You Cannot Download this book untill you login but you can read it .

---

Login Register

yadda kake faranta mini, Allah yasa ka shiga aljanna kafaɗa da kafaɗa da Manzon Allah Sallallahu alaihi Wasallam kamar yadda ya alƙwaratawa masu kula da maraya"
Gaba ɗaya jikin Khalil yayi sanyi, idan Allah ya karɓi Addu'ar Hafsa, yasan ya gama dacewa a duniya da lahira, macen da tun kan ya aureta komai ƙanƙantar kyauta ta dinga kwarara masa addu'a kenan, ina ga idan ya aureta, Hafsa bata taɓa roƙarsa komai ba, kai hasali ma ita kanta tana ƙoƙarin ganin ta bashi kyautuka, duk da arzikin da yake da shi, lokaci lokaci, sai ta saka masa katin ɗari biyar wai ga rabonsa nan, yau tayi ciniki sosai.
Wani irin ƙaunarta ya ƙara dabaibaye zuciyarsa, a hankali ya ce "Tare da ke Babyna"

"Ya naji muryarka kamar baka walwala, lafiya kuwa?"

"Lafiya ƙalau, bacci kawai nake ji"

"Ok, to bari in barka sai da safe, ka kwanta"

Yayi saurin cewa'No, ki yi mini hira mana, raina ne babu daɗi"

Cikin damuwa ta ce "Subhanallah, ko na ɓata maka rai ne kan ka tafi?"

"Haba, ni da kika faranta mini mana, ba abin da kika yi mini"

"To Alhamdilillah, Allah ya yaye maka damuwarka, ka san shi ɗan Adam dama ba a ƙyaleshi haka, sai dai ka kasance mai yawan godiya ga Allah, da kuma ambatonsa a halin daɗi ko akasin haka"

Khalil ya lumshe idanunsa yana sauraron bayananta sannan ya furta "Ina sonki Hafsa, dan Allah duk ƙalubalen da zamu fuskanta kar ki rabu dani, na saba da jin daɗin kasancewata da ke, musamman yadda kike kwantar mini da hankali. Kina da haƙuri sosai da hankali, ni dai ina sonki"
"Nima ina sonka, dan kama fini haƙuri, ka kwanta kayi bacci"
"Allah ya tashemu lafiya"
Ta amsa masa da Amin.

Ya ajiye wayar, ya rintse idanunsa yana hango irin halin da zai shiga, idan aka raba shi da Hafsa, ita kanta yana tausaya mata, saboda tana matuƙar son sa, kuma ta saka ran samun afuwar rayuwa ita da mahaifiyarta saboda shigowar sa rayuwarsu.

Hajiya Zainab kuwa har ta kwanata tana mita da banbami, a kan abin kunyar da a ganinta Khalil yake shirin janyo musu, musamman a cikin ƙawayenta, haka ta cigaba da communicating da su Hajiya Turai, suna cigaba da zigata, a kan duk yadda za tayi ta yi ta raba Khalil da yarinyar nan, dan kar ya ja nata abin kunya, kuma kar ayi masa asiri a mallake mata shi.

Amina kuwa ta gama tsinkewa da lamarin Hajiya Zainab, dan bata taɓa zaton al'amarin zai yi zafi haka ba.
Washegari  Amina tayi shirinta cikin doguwar rigar da Maman Azima ta bata, ta tafi makaranta, kasancewar lesson ne kawai ba da uniform suke zuwa ba, bada ban Alhaji Ahmad ya rarrasheta a kan ta yi haƙuri, ta cigaba da Zuwa lesson ba, da babu abin da zai sanya ta kuma zuwa, dan gaba ɗaya ta gaji da yawon lesson ɗin nan.

