ganin dalilin da yasa ta zo ta zauna kenan yau.
Daker Haj kilishi ke ciɓa ƙafarta tana bin bango ta fito daga banɗaki, cikin gajiya ta faɗa kan gado ta ɗan kishingiɗa gami da ɗage ƙafafuwan nata da suke yi mata azaba tamkar zasu bar jikinta.
Afrah ta yi mata sannu, sannan ta sanar da ita maganar fara zuwa makarantarta.

Tamkar an watsa mata garwashin wuta, ta dubeta da birkitattun idanunta da babu komai a cikinsu sai tsananin ƙiyayya da tsana, sun kaɗa sunyi jawur, murya a cushe tace “To zaman aure za kiyi ko yawon zuwa makaranta?”, Afrah ta dubeta lokaci ɗaya ta miƙe ta gyara zaman niƙaf ɗinta a fuska, sannan tace “Duka zanyi, in sha Allah da taimakon ubangijina”, tana gama faɗin haka ta juya gun su Hassana tace “Allah ya bata lafiya, Hassana ni na tafi makaranta”. Duka su biyun su ka haɗa baki su kace “Allah yasa a fara a sa’a”, cikin jindaɗin addu’ar Afrah tace “Amin nagode”. Dagananan a gaggauce ta fice.
Haj kilishi ta dafe ƙirjinta da hannu ɗaya sannan ta maida idonta ta rufe, wani abu ke yi mata yawo a duka sassan jikinta mai matuƙar zafi da ƙuna.
Karo da dama kenan da ta yi tunanin menene ya hana Haj Rakiya zuwa yau da wuri tana matuƙar son yin magana da ita, ta buƙe idanunta ta janyo wayarta a karo da dama ta ƙara kiran wayarta amma wayarta na kashe, ta maida wayar a hankali ta aje ta na saukar da numfashi.
Afrah zata cigaba da karatu idanunta zasu ƙara buɗewa, zata kara fahimtar komai, a hankali wata magana da boka mai Rakwacam ya taɓa gaya mata ya faɗo mata a rai, “ idan ki kayi wasa wannan yarinyar itace zata zama sanadiyyar tonuwar dukkan asiranki”. Gabanta ya ƙara faɗuwa, tabbas alamu sun fara nuna haka, amma bata isa ba zata yi yaƙi da Afrah ko da zata rasa makaman yaƙin, ba zata taɓa yarda Afrah ta kaita ƙasa ba.

Afrah bata samu wata matsala ba a makarantar saboda ta saba mu’amala da mutane,ta cigaba da kare kanta da mutunta kanta, musamman irin shigar da take yi,dole duk wani me mutunci ya mutuntata mara mutunci kuma dole ya yi shakkar takata. Sai dai ta fahimci ba zata iya haɗa karatunta da koyarwar islamiyya ba, saboda wani lokacin yana haɗuwa da dai dai zuwa makarantar ta, don haka dole yasa ta aje koyarwar ba wai don tana da zaɓi ba.
Aje koyarwar kuwa sam baiyi ma ya sayyadi Habib daɗi ba,
Amma babu yadda ya iya tunda cigaba Afrah ta samu, kuma yasan babu abinda yake so irin cigabanta, yasan burinta akan karatu, don haka sosai ya tayata murna tare da yi mata fatan alheri, ya kuma sanar da ita ƙofarsa a buɗe take a duk lokacin da take buƙatar tallafinsa, ya kuma ƙara tabbatar mata da cewa kullum musaddiƙ na cikin addu’arsa da yara sauran ɗalibanta, in sha Allah yadda rayuwa ta fara yi musu kyau haka zata cigaba har zuwa lokacin da Allah zai kawo ƙarshen komai, sai da har cikin zuciyarsa yasan sunyi asarar malama mai ɗimbin sani da kaifin tunani sama da shekarunta, zahiri Afrah babu abinda zata ce da ya sayyadi domin shi ɗin mutumin ƙwarai ne, samun irinsa sai an tona, daga masoyi ya zamar mata yaya mai kula da lamuranta.

