You Cannot Download this book untill you login but you can read it .

---

Login Register

zata mayar masa da martani ta kuma daidaita masa zama amma ko'ina na jikinta ciwo yake ba zata iya biye masa ba. Roƙon Kamal tayi da kallo, shi kuma ya yanke barinta ta huta. Wata ƙila ta yi magana gobe. Ya faɗa a ranshi.

“Ok, bari na gyara ɗakin da zaki kwanta." Kamal yace wa Hafsat. Gyaɗa kai tayi tare da yi masa godiya.

“Kai kuma biyo ni." Kamal yace wa Ammar da ya ƙudira sai ya yiwa Hafsat magana, ba wai Kamal bane zai tsayar da shi.

“A'a...ina nan !" Ammar ya bashi amsa.

“Toh yi hankali da abinda kake yi." Kamal ya gargaɗe shi kafin ya tafi.

Koda ya tafi, Ammar ya fara jerowa Hafsat tambayoyi.

“Wa yayi miki haka Hafsat? Kamal matsalolinsa ma sun ishe shi, idan baki faɗa masa komai ba zai shiga damuwa. A halin yanzu baida lafiya kuma ɓoye masa wani abun ba zai taimake shi ba."

Ammar yana tunanin babu abinda zai sa Hafsat magana. Ya damu sosai akan ta, wata ƙila ba wannan bace hanyar da zai nuna mata amma ya damu sosai akan ta. Basa shiri amma ba zai taɓa mata fatan shiga irin wannan halin ba.

“Well... Ok idan baki son faɗar komai zan daina takura ki amma ki sani ina nan idan har kina buƙatar wani abun."

Hafsat har yanzu bata ce komai ba, ba zai taɓa yiyuwa ta yarda da roman bakin Ammar ba. Yayi gwargwadon cutar da ita da zai sa ba zata sake yarda da shi ba. Domin lafiyar jikinta da kuma ta ƙwaƙwalwarta, ƙin yi masa magana shi yafi.

Ƙoƙarin tashi Hafsat tayi da niyyar zuwa ɗaki saidai koda ta tashi tsaye, jiri ya ɗauke ta ta faɗi kasa. Ammar yayi ƙoƙarin kai mata agaji amma kafin ya kai gare ta har ta faɗi. Amma duk da haka ya nufe ta domin ya taimaka mata.

Kama hannunta yayi ya ɗagota koda ta ga ta tashi tsaye kuma zata iya tafiya, Hafsat ta fizge hannunta daga riƙon da Ammar yayi mata. Da mamakin abinda tayi, Ammar ya ɗan ja da baya. Daidai lokacin Kamal ya shigo.

“Me ya faru ne?" Ya tambaye su ganin kallon da suke jefawa juna.

“Sai da na faɗa maka kar ka yi komai." Kamal ya faɗa rai a ɗan ɓace.

“Ai kullum ni ne da laifi." Cewar Ammar. “Kawai fa ni taimako na so yi." Ya faɗa tare da zaunawa bisa kujera...

Kamal taimakawa Hafsat yayi zuwa cikin ɗaki. Tsaftataccen tawul ya kawo mata, sannan ya fiddo mata wasu kayanshi sabbi wanda bai taɓa sakawa ba dan ta saki jikinta. Ya fita daga ɗakin bayan ya faɗa mata ta kwanta ta huta kuma ta kira shi idan tana buƙatar wani abun.

Komawa yayi falo ya tarar da ɗan uwansa na tattarar duk kwaramniyar da ya bari a falon. Zaunawa yayi kusa da shi tare da dafe kanshi.

“Ya subhanallah.. everything is wrong ..." Ya faɗa ƙasa ƙasa.

“Yeah...na yarda. A halin yanzu komai is not really top. Yaya zaka yi da ita yanzu?" Ammar ya tambaye shi.

“Ban sani ba nima gashi gobe wani wuri nake son tafiya da safe, ba zan iya kaita gidansu ba, haka ban yarda da kai ba bare in ce ka kaita."

