You Cannot Download this book untill you login but you can read it .

---

Login Register

ce, "to wane launi za ka yi mini?"

Marini ya ce, "zan rina maka shi shuɗi."

Abuƙir ya ce, "a'a, ni jan launi nake sha'awa."

Marini ya ce, "ban san yadda ake yin jan launi ba."

Abuƙir ya ce, "to rina mini shi tsanwa.'

Marini ya ce, "ban iya ba."

Abuƙir ya ce, "rawaya fa?"

Marini ya ce, "shi ma ban iya ba."

Abuƙir ya yi ta lissafo masa launuka daban-daban, Marini ya ce duk bai san su ba. Ya kuma ce, "ka sani mu arba'in muke marina a wannan birni, babu ƙari babu ragi. Dukkanmu kuwa mun gaji wannan sana'a ne daga iyayenmu, su ma sun gada daga iyayensu. Idan ɗaya daga cikinmu ya mutu, za mu koya wa ɗansa, domin ya gaje shi. Idan ba shi da ɗa, sai mu koya wa wani daga cikin 'ya'yanmu ya gaje waccan marinar, ba mu taɓa barin wani bare ya shiga wannan sana'a ta mu ba. Ka ga mu arba'in ɗin nan duka, ba mu san wani launi da ya wuce shuɗi ba."

Abuƙir ya cika da mamaki, gayar mamaki. Ya dubi marini ya ce, "ni ma da kake gani na nan, ba ni da wata sana'a da ta wuce rini a ƙasarmu. Na san yadda ake sarrafa baba a fitar da launuka iri iri daga gare shi. Idan ka yarda sai in zauna tare da kai, ka riƙa biya na, ni kuwa in koya maka yadda ake sarrafa launuka daban-daban har ka fi dukkan marinan wannan birni."

Marini ya girgiza kai ya ce, "ina fa za a yi haka, ko ɗan gari ba mu yarda ya raɓe mu ba, balle kai da kake baƙo. Wannan ba shi yiwuwa."

Abuƙir ya ce, "to ai sai in buɗe tawa marinar a cikin gari, tunda ina da 'yan kuɗina. Idan an hana ihu, ai ba a hana aha ba."

Marini ya ce, "wannan ma ba za ta saɓu ba. Ban da mu arba'in ɗin nan da na gaya maka, babu wanda yake da ikon buɗe wata marina."

Da Abuƙir ya ga dai marinin nan ya ƙi ba shi fuska, sai ya rabu da shi ya wuce gaba, ya tambayi inda zai samu wata marinar, aka yi masa kwatance ya nufi can. Shi ma wannan marini ya faɗa masa kamar yadda na farko ya faɗa masa. Bai gushe ba yana bin marinan garin, daga wannan shago zuwa wancan har sai da ya zagaya su duka arba'in. Dukkansu kuwa bakinsu ɗaya, babu wanda ya yarda ya ɗauke shi aiki a marinarsa. Da ya ga haka sai ya yi fushi, fushi mai tsanani. To, in ba rini ba wace sana'a zai yi? Ya tambayi hanyar fada, aka nuna masa, ya tasar wa can domin kai ƙara.

Da zuwa aka yi masa iso. Ya duƙa gaban Sarki ya ce, "Allah ya ba ka nasara, ni baƙo ne kuma gwanin rini a ƙasar da na fito. Na kawo ƙarar marinan garin nan."

Ya kwashe labarin abin da ya faru tsakaninsa da marina duka ya faɗa masa. Ya ƙara da cewa, "na san yadda zan rina tufa da duk irin launin da ake bukata. Ina iya sarrafa jan launi ya fitar da launin kowane irin fure ake so a duniya. Zan iya sarrafa tsanwa ya bayar da kowane irin launin ganyen ake bukata. Na san yadda zan sarrafa rawayan launi ya fitar da launin lemu da ruwan ƙwai ko makamantansa. Zan iya sarrafa baƙin launi zuwa baƙi-baƙi ko baƙi wuluk ko launin toka ko launin kwalli. Ina kuma iya sanya wa tufa launuka mabanbanta ta fito kamar launukan da ke jikin ɗawisu ko launukan gashin aku. Na san yadda zan rina zabibi da algashi da makuba da garura da ruwan goro da cincinbale."

