You Cannot Download this book untill you login but you can read it .

---

Login Register

kina koke-koke, har da surutai ba zaki dangana ba?" Ta jiyo muryar Inno.

Cikin kuka Amina ta ce "Wallahi Inno ba zan auri Malam Rabi'u ba, yanzun nan su Shema'u suka bar gidan nan, ba ki ga cin mutuncin da suka yi mini ba, wai kar in auri babansu ni ce musu nayi ina son babansu, Inno wallahi bana son Mutumin nan ki gaya musu".

"Amina ta yaya zan ce musu ba kya son sa ni a wa? Yanzu haka da na dawo ya tsareni a ƙofar gida, wai sun karɓi kuɗin Aurenki, da kuma kuɗin gonar mahaifinki, wai za'a kawai Jamila dillaliya dubu hamsin a samo miki gado ɗan hannu, a kaiwa Liti kafinta shima wai idan da kujeru na hannu a sai miki, an saka sati uku bikin".

Fashewa Amina ta kuma yi da kuka ta ce "Wallahi ba zan auri wannan mutumin ba, tun yanzu 'yan'yan sa sun fara zuwa suna ci mini mutunci, kuma dan tsabar mugunta an siyar masa gonar babana da arha ya siya, kuma a siya mini kayan ɗaki 'yan hannu, dan an mayar da ni mara galihu".

Bakinta Inno ta gwaɓe ta ce "Dan ubanki 'yan uwan mahaifin naki kike gayawa haka, salon su zo su ji suce ni nake ziga ki? Ke a rayiwarki ba ki san tawakalli ba da duk abin da Allah ya tsarawa bawa ba shi da ikon kuskurewa ba, kamar iyaye suke a gurinki fa".

"Ni Wallahi ba iyaye na ba ne, tin da suke son kassara rayuwata, da tozarta mahaifina an cutar da shi an raba shi da gonarsa ba da saninsa ba".

Inno ta bi Amina da kallo, Amina kenan akwai haƙuri wasu lokutan, wasu lokutan kuwa akwai gardama da taurin kai, dan Inno ta fara fagabar yadda Amina ke cigaba da adawa ƙarara da Auren da ake son a yi mata.

*****************

Kamar kullum sun kammala lectures, lecturer ya ce zai yi musu wata test, amma ya bawa kowa damar ya yi amfani da wayarsa wurin samo amsar tambayoyin da zai yi. Suka dinga murna ɗaliban, malamin ya rubuta tambayoyi uku, a kan allo ya ce su amsa a mintuna goma kacal!
Nan da nan suka duƙufa suka ɗauko wayoyinsu, suka fara binciken aikin da aka ba su.
Rarraba idanu ya shiga yi, dan ba shi da wayar da zai amfani da ita wurin gudanar da aikin, ya juya hagu da damansa kowa ya duƙufa yana yi, amma ban da shi.
Takarda ya samu ya sunkuya ya fara rubutun sa cikin nutsuwa. Fadila ta ɗago ta kalleshi, yana ta rubutu amma ba daga waya yake kwafa ba. Ta taɓe baki ta taɓo ƙawarta Ta nuna mata shi ta ce "Kalli ko mai yake rubutawa oho, mutumin da ba turanci ya iya ba, kuma ba waya ce da shi ba amma yana ta rubutu shi dole ga ƙwaro" kamar yadda suka saba suka kwashe masa da dariya.

Bai ko ɗagoba ya cigaba da rubutun, sai dai duka bun nam da ake, ɗaliban suka gaza samo amsoshin tambayoyin a Google, ƙarshe abin da ya sawwaƙa suka rubuta lokaci ya cika suka bayar.

Fitar malamin ke da wuya, ɗaliban suka fara ƙoƙarin fita daga ajin, tafiya yake sannu a hankali, babu gaggawa gashi ita kuma sauri take, so take ta bar ajin ya tsare mata hanya kuma ya ƙi sauri.

"Dalla malam ka bani hanya, sai tafiya ka ke kamar mace, ko nan ɗakin ka ne?"
Tsayawa ya yi, ya waiwayo ya kalli Fadila ido cikin ido, ya rasa mai ya tsarewa yarinyar nan haka, bata hanya ya yi yace "Bisimillah, wuce" ratse shi ta yi ta wuce tana cigaba da mitar yadda yake tafiya kamar mara lafiya.