“Wai da gaske kake? Da gaske kana tunanin zan iya cutar da yarinyar nan?" Ya faɗa da jin haushin maganar ɗan uwan nasa.

“Kalamanka sun fi naushi zafi. Ni shaida ne lokacin da kuka yi faɗa. Wani abu ya faru da ita, bana so ka ƙara mata da naka."

“Na rantse maka nima ina son taimakonta, nasan akwai tsama tsakaninmu amma wannan zancen ba ƙarami bane. Na ɗauki darasi akan Afnan."

“Matsalar ita ce, koda ka so yin abun ƙwarai, ɓata komai kake yi. So ka yi min alƙawarin ba zaka yi komai ba wannan karon. Kawai ina son ka kaita gida ni kuma da na ida abinda zan yi, zan biyo ta gidansu na yi magana da ita ko da mahaifiyarta."

“Hum na ga kamar kuma ka yarda da ni. Daman ni ba mugu bane !"

“Na ji, ina son ka fahimci yanayi ne da za'a yi taka tsantsan da shi."

“Shikenan zan kula nayi maka alƙawari. Kai fa naka matsalolin? Me zaka yi? Idan na fahimta da kyau Khadija tana da juna biyu?"

“Ban sani ba nima abinda ya kamata na yi, amma abinda na sani, ya kamata inyi saurin sanar da Zahara kafin abu yayi tsanani."

“So kana tunanin da gaske akwai wata aljana da ke wasa da ku, me zai hana ka nemi wani malami ko wanda kasan aikinsu ne?”

“Eh zan ga abinda nake iya yi, a halin yanzu ka kula da Hafsat, ni naji da sauran.”



BANGAREN ZAHARA

Zahara har yanzu tana fushi da Maryam tun ranar nan da ta ƙyale ta ita kaɗai tare da Habib. Alhali tayi mata alƙawarin maido ta gida da kanta. Zahara tasan Maryam taimakonta kawai take son yi, amma ita bata ra'ayi da lokacin ƙara faɗawa wata soyayyar. Kuma yanda Maryam take yi, zai sa Habib ya yi tunanin ko itama Zahara tana da ra'ayin sa ne.

Ƙin ɗaga kiran ƙawar tata take yi tsawon kwanaki. Da gaske ne tana ɗan fushi da ita amma wannan ba shine gaskiyar abinda yasa bata ɗaga kiran Maryam ba. Kawai bata da ra'ayin magana da kowa ne. Tana yin kamar komai lafiya amma ba zata iya yiwa kanta ƙarya ba. Komai ba lafiya ba kamar yanda take tunani, ganin Kamal tare da Khadija ya cutar da ita yanda bata tsammani.

Tana jin ƙunyar faɗa ne, amma a daren koda ta zo gida, tayi kuka kamar ranta zai fita. A cikin mota tare da Habib, tayi ta murmushi ga labaransa na dariya, tana bashi amsa wani lokacin har ma tayi ƙoƙarin biye mishi suna hira amma duk hakan ƙarfin hali tayi.

Abinda bata sani ba, Habib ya gani ba a hayyacinta take ba kawai tana pretending ne. Baya son yi mata maganar ne saboda tsoron shiga hurumin da ba nashi ba. Duk da haka yaji daɗin haɗuwa da ita kuma yana so ace ya ƙara saninta kuma ya gano abinda ke ɓoye a bayan Zahara.

“Zahara, ko zaki zo ki ƙarasa wanke kayan nan, na ɗan gaji." Cewar mahaifiyarta ta kan tagar ɗakin Zahara.

Ajiye littafin da take karantawa Zahara tayi. Ta buɗe ɗakin ta bi bayan mahaifiyarta da har ta sauka daga stairs.

Zuwa Zahara tayi ta tarar da kusan Mama ta wanke kayan. Zaunawa tayi ta fara.

Wata ƙila hakan ya taimaka mata wajen rage tunaninta.

