You Cannot Download this book untill you login but you can read it .

---

Login Register

An dauko wannan littafi daga shafin https://taskarnovels.com.ng ku ziyarci shafin na https://taskarnovels.com.ng domin samun kayatattun littatafan hausa kama daga kan na yake yake dana soyayya




Marubuci ko marubuciya zasu iya turo mana da littatafansu mu dora masu a shafinmu kyauta don masoyansu su rika Downloading a online,



Sannan marubuta zasu iya turo mana da tarihin rahuwarsu da tarihin rubutunsu, dama sharhin littatafansu don masoyansu su gani kuma su karu da hakan

Domin turo mana da littafi ko tarihin rayuwar marubuci ko marubuciya sai ayi mana magana ta whatssap da wannan nambar +2348140419490



A lura dakyau - kyauta muke saka littafi a shafinmu bama amsan ko sisin marubuci, duk wanda ya amshi kudinku da sunanmu babu ruwanmu,



Alura dakyau - manazarta bama tura littafi ta private ku dena binmu private kuna neman mu tura maku littafi, duk mai bukatar littafi yaje website namu



Alura da kyau - Littatfanmu suna fitowa cikin manhajoji uku ne PDF,TXT da DOC amman munfi amfani da PDF da TXT masu amfani da wayar android ko tablet ko computer zai fi kyau ku riga dauko PDF da DOC



Masu amfani da kananan wayoyi java ko mara java TXT zakuna zaba don shine daidai wayarku


This hausa novel was uploaded and downloaded from https://taskarnovels.com.ng

You can download more hausa novels there

Also you can send us your novel to upload it in our website for your fans to download it online

It is free we do not charge for uploading novel

Also if you are an Author be it online or Non online you can send us your biography including your book summary,commentary and others via this number +2348140419490 its free we do not charge for our services



Note that - we do not charge for our services we uploaded novels and posted biography free, any person that collect your money in our name is your fault do not blame us



Note that - pls readers stop calling us and be asking us to send you a novels we are not sending novels through whatssap or private our novels is public at any day, any time you can visits our site and download it



Note that - our ebooks came as PDF,TXT or DOC format but the popular format are PDF or TXT, those with android or tablet or pc we suggest you to download PDF or DOC
those with java phone or non-java phone we recommend you to download TXT



This Novel is downloaded from https://taskarnovels.com.ng
to download more hausa novels visits our site at www.taskarnovels.com.ng

For feedback and support

Facebook : https://facebook.com/taskarnovels

Twitter : https://twitter.com/taskarnovels

Telegram : https://t.me/taskarnovels


AURE KO BOKO?
(Littafi Ga Matasa Maza da Mata)



















SUMAYYAH ABDULKADIR
takorikabara@gmail.com



GABATARWA
Da sunan Allah mai Rahma mai jin kai.
Duba da halin da matasa ke shiga a kasarmu Nijeriya a yau, daga mazan har matan, akan rashin aikin yi ga wadanda suka samu damar yin ilmin zamani mai zurfi da matsalolin da hakan yake haifarwa, sannan da halin wasu daga cikin manyan 'yan bokon wannan zamani na baiwa boko fifiko akan addini, yasa na yanke shawarar rubuta littafin AURE KO BOKO? Ba don komai ba sai domin ya zamo hannun ka mai sanda ga irin wadannan 'yan boko da matasa masu zurfin ilmi marasa aikin yi. Tasirin furucin iyaye akan 'ya'yan su mai kyau ko maras kyau, hakika shi bakin iyaye kaifin sa da tasirin sa yafi na reza. Sannan 'ya'ya amana ne a hannun mu, kasancewar Ubangiji yayi musu umarnin su yi wa iyaye biyayya sai da yayi tagociya ga cewa banda akan umarnin Ubangiji.

