You Cannot Download this book untill you login but you can read it .

---

Login Register

akori-kura, kudin akori-kurar ma Landlord (mai gidan da suke haya) shi ya biya musu (full tank) sabida sun yi zaman mutunci tare da shi.

Gidan nasu an gama ginin, an yi plasta, amma ba a samu zarafin yi masa fenti ba. A haka suka shiga abinsu, Sa’adatu da Dr. Rabia suka zo suka taimaka musu suka jera kayan Halimah, sabida kayan masu quality ne ba abin da suka yi. Dr. Rabi’a ta tambaye shi ya ba a yi fenti ba? Shiru ya yi yana sosa kai, ta san halin Hashim sarai, ba ya bayyana babunsa sai samunsa. Idan ya samu kowa da ke jikinsa sai ya shaida ta hanyar kasonsa da zai ware masa.
Dan aikin da ya yi a Abuja na shekara guda ba karamar hidima ya yi musu ba, don haka washegari sai ga masu yin fenti ta turo su yi duk gidan, ba tare da ta yi shawara da Hashim ba.
Kwarai ya ji dadin wannan karamci na ‘yar uwarsa. Har gida ya je ya yi mata godiya. Halimah gwanar iya tsari, sosai ta tsara gidanta, ya yi kyau sosai kamar gidan wani ma’aikacin banki.

*****

A yayin da rayuwa ta juya wa dan Adam, abin da ake so shi ne, ya karfafa imaninsa, ya sa a ransa Allah na sane da shi. Yana jarraba imaninsa ne. To hakan ce ta faru da Halima, ranar da ta budi ido a gidan mijinta ko kwayar shinkafar da za su dafa ba su da ita. Ba irin buga-bugar neman aikin da Hashim ba ya yi har kuwa da koyarwa a sakandire, amma condition na kasarmu da komai sai kana da kafa ya hana Hashim samun aiki. Har tsohuwar makarantar da ya yi koyarwa wato ‘Yan Dutse ya je ya roki su maida shi, inda suka sanar da shi ai tuni suka maye gurbinsa da wani. For now ba sa bukatar sabbin malamai.
Don haka wuni guda sur! Yau Hashim ya kasa fita ko’ina, babbar damuwarsa ita ce ya bar Halimah da yunwa. Wasu hawaye masu zafi ke taruwar masa a ido yana maida su. Ba ya nadamar auran Halimah, kuma har abada ba zai yi ba. Ya yi alkawarin rike Halimah da kula da ita, amma in bai da abin yi da me zai kula da itan? Da me zai ciyar da ita? Ba ya son ya gaya wa Inna halin da suke ciki, don kuwa yanzu za ta maida ciyarwarsu a kanta, dan jarin kiwon kaji da ragunanta ya kare a kansa. A wannan matakin na rayuwa kam, in bai ciyar da Inna ba, ai ba zai bari ta ciyar mishi da mata da shi kanshi ba.
Wani tunani ne ya zo masa, zumbur ya mike ya dau mukullin motarsa ya fita. Halimah na kallon talabijin shirin Arewa24 cikinta yana ta damka, yunwa kamar ta mutu, rabonta da abinci tun daren jiya da suka ci gurasar teburin mai tsire. Tana ta cijewa tana daurewa, tare da kurbar ruwan bunun da ke cikin kofi a gefenta, wanda ko sukari babu a cikinsa.
Ta gabanta ya zo ya wuce da sauri, tana tambayarsa inda za shi, yana tafiya yana ce mata, “I’m coming…”
Wajen sayar da motocin hannu ya nufa, aka yi cinikin henessy dinsa, kashi uku cikin goman kudin da ya siye ta. Ya bada takardu aka dunkulo kudinsa aka ba shi.
Bai zame ko’ina ba sai super market ya dankaro wa Halimah shopping ya sayo kayan abinci, aka cika masa dan sahu taf! Ya nufo gida. Halimah sai gani ta yi ana ta sauke mata kaya, mamaki ya hana ta cewa komai, har yaran suka gama Hashim ya sallame su.
Zama ya yi rigijib a kan kujera cike da gajiya. Halimah ta zauna kusa da shi a sanyaye.