Abu ɗaya da ta sani yanzu tana shiga danginta idan ta samu dama. Bata son zaman kaɗaici yanzu dan kar tayi tunanin Kamal dan haka abu na farko da take yi idan ta dawo shine tsayawa cikin ƴan gidansu. A hankali ta fara jin daɗin hakan. Ta fahimci bata da komai da ya wuce danginta toh me yasa zata dinga nesa da su? Nadamar duk lokutan bayan da ta ɓata ita kaɗai tana kuka akan abinda ita ta ƙaƙabawa kanta alhali sauran suna jira ta fara yin takun farko zuwa gare su ne.

Saidai idan kowa ya je ya kwanta, gida yayi tsit, duka tunaninta sai ya koma ga Kamal. Ko tuna nishaɗin ƴan gidansu bai iya warkar da ita daga wannan raɗaɗin.

“Kina da sauri, har kin kusa gamawa?" Cewar Mama da tazo wucewa kusa da Zahara.

Ajiyar zuciya Zahara tayi ta kalli kayan ta ga duk ta wanke su bata ankare ba. Dole zata nemo wani abun ta yi idan ta gama.

“Zan je kasuwa cefane, idan kin gama sai ki tattare kayan da suka bushe ki kai ɗakina. Ni na tafi sai na dawo."

“Zan iya zuwa idan babu damuwa, ina son fita na ɗan sha iska." Zahara tace wa Mama.

Da mamaki Mama ta kalle ta
“Kina son zuwa? Ba ki gaji ba ne?"

“A'a ban gaji ba. Ki bari zan je na yi cefanen."

“Shikenan bari in ƙarasa wankin ni."

Duk abubuwan da zata siyo Mama ta zana mata. Bayan ta gama saurare, Zahara tace wa Mama ba zata daɗe ba zata dawo. Takalmi ta saka da gyalenta ta nufi hanyar fita.

A ƙofar gidan Kamal ne tsaye. Ya tattaro ƙuzarinsa hannu biyu ya zo, amma yana zuwa ƙofar gidan su Zahara ya ƙasa ƙonƙwasawa. Lokaci guda ya shiga tunani.. idan fa ta kore shi? Idan fa bata son ƙara yi masa magana? Komai tayi ba zai ga laifinta ba ganin shi abinda ya yi mata. A cewar shi.

Cikin sanyin jiki ya juya da niyyar tafiya sai ga Zahara ta buɗo ƙofa.



ƁANGAREN AFNAN

Yau Afnan ta tashi a sanyaye. Haɗuwarta da Anwar ta cutar da ita yanda bata yi zato ba. Bata da ƙwarin gwiwar sake tunkarar shi, tasan ba zai yiwu a ce sun ƙara komawa kamar baya ba.

Cikin damuwa da ɓacin rai yau take, cikin sa'a kuwa Ammar kafin ya fita ya bata haƙuri akan yau ba zai iya kaita ba daman bata son yi masa bayanin dalilin da yasa ba zata je school yau ba.

Ɓata ranar tayi tana ƙoƙarin nazartar darussan da Azima ta bata. Wajen ƙarfe huɗu na yamma ta ji ana knocking ƙofa. Da mamaki ta je ta buɗe.

“I'm sorry ƙawata amma wlh takura ni yayi sai na kawo shi." Cewar Azima.

“Akan wa kike magana?" Afnan ta tambayi ƙawar tata.

Kaucewa Azima tayi sai ga Anwar ya bayyana.

“Me kazo yi nan?" Afnan ta faɗa da ɗan ɓacin rai.

“Kar ku kashe junanku, ni kun ga tafiyata." Cewar Azima kafin ta juya da ɗan gudunta kamar ɓarauniya.

Afnan cikin matuƙar mamaki take da yasa bata bi ta kan Azima ba.

“Me ya kawo ka nace?" Ta sake maimaitawa.