Ta bayan layin gidan tabi, sai dai duk da kasancewar unguwar ta masu hannu da shuni ce, akwai wanda suke masu ƙaramin ƙarfi ne a unguwar, wasu tsirarin mutane ta gano a ƙofar wani gida, ana ta fito da kayan cikin gidan waje, wata mata da tsohon ciki da yara kusan biyar suna gefe sunata kuka, yayin da wani mutum da alama shine mijinta, yake ta rirriƙe wani mutum yana bashi haƙuri tamkar zaiwa mutumin sujjada.
Amina sai ta tsaya tana kallon ikon Allah, wasu tsirarin mutane kasancewar safiya ce, suka tsaya suna taya mutumin bada haƙuri, shi kuma wanda ake bawa haƙurin sai kumfar baki yake yi "Wannan wane irin wulaƙanci ne? Tun yaushe kuɗin nasu ya ƙare, amma ƙaryar yau daban ta gobe daban yaƙi biya, gaskiya ba wani ɗaga ƙafa, akwai mutane a ƙasa suna neman gidan nan, kuma ma sayar da gidan zan yi"

"Dan girman Allah ka taimaka mini, maiɗakina tana watanta na haihuwa, idan Allah ya sauketa lafiya, kan nan na samu kuɗin biyaka, ka san asara na tafka kwanan nan a kasuwa, na gobara da ta ƙona mini kaya"

"Kaga ni fa sayar da gidana zan yi, idan ka samu kuɗinka kawai ka kama wani gidan"
Kasa jurewa Amina tayi, kawai ta wuce su ta tafi makaranta, tana tafe tana kuka, tare da tausaya wa mutumin nan da iyalansa, tabbas talauci babu daɗi, da ana taimako yadda Yakamata, masu kuɗin dake unguwar nan zasu iya sai wa kowane talaka gida, saboda sun ninka talakawan dake unguwar yawa, amma kowa kansa ya sani, sai ranar juma'a zaka ga can gidan ana rabon gurasa can gidan ana rabon alala.
Amina ta dinga jin inama ita wata ce, yadda ta san raɗaɗin talauci, idan Allah ya yi mata arziki ba zata taɓa barin na kusa da ita a wahala ba.

A haka ta ƙarasa makarantar, da tunane tunane daban daban a zuciyarta, tare da fatan Allah ya bata nasara a rayuwa ta zama wata.

Yazid ya nemi afuwar su Amra, na rashin samun damar tsayawa jiya ya koya musu assignment ɗin su, sai yau ya tsaya yana koya musu, Fadila na hango shi, amma ba ta nuna tama ganshi ba, balle ta kula shi, sai da ya gama da su sannan ya taho wurinta.

"Dan Allah yau ɗaya ki gaishe ni mana, ke kullum sana gaishe ki?"

Ta ce "Ni na saka ka gaishe ni?"

"A'a ni naga yakamata in gaisheki, in ji ya lafiyarki"

Maimakon ta bashi amsa ta ce "Yauwa nace ya ku kayi da Kankiya jiya?"

Yazid ya ce "Jiya har ƙarfe biyar ina school ɗin nan, amma bai dawo ba, yanzu haka ma da wuri na shigo yau, na je ofishin sa, amma sakatarensa ya ce mini baya nan, na zauna na jira shi amma bai zo ba"

"Kaga ka share shi kawai"

"Meyasa zan share shi? Ko wani laifin nayi masa ne dan Allah ki gaya mini?"

Fadila ta kalleshi ta ce "Ni ya za ayi in sani idan ma laifi kayi masa?"

"Saurayinki ne fa, zai iya gaya miki"

Haɗe rai tayi ta ce "Ni nayi maka kama da sa'arsa? Ai zaren ba kalar yadin ne, nafi ƙarfinsa dan haka kar ka sake haɗani da shi". Wani irin sanyi jikin Yazid yayi, lecturer ma fa kenan, ina ga shi karan kaɗa miya, bai ajiye ba, bai bawa wani ajiya ba.

"Meye naga ka wani yi shiru?"