“Cherie, ina ka samo kudi haka? I hope it’s by halal means?”
Rungumota ya yi barin jikinsa na dama, “Ki min zaton alkhairi Sweetheart, ba zan taba ciyar da ke da haraam ba”.
Tana wasa da botirin rigarshi ta yi murmushi, ta ce, “I trust my husband, but I need an explanation”.
Ya ce, “Sai kin ci abinci ga kaji nan a ciki ki gyara ki yi mana farfesu. Tashi mu je in taimaka miki”.
Tare suka yi girkinsu mai rai da motsi, wanda suka dade ba su ci irinshi ba, suka ci cikin marmari. Sai lokacin kwanciya barcinsu yake sanar da ita motarsu ya siyar, ba zai iya jure ganinta tana jin yunwa ba, in Allah bai kama shi da laifin hakan ba, shi ba zai taba yafe wa kansa ba.
Ko kadan Halimah ba ta ji dadi ba, domin ta saba da motar, amma ta yarda ba su da wani option na samun kudi masu kauri ban da hakan.
Ta ce, “Sauran kudin me za ka yi da su?”
Ya jingina a jikinta, ya ce, “Karamin provision shop zan bude a dan shagon jikin gidan nan”.
Halimah ta amince da shawararsa, ta kuma ce ya debi kayan abincin ya kai wa Inna ko don ta sa musu albarka.
Cikin sati daya provision shop ya budu, Hashim na zama a ciki daga karfe tara na safe zuwa azahar, ya shigo ya ci abinci ya koma, la’asar ya shigo ya yi sallah ya kuma zuwa magriba ya rufe shagon sai kuma gobe. Dr. Rabi’a ma na kokarin nema masa lecturing a Legal, amma abu ya faskara sabida ba sa karantar da field dinsa.
****




BABI NA TARA
Halimah na suyar manja da za su ci wake da shinkafa da shi, ta ji kauri wanda ba ta san daga ina yake fitowa ba. Ta dudduba dakunansu ta tabbatar ba daga nan ba ne, sai kawai ta koma kicin ta ci gaba da aikinta.
Hashim ya tafi kasuwa zai saro kayayyakin da suka kare a shago. Bude wannan shago ba karamin taimako ya yi musu ba, ba sa samun wata riba ta a zo a gani, amma suna daukar komai su yi amfani da shi kenan ribar a cikinsu suke cinye ta.
Ba su da matsalar abinci, omon wanki, sabulun wanka ko sauran kananun abubuwan amfanin yau da kullum. Sannan suna diba su kai wa Inna na neman albarka. Ita kuma lokaci-lokaci tana aiko musu da cret din kwai da kajin gidan gona biyu ko uku.
Ta gama suyar manjanta wanda ya ji albasa, sai tashin kamshi yake yi, ta ji hayaniya daga waje ana fadin, “A kawo taimako… gobara! Gobara a shagon Hashim!!!”
Saboda kidimewa ba ta san sanda ta saki soyayyen manjan hannunta ba ya kware a kan kafafunta.
Wani ihu hade da salati Halimah ta saki, duk da azabar da ta ke ji, amma hankalinta na kan gobarar da ake fadi a shagon Hashim. Kafin ka ce me ye wannan fatar farar kyakkyawar kafarta ta tashi ta kukkumbura. Amma a haka ta yo waje da gudu ko mayafi ba ta tsaya dauka ba, domin ta manta da shi.
Wuta ce ganga-ganga mutane nata watsa mata ruwan omo, amma sabida kayan da ke ciki masu cin wuta ne sai kara habaka ta ke yi, Halima ta koma gefe tana hawaye tana kallon yadda gabadaya abin da suka dogara da shi yake konewa kurmus! Shago kam ya kone, ba abin da ya yi saura sai gawayi.
Sai da ya gama konewa aka samu wutar ta tsaya, already ba abin da aka iya cirewa sai gawayi. Har ta soma lasar wani bangare na bangon gidan ya yi bakikirin. Babu wanda ya lura da Halimah ta durkushe ta ci kukanta ta koshi, sai da mutane suka watse ana ta cigiyar Hashim, sannan ta lallaba ta koma gida.

