You Cannot Download this book untill you login but you can read it .

---

Login Register

kyautar, Afrah musaddik ya samu, ya Allah ka duba girman sadaukarwar da ya ta ta yi ka ƙara dawo da musaddik hanya madaidaiciya”, Afrah tace “Amin Baba, ai akwai sauƙi sosai komai ya na tafiya yadda muke addu’a kullum, Alhamdulillah”. Zaiyi magana kenan Mama Hauwa ta taso tana cika tana batsewa tace “To ni dai ka sani, duk abinda ka sayo a matsayin abin buƙata a gidan nan, in dai da wannan kuɗin ne bazan yi amfani da su ba, domin dai ni ban yarda da kuɗin ba………..
Cikin tsantsar fushi da zafin rai yace “ Tir da zuciyar da bata da kamun kai irin ta ki. Zuciyar da bata da zuciya, tun yaushe na gargaɗeki da ki daina shiga duk wani abu da ya shafi Afrah da aurenta, amma saboda tsabar rashin zuciya irin na ki, kin dage dole sai kin wofintar da kanki ta hanyar shiga abinda bai shafe ki ba, ki bari sai na yi maganar Na’ima to ananne ki ke da damar yin duk abinda ki kaga dama”.
Nan da nan ran Mama Hauwa ya kara ɓaci, tace “meye abin tunƙaho, tunda dai har ƙasa ta naɗe ba za’a kiran yarka da matar ɗan iska ba….. “, A fusace jiki na rawa Mallam Mahmud ya tashi ya yo kan Mama Hauwa da alamar duka zai naɗa mata, a gaggauce Afrah ta taso cike da tashin hankali ta shiga tsakaninsu, tana tsuma. Tana faɗin “A’a Baba don Allah ka yi haƙuri, na rantse maka hankalina yana matuƙar tashi ina jin damuwar yadda duk zuwan da zanyi gidan nan, sai kun sami matsala a tsakaninku, ya kuke son na yi don Allah”.
Jikin mallam mahmud ya yi sanyi, ya shiga faɗin innalillahi wa’inna ilaihirrajiun, domin yana son ya mallaki fushinsa. Ayayinda Mama Hauwa ta ƙara fusata, da ƙarfi cikin daka tsawa tace “ke da Allah can munafukar banza da wofi, idan bakya so mu dinga samun matsalar ba sai ki daina zuwa gidan ba da guntun kinibibinki, na nuna cewa kimfi kowa son ubanki, ki je can kiyi zamanki da mashayin mijinki mana” ananne Mallam Mahmud yace “ Babu wanda ya isa ya hana Afrah zuwa gidan ubanta ke ɗin me?”
Ta ƙara watsama Afrah harara tace “ ku kuka sani, idan kana iyawa ma ka basu ɗaki da ita da musaddik ɗin duk su dawo gidan su tare, wama ya sani ko kuɗin sata ne ake kawo maka ka ke washe baki”.
Afrah ta zame ƙasa ta yi zaman dirshan tana dafe da kanta, saboda damuwa.
Mallam Mahmud ya ƙara tunzira yace “Wallahi Hauwa ki ji tsoron Allah, ki sani ke ma kin haifa, kuma duk taƙadarancin musaddik bai taɓa sata ba, ko sanda ya shiga halin talauci balle yanzu da Allah ya azurta shi da aikin yi, wanda na fahimci shi ki ke ma baƙinciki, kuma sai dai ki mutu”.
Tsaki mama Hauwa ta saki ta juya tana ƙunƙuni ita kaɗai tasan abinda take faɗa ta koma wajen tuwonta da ya tasamma ƙonewa.
Tagumi Afrah ta zuba, ta rasa abinda ta yi ma mama Hauwa ba ta ƙaunarta, ko ko laifinta kenan na kasancewa yar kishiya, me yasa ba zata ɗauketa a matsayin ya ba, wannan abu yana ci mata tuwo a ƙwarya, lokaci ɗaya kuma tunanin abinda ya shiga tsakaninta da Haj kilishi ya dawo mata aka, ta ƙara aminta da cewa duk ƙarya ce ta gaya mata, tafi yarda da wata ƙila wani abun take nema agareta ya sata zubda kimarta har tana bata haƙuri, domin dai kusan ta fahimci matsalar su ɗaya da musaddik yadda Mama Hauwa ba ta sonta to hakanan Haj kilishi bata son musaddik, duk don saboda sun kasance yayan kishiya.