Shi dai bece mata uffan ba, ta wuce.

Department ɗin su Yusra ta tafi, kasancewar duk a makaranta ɗaya suke, ta yi sa'a ajinsu Yusra ba kowa dan haka ta shiga kan ta tsaye.

Yusra ta duƙufa ta na ta chatting a waya, Fadila ta zare wayar hannun Yusra, hakan ya tilasta mata ɗagowa, tana ganin Fadila ta yi murmushi ta ce "Beb daga ina haka?".

Fadila ta zauna tare da faɗin 'Daga class, nace bari in zo in ganki".

"Kai amma naji daɗi, ya lectures ɗin?".

"Alhamdilillah, muna nan muna fama, ya naku?".

"Alhamdilillah, muma hakan ne".

"That's good, da wa ake chatting ne haka?".

Yusra ta yi murmushi ta ce "Wallahi ba kowa, ina duba wani ankon da za muyi ne, na bikin Sister ɗina, so ina duba IG ne ko zan samu style".

Fadila ta ce "Ok na zata sabon kamu aka yi mana".

Yusra ta girgiza kai ta ce "Ba wani sabon kamu, samari akwai su, amma ni hankalina duk baya kan su".

"Don't mind girl, in dai brother na ne, insha Allah ina nan ina miki fighting ina ta kafa ki a wurin Mummy, mu bi komai a sannu zai amince ne".

"To beb, Allah ya amince. Ni wai ke ya ake ciki ne? Ko haryanzu ba ki da gwani"

"Hmm ni fa ba ta wannan shirmen nake ba, ni ban baki labari bama, wannan abokin Yaya Khalil ɗin Abdul yake kowa? Wai shine ya ke nuna yana sona"

"Ohh wannan abokin yayan naki da muka taɓa haɗuwa, wani mai abin dariya?".

"Shi fa"

"To meye aibunsa beb? Yana da kirki sosai".

"Taɓ, lecturer ne fa mai ya samu ya ci balle ya bani? Aikin ma fa Daddy ne ya samo masa".

"Ai ba wani abu Fadila, idan har kina son sa wannan duk ba abin damuwa bane".

'Bama na son sa dan ba class ɗina ba ne, wani baƙi da shi mara aji, sai surutun tsiya Mummy ma ba zata amince ba".

Yusra ta yi murmushi ta ce "To Ubangiji Allah ya zaɓa mana abin da ya fi alkhairi gaba ɗaya".

"Ameen dear, tashi muje mu samu abin da zamu ci".

Suka rankaya gaba ɗaya suka fita daga ajin.

********
Saminu kuwa bayan tafiyarsa daga gidan su Amina, ya koma tasha, sarkin tasha ya sanar da shi an samu wasu 'yan biki da zasu je kai amarya can Lagos, a jira su kwana biyu a dawo da su, idan ya amince zai kai su zasu biya shi, biya mai kyau sun ce ba sa son Manyan motoci saboda tsaye tsaye.
Jin zai samu kuɗi masu yawa, ya sanya Saminu ya amince, ba tare da ya tuna saƙon Amina zuwa ga mahaifinta ba, washegari da Asubar fari ya ɗebi 'yan kai amarya yayi Lagos.

Amina kuwa ta din ga zuba ido taga ta ina Baba zai dawo gari, sai dai babu Baba babu alamar sa, kullum garin Allah ya waye cikin zuba ido take ta ga Baba ya dawo, amma shiru.
Gashi ta ƙara tsangwamar kanta, duk ta yi baƙi saboda damuwar da ta sanyawa zuciyarta, gashi 'ya'yan Rabi'u Jarmai kusan kullum cikin zuwa gidansu suke suna ja mata kunne a kan Auren mahaifinsu.
Ga su Kawu Lawan suma kullum da kalar ta su tijarar da suke zuwa su yi mata, hakan ya sa ta ƙara tsangwamar kanta, ko Abincin kirki ba ta iya ci sai kuka.
Gashi tuni su Kawu Bala suka karɓi kuɗin Aurenta, Naira dubu hamsin komai da komai har sadaki, kuma suka amshe kuɗin gonar mahaifinta.
Tana kwance a ɗaki da yamma, wani irin zazzaɓi ya rufeta, dama duk dare da shi take kwana, yanzu kuwa tun yamma ya rufeta, tana ƙudundune a bargo tana ta rawar sanyi, Inno na tsakar gida tana dafa mata rai ɗore ta bata ko zazzaɓin ya sauka, sai ga hayaniyar mutane.
Uwargidan kawu Bala da ta Kawu Lawan ce suka shigo, suka kalli Inno suka ce "Ke Hanne kayan Amina muka kawo, ki gyara wurin da za a ajiye".