"Bakomai, kawai ina tunanin dalilin da yasa yake kirana ne, ko dai zai ja mini kunne ne akan ki?" Da sauri ta kalleshi ta ce "Me kake nufi?"

"Ina nufin ya ce kar ya ƙara ganin mu tare"

A ranta ta ce 'kai wannan sai kace aljani, ya fiye saurin gane abubuwa'

"Ya kika yi shiru?"

"Ai ni da zai ya kiraka yayi maka warning ɗin, da ya taimaka mini, ka liƙe mini da yawa, na rasa irin wannan abun, kai gashi kome mutum zai maka ba fushi kake ba".

Murmushi yayi, ya sake matsawa kusa da ita, wanda hakan ya fara haddasa mata mutuwar jiki.

"Idan yayi mini haka bai mini adalci ba, kina daga cikin mutanen da zuciyata ta aminta da su shiga rayuwata, daga ranar da kika fara yiwa takalmin ƙafata dariya, zuwa rashin iya turanci na, ban ji ba daɗi a kan yadda kike mini dariya ba, sai wadda sauran 'yan aji suka yi mini, rayuwata da ke maybe temporary ne, da mun gama school shikenan, amma wataƙila in Allah ya ƙaddara ke matarsa ce tare zaku rayu har abada"
Ya ɗan yi shiru sannan ya ce "Dan Allah Fadila, ki bashi haƙuri kar yayi Wani yunƙuri da zai raba abotarmu, let's be friends"

Ta ce "Kai ka gaya masa mana, kuma ina ka taɓa ganin ana abota tsakanin namiji da mace?"

"Ba ayi, amma ina son mu mu fara" yayi maganar muryarsa can ƙasa.

Share shi tayi ta cigaba da danna wayarta.

Gaba ɗaya ya tattara hankalinsa a kanta yana kallonta, ko ƙiftawa baya yi.

"Dan Allah ka daina kallona haka, ni gaskiya ka takurawa rayuwata wallahi" ta faɗa a tsiwace tana jujjuya ido.

Ya ce "Kamar bani da zuciya ko?"

"Dama ina ka ganta" murmushi yayi bai ce komai ba, ya tashi tsaye ya bar mata seat ɗin.

"In kana da zuciya kar ka sake zuwa wurin da nake, kuma kar ka sake kulani" bai waiwayo ba, yayi gaba yana murmushin da shikaɗai ya san ma'anarsa.

Amina ta na aji ana lesson, ƙarfe sha ɗaya na safe, malaminsu ya shigo ajin, ya kalli Amina a ya ce "Amina ɗauko jakarki ki zo" cikin mamaki ta bi malamin da kallo, ta ga dai lokacin tashi bai yi ba, to ina zata?
Haka ta ɗauko jakarta, ta biyo bayansa cikin mamaki.

Ga mamakinta Daddy ta gani a tsaye a ƙarshen barandar ajinsu.

Ƙarasawa ta yi  ce "Daddy lafiya kuwa?"

Maimakon ya amsa sai ya ce mata "Ina kwana"

Ɗan sosa kai tayi sannan ta ce "Yi haƙuri, ina kwana?"

"Ai ni na fara gaishe ki, yau bamu haɗu ba sai yanzu, kuma na riga gaishe ki"

Amina ta ce "Yi haƙuri"

"Ai ba laifi ki ka yi mini ba, amsawa kawai zaki yi"

"Ai kunya nake ji, ba zan iya amsawa ba" tayi maganar tana sunkuyar da kai.

Dariya yayi ya ce "Zo mu tafi"
Ba musu tabi bayansa, zuwa mota, ya buɗe ya ce ta shiga.

Mamaki ya mamaye mata, tana son ta tambayeshi, amma tana tunanin kar tayi wani laifin.

Sai dai kasa jurewa tayi ta ce "Daddy ina zamu je ne?"

"Sayar da ke zan yi" ya bata amsa.