Sosai Afrah ta dage da yin karatu domin tasan dama sau ɗaya take zuwa a rayuwa, duk kuma wanda ya sami dama bai kamata ya yi wasa da ita ba. Tana kuma son ta zama abin alfaharin musaddiƙ, ta gefe ɗaya kuma bata taɓa ɗaga ƙafa wajen cigaba da yi ma mijinta addu’a ba kamar yadda ba ta ɗauke zargin Haj kilishi a cikin zuciyarta ba, sai dai ta bakin Inna Halima ne tunda bata da wata shaida dole ta rufe bakinta ta cigaba da yin abinda ta ga ya kamata wato cigaba da yi masa addu’a tare da karanta masa ayatul sihir kullum yama sha kamar yadda ta saba, addu’a takobin mumini ce don haka tana da yaƙinin zata sami dacewa komai daren daɗewa.

Wannan makon Alh yusuf sanda ya dawo, sai dai duk yadda Haj Hudah ta matsama zuciyarta ta jidaɗin dawowarsa ta kasa, yadda take ɗokin ya dawo wannan karon komai ya canja, asalima gata ga shi amma wani al’amari me dasa tashin hankali a gareta shi ne yadda suffar musaddiƙ ke bayyana a cikin idanunta, hatta sha’awa irin ta aure babu a tare da ita nasa, duk iya daɗewar da ya yi bata jin wani shauƙi na son kasancewa tare da shi, shin wannan wace irin masifa ce ta yanko ta faɗo mata.
Karfe ɗaya da rabi na dare ne, Basu daɗe da gama aiwatar da sunna ba, sai dai duk cikinsu babu wanda ya samu wani gamsuwa, adalilin kowa ya yi ne cikin rashin jinfaɗin zuciya, a hankali Haj Hudah ta jiyo da kanta tana kallon Alh yusuf sanda wanda idonsa ke rufe, a ganinta baida wata matsala da alama har ya koma bacci, a hankali ta zare kanta daga cikin bargon ta zuro ƙafafunta ƙasa ta miƙe, ta lalubo doguwar rigar baccinta ta sa, a hankali ta buɗe ƙofar ɗakin ta fita zuwa falo, ta nemi ɗaya daga cikin kujerun ta zauna gami da sakin wata ƙatuwar ajiyar zuciya ta runtse idanunta gaba ɗaya, hawayen da take ƙoƙarin hana su sauka sune suka fara fita daga kwarmin idanunta.
A hankali Alh yusuf sanda ya buɗe idanunsa yana jinjina kai, lokaci ɗaya shi ma ya tashi ya gyara kayan dake jikinsa, sannan ya taka a hankali zuwa bakin ƙofa, ta saman ƙofar inda aka bar ɗan rami wanda kana iya ganin mai shigowa ɗakin, anan ya tsaya ya ɗora idonsa akai, hakan ya bashi damar hango Haj Hudah tana sharar hawaye, lokaci ɗaya kuma ta buɗe wayarta ta fito da ɗaya daga cikin hotunan da aka ɗauke su tare da musaddiƙ da sauran jami’an tsaronta a lokacin wani taro da suka je aka ɗauka.
Duk da Alh yusuf sanda baisan abinda take kallo ba a cikin wayar, tunaninsa tuni ya tafi inda ya karkata.
Haj Hudah ta ƙurama faffaɗan ƙirjin musaddiƙ ido, nan mafarkinta yake son ta kwanta, ta dubi dantsensa me alamun ƙarfi da nagarta irinta ɗa namiji, nan ma ji tayi tsigar jikinta na tashi, ta dawo da kallonta kan lallausan sajen fuskarsa da ya kwanta luf baƙi sidiƙ, ta lumshe ido tana jin wani irin sonsa yana fisgarta kamar yadda mayen ƙarfe ke fisgar ƙarfe.