Ya yi ta zayyana wa Sarki launuka dai, wasu ma ko sunansu Sarkin nan bai taɓa ji ba balle ya gan su. Ya ƙarƙare da cewa, "ya Sarki, marinan garin nan duka babu launin da suke iya mayar da tufa sai shuɗi, duk da haka kuma sun ƙi yarda in shiga cikinsu balle in koya musu dabarar sarrafa launuka. Kuma sun hana in buɗe tawa marinar, ga shi kuwa ban iya wata sana'a ba sai rini."

To, Allah ya yi sarkin nan wayayye ne, mai son ci gaban garinsa. Yayin da ya ji abin da Abuƙir ya gaya masa sai ya yi fushi da marinansa. Ya kuma ce wa Abuƙir, "idan dai abin nan da ka faɗa mini gaskiya ne, cewa kai gwanin rini ne, to zan buɗe maka karofi, na kuma ba ka jari ka sayi duk abin da kake bukata ka zuba a ciki. Su kuwa waɗancan marinan, ƙyale ni da lalatattu, duk wanda ya yi maka ko da kallon banza ne, ka zo ka gaya mani, in sa a rataye shi gaban shagonsa."

Nan take Sarki ya kira masu gini ya ce musu, "ku tafi da wannan gwanin rini cikin gari, ya nuna muku duk inda yake so, kada ku kula da gida ne ko shago ko masaukin baƙi, ku rushe ko ma menene, ku zo mini da mamallakinsa a biya shi diyya, ku gina masa marina irin wadda yake so. Kada ku kuskura ku saɓa wa umurninsa."

Sarki ya sa aka ba Abuƙir tufafi na alfarma. Aka je barga kuma aka zaɓo masa ingarman doki. Sarki kuma ya ƙidaya dinari dubu ya damƙa masa ya ce, "riƙe wannan ka riƙa ɓatarwa kafin a kammala gina maka marina." Aka ba shi ƙerarren gida cike da kayan alatu, aka haɗa masa da bayi biyu da za su yi masa hidima.

Za mu ci gaba ranar Asabar mai zuwa, insha Allah.

Bukar Mada
12/10/2022SHARRI KARE NE 5

HIKAYAR ABUƘIR MARINI DA ABUSIR WANZAMI

Waziri Aku

Sarki ya sa aka ba Abuƙir tufafi na alfarma. Aka je barga kuma aka zaɓo masa ingarman doki. Sarki kuma ya ƙidaya dinari dubu ya damƙa masa ya ce, "riƙe wannan ka riƙa ɓatarwa kafin a kammala gina maka marina." Aka ba shi ƙerarren gida cike da kayan alatu, aka haɗa masa da bayi biyu da za su yi masa hidima.

Abuƙir ya kwana gidansa, da gari ya waye ya sanya tufafin nan na alfarma, ya hau doki yana taƙama, kamar shi ne Sarkin, mai ƙudundune a batta idan ya samu shantu sai ya miƙe. Magina suka shige gaba yana biye da su, suka yi ta zagaya birni har suka iso wani wuri a tsakiyar garin. Abuƙir ya dakatar da su ya ce, "nan ya yi mini yadda nake so."

Magina suka kwashi mai wurin sai gaban Sarki. Aka yi wa wurin kuɗi, Sarki ya biya fiye da yadda aka ce. Mai wuri ya karɓa yana ta godiya. Masu gini kuma suka duƙa aiki, lailatan wa naharan, ba ji ba gani. Abuƙir ya tsaya a kansu yana ba su umurni, "ku gina abu kaza nan, ku gina abu kaza can, ku sanya abu kaza nan, ku sanya abu kaza can." Cikin 'yan kwanaki kaɗan aka gina marina wadda babu tamka tata.