Ina fatan wannan dan littafi ya zamo mai amfani ga al'umma, matasa maza da mata, ya zamo sadaqatul jariya ga iyaye na ya yafe min kurakuran da ke cikinsa.
- Sumayyah Abdulkadir (Takori)
3rd June, 2021

GARGADI
Ban yarda a karanta wannan littafi a kowanne gidan radiyo ko kafafen yada labarai ba tare da izni na ba, ko copying dinsa a kafafen sada zumunta, yin hakan karya doka ne kuma abin tuhuma daga Lauya na Barr. Sadiq Rufai Wali.


GODIYA
Ga dukkan members na Takori's online Forum, na gode da kaunar ku da goyon bayan ku.


FATAN ALKHAIRI
Ga duk makaranta littatafan TAKORI. Wadanda na sani da wadanda ban sani ba, ina godiya da yabo da fatan alkhairin da kuke yi mun, Allah ya barmu tare cikin alherin sa, har zuwa ranar da muka daina numfashi.







SHIMFIDA
BABI NA DAYA
A cikin babbar hedkwatar hukumar sadarwa ta kasa (Nigerian Communications Commission) da aka fi sani a takaice da (NCC) da ke kan titin Aguiyi Ironsi Street, Maitama, Abuja, motocin ma’aikatan su ke ta shigowa daya bayan daya harabar ma'aikatar suna fakawa a faffadar harabar ma'adanar motoci, wannan motar na wane waccan, duk da cewa ba ranar aiki ba ce, amma alamu sun nuna wani muhimmin taro ne za su yi na iya ma’aikatansu tare da (Board of Commissioners) din su a babban dakin taron su wanda ya fi kowanne girma cikin ma’aikatar. Duba da yadda suke ta shige da fice don ganin komai ya kammala ya yi yadda ake so kafin isowar Executive Chairman.
Kowannensu tsuke cikin suit mai kalar fari daga ciki, baki daga waje, wuyan ya sha tsuka da tie din bature, da takalma bakake sau ciki a kafafun su. Sai da duk suka gama hallara a dakin taron, suka nutsu wajen zaman su, kwamishinoni suka iso suka zazzauna, sannan suka ji daga wajen hall din dirin isowar jibgegiyar motar Executive Chairman wato PROF. ZUBAIR MOHD. NUMAN.
Farin dattijo mai kyakkyawar suffar fulanin usli da tsantsar ilmin boko. Inda ace ana kure boko to da mun ce Prof. Numan ya kure shi. Shi din fitacce ne, kuma sananne a kasarmu Najeriya akan harkar sadarwa, domin ya dade yana rike da manyan mukamai daban-daban a gwamanatin tarayyah tun kafin ya karbi ragamar (NCC), sannan tsohon malamin jami’ar Igbinedeon ne.

Prof. Zubair Muhammad bafullatanin garin Numan ne, don haka kallo daya za ka yi masa ka tabbatar an zuba kyau a zamanin kuruciya. An sha gwagwarmaya a ilmin boko da ma’aikatun gwamnati, sannan ana kan damawa da shi a shekarun girman sa, domin kuwa na hannun daman shugaban kasa ne, duk da ba ya siyasa, shi ne ya dora shi matsayin da yake kai a yanzu, wato Executive Chairman na Nigerian Communication Commission (NCC).