Inno ta ce "Ga filin tsakar gida nan, a zo a ajiye su".

Nan fa samarin 'ya'yan su suka fara kokowa da shigo da kayan, wasu irin ruɓaɓun kayan gado ne, aka yi musu fentin ha'inci, dan garin shigo da su ƙasan sip ya ɓare, zanin kujerun nan kuwa daƙal daƙal, ga ƙamshin fenti ga warin rima kayan suna yi, kai da gani ka san na ha'inci ne.
Inno ta yi shiru tana bin kayan nan da kallo, duk sun ɓare garin kokowar shigowa.

Uwargidan kawu Bala ta ce "To Inno, su Malam sun fita sun yi iya yin su ga kayan gadon Amina nan, saura kema naki ɓangaren aga irin bajintar da zaki yi a ɗakin amarya".

Inno ta yi murmushi mai ciwo ta ce "Haka ne, Allah ya nuna mana ya sa ayi da mu".

Suka amsa da Ameen, suka ringa guɗa, suka gama hayaniyar su suka fice.

Amina ta ɗaga labule ta fito daga ɗakin su, ta kalli kayan nan, ta kalli bayan sif ɗin nan, yadda wani wurin ya kusa burmawa, da in da ya ɓare wurin shigo da kayan, shi kansa allon gadon, sari ya cinye wani wurin aka liƙe shi da fenti.

Ta fashe da kuka ta ce "Yanzu a kan wannan matsiyatan kayan aka siyar da gonar Baba? Wallahi sai Allah ya saka mana".

Inno ta ce "Dan Allah ki rufa mana Asiri, kar su dawo su ji abin da ki ke faɗa"

"To su ji ɗin ina ruwana, Wallahi su da Allah, duk cikin yaransu da aka aurar, ba wadda aka yiwa wannan wulaƙanci sai ni, kalli wasu irin kaya kamar wata mara galihu, Allah ka saka mini" tayi maganar kamar zata shiɗe, saboda yadda haƙoranta ke haɗuwa saboda zafin zazzaɓi.

Inno ta ce "Ni dai haƙurin nan dai shi zan baki, ki barwa Allah Komai dan Allah karki wani abu da zai sanya su zo su ɗaga mana hankali".

Ta share hawayenta ta ce "Inno, anya Saminu ya gayawa Baba halin da ake ciki?"

"To gashi dai har yanzu shiru ba muji ɗuriyarsa ba"

"Inno ko bokonmu zanje, wurin malamanmu in ari waya in kira Baban?".

"A'a ni bana son abin da zai janyo magana, ko kin manta da sun hanaki zuwa bokon nan, ki kiyayeni. Zan shiga banɗaki ki ɗau kofi ki tsiyayi rai ɗoren can ki sha, ki ɗau Abinci ki daure ki ci". Amina ta jinjina kai. Tana ganin Inno ta shiga banɗaki, ta ɗau hijjabinta ta fice daga gidan.

Duk da yadda take jin jiri, kanta yana juyawa, amma zuciyarta ta bushe, sai zuba sauri kawai take yi.

Uwar tafiya ta kwasa ba ta wasa ba, ta isa ƙaramar tashar garinsu, cikin rukunin direbobin nan taje ta gaishe su.
Suka amsa wani mai suna Lado kan kara ya ce "Ya aka yi ne? Amarya da yawo ke da aka kusa ɗaura miki Aure?".

Banza ta yi masa ta ce "Dan Allah Saminu nake nema".

Wani ya ce "Saminu ya je Ikko, amma ya kamo hanyar dawowa gida".

"Dan Allah ko zaku taimaka ku kira mini shi a waya, na bashi saƙo zuwa wurin Baba amma na ji shiru".