Mallam Mahmud ya durkusa a gabanta cike da ƙauna yake tausarta, yana nuna mata muhimmancinta a rayuwarsa, basu gushe a haka ba, har sai da Afrah ta ji damuwarta ta tafi. Ta yi masa sallama ta tafi, ba tare da ta ko kalli inda Mama Hauwa ta ke ba, ko kuma ta kalli cika da batsewar da Na’ima take yi a tsaye a ƙofar ɗakinsu.
Ta so wucewa gidan Inna Halima musamman yadda bayan saƙonta da zata kai mata akwai kuma maganar da take son ta yi da ita.amma kiraye kirayen sallar magriba ya tilasta mata wucewa gida, da zummar gobe ta je gidan inna Halumar tunda basu da islamiyya.

Washegarin kuwa, da wuri Afrah ta shirya zuwa gidan Inna Halima, bayan fitar musaddiƙ wajen aiki. Ta fito kenan ta yi kaciɓis da masu aikin Haj kilishi zasu shiga gidan suna maganar jikin Haj kulishi ya yi zafi jiya ma daƙer ta iya zuwa asibiti. Afrah ta ɗanyi turus, tayi tunanin ta shiga ta gaisheta amma kuma saita gommace ta tafi inda zata idan ta dawo ta leƙata.
Inna Halima ta yi matuƙar farincikin zuwan Afrah. Wacce tunda ta je gidan bata zauna ba sai aikin gyara mata gida da take yi, sai da ta gama gyara mata ko’ina samnan Inna Halima ta janyota cike da ƙauna ta zaunar da ita kusa da ita , ta ƙura mata ido tace “Afrah nayi kewarki, a zahiri a duk lokacin da irin wannan ranar ta zagayo , sai nayi tunaninki, kin sangarta ni , bakya jin wahalar jikin ki a kan aikina, Allah ya saka miki da alheri”.
Afrah ta yi murmushi tace “inna kenan, nifa yau wata maganace ta kawo ni gunki,Inna Halima ta gyara zama tace “To ya akayi Afrah, wace magana ce ta kawo ki, Allah yasa lafiya”.
Tayi murmushi tace “lafiya lau Inna ba wata matsala, kafin dai mu fara magana ga saƙon ki yaya musaddiƙ yace na kawo miki”, ta janyo leda ta miƙama Inna Halima, da hanzari ta amsa tana buɗewa . Ganin tsaleliyar atamfa yasa Inna Halima ta cika da fara’a, abubuwa dai sai gyaruwa su ke, tana mamakin yadda musaddiƙ ke tunanin faranta ransu a duk lokacin da ya samu wata dama.
“ Alhamdulillahi, Afrah Allah ya yi muku albarka Allah ya ƙara cika mana burin mu akan musaddiƙ”,
Afrah ta ƙara murmusawa tana jindaɗin yadda ake yabon musaddiƙ, tace “Amin Inna,ai haƙiƙa wannan samun aikin na yaya musaddiƙ ya janyo mana farinciki, domin a kullum natsuwa aikin yake ƙara sama masa,”.
Inna Halima tace “ƙwarai da gaske Afrah, don haka babu abinda zamu ce da wannan mata sai addu’a don a gaskiya ta taimake mu wajen dawo da musaddiƙ turbar arziƙi”. Afrah ta saki murmushi tace “ Ni kaina Haj Hudah banda wata kalma da zanyi ma ta godiya , ko na saka mata da irin alherin da tayi min sai dai nayi ta yi mata addu’a, domin tana ɗaya daga cikin mutanen da bazan taɓa mantawa da su ba a cikin rayuwata”, inna Halima tace “ Hakane,Allah dai ya cigaba da taimakonsa”.