"To ai idan ka sayar da ni ba zan yi tsada ba"

Ya ɗan buɗe baki ya ce "Inji wa? Tsada za kiyi sosai, har an biyani kuɗin ma" dariya Amina tayi tana cigaba da kallon titi, sai dai ga mamakinta, sai taga ba hanyar gida suka nufa ba.

Ta sake kallonsa ta ce "Amma Daddy..

"Shhh" ya katseta.

Haka ta zubawa sarautar Allah ido, sun ɗan yi tafiya mai nisa, suka shiga wata unguwa, titunan unguwar kanta sai lokaci lokaci ababen hawa ke wucewa.
Gaban wani ƙaton gate Yayi parking, wani ɗan sanda ya leƙo, sannan ya koma ya buɗe gate ɗin.

'yan sandan sun kai huɗu a cikin gidan, suka dinga ɗaga masa hannu suna gaishe shi, amma bai kula su ba.

"Daddy suna gaisheka fa" Amina tayi maganar tana waiwayawa.

"Eh na gani"

"To ya baka amsa ba?"

"Kai ke kam tambayoyinki sun yi yawa" bata kuma magana ba tayi shiru.

Yayi parking a ƙatuwar harabar gidan, ya kashe motar ya fice.

Amina zamanta tayi a cikin motar, tana waige waige.

Ya buɗe motar ya kalleta ya ce "sauko mana"

A ɗan tsorace ta ce "Daddy dan Allah ina ne nan?"

"Wurin wanda ya saye ki na kawo ki"

Gaba ɗaya jikinta yayi sanyi, ta bi idonsa da kallo.

"Sauko mana" ya kuma maimaitawa.

Jiki a sanyaye, ta sauko daga motar, tana bin gidan da kallo.

Yayi gaba tabi bayansa, gidan yafi wanda suke ciki girma sosai da sosai, kuma ya tsaru, ya ciro mukulli ya buɗe ƙofar shiga cikin gidan. Wani irin ƙaton falo ne, da sai ka taka steps Sanan zaka isa ga kujerun.

Fuskantar da Amina tayi babu mutane a gidan ne, ya sanya jikinta yayi sanyi, ta ɗan tsorata.

"Shigo mana" yayi maganar yana kallonta.

Ƙarara yaga tsoro kwance a fuskarta, hakan ba ƙaramin burge shi yayi ba.

Babu tsammani taji ya riƙo hannunta cikin nasa, aikuwa ta tsorata, tamkar zata zura da gudu.
Murmushi yayi ya ja hannunta, zuwa wani tangamemen kitchen, sannan ya saki hannunta ya kalleta ya ce "Amina, ke 'ya ta ce, kar ki saka a ranki zan wani abu da zan cutar da ke, amma duk da haka naji daɗin reaction ɗinki akan hakan, kiyi haƙuri na ɗauko ki ba tare da na gaya miki dalilin hakan ba, nan gidana ne galibi ina saukar baƙina a ciki, Abokaina zasu zo garin nan, shi yasa na ɗauko ki ki musu girki dan Allah, bana son yin order na restaurant saboda na yadda da girkin ki, amma idan kinga da takura bakomai, ki bar shi".

Jiki a sanyaye ta ce "Zan yi"

"In kin san na takura miki ki bar shi kawai"

Ta girgiza kai ta ce "A'a, baka takura mini ba, amma me zan girka" tayi maganar tana jin yadda kaɗaicewarsu ta takurata.

"Ko me kika girka yayi, zuwa azahar zasu zo insha Allah, na ajiye komai, idan kina buƙatar wani abu sai ki mini magana" ta jinjina masa kai alamar to.

Ya juya ya bar kitchen ɗin, sai da Amina ta tsaya ta gama ƙarewa kitchen ɗin kallo, tana tunanin to ita Hajiya Zainab zaman me take, da mijinta zai yi baƙi amma ba zai kaisu gidanta ba ayi musu girkin a can, sai a nan ba? Ganin bata da amsa, ya sanya ta fara tunanin abin girkawa.