Prof. Zubair ya shigo hall din cikin kakkarfan takunsa, da ganin sa ka ga bakin bature, a gefensa hagu da dama wasu santala-santalan ‘yammata ne guda biyu; a ido daya ta girmi daya, sun yi shiga irin ta ‘yammatan zamani gogaggu, ‘ya’yan gata irin su, wato ‘ya’yan kusoshin gwamnatin Najeriya. Tafiyar su kadai abar kallo ce, yayin da suka maka bakin glass (prada) wanda ya cinye kusan rabin fuskar su. Mayafin jikinsu shi da babu duk daya. Har gara na babbar. Kallo daya za ka yi musu ka tabbatar ‘ya’yansa ne na cikinsa, sabida tsananin kamanninsu da mahaifin nasu, duk da cewa sun fi shi hasken fata kasancewar su mata.
Shigowar su hall din ke da wuya gabadaya ma’aikatan suka mike domin girmamawa ga shugabansu. Har sai da ya zauna a kujerar sa tare da ‘ya’yansa a dama da hagunsa a kujerar musamman da aka tanadar musu, sannan gabadaya ma’aikatan suka zauna a mazaunin su.
Bayan addu’ar bude taro daga limamin ma'aikatar mai gabatarwa ya yi bayanin makasudin taron, wato taron ba na komai ba ne, na taya murna ne ga ‘ya’yan shi Prof. Zubair ga kammala karatunsu daga jami'ar National Autonomous University, Mexico. Sannan Prof. Zubair ya mike ya yi jawabin godiya ga ma’aikatansa da kwamishinonin sa a kan hadin kan da suke ba shi wajen gudanar da ayyukan su na sadarwar Najeriya.
A karshen bayaninsa kuma ya ce, daga yau ya dora babbar ‘yar sa Engnr. Halimah Zubair Numan matsayin mataimakiyar sa wato (Executive Vice Chairman), ya kuma dora kanwar ta Hanan Zubair Numan a matsayin (Human Resource Manager), za su shiga ofis daga wannan satin mai kamawa.
Yana fatan za su ba su hadin kai wajen gudanar da ayyukan su tare da su, kamar yadda suka saba bashi. Su sani cewa ba ya hada komai da wadannan ‘ya’yan nasa guda biyu, dalilin sa ke nan na kawo su kusa da shi su yi aiki don ba zai iya barinsu su yi aiki a karkashin wani ba, balle a taka mishi su, shi ya sa ya kawo su karkashin sa.
Hanan sai gyada kai ta ke kamar jangwalagwada, tana taunar cingam kas-kas-kas, cikin jin dadin bayanan da mahaifinta ke yi. Ai gara duk su san matsayin su a gun Daddy tun yanzu, kada ma su kawo musu raini don sun gan su yara. Yayin da Haleemah ta sunkuyar da kai cike da jin kunyar wannan rashin kawaici na mahaifin ta. Me ya hada harkar ofis da kaunar da yake musu saboda Allah? (This is personal).
Daga nan shugaban bangaren daukar ma’aikata na baya (former Human Resource Manager) wanda yanzu ya koma karkashin Hanan ya mike cikin rashin jin dadi ya yi wa ‘ya’yan Prof. Zubair barka da zuwa ma'aikatar NCC, tare da alkawarta musu cewa, za su samu duk hadin kan da suke bukata tare da su. Ya yi bayanin ne cikin cijewa a madadin sauran ma’aikata, duk da kokarinsa na boye damuwar wannan ragin mukami da aka yi mishi da ‘yar cikin sa rana daya.
Daga nan aka fara ciye-ciye da shaye-shaye na alfarma, zukatan ma’aikata cike fal da magana wadda ba wanda ya isa ya furta. Don haka kowa ya hadiye abarsa. Taron da ya dauke su awanni biyu cif! Kafin a watse direba ya kwaso su Halima da Prof. Zubair zuwa gida.

Gidan Prof. Zubair na nan a unguwar Asokoro, wani tankareren gida mai ginin sama-da-kasa. Gabadaya ginin gidan an dauko samfur dinsa ne daga kasar Brunei. Sai dai abin da zai ba ka mamaki shi ne; daga shi sai ‘ya’yansa biyu suke rayuwa cikin wannan tafkeken tankareren gidan, sai tarin ma’aikata rututu maza da mata. Babu matar aure a cikin sa.

Asalin Prof. Zubair ya fito daga karamar hukumar Numan ta jihar Adamawa, ya auri matarsa uwar ‘ya’yansa Safeeyyah, aure na saurayi da budurwa wadda ita kuma Kanuri ce da ya auro daga Maiduguri, don haka Halima da kanwar ta Hanan kyawunsu na tudu biyu ne, wani irin sassanyan kyau da ya maida su tamkar ruwa biyu (fulani/kanuri). Ya basu wata irin kala mai kyau da daukar ido. Halima ce babba, sannan kanwarta Hanan, shekaru biyar kwarara Halima ta baiwa Hanan.