Da aka ƙare aiki, sai Abuƙir ya tafi gun Sarki ya faɗa masa. Sarki ya tambaye shi me ake bukata kuma? Abuƙir ya ce kayan aiki. Sarki ya lalubi lalitarsa, ya ƙidaya dinari dubu huɗu ya ba shi ya ce, "je ka maza ka sayi duka abin da kake bukata na aiki, ni dai na ɗokanta in ga yadda launukan nan suke."

Abuƙir ya ƙulle kuɗi ya nufi kasuwa tare da bayi. Ya tarar da baba tari guda, ga kuma araha, ya kwashi wanda zai ishe shi ya biya, ya kuma sayi duk wani abu da yake bukata na rini, bayi suka kinkima suka kai masa marina. Da ya ga komi ya kammala sai ya sake komawa wurin Sarki ya faɗa masa. Sarki ya yi murna ƙwarai sa'annan ya ce, "to, madalla. Sai a fara da ni, kasan kowa ya ci ladan kuturu dole ya yi masa aski." Ya tattaro tufafi kamar ɗari biyar ya ce a rina su launuka mabambanta.

Abuƙir ya tafi marina ya duƙufa aiki, cikin ƙanƙanin lokaci ya rine tufafin Sarki duka, kowace tufa da irin launinta. Ya shanya su gaban shagonsa domin su bushe.

Yayin da mutane masu wucewa ta gaban shagon suka ƙyalla ido suka ga tufafin nan, sai suka tsaya, suka yi cincirindo suna kallo, tare da mamakin launukan da ke jikinsu, waɗanda ba su taɓa gani ba tunda suke. Suka riƙa tambayar Abuƙir sunayen launukan, shi kuma yana faɗa musu, "wannan ja ne, wannan tsanwa ne, wancan kuma rawaya." Ya yi ta faɗa musu sunayensu. Nan da nan masu ido da kwalli daga cikin mutanen suka ruga gida suka kwaso tufafinsu suka kawo masa, suna rige-rige. Wani ya ce, "rina mini su rawaya." Wani kuma ya ce rina mini su makuba." Suka ce kuma ko nawa ya bukata gare su, za su ba shi.

Da ya gama aikin Sarki, sai ya ɗauka ya kai masa. Sarki ya karɓa ya riƙa dubawa yana al'ajabi. Ya yi farin ciki matuƙa, ya kawo kyautar dukiya mai yawa ya ba shi. Ko da fadawan Sarki suka ga haka, sai su ma suka ɗebo nasu tufafin suka ba shi. Sa'adda ya rina ya kawo musu, suka yi ta ba shi dinari da azurfa, suka girmama shi, darajarsa ta ɗaukaka ga Sarki da fadawa.

Sunan Abuƙir fa ya yi tambari ko'ina cikin garin nan har mutane suka sanya wa marinarsa suna Marinar Sarki. Ko'ina sai kawo masa aiki ake yi, shi kuwa sai abin da ya yanka na kuɗi ake biyan shi. Sauran marinan garin kuwa tuni ya kashe musu kasuwa, ban da hamma ba su komai a ƙofar shagunansu. Duk da haka babu mai ikon ce masa kanzil a cikinsu, ana tsoron su inna inji ɗiyan mayya, to su ma tanka su ga aiki da cikawa gun Sarki.

Saboda haka sai marinan nan suka sake dabara, tunda an ce in laila ta ƙiya sai a koma basha, suka riƙa lallaɓowa wurin Abuƙir suna ba shi haƙuri tare da yi masa daɗin baki wai ko sa samu ɗan abin kore wa bakinsu ƙuda, ba su san cewa rowa a gunsa ko na goye na shafa masa lafiya ba. Wanda hannunsa yake dunƙule kullum kamar hannun 'yan dambe. Da suka ga dai ba za su ɓamɓari komai ba ta hanyar bambaɗanci sai suka fara doddofar ya ɗauke su aiki, ya ɗan riƙa 'yammusu na cefane. Nan ma dai ya baɗa musu ƙasa a ido, ya kuma yi musu kora da hali, wadda aka ce ta fi kora da kara.