Inna Halima ta ƙara matsowa kusa da Afrah sosai tace” To me zaki gaya min bayan wannan?”.
Afrah ta juyo tana kallonta sannan ta numfasa tace “Inna wani tunani nake yawan yi a kwanakin nan”, tace “Tunanin me kuma?”. Ta ɗan yi jim kamar tana tunanin abinda zata faɗa sannan tace “Al’amuran yaya mysaddiƙ ne nake tunanin tamkar akwai wata a ƙasa”, Inna Halima ta ƙara kallonta tace “kamar ya ya kenan?”.
Afrah tace “Abubuwan da yake yi, na tabbatar ba yin kansa ba ne,akwai alamomi da suke tabbatar min da hakan , sannan zuciyata tana cike da zargin Haj kilishi akan lalacewar yaya musaddiƙ”. Inna Halima ta yi jugum ta kafe Afrah da ido, zuwa ɗan wani lokaci sannan tace “ke Afrah idan baka iya kama ɓarawo ba sai ɓarawo ya kamaka, nasan Haj kilishi bata da kirki, kuma ba wani son musaddiƙ take yi ba, ni ma kuma akwai lokacin da nayi irin wannan tunanin naki, amma ban gayawa kowa ba na bar abin acikin ziciyata, kin san dalili?”, Afrah ta girgiza kai tace “A’a Inna”, tace “saboda ba ni da wata hujja ko shaidar da idan na faɗa zan gamsar da wanda na gayama ɗin, to kamar ke ce yanzu, wannan zargi ne yau idan kina da shaida na rantse miki sai inda ƙarfin mu ya ƙare”.
Afrah ta yi shuru, tana nazarin maganganun Inna Halima wanda tasan gaskiya ne, ya zama dole idan zaka zargi mutum ace kana da wata ƙwaƙƙwarar hujja, amma tabbas ta gama ji a jikinta akwai sa hannun Haj kilishi a cikin lalacewar musaddiƙ, sai dai kamar yadda Inna Halima ta faɗa ne zata bar komai a ranta har zuwa lokacin da zata sami wata shaida, da zata tabbatar ma da duniya zargin da take yi gaskiya ne akan Haj kilishi.Inna Halima tace cikin lallashi, “ki kwantar da hankalinki, kada kisa wannan tunanin a ranki har ya zo ya zamar miki illa, ki sani Allah baya zalunci ya kuma sanya zalunci abin haramtawa a tsakanin mu saboda haka duk wanda ya zalunce ka komai daren daɗewa Allah sai ya yi maka sakayya, don haka idan ma har tunaninki gaskiya ne to masifa ta na kan Haj kilishi kuma komai daren daɗewa Allah sai ya tona asirinta”.
Afrah ta gamsu ƙwarai da maganar Inna Halima, don haka ta samu sauƙin damuwar da ke zuciyarta.
Afrah ta ƙara duban Inna Halima tace “shikenan Inna mu bar wannan maganar mu yi ɗaya maganar”, ta yi murmushi sosai tace “To ina jinki”.
Afrah ta gyara zamanta tace “ Inna na ga kamar kun manta da burina na son yin karatu, tun bayan aurena da yaya musaddiƙ kullum ina tsumayin ranar da ke ko Baba zaku tuna da burina ku kuma taimakeni na cika shi, duk da a da nayi tunanin haƙura da komai, don kawai na kula da yaya musaddiƙ, yanzu kuwa ganin abubuwa duk sun yi sauƙi yasa na yi tunanin me zai hana na cigaba da karatuna”.
Inna Halima ta sauke a jiyar zuciya tace “Allah sarki Afrah, al’amuran musaddiƙ yasa muka manta da komai, amma ina tabbatar miki in sha Allah zaki cigaba da karatunki, da kaina zan samu yaya Mahmud mu yi magana, ke kuma sai ki zauna da mijinki ku yi magana idan ya amince to idan bai amince ba, ki kira ni ki gaya min”.
Gaba ɗaya Afrah sai ta kwanta a jikin Inna Halima cike da farinciki da jindaɗi. Afrah ta daɗe a gidan Inna Halima domin hatta abincin dare ita ta girka mata, tana gamawa gaf da magariba ta ɗauki hanyar gida.