Ta kai hannu ta shafi bakinsa ɗan matsakaici, duk da dariyar da ya yi a waya baisa bakinsa ya faɗaɗa ba.
Idanunsa masu cike da gaskiya, da son ganin kowa cikin farinciki, ta ƙara zubama ido, musaddiƙ baida makusa, shin ya zata yi ta yaƙi zuciyarta daga son musaddiƙ da tasan masifa ce a gareta, lalle wannan yana ɗaya daga cikin dalilin da yasa addinin musulunci ya hana keɓencewa tsakanin mace da namiji da ba muharraman juna ba sabida fitintunun da hakan ke haifarwa.
Hakika da tasan inda labarin zai kaita da bata ko yarda ta haɗu da musaddiƙ ba balle harta faɗa cikin wannan masifar, tunda ta gane tana sonsa take ƙoƙarin yin yaƙi da zuciyarta domin ta cire sonsa a ranta amma abin ya faskara, ta yi yunƙurin daina ganinsa don har hutun kwana bakwai ta bashi amma a daddafe ta iya kwana biyu bata ganshi ba, da kanta ta kira shi tace ya dawo bakin aikinsa, to ta ya ya ta ina zata iya fita daga wannan ƙangin.
Kawai ji ta yi ta ƙara rushewa da kuka tasa hannu ta toshe bakinta gudun kada sautin kukan nata ya taso Alh yusuf sanda.
Sai dai abinda bata sani ba shine babu abinda bai gani ba, cikin wannan murmushin nasa ya juyo ya jingina jikin ƙofar ya haɗe girar sama da ta ƙasa, kai kace abin da ya gani ya dame shi, amma kawai daga bisani sai ya bushe da dariya sosai ya taka da ƙarfinsa ya koma kan gado ya kwanta ya janyo bargo, babu damuwa ko kaɗan a tare da shi, sai ma wani nishaɗi da ya ji yana yi, yana kuma fatan a cigaba da tafiya a hakan. Ya yi tunanin yadda yaga mugun canji daga Haj Hudah tun kafin ya dawo, yanzu kuma bayan ya dawo ya ƙara fahimtar canjin da tayi ya wuce ma yadda ya yi tunani, sai dai ko ajikinsa.Baccinsa ne mai daɗi ya yi awon gaba da shi tabbatar da gaske baida damuwa akan ko ma wace matsala matarsa ta ke ciki.

Cigaba da karatun Afrah fa ya ƙara dagulama Haj kilishi lissafi, malaman bogi uku Haj Rakiya ta ƙara samowa inda suke gudanar da kasuwancinsu cikin kwanciyar hankali, domin dai Haj kilishi kuɗi kawai take fitarwa domin biyan buƙatarta, wata rana idan ta ji ɗan sauƙi suna tafiya tare, ko kaɗan bata taɓa sawa a ranta wai Haj Rakiya zata iya cutarta ba ko cin amanarta ba, hakan yasa hankali kwance take wadata ta da komai, hatta ciwon da take yi yanzu neman taimako take yi akansa, Haj Rakiya kuwa harka ta buɗe.
A wannan tsakanin Afrah ta fara jin ciwo me tsanani a cikinta, tana matuƙar daurewa domin bata son musaddiƙ ya sani balle ya tada hankalinsa, sau tari wani lokacin a makaranta sai taje wajen shan magani ta karɓi maganin ciwon ciki ta kan kuma kwanta anan wani lokacin harta rasa lectures, ciwon na damunta, nan da nan ta fara ramewa, wanda ko musaddiƙ ya tambayeta meke damunta ne takan nuna masa karatune kawai ya sata gaba.