Cikin 'yan watanni Abuƙir ya tara dukiya mai yawa, ya mallaki bayi da kuyangi, baƙaƙensu da farare. Duk inda ya ratsa cikin gari a kan dokinsa, sai talakawa ke faɗuwa suna kwasar gaisuwa suna faɗin, "maigida barka da fitowa." Bayi kuma na kewaye da shi suna yi masa hidima, da zarar ya ba da umurni sai su zabura su aikata. Wannan ke nan game da lamarin Abuƙir Marini.

Amma abin da ya kasance ga Abusir Wanzami, lokacin da Marini ya kwashe masa kuɗi ya kuma rufe shi cikin ɗaki a halin rashin lafiya mai tsanani ya gudu, ya kasance cikin ɗimuwa da gushewar hankali tsawon kwana uku bai farfaɗo ba.

A kwana na ukun ne da yamma mai kula da gidan baƙin na zagayawa daga wannan ɗaki zuwa wancan har ya iso ga ɗakin da Wanzami yake ciki, ya tarar da ƙofa rufe, sai kuma ya tuna tsawon kwana uku bai ga duhun kowa daga cikin mutanen biyu ba. Ya ce a ransa, 'a'aha, waɗannan guduwa suka yi don kada su biya ni kuɗin haya. To, ban yardar musu ba." Ya sa ƙafa zai wuce, sai ya ji kamar nishi na fitowa daga cikin ɗakin. Ya tsaya ya saurara da kyau, ya ji lallai dai mutum ne ke nishi, ga kuma ƙofa a rufe. Ya tafi ya ɗauko wani ɗan mabuɗi na ɗakin ya buɗe, ya tarar da Wanzami kwance yana juye-juye yana kiran sunan Abuƙir.

Mai gidan baƙi ya yi maza ya durƙusa kusa ga Abusir yana cewa, "me ya same ka? Ina ɗan uwan naka?"

Cikin ƙarfin hali Abusir ya ce, "ba ni da lafiya, yanzu na farfaɗo. Na kirayi abokina ban ji ya amsa mini ba. Don Allah laluba ƙarƙashin shimfiɗar nan da nake kwance ka ɗauki kuɗi ka sayo mini abinci, yunwa nake ji."

Mai gidan baƙi ya laluba ko'ina bai samu kuɗi ba, ya ce, "babu komai a nan."

Abusir ya tambaye shi, "ko ka ga abokina?"

Mai gidan baƙi ya ce, "yau kwana uku ban gan shi ba. Kai, ni ina tsammani shi ya kwashe ma kuɗi ya gudu."

Ran Wanzami ya ɓaci, Me ya sa Abuƙir zai yi masa haka? Don me zai kwashe masa kuɗi ya gudu ya bar shi cikin ciwo? Amarya ba ta hau doki ba, kuma sai a ɗora mata kaya? Hawaye ya kwaranya bisa kundukukinsa kamar ruwa don baƙin ciki.

Yayin da Mai gidan baƙi ya ga halin da Wanzami ya shiga, sai tausayi ya kama shi ya ce masa, "kwantar da hankalinka. Shi kuwa abokinka, rabu da shi, duniya ce ta ishi kowa riga da wando, wanda bai zo ba ma tana jiran sa balle wanda ke cikinta. Kuma shi sharri kare ne, mai shi yake bi."

Ya tafi ya dafa shayi, ya zuba madara da gahawa, ya kawo wa Abusir domin ya sha hanjinsa su warware. Ya kuma tafi ya sayo masa abinci mai rai da lafiya ya kawo masa. Mai gidan baƙi ya yi ta jinyar sa tsawon wata biyu. Wanzami ya murmure sarai, jikinsa ya fara komowa. Ya yi wa mai gidan baƙin nan godiya sannan ya ce, "ina roƙon Allah ya hore mini, in biya ka kuɗin duka ɗawainiyar da ka yi mini."

Mai gidan baƙi ya ce, "ban yi don ka biya ni ba. Na yi ne domin neman yardar Ubangiji."

Daga nan Abusir ya saɓa zabirarsa ya shiga gari yana zagayawa, kamar yadda ya saba yi a baya. Yana cikin tafiya har Allah ya kawo shi kusa da marinar Abuƙir. Ya hangi mutane sun yi dafifi a gaban marinar suna kallon tufafin da aka shanya. Abusir ya tari wani mutum ya tambaye shi, "bawan Allah, ko lafiya na ga mutane sun taru gaban wancan shago?"