Ko da ta koma gidan, daƙer ta lallashi zuciyarta ta shiga cikin gidan domin ta gaida Haj kilishi. Duk da duhun da ya fara Haj Rakiya ce zaune gefen Haj kilishi da alama itace ke jinyar, ta sami waje ta zauna tana yi mata sannu, gami da kallon tarin maganin da ke gabanta, ta jinjina kai tace “ciwon meye haka ke damunta irin waɗannan magunguna haka”, idon Haj Rakiya na kafe a kanta tace “ciwon ƙirji da kai ke damunta, amma ai ta ji sauƙi ma a haka”, Afrah ta jinjina kai tana ƙara mata sannu, daƙer take ansawa saboda ba ƙaramar wahala ta yi ba, amma duk da haka baƙar zuciyarta tana nan tana jifan Afrah da mugun alkaba’i, gami da tunanin yadda har yanzu bata ga alamar maganin da ta ci a cikin abinci ya yi tasiri ba, ko dai maganar mai Rakwacam gaskiya ne cewar Afrah ta fi ƙarfinta, da sauri ta kori wannan tunanin da ƙarfafa ma kanta guiwar cewa Afrah bata fi ƙarfinta ba, tasan wannan ciwon ne kawai da ya kwantar da ita ya hana mata komawa wajen me Rakwacam da Tsiduhu da zaran kuma ta sami lafiya zata tafi.

Kallon kallo kawai ake tsakanin Haj kilishi da Afrah, ita kuma Haj Rakiya tana kafema da Haj kilishi ido, tana karantar abinda ke kwance a cikin zuciyarta, ta yi murmushi a ranta tace na fiki son ki warke, domin ina buƙatar kuɗi, duk wannan bin da nake miki da zaman jinyar ki da nake yi duk sai na fanshe. Afrah na shirin tashi ta tafi domin tasan musaddiƙ duk inda yake ya kusa dawowa gida. Amma ga rashin tsammaninta kawai sai ta ji sallamar musaddiƙ a cikin falon, tayi saurin kallonsa tana amsawa.
Cike da damuwa ya ƙaraso kusa da Haj kilishi ya zube a gabanta, fuskarsa na nuna tsantsar tausayi da kulawa yace “Sannu Haj, ashe baki da lafiya ban sani ba sai yanzu da na dawo baba maigadi yake gaya min Afrah tana ciki ta zo duba ki ba ki da lafiya”, ta motsa a hankali ta ƙara langaɓewa tace “ya za’ayi ka sani musaddiƙ tunda ka manta da nauyi na da ke kanka, ban taɓa tsammanin zaka iya juya min baya ba”, nan da nan musaddiƙ ya ji damuwarsa ta ƙara ƙaruwa ya zauna sosai kusa da ita cikin ƙoƙarin kare kansa yace “Don Allah Haj ki daina faɗin haka, babu yadda za’ayi na juya miki baya, abubuwa ne kawai su ka canja,” Cikin wata irin galabaitacciyar murya tace “ Na sani,komai ya canja musaddiƙ”.
Ita kam Afrah ido kawai ta kafama Haj kilishi tana mamakin yadda ta ƙara langaɓewa tare da ƙoƙarin dasama musaddiƙ damuwa don kawai ya ji da gaske baya kyauta ma ta, ta girgiza kai wai shin Haj kilishi wace irin mutum ce?
Afrah ta fahimci musaddiƙ ya damu sosai da ciwon nata, har yana ƙoƙarin a koma asibiti, Haj Rakiya tace ai an riga anje asibiti tana kan shan magunguna ne. Lokaci ɗaya kuma ta na cike da mamakin, irin natsuwar da take gani a tare da musaddiƙ, gaba ɗaya ya kusa komawa musaddiƙ ɗinsa na da, lalle sai yanzu ta ƙara fahimtar daliln damuwar da Haj kilishi ta ke ciki.
Tabbas komai ya canja, shi yasa Haj kilishi ta ƙara haukacewa.