Khalil kuwa jinsa yake tamkar mara lafiya, gaba ɗaya ya rasa abin da yake masa daɗi, sai da yunwa ta ishe shi, sannan ya shiga cikin gidan neman abin da zai ci, sai dai jin Abincin yayi tamkar magani, ya ajiye Abincin ya tashi, shi babbar damuwarsa, kar Mummy ta ce zata yiwa Hafsa wani abu, gashi har ɗakinta ya je ya sameta ya sake bata haƙuri, yayi mata bayani, amma taƙi saurararsa, ta ƙare masa zagi ta koreshi.

Ba zato babu tsammani, Sir Kankiya ya shigo ajin su Fadila, yana muzurai ya fara yi musu bayanin cewa yayi musayan lokacin gabatar da darasi, da malamin da yakamata ya shigo ajin, ya wuce ya ajiye litattafan hannunsa ya fara ƙoƙarin ciro maker daga aljihunsa, yana ɗaga ido, suka yi ido huɗu da Yazid.

"Kai jiya bance maka kaje office ɗina ina son ganinka ba?" Yayi Maganar yana tsare Yazid da ido.

"Naje sir ban sameka a office ba, har kusan biyar ina jiranka"

"You Are very stupid, ni zaka yiwa ƙarya?"

"Ba ƙarya nake ba sir"

"Shut up, tashi ka bar mini aji, kar ka sake attending lectures ɗina, mara ɗa'a kawai, and mark you no 75% attendance no exams"
Gaba ɗaya Fadila sai ta rasa me ma zata yi ko tace, abubuwan na Kankiya sun wuce misali sun zama hauka.
Ga mamakinta Yazid ko yunƙurin bawa Kankiya haƙuri baiyi ba, ya tashi ya bar ajin.

Kan azahar tayi, Amina ta gama girkin da Daddy ya sakata, duk ta gaji, ta wanke dukkan abin da ta ɓata. Ta bi hanyar da suka shigo ita da Daddy, ta koma ƙaton falon nan, sai dai baya nan, kitchen ta koma tayi alwala ta dawo carfet ɗin falon tayi salla. Bayan ta idar Alhaji Ahmad ya shigo, ya kalleta ya ce "Sannu da aiki"

"Yauwa, na gama, sai in tafi gida ko?" Tayi maganar a ƙagauce.

Yayi murmushi ya ce "Zaki tafi gida, yanzu dai ga ɗakin da zaki kai abincin can, zaki jirani, idan sun kammala sun tafi, sai mu koma gida tare.
Amina ji tayi kamar ta fasa ihu, ita gaba ɗaya bata son wannan ƙeɓewar ta su.

Da kansa ya tayata suka shirya komai a ɗakin, ya bubbuɗe kulolin Abincin sai ƙamshi yake yi.

Ya kai Amina wani ɗakin, bayan ya sa ta ɗebi Abincin, ya rufeta a ɗakin. Ya koma taro baƙinsa.

Amina dai gaba ɗaya a tsorace take, wannan gidan sai ayi garkuwa da mutum ma ba wanda ya sani, Amina ta ci Abinci, ta gama amma zaman ya isheta, dan haka ta kwanta a nan ƙasan carfet, wani nannauyan bacci ya kwasheta.

Ya ɗan jima a tsaye a kanta yana kallonta, sannan ya durƙusa daf da ita
"Amina ki tashi kiyi sallar la'asar mu tafi" A hankali ta buɗe idonta, firgigit ta tashi zaune, saboda ganin Alhaji Ahmad a tsaye a kanta.

Miƙewa tsaye tayi, tana murza idonta.

"Ni mu tafi kawai"

"Ba zaki sallar ba?" Ta ɗaga kai alamar eh.