"Ba matsala, bari a kira shi" cewar Lado. Amina ba tayi niyyar tankawa Lado kan kara ba, amm ganin zai taimaka mata ya sanya ta ɗan saki fuskarta.

Ya kira Saminu ya miƙa mata wayar, cikin azama ta karɓa ta koma gefe.

"Salamu Alaikum, Saminu Amina ce 'yar wajen Baba Hassan".

Saminu ya rafka salati ya ce "Amina, dan girman Allah kiyi haƙuri, Wallahi na manta shaf da saƙonki na tafi ikko, amma kin ganni a hanyar dawowa, na miki alƙawarin yanzun nan, zan kira Baban in sanar masa".

Amina cikin kuka ta ce "Dan Allah ka taimake ni Saminu, kar a wulaƙanta rayuwata"

"Kar ki damu Amina, zan sanar masa Insha Allah" suka yi sallama ta bawa Lado wayarsa, ta yi musu godiya ta kama hanyar gida.

Tun a hanya duhun magariba ya fara rufawa, ba ta damu da yadda sanyin dogayen zangarniyar bishiyoyin hatsi ke kaɗawa suna ratsata ba, wanda hakan ya ƙara asassa tsananin zafin da jikinta ke ɗauka, ga gefen cikinta da ya ƙulle, saboda yunwa amma ba ta damu ba, sai sauri take yi, in da ba mutane ta kwasa da gudu dan ta isa gida da wuri.

Allah ya taimaketa ba wanda ya ganta suruf ta shige gida.
Ta tarar Inno bata nan, ta shiga banɗaki tayi alwala ta koma ɗaki ta tayar da sallar magariba.

Inno ce ta shigo gidan tana 'yan maganganu, tana ɗaga labule ta hango Amina na salla, aikuwa ta rafka salati ta ce "Ke daga ina haka? Kika ɗaga mini hankali nake ta yawon nemanki?".

Amina ta idar da salla ta yi Adduointa, sannan ta kalli Inno ta ce "Inno tasha naje ko Saminu yana nan, wai ashe bai gayawa Baba saƙon nan ba, yana Ikko ma, aka kira mini shi a waya, shine ya ce mini zai gaya masa".

"Kuma shine sai ki tafi baki gaya mini ba, kin ɗaga mini hankali, nan suka aiko suna neman ki, amma ba kya nan na rasa ƙaryar da zan musu, wato ke dai Amina ba kya gudun magana ko? Ke duk abin da zai sa su zo su ci mana mutunci kin san shi kuma zaki aikata ko?" Shiru Amina ta yi taƙi magana, Inno ta yi ta banbaminta ta gama, Amina ba tace komai ba.

Baba Hassan kuwa kusan suman zaune yayi, bayan Saminu ya kira shi a waya ya wassafa masa irin katoɓarar da 'yan uwansa suke shirin aikatawa, na cefanar da gonarsa da kuma aurar masa da tilon 'yar sa ga mutumin banza da suke shirin yi.
Baba Hassan bai iya cewa Komai ba sai kashe wayar da ya yi, ya san nan duniya ko me zai yi bai isa ya hana wannan auren ba, sayar da gonarsa bai ɓata masa rai ba kamar yadda ake shirin salwantar da rayuwar 'yar sa, dan abin da ya shirya shine, shekara mai zuwa ya biya mata kuɗin jarrabawar, kuma ya dinga tattala 'yan kuɗaɗe saboda harkar makarantar ta, sai dai kash ga abin da 'yan uwansa ke shirin aikatawa.

Amina har zuwa sallar isha'i zazzaɓin jikinta bai sauka ba, ga wani irin koren amai mai ɗaci da take tayi, Inno sai jiƙe-jiƙe take tana ɗura mata, Amina mirsisi ta ƙi sha, saboda wannan jiƙe-jiƙen da take sha su suke ƙara sanyata amai.

Yarone yayi sallama, wai Amina ta je in ji Malam Rabi'u Jarmai.

Inno ta ce "Ka je ka ce masa ba ta da lafiya".

Yaron ya fita ba jimawa, ya dawo ya ce "Wai Kawu Lawan ya ce idan ba ta je ba ya zo sai ya zane ta".

Inno ta kalli Amina ta ce "Amina, lallaɓa kije, bana son fitina da tashin hankali".