Musaddiƙ da Afrah sun daɗe tare da Haj kilishi, kafin ya tasa matarsa a gaba cike da so da kulawa suka tafi ɓangarensu. Suna fita Haj kilishi ta ja jiki ta zauna tana maida numfashin ciwo da tashin hankali, Haj Rakiya ta taso ta dawo gefenta ta zauna tana kallonta, Haj kilishi itama ta ɗago tana kallonta tace “kinga musaddiƙ ko Haj, maimakon warin taba da wiw-wiw da tsamin giya da yake yi kullum yau kina jin irin ƙamshin turare da yake yi”, Haj Rakiya tace “Na ji fa “, ta ƙara kallonta tace “ kinga kayan jikinsa, duk da nasan tun safe ya sa su, to amma har zuwa daren nan kina ganin har yanzu karin gugar su bata bar jikin kayan ba, ki duba irin hular da ya murza a kansa yadda ya yi kyau matuƙa, a haka waye zai dube shi a matsayin mutumin banza”, Haj Rakiya tace “Babu, gaskiya duk wata kamala ta kusa cika ga musaddiƙ”, Haj Kilishi ta dafe ƙirjinta da yake dakan uku uku , zafin ƙirjinta ya ƙaru, lokaci ɗaya kuma mugun ciwon kan da take yi ya dawo ji take kamar ana tsige gashin kanta saboda azaba, bakinta na rawa tace “Na shiga uku, ta yaya ina saƙa amma zare na warwarewa, ina zansa kaina idan musaddiƙ ya dawo mutumin kirki, bana son yaron nan har cikin zuciyata, bana son ganinsa cikin farinciki, bana son a kira shi da mutumin kirki”.
Haj Rakiya tace “Nasan abinda ki ke ji, ai kawai kuɗi zaki ƙara saki tunda Allah ya azurtaki, ranar biyan buƙata ai rai ba bakin komai yake ba”.
Cikin azabar ciwon ƙirji Haj Kilishi tace “kuɗi ba matsalata bace, wajen da zan samu biyan ɓuƙata ne damuwata”.
Haj Rakiya ta yi ƙasa da murya sosai tace “ kada ki damu, Allah kaɗai yasan inda za’a dace, shi yasa raba ƙafar yake da amfani, idan ba’a samu a can ba za’a samu anan”, Haj Kilishi tace “Allah ya ba ni lafiya mu koma wajen Tsiduhu da mai Rakwacam, kamar yadda muka tsara, idan kuma ban ji dama ba ina ganin kece zaki tafi min kiyi mu su bayanin komai”.
Haj Rakiya tace “Babu damuwa, babu abinda ba zanyi miki ba matuƙar zaki jidaɗi, don haka a shirye nake”, ta lumshe ido ta buɗe cike da tashin hankali tace “ madallah da samun ƙawa irin ki, Allah yabar mu tare”. Ta yi ɗan murmushi tace “Amin”. Yadda jikin Haj kilishi ke rawa yasa Haj Rakiya ta kwantar da ita, sannan ta bata maganinta na dare sai da ta tabbatar ta sha sannan ta yi mata sallama ta kama hanyar gida goman dare ya wuce.
Bata san dalilin da yasa sam bata jin tausayin Haj kilishi ba, don a yanzu tana nazari sosai tana kuma iya hango tsantsar rashin adalcin da take yi ma musaddiƙ gami da ɗimbin zaluncin da bata ga dalili ba.