Ta durƙusa zata ɗau kwanon da taci Abinci ya kalleta ya ce "Bar shi a nan, za a gyara komai insha Allah, muje sai kin yi salla zamu tafi, biyar da rabi fa"

Hankalinta bai kwanta ba sai bayan tayi sallar,  taga sun fita daga gidan sun hau titi sosai, sun fito daga gidan nan.

Suna tafe a hanya Daddy ya ce "Naji daɗi sosai, kin fitar da ni kunya, suna ta godiya, Allah yayi miki albarka, Ahmad ya gode sosai"

Ta ɗan kalle shi "Waye Ahmad?" Ta tambaya, dan ta manta sunansa ne.

"Baban Fadila da Aminatu" murmushi tayi ta ce "Au na manta sunanka ne"

Ta kashingiɗa a jikin seat, tana lumshe ido.

"Kin gaji ko?" Ta ɗaga masa kai alamar eh.

"Eyya, sannu to, and please wannan ma sirrinmu ne, kin taimakawa Daddynki, ya fita kunyar abokansa is our secret"

"Tom, ba zan faɗawa kowa ba insha Allah" tayi maganar tana murmushi.

Ya zura hannu a aljihunsa, ya zaro kuɗi a envelope ya miƙawa Amina.

Ta kalleshi ta ce "Na menene wannan?"

"Kuɗi ne na baki, tukuicin abin da kika mini ne, na katse miki karatun ki kin mini aiki"

"Ai dama dai sai ka nuna banbanci duk da kace ni 'yar ka ce" tayi maganar tana tura baki.

"Banbancin me fa?"

"Idan kasa Fadila aiki biyanta kake?"

Mamakin Amina yake, sam yanzu bata shakkarsa, ko shakkar faɗa masa magana.

"Eh to, na kan mata tukuici da wani abu, dan na faranta mata rai"

"Ai ni kayi mini abubuwa da dama, kana ciyar dani, ga wurin kwana, ga kuma karatuna, me zai sa sai ka kuma bani wani abu?"

"Wannan ai duk daban"

Ɗan shiru Amina tayi sai kuma ta ce "Daddy"

"Na'am 'yar Daddy"

"In roƙeka wani abu?"

"Kan ki tsaye makuwa, me kike buƙata?"

Nan ta labarta masa, gidan da ta wuce ɗazu da safe, ana fito musu da kaya.

"Yanzu me kike so ayi?"

"Dan Allah ka biya musu, tunda kana da kuɗi"

"Waye ya ce miki ina da kuɗi?"

"Kai ka gaya mini sayar da kuɗi kake, kuma kalli motarka da gidanka, ai dai kana da kuɗi sosai"

Murmushi yayi, ya shafi dogon gemunsa, da yake baƙi da fari kaɗan kaɗan a cikinsa.

"Daddy baka ce komai ba"

"Sai na tambayi mata ta, idan ta amince sai a biya musu"

Haɗe rai Amina tayi ta ce "Ashe ba za a biya musu ba kuwa"

"Me kike nufi?"

"Ai wannan matar 'yar hana ruwa gudu ce, ba zata taɓa barin ayi abin arziki ba"

Daddy ya haɗe rai ya ce "Matar tawa ce 'yar hana ruwa gudu?"

Amina shiru tayi tana ɗan kallon gefe dan da zata samu dama, sai ta ɗuɗɗurawa Hajiya Zainab Ashar dan ta huce.

"Kayi haƙuri, amma wallahi bata da....

"Ke!" Ya daka mata tsawa da sai da ta razana ta kalleshi.

"A gaban nawa zaki zagi uwar 'ya'yana" ji tayi kamar ta ce "Nima a gabana take zagin babana' amma ya koma mata Alhaji Ahmad ɗinsa, dole ta haɗiye maganarta.

Parking ya yi ya kalleta ya ce "Fitar mini daga mota"

"Gida da nisa fa daga nan" ta faɗa kamar tayi kuka.