Sai yamma lis Hashim ya dawo cikin adaidaita sahun da aka dankaro wa kayan provision. Tun daga nesa ya hango bangon gidansa ya yi bakikkirin.
“Innalillahi wa’inna ilaihi raji’un”. Kawai yake ambata, har mai adaidaita ya juyo yana tambayarsa, “Malam lafiya?”
Motar na tafiya haka Hashim ya dirgo ya yanka a guje, ba abin da yake masa amsa-kuwwa a kunne irin HALIMAH!!!
Ga babban kwanciyar hankalinsa da ita ya fara tozali yana shiga harabar gidan, tana zaune a kan kujerar roba da suke zama da yamma su sha iska ta kada kanwa tana ta kwara wa kafarta bayan tuni ta riga ta tashi. Da sauri ya duka ya rungume ta yana fadin,
“Halima, are you alright?”
Har wani irin girgiza ta yake yi. Da ganinta ta ci kuka ta koshi.
“Tell me Halimah, are you okey?”
Ta sanya fuskarsa cikin tafukanta ta ce, “I’m okey Hashim. But shagon mu ya kone kurmus, shi ne garin kidima na kone kafafuna da manja”.
Ya kai idonsa ga kafafun nata, tsigar jikinsa ta yi wani irin tashi. Ga shi ba shi da motar da zai saka ta a ciki ya kai ta asibiti, kada kuma ya goya ta a bayansa a ce ya haukace. Amma tabbas ba shi da maraba da zautaccen a wannan lokacin. Ba shago ne damuwarsa ba, lafiyar Halimah ce.
“Bari in samo adaidaita sai mu tafi asibiti kin ji? Sorry sweetheart”.
Ko ta kan zancen shago bai bi ba, ya juya ya fita jikinsa na kyarma, mutanen unguwa nata yi masa jaje, amma ko amsawa ba ya iya yi, ya tare dan sahu ya shige ba bayani, da kyar ya ce da shi matarsa za su kai asibiti.
Har cikin get suka shiga da adaidaitan, ya dauko mata hijabin sallarta. Bai ji kunyar mutumin ba ya sunkuce ta ya sa ta a motar tana fadin, ya kyale ta za ta iya takawa, amma ina!
Asibitin malam Aminu Kano suka je, bangaren accident & emergency, da kyar suka samu aka karbe su. Aka yi mata treatment sosai tana ta kuka da hawayenta don azaba. Daga asibiti gidan Inna ya wuce da ita, don ya san wannan jinyar ta fi karfinsa.
Inna ta yi salati ta sanar da Ubangiji da ta ji abin da ya faru, ta yi addu’ar Allah ya mayar da alkhairi. Ta shiga kula da Halimah bilhakki. Rabi’a ta zo ta yi masa jaje, ta kuma duba Halima, duk da dai ba wai tana sonta ba ne har yanzu. Ta ba ta hakkinta ne da ya rataya a kanta.
Watan Halimah biyu a gidan Inna tana jinya kafin ta samu lafiyar kafarta, amma tabo ya kwanta lambam. Suka koma Janbulo inda aka koma ‘yar gidan jiya.
Sai kuma laulayin ciki ya sako Halima a gaba. Ba ta iya cin komai sai yalo data. Duk ta rame ta yankwane, a karshe likita ya rike ta a asibiti ake ta sa mata ruwa.
Kwanansu hudu aka sallame su. Hashim ya ga cewa, ba zai iya da Halimah ba don ko kudin yalo datan watarana rasawa yake yi, don haka ya kara maida ita gidan Inna.
Inna da yake babba ce ta san abin da za ta iya ci, kuma shi ta ke mata, kunun tsamiya, tuwon laushi miyar kalkashi da miyar zogale, sosai Halimah ke bude ciki ta ci, tuni ta kara murmurewa.
Sa’adatu ta samu miji wani malaminsu na sakandire, amma sai daga auren suke sabida ba su shirya ba. A karshe Inna ta sa ragunanta da ta ke kiwo manya-manya a kasuwa ta sayar, Dr. Rabi’a ta kawo nata gudunmawar, Hashim babu ko sisi, aka tsaida lokacin auren watanni uku masu zuwa.