Yar gidan Imam ✍️
https://chat.whatsapp.com/JUeJeOL9kA8AHOGOfXOnSZ

MUSABBABI BOOK 2
NA
HABIBA ABUBAKAR IMAM
(Mrs Aliyu Meyere)

Page 3

Karfe ɗaya saura minti uku na dare, Afrah na lafe a saman faffaɗan ƙirjin Musaddiƙ, gaba ɗayansu cike su ke da shauƙin son junansu, hakan yasa Afrah ta ƙara sunne kanta cikin kirjinsa, cikin sanyin murya ta kira sunansa, ya amsa yana ƙara matseta tsam, tamkar zai maidata cikin jikinsa, ta ɗan lumshe manyan idanunta tace “Ni ko yaya wata alfarma zan nema a wajenka, ina fatan kuma zaka yi min”. Da sauri ya amsa “Menene Afrah, bana jin akwai abinda zaki nema a guna matuƙar ina da halin yi miki na kasa yi, domin nasan ba zski taɓa yin abinda zai cutar da ni ba”.
Ta yi ɗan murmushi tace “yaya so nake ka barni na cigaba da karatuna”.
Ya numfasa gami da ɗago kanta, duk da babu wadataccen hasken da zai iya ganin fuskarta, sai yasa baki ya sumbaci saman goshinta, sannan ya maidata ya ƙwantar, yace “Dama na sani duk abinda zai fito a bakinki yana da muhimmanci, wannan tunanin ni ne yakamata nayi shi, saboda haka na yarda zaki cigaba da karatunki ni da kaina kuma zan samo miki makarantar”.
Cike da farinciki ta ƙara ƙwaƙume shi tana yi masa godiya.
Baisan dalilin da yasa a duk lokacin da ya faranta ran Afrah yake jin ya fita farincikin ba, domin dai ko yanzu ji ya yi wani daɗi na ratsa zuciyarsa, yadda ta ke jindaɗi ya fi masa komai.
Federal university of technology (F.U.T) Minna nan Murtala ya koma da aiki, Musaddiƙ yasan makarantar domin nan yake zuwa ya sami murtalan. Don haka shine mutum na farko da ya faɗo masa a rai wamda yake jin zai iya taimakonsa.

Hakan yasa washegari ya fita kafin lokacin fitarsa, amma fa sai da su kayi azkar shi da Afrah tun asuba, domin dai babu yadda za’ayi Afrah ta barshi ya fita ba tare da ya yi azkar ba. Ga ruwan ayatul sihir da kullum sai ya sha kafin ya bar gida. Haj kilishi na cikin zuciyarsa hakan yasa ya kasa fita har sai da ya shiga ya dubata, har yanzu cikin ciwon take sosai, domin nan ya tadda Hassana yadda ta gaya masa kuma tun asuba ta baro gidan mijinta ta taho saboda wayar da Haj kilishin ta yi mata cikin dare, cewar jikinta ya rikice.
Musaddiƙ ya matso sosai kusa da ita tama cikin bargo tana rawar sanyi.
Ya miƙa hannu ya taɓa saman wuyanta, zafi kamar wuta, da sauri ya cire hannunsa, ya dawo da kallonsa kan Hassana cikin damuwa yace “Ni ina ganin mai zai hana a koma asibiti”.
Hassana tace “Ni ma na yi tunanin hakan amma Haj ta dage ba zata koma ba sai ta gama shanye magungunanta, tunda dama ance maganin zai iya zafafa ciwon kafin daga baya ya dawo ya yi maganin ciwon”.
Cikin gamsuwa ya gyaɗa kai, ya ƙara mata sannu sannan ya juya zai fita, duk da tana cikin wahala amma baƙar zuciyarta ba zata barta zama lafiya ba, da sauri cikin galabaitacciyar murya tace “Musaddiƙ ba zaka zauna tare da ni ba, tafiya zaka yi”, ta faɗi maganar tare da addu’ar Allah yasa ya yarda ya zauna ɗin, ko ba komai tasan zata sa ya makara wajen aiki, wanda hakan zai iya sawa ya sami matsala a wajen aikin, wanda dama burinta kenan.
Har ya dawo kamar zai zauna, harta fara jindaɗi sai kuma ya tsaya, ya ɗan dubeta yace “zan so na zauna kusa da ke Haj ko don na kula da ke, amma yau zamu tafi Abuja ni da Haj Hudah, zata halacci wani taro kuma yau zamu dawo, bana son na makara”, wani baƙinciki ya ƙara cika zuciyar Haj kilishi, ta maida idonta ta rufe, domin dai tasan kafiyar musaddiƙ tunda ya faɗi uzurinsa to bazai taɓa canjawa ba, don haka yi masa magana ma baida wani amfani,
Har ya fice bata buɗe ido ba, sai la’anta da tsinuwa da take masa. Da ta ɗan ji sauƙi amma yanzu ji tayi gaba ɗaya ciwon ya dawo mata.