Amina ta buɗe baki za tayi Magana, Inno ta girgiza mata kai ta ce "Yi haƙuri, daure kije" haka ta ɗau hijjabinta tana kuka, ga zazzaɓi a jikinta ta fita.

Jarmai na ganinta ya washe baki yana faɗin "Amaryata ba faɗa mai ya kawo gaba fisabilillahi?".

"Kaga saurara mini, Azzalimi kawai aka sayar maka da gonar Baba ka saya, alhalin ka san kuɗin gonarsa ba haka yake ba, to Wallahi ba zan auri Azzalimin mutum irinka ba, ga yaranka marasa tarbiyya da suke mana zarya a gida suna zagina, ba zan iya ba".

"Aikuwa zaki iya, da kin shiga gidana kin sha jar miya zaki watstsake muyi zaman mu".

"Jar miya a Ina? Da jar miyar a gidan naka ka ke kai yaranka bara wasu suna talla? Ina alamar jar miya a jikinka ko jikin 'ya'yanka, saboda tsabar cuta da zalunci ina kai ina ni, da ƙanan shekaru na ka haɗani a wannan gidanka na gayya, to bari kaji in gaya maka, ko da sarƙa a ka ɗaura Aurena da kai sai na warware shi, kuma ba dai in je gidanka ba sai dai a kai maka gawata".

"Ni kike gayawa wannan miyagun maganganun?" Yayi Maganar yana matsawa kusa da ita, wani azabar warin baki gami da na sigari ya daki hancinta, ga ƙarin rana yana yi, kayan jikinsa ne kawai wankakku, suma sai ƙarnin koren sabulu suke.

Ja da baya ta yi ta ce "Kar ka sake matsowa kusa da ni, na gaya maka ɗin, idan kana da zuciya ka biya ka karɓe kuɗin Aurenka ka fasa Aurena, idan kuwa ba haka ba idan ba a kai maka gawata gidanka ba, sai gidanka ya zama sansanin tashin hankali da bala'i na gaya maka".

"Yaro man kaza, mu zuba mu gani ni da ke shege ka fasa, gidana ne Wallahi sai kin shige shi sai na Aureki".

"Za kuwa mu gani, na bika ta lallalami kaƙi fahimta, zan fahimtar da kai ta hanyar nuna maka ni 'yar zamani ce, tsohon kawai". Saroro ya bi Amina da kallo, bai taɓa zaton za ta iya gasa masa miyagun maganganu haka ba, dan kowa kallon saliha yake mata, ga haƙuri da biyayya, a zatonsa duk irin halin mahaifinta ne da ita zai samu tuɓus, ashe abin ba haka yake ba.

Ita kuwa Amina gida ta shige abinta, Inno na tambayarta yaya aka yi, amma tayi shiru saboda yadda zuciyarta ke tafasa, ko ƙaunar jin sunan Rabi'u Jarmai ba ta yi, balle a kai ga batun Auren su.
Ta haɗa kai da gwiwa ta dinga rusa kuka, Inno kam ta gaji da rarrashin Amina dan haka ta zuba ido.

Baba Hassan kuwa bakinsa ɗauke da Addu'a, ya shiga falon gidan da sallama, a zatonsa ya je daidai lokacin da zai samu Alhaji Ahmad, sai dai kash bai fito ba, sai Hajiya Zainab ya tarar a falo, tana ta bawa Hajara umarni cikin tsawa da wulaƙanci.

Kasancewar abu ne na gaggawa, ya yanke shawarar sanar da Hajiya Zainab, Alfarmar da ya zo nema, ya risuna ya gaida ita cikin girmamawa, ta amsa ba yabo ba fallasa.

"Hajiya dan Allah wata alfarma na zo nema a wurinki".

"Haka dai, Alfarma ba yau ba gobe ina  jinka".

Ya gyara zamansa ya ce "Wallahi wani al'amari ne ya taso mini a garinmu cikin gaggawa game da iyalina, nake son dan Allah a bani dama, ko kwana biyu in je in yi in dawo".

Ta ɗago ta kalleshi ta yatsina fuska ta ce "Idan zamu fita ko mun dawo, mu zamu dinga kokowa da ƙofa wurin buɗewa da rufewa kenan?".