Ta dade rabon da ta yi magana da Hanan, ko ta kira layin ba ya shiga. Ko dai Hanan ta daina amfani da layin, ko kuma ba ta kasar Nigeria. Ta taba gaya mata sun dawo Kano, amma ba ta gaya mata wani address ba. Ta so ta gaya mata maganar samun cikinta da konewarta. Sosai ta ke kewar Hanan duk da cewa in suna tare din fada suke yi irin na sako da sako.
Daddy fa?
Ta yi ajiyar zuciya tana lalubar zuciyarta, did she really missed him? A take amsa ta zo mata, “No, she didn’t. He is, but a cruel father (shi ba komai ba ne sai mugun uba a gare su), wanda ya zama silar duk wannan wahalalliyar rayuwar da suke ciki.
Ta kai hannu ta shafe hawayen idanunta. A fili ta ke addu’a ba ta san cewa a filin ta ke yi ba.
“Ya Allah ka ga zuciyata, Ka ga niyyata ta alkhairi ce, ta raya sunnar manzonKa. Ban yi aure don in zamo mara biyayya ga mahaifina ba, sai don kare kaina daga dattin ZINA. Allah ga HASHEEM! Ka dubi lamarinsa Ka tausaya masa. Ka sa sai dai ya zamo mai bayarwa ba mai karba ba. Allah ka yalwata masa, Ka azurta shi ta inda bai tsammani ba…’
Ji ta yi Hasheem ya kwantar da kai a gadon bayanta, ya lumshe ido yana jin addu’o’inta. Tana rufe baki ya dora tasa.
“Allah ga Halimatu-Sa’adiyyah, Ka ba ta aljannah albarkacin aure. Idan har miji ke daga wa mace kafa ta shiga aljannah, na daga, na kara dagawa. Ina rokonKa Ka ba ta mafi darajar aljannah (Firdaus). Ka sa ta zamo uwargidana a gidan aljannah ba tare da hurul-eeni ba”.
Da sauri ta juya ta rungume shi. Ya yi azama wajen ba ta masauki a katafaren kirjinsa. Sosai yake sumbatarta kamar zai cinye ta. Ba ta yi nawa ba wajen maida martani. Wani yanayi suka tsinci kansu wanda ya zarta na amarcinsu. Har suka manta cewa a gidan inna suke.

*****
Duk wani tattali na duniya Hashim ya dauka ya dora a kan cikin Halimah. Ba shi da zabi a kan jinsin da za ta haifa, kowanne ne ya san zai so, matukar zai yi kama da Halimarsa.
Sabida halin babu, a asibitin Murtala Halima ke bin layin awo, in ka ganta ba za ka taba tsammanin Engnr. Halimah Zubair ce ba, wadda manyan kasashen duniya daidaya ne ba ta taka kafarta ba. Wadda ba ta taba sanin wani abu wai shi BABU a rayuwarta tun haihuwarta ba. Haliman da ke jan motoci irin su Toyota Avensis, Discussion Continues da Rolls-Royces a titunan Abuja. Haliman da kafin ka samu appointment din ganinta sai ka isa wane a manyan kusoshin Nigeria. Ta dauki rayuwarta bakidaya a matsayin bautar Allah, bautar aure bautar Allah ne. Allah shi ne mai bayarwa kuma mai karba.
A wannan lokacin imaninta ya karu, ta kara dagewa da ibadah tana rokon Allah ya sauke ta lafiya, ta samu sanyin idaniya, wanda shi kadai za ta kalla a matsayin jininta a halin yanzu, don alkawarin da Hashim ya yi mata na kaita ga dangin mahaifiyarta har yau bai samu cika shi ba sabida yanayin da suke ciki.
Hashim ba shi da kowacce sana’a sai lesson da yake yi wa ‘ya’yan wani maikudi a nan unguwarsu ana biyanshi dubu goma a wata. Da wannan dubu goman da kuma taimakon Inna suke gangandawa suke cin abinci. Ya dade da daina smoking tun suna Abuja, sabida son da yake yi wa matarsa Halimah.