Hanan na da watanni tara mahaifiyarsu Safeyyah ta rasu a dalilin cutar (blood-cancer), wato kansar cikin jini. Daga dangin Halima har na Prof. Zubair sun yi kokarin karbar yaran su rike masa abin ya faskara, domin gabadaya soyayyar da yake yi wa mahaifiyar su ce ta dawo kan su. Ya dauki soyayya da kulawar duniya ya dora musu har fiye da kima, musamman Hanan wadda aka mayarwa sunan Safeeyyah.
Prof. Zubair shi ya ci gaba da rainon Hanan da madarar (NAN) har Allah ya raya ta, da taimakon dattijuwa (Nanny) da ya daukar musu daga Numan, amma fa aikin Asabe kawai in Zubair ba ya gida ne, da ya dawo zai janye ‘ya’yansa bangarensa ya ci gaba da kula da su da kansa baya taba gajiya da hidimar su. Sai da Halima ta yi shekaru goma sha biyu ne Babanta ya daina kwana kusa da ita, ya ware musu daki kusa da nashi.
Allah ya baiwa Halima wata irin kwakwalwa kamar kwamfutar na'ura mai kwakwalwa tun tana karama, wannan yana da alaka da tsadaddun makarantun da suke yi daga firamare har sakandire. Don haka ne ake ta yi mata promotion kan promotion ta gama sakandire a kananan shekaru tana da shekaru goma sha biyar.
Manyan darussan da Halima ta kware a kai sune lissafi da kimiyya, don haka tana gama sakandire Prof. Zubair ya kai ta kasar Mexico ta yi digiri na farko da na biyu cikin kankanin lokaci a fannin injiniyancin na’ura mai kwakwalwa (software engineering). Yayin da Hanan ta karanci digiri a kan (human resource management). A shekarar da Halima ta gama masters dinta, Hanan ma ta kammala digirinta.
Ko da suka dawo gida bayan kammala karatu Prof. Zubair ba tunanin da ya yi ban da ya zuba su a ma’aikatar sa karkashin kulawar sa, yadda babu wanda ya isa ya taka masa su. Ko su sha wahala yana raye.
Ba tare da la’akari da kankantar shekarunsu ba, ai dai suna da kwalayen da suka cancanta, domin Halima komai nata (first class) ne mai daraja ta farko, Hanan ce mai digiri mai daraja ta biyu. A hankali zai sa tsofaffin ma’aikata su wayar musu da kai a kan komai na NCC.
Haka nan yake zaune gwauro tun mutuwar Safiyyah bai kara aure ba, domin yana da labarin yadda matan uba ke wahalar da ‘ya’yan miji wadanda babu uwarsu a gidan, amma fa yana da dalilin da ke hana shi aure da ‘ya’yansa ba su taba sani ba, sabida yana matukar taka-tsan-tsan. Daga shi sai Ubangijin sa suka san yana dan taba neman mata.
Ba ‘ya’yansa kadai ba, babu wanda ya san da wannan bangaren nasa, sabida ba ya jan kowa a jiki, dangin sa gudun su yake sabida basu da shi, tsakanin sa da kowa harkar aiki ce kawai. Sannan bai amincewa su Halima yin kawaye ba bayan dawowar su karatu daga Mexico, kada a lalata masa su (wanzami baya son jarfa).
Kawar Halima ta jiki daya ce a duniya, wato Zarah Datti. Tare suka yi karatu a Autonomous, ita Zarah diya ce ga tsohon gwamnan Bauchi, har gobe suna tare da Halimah kusan kullum a waya.
Wadannan ‘ya’ya biyu na Prof. Zubair halayensu sun matukar bambanta. Duk da cewa kamar su daya a fuska da zubin halitta. Halima duk wani hali na mahaifiyarsu ta kwashe shi kaf, na gudun duniya da Yakanah. Yarinya ce mai hankali da sanin yakamata, sannan ba ta dauki duniya a bakin komai ba, mahaifinsu ya kware su ta fannin addini, domin bai ba su ilmin addini yadda ya kamata ba, ya fi bada karfi ga ba su tsadadden ilmin boko.
A tarayyarta da Zarah Datti, Halima ta koyi muhimman abubuwa na addini, wankan janaba, alwallah, hatta sallarta sai da ta gyara. Tana kuma ci gaba da neman sani a kan addini daga yanar gizo da kasasuwan wa’azin Malamai iri-iri data ke saya domin inganta addininta.
Yayin da Hanan duk wani halin mahaifinsu ta kwashe shi tsaf har da kari; fadin rai, son duniya da gudun talauci. Duk wata harka in dai da talaka za a yi ta, to Hanan ba ta cikinta. Shekarun Halima ashirin da hudu da haihuwa, yayin da Hanan ke da sha tara.