"I don't care, get out" ya faɗa in a serious tone. Buɗe motar tayi a fusace, ta fice ranta a ɓace.
Ɗan guntun murmushi yayi, ya ja motarsa yayi gaba.

Da ƙafa Amina ta nufi hanyar gida, tana tunanin yadda zata ƙarasa gida a ƙafa.
Ran Amina ba ƙaramin ɓaci yayi da abin da Alhaji Ahmad ya mata ba, yana ta mata kirki, amma dan ta faɗi magana a kan waccan azababbiyar matar ya mata wulaƙanci, duk wahalar da tayi masa, amma bai gani ba, meye ya hana ita 'yar lelen matar tasa tayi masa?.
Haka Amina tayi ta zancen zuci tana mita a ranta.

Horn ɗin motar da ta ji yayi mata yawa a kunnuwanta ne, ya sanyata waiwaya.
Murmushi me motar ya sakar mata, gani tayi kamar ta sanshi, ta hau tunanin a in da ta san shi.

"Gida zaki ne?"

"Eh" ta bashi amsa.

"Kamar baki gane ni ba, Bilal ne na nan layinku, muna gaisawa fa idan zaki tafi makaranta" sai yanzu ta tuna shi, yana yawan yi mata adawo lafiya, idan zata tafi makaranta.

"Sannunka ya kake?"

"Lafiya ƙalau Alhamdilillah, taho mu ƙarasa".

Ɗan shiru Amina tayi, yamma tayi liƙis, ta san yanzu haka Baba ya fara tunanin ina ta tsaya, kuma idan ta ce da ƙafa zata ƙarasa kuma, magariba zata rufa mata.
Dan haka bata da zaɓi illa tabi Bilal.
Suna tafe a hanya yana mata hira, ita gaba ɗaya hankalinta baya kansa, fatanta kawai su ƙarasa gida.

Suna zuwa ƙofar gidan, Amina ta fara ƙoƙarin buɗe motar tana masa godiya. Bilal ya ce "Bakomai, muje nima in gaida Baban"

Amina dai ba ta ce masa komai ba, baya son gwaleshi, bayan ya taimaketa.

Tare suka shiga cikin gidan, sai dai Baba baya nan, Dan an fara kiraye kirayen sallar magariba.

Amina ta kalleshi ta ce "Ina ga ya tafi masallaci, na gode sosai".

Bilal ya ce "To ko zaki bani lambar wayarki?"

"A'a ai bani da waya" suna cikin maganar, sai ga Alhaji Ahmad ya fito zai tafi masallaci, tun daga nesa ya fara yi musu wani irin kallo, musamman Amina, Amma Amina ta basar ta mayar da hankalinta kan Bilal.

TOFA ME KUKE TUNANI.
MASU SAN POSTING KULLUM, SU BIYANI IN BUƊE MUSU VIP, ZAN DINGA POSTING KULLUM INSHA ALLAH

AYSHERCOOL
08081012143
GABA DA GABANTA

AISHA ADAM (AYSHERCOOL)

PAGE 32-33

Duk da Amina ta sha jinin jikinta da irin kallon da Alhaji Ahmad ya yi musu, amma ta maze ta ƙi ko ɗaga kanta, balle ta nuna ta san ita yake yiwa wannan kallon.
Bilal ya gaida Alhaji Ahmad, amma ya amsa masa sama-sama ya fice, Amina na ganin fitar Alhaji Ahmad, ta yiwa Bilal sallama ta shige cikin gida.