Cikin Halimah na da wata bakwai, ta fito toilet da daddare za ta kama ruwa ta ci uban tuntube da bokiti ta fada da baka a kan cikinta. Wata razananniyar kara ta saki, wadda ta taso Hashim a gigice, yana zuwa toilet din ya kunna fitila abin da ya gani ya razana shi, jini ne ke malala daga kasan kafafunta.
Ya rasa me zai yi? Ya rasa taimakon da zai ba ta. Ga shi cikin sulusin dare. Ya sunkutota ya fito da ita tsakiyar dakin ya shimfide. Tana ta murkususu shi kuma yana kiran sunanta yana rokonta ta yafe masa shi ya janyo mata duk wahalar da ta ke ciki.
Wani uban nishi da Halimah ta yi sai ga Da ya fado, ba jimawa mabiya ta biyo baya. Hannunsa na karkarwa ya dauki dan cikin kazantar haihuwa ya rungume a jikinsa. Sai dai tsawon lokaci bai ji ya yi kukan da ake cewa jarirai na yi in sun iso duniya ba. Bai ga yana wutsil-wutsil da kafafu da hannayensa ba.
Kada dai hakan na nufin… there baby is no more? Hashim ba ya son yarda da tunaninsa. Halimah don wahala bingirewa ta yi a wajen tana barcin wahala. Har aka yi kiran assalatu bai ga alamun babyn nan ya motsa ba. Gari ya soma haske dole ya ajiye jaririn a gefen Halimah ya fita ya buga wa makwabtansa kofa, ya ce su zo su taimaka masa, Halima ta haihu cikin dare.
Matar gidan suna mutunci da Halimah sosai, duk da ta girme ta nesa ba kusa ba. Ta dauko mayafi ta bi bayansa. Ta dauki jaririn nan ta bubbuga shi, amma babu motsi. Yaro babba da shi kamar ba bakwaini ba an gama yi masa cikakkiyar halittarsa.
“Ku yi hakuri Hashim, bai zo da rai ba, ko kuma bayan haihuwar ya koma”.
Hashim ya rike kansa yana fadin, “Ya Allah I seek your forgiveness, idan wani laifi na yi maka ka ke hukunta ni nau’i-nau’i”.
Hajiya Mukarrama ta ce, “Kul! Hashim, maza yi istigfari ga sabonka ka gaggauta cewa astagfirullah- alhamdu lillah…”
A hankali yake maimaitawa, kamar mara lafiyan da ya zo gargara ake lakanta masa kalmar shahada. Ya daga Halimah daga kasa jina-jina cikin kazantar haihuwa ya rungume ta a jikinsa. Ba ta san yana yi ba sai barci ta ke yi, wani wahalallen barci da ba ta taba yin irinsa a rayuwarta ba.
Hajiya mukarrama ta dauko kwalin indomie a kicin dinsu ta sanya jaririn a ciki ta rufe. Ta ce ya ba ta waje ta gyara Haliman, dole ta tashi daga barcin nata. Juyawar nan da za ta yi ta ji ta sakayau babu nauyin cikinta.
Ido ta bude a kan Hashim, shi kuma ya girgiza mata kai, sannan ya lumshe idonsa. Ta kai hannu ta shafo cikin ba ta san lokacin da ta mike zaune ba.
“Ina babyna Hashim?”
Ya kama ta ya rike yana magana cikin taushin murya.
“Allah da ya ba mu Ya fi mu sonsa, don haka kada ki yi bakin ciki don Ya karbi abinsa”.
Halima ji ta yi duniyar na juya mata, wani duhu ya mamayi idonta. Sai bude ido ta yi ta ganta a gadon asibiti, Hajiya Mukarrama a gabanta. Kanta bisa cinyar Hashim ko kunyar Hajiya Mukarrama bai ji ba.
Kwanan Halimah biyu a asibitin Murtala sannan aka sallame ta. Inna ta ce Yakasai za ta wuce da ita. Jego zata yi mata sosai domin kuwa ita da mai haihuwar wata tara ba su da maraba. Hashim bai ja ba, ko shi ya so hakan.