*****

Bayan sun dawo gida a ranar, da daddare suka hadu da mahaifinsu a babban falonsa, "Daddy", kamar yadda suke kiran Baban nasu Prof. Zubair, ya dubi kowacce yana murmushi da kofin tataccen inibi a hannunsa.
“Duk gajiyar taron ne Halima tun dawowar mu ban ji motsin ki ba?”
Halima ta yamutsa fuska, sannan ta jingina kai a kafadun sa. “Actually Daddy ina cikin wani tunani ne, sai na ga kamar matsayin da ka ba ni ya fi karfi na, Executive Vice Chairman ta NCC gabadaya fa! Ni ce mataimakiyar ka, kai kadai ne a sama na, ai ma’aikatan ba za su ga girmana yadda ka ke tsammani ba tunda sun san experience dina bai kai in karbi wannan babban matsayin ba”.

Prof. Zubair ya ajiye kofin hannunsa, ya maida hankalin sa ga Halima, ya ce, “Halima ki fahimci wani abu, Nigeria ta riga ta yi lalacewar da kowa nasa kadai yake ginawa, ba ki da matsalar komai zan daukar miki P.A (Personal Assistant), sannan tsohon mataimaki na ba korarshi na yi ba, na hada shi da wani mukamin ne daban da bai kai naki ba. Cikin ma’aikata kuwa duk wanda ba zai darajja ku ba ko ya girmama ku, wallahi korarsa zan yi, zan kara hada su in jaddada musu wannan”.
Halimah ta kama kai, “Daddy Please.... don’t, ka barsu haka, na tabbata za su bi umarnin ka kada ka yi musu tsauri da yawa a kan mu za su tsane mu. Na san yadda zan tafiyar da komai, amma kamar yadda ka ce din ne ina bukatar personal mataimaki kwakkwara, wanda ilminsa ya kai ya zama P.A dina”.
Ya ce, “Muna da applicants (masu neman aiki) da muka yi (shortlisting) din su ba da jimawa ba. Zan duba daya a ciki wanda na tabbatar bai taba aiki da kowa ba, kuma bai taba aiki da kowacce ma'aikata ba. Hikimar a nan shi ne, ina so ya zama abokin shawarar ki, kuma mataimaki wanda ba zai yarda da munafurcin ofis ba, don na ga duk sun shaqa da mukamin da na ba ku. To sai dai su mutu, amma kun shigo NCC ke nan in ga wanda ya isa ya taka min ku”.
Halima kasa cewa komai ta yi, sai Hanan ce ke dariya, ta ce,
“Shi ya sa nake son Daddyna, aikin ka yana kyau, Allah ya bar min kai Daddy”.
Ta fada tana mai kwanciya a gefen kafadarsa.
Prof. ya yi murmushi ya ce, “Anything for you my lovely daughters. Ni dai burina ku kula da kan ku, ku fita harkar maza, ba ku babu samari, don ba zan iya aura wa kowa ku ba, don ba na jin a wannan zamanin zan samu mijin da zai iya rike min ku yadda nake so ku samu a gidan aure.
Don haka da muguwar rawa gwamma kin tashi, don zan iya daure duk wanda ya bata muku rai, ko ya muzguna muku har sai igiya ta yi rara. Koda kuwa mijin auren ku ne. So, hakura da auren shi ya fi alkhairi. Ba abinda ba zan yi muku ba, ko me kuke so, ina kara jaddada muku da ku fita harkar maza duk mayaudara ne.
Sannan idan namiji ya wulakanta ku ni ba zan iya dauka ba, ba zan iya yafewa ba. In kuka maida hankali bisa ayyukanku, ba irin arzikin da ba za ku tara ba, ba abinda ba zan yi ba don ganin kun dore cikin kwanciyar hankali da jin dadi. Ina fatan kun fahimce ni?”