Mutumin ya ce, "hala kai baƙo ne da ba ka san Marinar Sarki ba?"

Abusir ya ce, 'Marinar Sarki?"

Mutumin ya ce, "I, marina ce da Sarki ya gina wa wani baƙo da ake ce ma Abuƙir gwanin rini. Duk sadda ya fid da launin da ba mu taɓa gani ba sai mu taru muna kallo muna tambayarsa sunan launin. Sa'adda ya zo garin nan sai da ya bi dukkan marinan garin nan yana roƙon su ɗauke shi aiki, amma suka kore shi."

Mutumin nan ya kwashe abin da ya faru duka tsakanin Abuƙir da marina, da yadda ya kai ƙarar su wurin Sarki duk ya gaya wa Abusir. Ya kuma ƙara da cewa, "da yake Sarki mutum ne mai son duk wani abu da zai kawo cigaba a garinsa, sai ya gina masa wannan marina da kake gani, ya saya masa komai na kayan aiki, babu dirhami ko ɗaya na marinin, ya kuma ba shi gida da bayi da dukiya mai yawa. Ka gani, da ma an ce idan an hana maraya rigar saƙi, sai Allah ya ba shi ta ƙarfe."

Yayin da Abusir ya ji wannan jawabi sai ya cika da farin ciki ya ce a cikin ransa, 'tsarki ya tabbata ga Allah da ya cika wa abokina burinsa na zama gwani ga sana'arsa. Da fari na zarge shi da mantawa da ni, ashe ba ya da laifi, ayyuka ne suka rufe shi har ya manta da ni, lallai yanzu na yi masa uzuri a kan haka. Bari in tafi gare shi, na tabbata zai yi farin ciki da sake gani na, zai tare ni da murna ya kyautata mini kamar yadda na kyautata masa lokacin da ba shi da aikin yi.' Sai ya kutsa cikin mutane, ya tasar wa ƙofar shagon.

Tun daga nesa ya hangi Abuƙir cikin tufafi na alfarma, ya kame bisa kujera kamar wani Sarki. Ga bayi huɗu baƙaƙe da kuma wasu huɗu farare sun kewaye shi suna ta yi masa hidima. Ga kuma wasu bayi goma da ke ta aikin rini, wasu na tsoma tufafi, wasu na fitarwa, wasu na matsewa, wasu na shanyawa. Shi kuwa Abuƙir babu aikin da yake yi sai ba da umurni, a yi kaza, a yi kaza.

Wanzami ya matsa har ya zo kusa da ƙofar shagon, ya ja ya tsaya. Ya tabbata idan Marini ya gan shi, zai taso ya rungume shi cikin farin ciki, ya ja hannunsa ya zaunar da shi kusa gare shi, ya girmama shi, ya yi masa hidima. Sa'adda idanu biyu suka afku cikin idanu biyu, Abuƙir ya yi ido huɗu da Abusir

Za mu ci gaba ranar Laraba mai zuwa, insha Allah.

Me kuke tsammani zai faru tsakaninsu? Ko kuna ganin Abuƙir zai iya mai da buki?

Bukar Mada
15/10/2022
SHARRI KARE NE 6

HIKAYAR ABUƘIR MARINI DA ABUSIR WANZAMI

Waziri Aku

Wanzami ya matsa har ya zo kusa da ƙofar shagon, ya ja ya tsaya. Ya tabbata idan Marini ya gan shi, zai taso ya rungume shi cikin farin ciki, ya ja hannunsa ya zaunar da shi kusa gare shi, ya girmama shi, ya yi masa hidima.