"A'a hajiya, ga Hadi nan sai ya riƙa mini kan in dawo".

"Ban lamunta ba, aikin Hadi daban a gidan nan, naka daban dan haka ba in da zaka a yanzu, idan kuwa ka tafi, to ka tafi kenan" Baba Hassan yayi shiru ya rasa abin da yake masa daɗi, ya tashi gwiwa a sanyaye ya bar falon. Idan ya kuskura ya bar aikin gadin nan, tofa rayuwarsa da ta iyalansa za ta shiga wani hali, dan ba shi da wata sana'a da ya iya.

Amina kuwa tun Asuba take amai, ciwo ya ƙi sauƙi kullum sai gaba yake yi, ƙarfe shida da rabi sai ga Kawu Bala da Lawan tare da matansu, da wasu daga cikin yaransu kamar wanda za su je ritsa kwarto, sun shigo suna zazzaga bala'i tun daga hanyar shigowa.

Suna zuwa suka tarar da Amina a zaune dirshen tana amai.

Ladiyo Uwar gidan Kawu Bala ta ce "Wallahi malam zancen ya tabbata, abin da ake ta gudu, wannan aman ai irin na masu ciki ne".

Inno ta ce "Innalillahi wa Innalillahi raji'un, wane irin masu ciki kuma bata da lafiya ne fa".

"Ƙarya kike munafuka, dama ance mini an ganta a tasha wai taje wurin Saminu, dama zuwan da Saminun yake gidan nan kenan, Kuna lalacewa, kafira mai siffar munafukai, har an samu wanda zai rufa miki asiri ya Aureki, amma zaki tozarta mu, ashe dagaske ne kullum sai kin je tasha kin bada jikinki a baki kuɗi, wannan cikin ba zaki haife shi a gidan nan, jibi in Allah ya kaimu idan an sakko daga sallar juma'a za'a ɗaura aurenki da Rabi'u, kuma ba wata bidi'a da za a yi, ɗaurin Aure kawai za ai a kai ki dama da ke da bazawara ba maraba, kin gama tsufa a titi da rabawa maza jikinki".

Wani malolon baƙin ciki ya tokarewa Amina ƙirji, ba ta san lokacin da zafin maganganun wan mahaifin nata suka sanyata jan tsaki a fili ba. Ai kuwa hakan ya tunzura shi, ya nufi dangar kara, ya ciro kara suka rufar mata da duka.
Inno ta dinga kururuwa tana faɗin "Kuyi haƙuri, ba ta da lafiya".

Ladiyo ta ce "Wallahi ku casa ta, ko Allah ya sa cikin jikinta ya zube".

Tun Amina na iya motsi tana kuka, har ta sare sai wata irin ajiyar zuciya take, jikinta duk ya farfashe saboda duka.

Bayan tafiyarsu Inno ta ɗumama ruwa, ta gargasawa Amina jikinta tana faɗin "Kin ga Abin da nake gaya miki ko, shiyasa na gaya miki taurin kai ba shi da rana Amina"

Kwanaki biyun nan, jikin Amina ya ƙara zafi, wai sunan amarya ba kitso ba ƙunshi tana kwace ba lafiya, iyalan su Kawu Bala suka kwashi raftar kayan da suka yiwa Amina aka kai mata gidan Malam Rabi'u.

Ranar Juma'a kiran Sallar farko, Amina ta ɗebi kuɗi, daga kuɗin da ake bawa Inno gudunmuwar Aurenta, dama tun dare ta haɗa kayanta Inno na bacci, kiran sallar farko, ta kwashi kayanta ta fice daga gidan.

Tana tafe a hanya tana kuka ta ce "Babana maganin kukana, na san wataƙila har yanzu saƙona bai riske ka ba, shi yasa baka kawo mini ɗauki ba, duk da ban san wurin da zan sameka a birni ba, amma gara in tafi da tambaya har Allah ya sanya in dace in gano in da kake, dan da in auren nan gara in mutu a hanya".