Makaranta Musaddiƙ ya fara wucewa domin cika alkawarinsa ga Afrah. Ya sami murtala da maganar, cikin jindaɗi murtala ya gaya masa babu damuwa, domin an faɗa akan lokaci domin kuwa yanzu aka fara saida form.
Don haka murtala da kansa ya yi alƙawarin saya ma Afrah form ɗin, tare da neman taimakon malaman da ya sani a makarantar, domin su taimaka wajen samun admission ɗin.
Godiya sosai musaddiƙ ya yi ma murtala, a wajen kuma ya kira Afrah ya sanar da ita yadda su kayi da murtala, sannan ya bashi wayar domin ta yi masa godiya.

Daga wajen Murtala gidan Haj Hudah ya wuce.
Abinda ya ke gudu ne ys faru domin tuntuni Haj Hudah ta shirya, shi kaɗai ake jira. Meating ɗin da zata je yana da matuƙar muhimmanci, babu buƙatar ta makara, ba don ta ɗorawa kanta tafiya da musaddiƙ ba da tuni ta tafi ta bar shi. Sai da suka shiga mota sannan ta dube shi, bata iya yin fushi da shi, don haka ta sami kanta da yin ɗan murmushi tace “Ina ka aje wayarka?”, da sauri ya fito da wayar a bayan aljihunsa ya na dubawa, missed calls ɗinta ya gani har guda huɗu.
Ya yi saurin ɗagowa ya dubeta, yace “Banga kiranki ba Rankiyadaɗe, ayi haƙuri”.
Wani irin ƙayataccen murmushi ta jefe shi da shi, wanda nan da nan musaddiƙ ya ɗauke kansa, tace “Babu damuwa, amma dai kasan ka makara ko?”. Ba tare da ya kalleta ba, yace “ Na je yin wani uziri na matata ne”.
Ji ta yi kamar an watsa mata wuta a jikinta. Tayi danasanin tambayarsa, don da tasan irin amsar da zai bata kenan da bata tambaye shi ba. Dif ta yi har su ka kai Abuja bata ƙara magana ba. Wato musaddiƙ irin mazan nan ne masu ɗaukar matansu da muhimmanci, bayan irin ɗimbin son da ta fahimci ya na yi mata, har da kuma hidumta mata, lalle musaddiƙ irin su mata ke buƙata. Shin me ye matsayin musaddiƙ a wajenta? Da har ta ke shiga muguwar damuwa a duk lokacin da ta ga kusancin da ke tsakaninsa da matarsa, me yasa duk abinda yake ma matarsa take jin ina ma ita yake yi ma?.

Duk tafiyar da su ke yi, motsi kaɗan musaddiƙ sai ya kira Afrah ya ji halinda take ciki, Haj Hudah na jinsa yana roƙonta ta shiga ta zauna tare da Haj kilishi, duk da bata san wacece Haj kilishin ba, tayi mamakin yadda ta ji ya na yi mata magiya yana ƙasƙantar da kansa wajen roƙonta