Sa'adda idanu biyu suka afku cikin idanu biyu, Abuƙir ya yi ido huɗu da Abusir, sai ya game girar sama da ta ƙasa kamar wanda aka aiko wa da saƙon mutuwa. Da yake an ce mai kaza aljihu ba ya jimirin as, haka kuma mai mugun hali, gani yake kamar kowa ma haka halinsa yake, sai Marini ya yi tsammani Abusir ya zo ne domin ya kware masa baya cikin mutane, ya tambayi kuɗinsa da ya ɗauke masa, saboda haka ya daka masa tsawa, "kai lalatacce! Ka biyo ni nan ne domin ka tozarta ni? Sau nawa na yi maka kashedi da zuwa nan? Ɓarawon banza mai kunnen ƙashi!" Ya dubi bayi ya ce, "ku kama shi."

Masu fushi da fushin wani suka zabura suka yi cacukwi da Abusir. Abuƙir ya miƙe daga inda yake zaune, ya ɗauki tsumagiya ya ce wa bayi su kwantar da Wanzami. Ya yi ta tsala masa tsabga ga baya, sai da ya yi masa tsumagiya ɗari. Ya kuma ce a birkice shi. Ya yi masa wasu tsabgogi ɗari ga ciki, sa'annan ya ce a sake shi.

Abuƙir ya dubi Abusir ya ce, "idan na sake ganin ka kusa ga shagona, zan kai ka gun Sarki ya sa hauni ya sare maka wuya kowa ya huta da zambarka, ɓarawon banza, lalatacce! Tafi ka ba mu wuri, Allah ya tsine maka albarka!" Abusir ya juya ya tafi yana kukan zuci bisa ga tozarta shi da abokinsa ya yi. Da mutane suka tambayi Abuƙir, "me wannan mutum ya yi maka?"

Sai ya amsa musu da cewa, "ɓarawo ne mai sace kayan mutane. Yakan lallaɓo nan ya faki idona, idan ya ga hankalina ya ɗauku ya yi mini sata. Ya jawo mini asara mai yawa wajen biyan mutane kuɗin kayan da ya sace mini. Duk sadda na kama shi, sai na ji tausayinsa in ƙyale shi, nakan ce a raina wataƙila talauci ne ke damunsa, nakan ja masa kunne in sake shi. Amma tunda na ga kunnen ƙashi gare shi, lallai idan na sake kama shi in kai shi ga Sarki ya sa a kashe shi kowa ya huta." Da mutane suka ji haka sai suka yi ta tsine wa Wanzami, suna la'antar shi. Kun ji kaɗan daga halayen Abuƙir.

Shi kuwa Abusir sai ya koma gidan baƙi, ya shige ɗakinsa ya zauna yana jinjina wulaƙancin da Marini ya yi masa, ga kuma jikinsa na yi masa raɗaɗi saboda bulala. Can zuwa wani lokaci bayan ya ɗan sarara, sai ya sake ɗaukar zabirarsa ya nufi cikin gari wajen sana'arsa. Da ya ji jikinsa dai ya dame shi da zogi, sai ya yanke shawarar zuwa gidan wanka, ya samu ruwan ɗumi ya watsa ko ya ji 'yar dama-dama. Yana cikin tafiya sai ya haɗu da wani mutum, ya tambaye shi hanyar gidan wanka. Mutumin ya ce, "menene gidan wanka kuma?"

Abusir ya ce, "wurin da aka keɓe domin mutane su je su cire dauɗar da ke jikinsu, fatarsu ta yi wasai su ji daɗin rayuwarsu."

Mutumin ya ce, "af, ka ce hanyar rafi kake nema. Ai mu duka nan garin rafi muke zuwa mu gurje dauɗar jikinmu. Hatta Sarki idan ya yi nufin watsa ruwa can yakan je. Mu ba mu san wani abu gidan wanka ba."

Wanzami ya yi ta yawo har Allah ya gajishe shi, amma bai samu gidan wanka ba, bai kuma samu wanda ya san abin da ake kira da haka ba. Ya yi mamaki matuƙar mamaki. Ya ce a ransa gari kamar wannan bai kamata a ce babu gidan wanka ba. Ya tuna an taɓa gaya masa Sarkin garin wayayye ne mai son abubuwan ci gaba a garinsa. Don haka sai ya shura takalmansa ya nufi gidan Sarki.