Sa’adatu ita ta dinga taimaka wa Inna wajen jegon Halimah, amma Dr. Rabi’a tunda ta zo sau daya ta jajanta ba ta kara zuwa ba. A ranta ta ce, Hashim ya je bariki ya auro mai farar kafa, ya kasa mallakar kwandalar kansa, dan da ya haifa ma a duniya kansa bai tsira ba.
(Hasbunallahu wani’imal wakeel. Wani babban kuskure da mata ke yi ke nan, kiran ‘yar uwarsu musulma da mai farar kafa in mijinta does not succeed in life. Sun manta an ce rabon bawa da arziki sai mutuwa. Sannan RAI DAI… ba ya rabuwa da rabo… sai dai idan ya kare. Sannu-sannu ba ta hana zuwa sai dai a dade ba a je ba. Idan kuma Ubangiji ya riga ya rubuta wa bawa kaddarorinsa na rayuwa ciki har da arziki da talauci, babu dan Adam din da ya isa ya kankare. Allah ka hani harshenmu yi wa ‘yan uwanmu musulmi mugun alkaba’i, ameen).
Ranar da Halimah ta yi kwanaki talatin tana jego, wani mummunan tashin hankali wanda ya fi na rasa baby ya same su.
Ya tsayar da komai na rayuwarsu dungurugum!
Inna Haajara ce ta shiga bandaki da buta a hannunta za ta yi alwalar magriba, sai ta zame ta fadi, shiru-shiru Halimah da Sa’a ba su ganta ta fito ba, sai zuwa suka yi suka tadda ta ba rai a jikinta.

Halimah na ganin cewa, mutuwar Inna Haajara, ita aka yi wa mutuwa ba kowa ba, don ita ce ba ta da kowa da za ta kira uwarta bayan Innar.
Ta rike ta da amana da kyautatawa kamar uwar da ta haife ta. Ta zauna da ita da zuciya daya. Zuwa yanzu ta gama fahimtar Dr. Rabi’a ba ta sonta a kan dalilin da ba ta sani ba.
A wajen makokin Inna ta wulakantata a cikin mutane ya fi a kirga, sai dai ta shiga daki ta ci kukanta ta more. Har tana cewa tunda ta shigo gidan su masifa ke bibiyar Hashim. Sa’adatu ce ta samu Yayanta a boye wanda mutuwar mahaifiyarsa ya fyadar da shi a lokaci guda, don mutuwa ce kamar ta fuju’a, Inna lafiyarta kalau ko ciwon kai ba ta yi ba. Tana tsaka da hidimta wa rayuwarsu Allah ya amshi ranta.
Ta gaya masa duk abin da Dr. Rabi’a ke fada a kan Halima, kuma a gaban idon Haliman. Hatta gashin jikin Hashim gabadaya sai da ya mimmike, idanunsa suka kada suka yi jajir, bakinsa har rawa yake kamar yadda ilahirin jikinsa ke kyarma kamar ana kada masa gangi. Bai tsinci kansa a ko’ina ba, sai a gaban Yayarsa Rabi’a.
“Adda Rabi’a, ki sani daga yau babu ni babu ke. Ko a hanya muka gamu kada ki nuna kin taba sanina. Da ma Inna da Baba ne suka hada kuma babu su, me rabawa ta raba.
Wadda ki ke kira ‘yar barikin mai farar kafar ta fiye min ke sau shurin masaki. Sannan babu wanda ya isa ya taba mutuncin ta in kyale shi. Ko wane ne, idan na ce kowa… ina nufin ko KE!”
Rabi’a ta bude baki tana kallonsa.
“Hashim ni ka ke yi wa diban albarka a kan mace? Macen ma wadda ta zabi namiji a kan iyayenta? Tunda ka aure ta mun taba ganin wani nata? In ba daga barikin ta fito ba, daga ina ta ke?
Hannunsa ne ya fita daga jikinsa zai mari Rabi’a, ya tuna yawan shekarunta a kan nasa. Hankali tashe ya juya don barin wajen ya yi ido hudu da Halimah da ke rakube