Arewabooks
https://arewabooks.com/u/ayshercool7724

GYARA SHARHI KO SHAWARA
08081012143
GABA DA GABANTA

AISHA ADAM (AYSHERCOOL)

P6

Follow my Arewabooks account
Ayshercool7724
https://arewabooks.com/u/ayshercool7724

Tafiya take tana ratsa tsakanin gonaki, ga duhu ga babu haske, amma hakan bai dameta ba, babban burinta shine ta ga ta baro cikin ƙauyen nan cikin salama, ba tare da wani ya ganta ba.

Baba Hassan kuwa bacci ma ɓarawo ne ya ɗauke shi, tunanin mafita kawai yake yi, zuciyarsa ta dinga raya masa kawai ya haƙura ya tafi ƙauye, komai zai faru ya faru, idan ya so ya haƙura da aikin, amma gefe guda yana tunanin idan ya bar aikin gadin me zai yi? Wace sana'a zai yi? Wata shawara yake ta jujjuyawa a ransa wadda ba shi da tabaccin zata karɓu.

A haka har garin Allah ya waye, gaba ɗaya jikinsa a sanyaye yake gudanar da komai, yana nan zaune a bakin gate yana ta jujjuya yadda zai ɓullowa lamarin, wajen ƙarfe goma Fadila ta fito ta fita, wajen ƙarfe sha ɗaya kuma Alhaji Ahmad ya fito, cikin wani ash ɗin yadi, an fito masa da motar sa da zai fita da ita.

Alhaji Ahmad yana ƙoƙarin shiga mota, Baba Hassan ya cin masa, cikin girmamawa ya gaisheshi, Alhaji Ahmad ya amsa cikin mutuntawa.

Baba Hassan ya duƙa ya ce "Yallaɓai dan Allah alfarma nake nema".

Alhaji Ahmad ya gyara tsayuwa ya ce "Ina jinka".

Baba Hassan ya ce "Dama Yallaɓai game da 'yar wajena ce, jarrabawar nan ba a samu damar yin ta ba"

"Subhanallah, garin yaya?"

"Kuɗin aka kai a ƙurarraren lokaci, to yarinyar tawa tana son ta yi karatu sosai da sosai, to ka san mutanenmu na karkara, 'yan uwana ba son karatun nata suke ba, to rashin samun damar rubuta jarrabawar ya sanya suna ƙoƙarin su Aurar mini da ita. Shi ne nace dan Allah tun da dama Asabe ta tafi, a taimaka mini a ɗauki yarinyar tawa ta maye gurbin Asabe, idan ya so kuɗin aikin nata sai a sakata a makarantar boko, a dinga biya mata kuɗin makarantar".

Alhaji Ahmad ya ce "Malam Hassan wannan ai ba wani abun damuwa bane, bakomai ka kawota ai ilimi ga 'ya mace abin so ne, idan na dawo an jima ka tuna mini zan yiwa mutan gidan magana, ka kawota".

Wata ƙwallar farinciki ta cikawa Baba Hassan ido, ya zube ƙasa yana faɗin "Na gode, Na gode Allah ya jiƙan magabata ya yauƙaƙa Arziki, Allah ya biya maka buƙatunka na Alkhairi duniya da lahira, yadda ka Sanya farinciki a cikin zuciyata da ceto 'yata ubangiji Allah ya faranta maka, yayi maka tukuici na Alkhairi".

Alhaji Ahmad ya ce "Haba Malam Hassan, kar ka damu dan Allah wannan ai ba wani abin damuwa bane, Allah yayi wa yaranmu albarka baki ɗaya".

"Ameen Yallaɓai godiya nake".

Baba Hassan ji yake kamar an yaye masa damuwar da yake ciki, dan yana zuwa ɗakinsa yayi sujudu shukur, ya lalubo wayarsa ya kira Saminu.

Sai da ta kusa tsinkewa Sannan Saminu ya ɗaga, suka gaisa Baba Hassan ya ce "Saminu, dan Allah idan ka tashi tahowa, duk yadda zaka yi ka taho mini da Amina garin nan, ko a tasha ka ajiyeta sai ka kirani in zo in tafi da ita".

Saminu ya ce "To shikenan, amma ba zan taho yau ba gaskiya, sai dai gobe in Allah ya kaimu"

"Bakomai, amma dan Allah kar ka bari su farga su san da ita zaka taho, idan kuka taho daga baya nazo in musu bayani, idan suka san zaka kawo mini ita ba zasu bari ba".

Saminu ya ce "ba komai,