Da zuwa ya faɗi ya ɗauki ƙasa gaban Sarki, ya gayar da shi cikin ladabi da girmamawa, sannan ya ce, "Allah ya ba ka nasara, ni baƙo ne, sana'ata wanzanci da kuma aikin gidan wanka. Na zagaya duka garin nan kaf ban samu gidan wanka ko ɗaya ba. Abin da na tabbata kuwa shi ne, duk garin da babu gidan wanka a cikinsa to tamkar abinci ne da babu gishiri."

Sarki ya dube shi ya ce, "menene muhimmancin gidan wankan nan da kake faɗi?"

Abusir ya nutsu ya yi ta bayyana wa Sarki alfanun gidan wanka, har sai da ya ga Sarki ya gamsu da bayaninsa sarai. Daga ƙarshe ya ce, "birni duka ba ya cika birni sai in akwai gidan wanka a cikinsa, ya Sarki."

Sarki ya yi farin ciki da zuwan Abusir, ya ce, "maraba da kai baƙo. Wallahi irin ku muke so, masu kawo mana ci gaba a gari, baƙo da gashi ai ya fi ɗan gida figagge." Ya kawo tufafi na alfarma ya ba shi. Ya ba shi ingarman doki da dukiya mai yawa. Ya kuma ba shi ƙayataccen gida cike da kayan alatu. Aka ba shi bayi biyu baƙaƙe da kuyangi huɗu da fararen bayi masu yawa. Sarki dai ya karrama shi fiye da yadda ya karrama Marini.

Washegari Sarki ya kira magina ya haɗa su da Abusir ya ce su zagaya da shi cikin gari, ya gwada musu duk inda yake so, su gina masa gidan wanka. Kada kuwa su kuskura su saɓa wa umurninsa. Haka kuwa aka yi, Abusir ya nuna wa magina wurin da yake so a yi gidan wankan. Masu gini suka duƙufa ga aiki, Abusir na gwada musu yadda yake son ginin ya kasance. Cikin 'yan kwanaki kaɗan aka gama ginin gidan wanka wanda babu kamarsa. Aka shafe bangayen da launuka masu ɗaukar ido.

Bayan an gama komai na gini, Abusir ya je gun Sarki ya durƙusa gabansa ya ce, "Allah ya taimake ka an gama gini, yanzu kayan aiki kurum suka rage a sanya."

Sarki ya kawo dinari dubu goma ya ba shi ya ce ya sayi duk abin da ake bukata. Abusir ya tafi kasuwa ya sayi komai da komai, ya zo ya shirya su a gidan wankan. Ya rarrataye mayafai na goge jiki a kan igiya, ga sabulu iri-iri, wasu na magani wasu masu sa ƙamahin jiki, an jejjera ko'ina. Mutanen da ke wucewa ta kan hanyar sai suka tsaya suka saki baki suna kallon irin kwalliya da tsarin da aka yi wa gidan wanda ba su taɓa gani ba, suka riƙa tambayar Abusir, "menene wannan?" Abusir ya amsa musu, "gidan wanka ne." Suka yi mamaki, mamaki mai yawa.

Daga nan Abusir ya fara aiki. Ya kunna turaren wuta, ƙamshi ya gauraye ciki da wajen gidan. Ya dafa ruwan zafi, ya kuma shirya ruwan yana ɓuɓɓuga ta cikin wata babbar kwatarniya wadda mutum zai iya shiga ciki ya kwanta. Duk wanda ya ga yadda ruwan nan ke fitowa daga cikin kwatarniyar, kamar dai yadda ruwa ke keto jikin dutse ya fito, sai abin ya ba shi sha'awa ya tsaya kurum yana kallon ikon Allah. Mutane suka riƙa tafa hannuwa cikin mamaki, suna faɗin aikin wani sai kallo.

Abusir ya tafi ga Sarki ya samo 'yan yara ƙanana guda goma, daga cikin fararen bayi, yaran nan kuwa sai ka ce watanni don kyau. Ya koya musu yadda za su yi wa mutane hidima, da yadda za su taje musu gashin kai idan sun fito daga wanka. Daga nan ya aika mai shela