Fadila kuwa tun da Kankiya ya Kori Yazid daga ajin, hankalinta yake a tashe, ta rasa meya kamata ta yi, tamkar a kan ƙaya take haka ta dinga jiran Kankiya ya fita ita ma ta fita, ganin ba shi da niyyar fita ne, ya sanya ta tashi ta nemi excuse zata fita, amma Fafur Kankiya ya hanata, ji tayi tamkar ta je ta shaƙe shi ta gwara kansa, wata irin tsanarsa ta ninku zuciyarta.
Sai da yayi kusan awa biyu da wani abu sannan ya bar ajin, yana fita Fadila ta fita, ta dinga duddubawa ko zata ga Yazid, amma babu Yazid babu dalilinsa, duk in da ta san zata ganshi ta duba amma bata ganshi ba, hakan ya sa tayi tunanin gida yayi tafiyarsa, alamar yayi zuciya.
Tunani ta dinga yi, wani irin hukunci yakamata ta yiwa Kankiya, wani mataki yakamata ta ɗauka a kansa, amma sai ta yi tunanin kar tayi wani abu a kai, ya kuma cutar da Yazid, haka nan ba tare da ta yanke shawarar komai ba, ta shiga motarta ta tafi gida cike da damuwa.
  A gidanma kasa sukuni tayi, gashi ita ba lambar Yazid ba, balle ta kira shi a waya taji meyafaru bayan fitarsa daga aji ba.
Tana tsaka da wannan tunanin, sai ga kiran Kankiya, ji tayi kamar tayi jifa da wayar, amma tayi yaƙi da zuciyarta ta ɗaga.

"Amincin Allah ya tabatta a gareki amaryata" ji tayi kamar ya watsa mata wuta a zuciyarta, ko muryarsa ba ta ƙaunar ji sam.

"Me ka kirani kayi mini, wai ban maka kashedi a kan kirana ba?"

"Kina fushi da ni dan na kori saurayinki daga aji ko? Ai abinda na gaya miki ne Fadila, muddin ba zai rabu da ke ba, zan ta wahalae da shi ne"

"Wai kai waye ya gaya maka Yazid saurayina ne? Babu wani abu mai Kama da soyayya tsakani na sa Yazid, kuma bari in gaya maka wani abu, wallahi muddin baka kiyaye ni a kan batun soyayyar nan ba, sai na maka abin da har ka mutu ba zaka manta ba*

Yayi dariya ya ce "Ni ma kuma zan yiwa Yazid ba, dan naga a duniya idan ana son ɓacin ranki, to a taɓa Yazid"

Sai kuma yayi ƙasa da murya ya ce "Haba Fadila, duk ke kika saka al'amura suka zama so complicated like this, ni ina da kishi sosai da sosai, shiya sa ba zan iya jure ganinki da wani ba, wallahi idan Yazid ya fita daga harkarki babu ruwana da shi. Yanzu gaya mini yaushe zan zo gidanku?"

"Abudrrasheed Kankiya, banda ina ganin darajar alli da duster, da sai na nuna maka wacece Fadila, na lura rashin sanin wacece ni ya sanya kake mini karan tsaye yadda ka ga dama"

"Hmmm, koma dai menen ai nasan ke mutum ce, kuma duk matsayinki dole zaki aure wataran ƙarƙashin inuwar wani, Fadila mu daina samun wannan saɓanin, in daina wahalar da ɗan mutane, ki fita harkarsa ki bani dama in gwada miki soyayya"

"Shikenan, ni da kai mu zuba mu gani,ka koma ka ƙarewa kanka kallo, sannan ka ƙare mini kallo kasan wacece ni, kan kace kana sona ka san matsayina tukuna, wallahi ka cigaba da takura masa zan nuna maka abin da zan iya yi a kai"

Kankiya ya yi ajiyar zuciya ya ce "Saboda shi Yazid ɗin duk kike gaya mini wannan maganganun?"
"An gaya maka ɗin, kayi abin da zaka iya" daha haka ta kashe wayar , tana jin tamkar ta sa a ɗaure Kankiya, ita tausayin Yazid take ji, idan aka ɓata masa career an cuce shi, amma Kankiya na son amfani da wannan damar ya tilasta mata ta so shi, bata taɓa tausayin