A yau kuwa tun safe Haj Rakiya ta nufi rugar mai Rakwacam bisa umarnin Haj kilishi domin ta karɓo maganin da ya debi kwanaki yana haɗawa na ciwon Haj kilishi, sai na ɓangaren musaddiƙ da Afrah amma wannan karon shi ma shirmensa kawai ya haɗa tunda ya fahimtar da ita asalin gaskiyar, Afrah da musaddiƙ na cikin kariya da katangewar ubangiji babu wani abu da zai iya cutar da su, amma ta dage dole asamo wata mafitar shi yasa tunda ba ya son rasa kwastama yasa ya fara yi mata aliya acikin aikin,
Rana fatsar fatsar ta isa rugar, amma wani abun tashin hankali, a wajen bukkar mai Rakwacam ta tadda mai Rakwacam ɗin an kwantar da shi a cikin wannan zazzafar ranar, akan tabarmar karauni, gefensa wasu tsoffi ne guda biyu marasa ko kyan gani, ɗaya gefensa matarsa ce domin Haj Rakiya ta santa sosai wani lokacin ma hannunta suke karɓar magani idan yq bar mata ajiya baya nan, duk ta kwantsame ta buga tagumi hannu biyu, idanun Haj Rakiya yana ɗore akan mai Rakwacam tana ƙoƙarin gano abinda ke faruwa.
Idonta ya sauka akan cikinsa da ya yi ƙato tamkar mai shirin haihuwa ko yau ko gobe ya, idanunsa duk da suna rufe su ma sun kumbura matuƙa sun ɗago sosai kamar zasu fito waje, ta fahimci hatta numfashi wahala yake yi masa, ta matsa a hankali wajen matarsa tana kallonta cike da kaɗuwa tace “sannu dai”, ta ɗago ta yi mata kallon tsaf sannan ta amsa a hankali, “ sannu ka dai”, ta ƙara kallon mai Rakwacam tace “ me ya sami boka ne, na ganshi a haka”.
Ta aje wata nannauyar ajiyar zuciya cike da ɗimbin tashin hankali da fargaba tace “Azal ce ta faɗo masa, tun jiya da daddare yana kan yin wani aiki kawai aka yi wata irin tsawa ta kuma faɗa masa, tun cikin daren a haka yake bai ko yin motsi ga ciki ya kumbura ga idanu duk sun fito daker muka iya rufe masa su, amma kinga harshensa har yanzu a waje yake duk ya zaro mun rasa yadda za’ayi ya koma”, ta juyo ta nuna tsofaffin dake tsugune gabansa tace “ Tun daren muke kiran abokan aikinsa bokaye yan’uwansa amma babu wanda ya iya tsinana masa komai, waɗannan su ma gawurtattun bokaye ne amma tun asuba suke gabansa har yanzu sun kasa yin komai, na karaya domin na yi imani wannan daga Allah ne”.
Taga taga Haj Rakiya ta yi kamar zata faɗi saboda kaɗuwa da razana, ta kasa cewa uffan sai ido da ta ƙara ɗorawa mai Rakwacam tunani ya cika zuciyarta lalle wanda suka kauce hanya suna zuba kuskure a rayuwarsu, yau ga mai Rakwacam ko kansa bazai iya taimaka ba balle ya taimaki wani. A gaggauce ta bar gidan ba tare da ta ƙara tofa wata magana ba. Gaba ɗaya jikinta ya yi sanyi, sakayya ce Allah ya fara yi ko yaushe ta su sakayyar zata zo oho?, tunanin hakan yasa Haj Rakiya ƙara tsorata da kaɗuwa, ta firgita tsoron Allah ya kamata jikinta har rawa ya ke yi. Haƙiƙa a yau ɗin nan ba don tana da wata manufa ba da daga nan kai tsaye bakin kuka zata dire ta tone asirin da aka yi ma musaddiƙ, ta kuma nemi gafarar Allah tun kafin ya yi mata kamun huhun goro.
Amma ina tana da abinda da take son cimma, gidan da ta fara ciniki take son ta gama samun kuɗin a jikin Haj Kilishi da zaran kuwa wannan burin nata ya cika zata fasa