A sanyaye Halimah ta gyada kai, Hanan kuwa da karsashi ta amsa, “Mun fahimta Daddy, kuma insha Allahu za mu kiyaye. Allah na tuba ni Daddy ko a Mexico ban taba haduwa da namijin da ya yi min ba balle a Nigeria, ba'a haifi wanda zai ishe ni kallo ba, ka kwantar da hankalinka, ‘ya’yanka are safe at this side (‘ya’yanka a kebe suke a wannan bangaren)”.
Prof. ya ce, “Da kyau my daughter. Halimah kin yi shiru kina jin mu, tunanin me kike?”.
Murmushi Halima ta kakalo wanda iyakarsa fatar bakin ta, ta ce, “Daddy me zan ce to? Sai dai in ce Allah ya taimaka mana wajen sauke nauyin da a rataya a wuyan mu. I will work harder yadda ma’aikatan NCC duka za su amince da zabin ka, su ga cewa ko da gata da kananan shekaru to da cancanta cikin zabin da ka yi musu”.
Hanan ta yi dariya, “Wai ke Sis Leemah, me ye damuwarki da ma’aikata ne? Cewa nake duka karkashin Daddy suke? Ko basu amince da zabin Daddy din ba sai me? Sun isa su cire ki ne?”
Daddy ya ce, “Is okey Hanan, kin santa akwai concern, ni kuma na san za ta iya shi yasa na bata, and that is good nuna damuwa ga damuwar wasu, balle ma duka ba su da matsala. Your P.A will assist you also, sannan tsohon mataimaki na zai nuna miki yadda komai yake, ba za ki samu matsala ba insha Allah, as sharp as this brain of yours”.
Halima ta yi murmushi, “Allah ya taimaka mana Daddy, mun gode, Allah ya ba mu ikon faranta maka yadda ka ke faranta mana”.
Su duka biyun ya dora hannu a kafadunsu dama da hagu yana fadin,
“These are my daughters”.

Ko da Halima ta koma dakinta a wannan daren kasa barci ta yi. Tunani kala-kala ya yi wa zuciyarta kawanya. Shekarunta ashirin da hudu, amma Babanta ya fito fili ya ce, bai so ta yi aure a bisa wasu hujjojin sa wadanda addini ba zai taba karba ba. Ga shi ita tana son yin auren, don duk wadanda suka yi karatu tare har babbar kawarta Zarah sun yi aure sun barta, sai ta tsufa ta tsofe a gida? Ko sai ta kai shekarun da maza za su daina sha’awarta? Daddy dai so yake su rayu ba aure, kamar yadda yake rayuwar sa!
To kuma what about the call of nature? Na kowanne lafiyayyen dan adam?
A yanzu haka ma ba wani saurayi ko manemi tare da ita, duk sun gudu sun kama gaban su. Ba irin maneman da ba ta yi ba a Mexico, don Ubangiji ya kyautata halittar ta, amma barazanar Daddy na kullum cewa, muddin suka saurari saurayi zai dakatar da karatunsu, ya sa duk ta kore su. To sai yaushe Daddy yake nufi zai musu aure? Ko ko irin rayuwarsa yake so su ma su yi har tsufan su? Da yawon daren da yake zuwa basu san inda yake zuwa ba?
Tunani ne da ba ta da amsoshinsa, kuma ba za ta iya yi wa kowa maganar ba, ta bar wa Allah komai. Shine masanin gaibu. Ya yi mata zabin abin da ya fi zama alkhairi ga rayuwar ta.
****