“Me yasa yau baki zo school ba? Sake ɓacewa zaki yi ba tare da kin faɗawa kowa ba? Yanzu na ƙara tabbatar kin fiye son kanki da yawa fiye da baya."

Ƙasa gaskata abinda ta ji Afnan tayi.
“Wai wasa kake yi? Idan dan ka zage ni kazo, zaka iya tafiya. Dan haka sai an jima ni inada abun yi." Afnan ta faɗa tana ƙoƙarin rufe ƙofa amma Anwar yayi saurin saka ƙafa ya tare ƙofar.

“Haka ne, ai baki iya komai ba bayan guduwa. Ban yi mamaki ba, ban ma san me yasa nazo nan ba!”

“Problem ɗin da nake fama da shi yanzun ma ya ishe ni, ba zan bar wani ya daɗa min da nashi ba. Ka faɗi duk abinda kake so kuma ka yi duk abinda kake so ban damu ba. I have had enough of you all ! Ka zauna nan idan kana so ni ka ga tafiya."

Riƙe mata hannu yayi kafin ta tafi.

“Idan kinada wata matsala me yasa ba zaki faɗa min ba? Me yasa kike maida ni gefe? Na yi tunanin inada muhimmanci a gare ki, nayi tunanin muna tare domin ɗayanmu. Ina ma zaki san irin yanda rashinki ya cutar da ni."

Wannan ne karon farko da Anwar ya bayyana mata haka, karon farko kenan da ya bayyana halin da yake ciki. Ɓoye komai da komai yake ga shi kadai. Afnan tana burge shi ne domin yana faɗa mata damuwarshi kuma ta bashi shawara ba tare da ta bibiyi dalilin damuwar ba...

“Ka fi kowa sanin ba koda yaushe muke bayyanawa juna matsalarmu ba. Na so a ce ka yarda da ni kuma ka cigaba da kasancewa tare da ni ba tare da kayi dogon bincike ba kamar yanda nake yi a baya. Na sha jin zafin rashin faɗamin damuwarka amma a kullum ina girmama ra'ayinka. Amma share ni da kayi jiya, ya nuna min ba zaka iya irin wannan sadaukarwar ga alaƙarmu ba."

Janye hannunta tayi daga na Anwar kafin tace
“Ina son ka tafi yanzu, ba zan ce komai ba na abinda ya same ni. Idan ka yarda zaka karɓe ni ba tare da kaji dalilin da yasa na ɓace ba, zan ji daɗin hakan. Idan ba haka ba... Kasan abinda ya rage maka. Sai mun haɗu school.” Afnan ta faɗa kafin ta rufe ƙofar...


To be continued...

AMRIYA ☠️
(Hatsabibiyar Aljana)

Love 💞 and Horror ☠️ story📖

By Malik al-Ashtar 🖋


CHAPTER 31

I just published Amriyar Hatsabibiyar Aljana Chapter 31 of my story “AMRIYA Hatsabibiyar Aljana”

http://www.ashblogg.com.ng/2022/03/amriya-hatsabibiyar-aljana-chapter-31.html

Bata taɓa tunanin ganin mutumin da take tunani kwana biyu a ƙofar gidansu ba. Abu na farko da ta so tayi shine ta maida ƙofa ta rufe kamar bata ganshi ba. Saidai a daidai lokacin wani ƙwarin gwiwa ya ziyarce ta.

“Me kazo yi nan?" Zahara ta tambaye shi.

Kamal bai san takamaimai abinda zai yi ba, duk da haka yace
“Ya kike Zahara?"

“Lafiya lau daƙiƙu kaɗan baya nake, excuse me now akwai inda zan je." Ta faɗa kafin ta rufe ƙofar gidansu. Ta gabansa ta bi da niyyar tafiya amma ya riƙo hannunta.

“Zahara, please ki saurare ni, ki bani mintuna biyar dan Allah. Idan ba gaggawa bane ba zan zo nan ba."

“Ba so kake ka tafi ba? Kayi tafiyarta kafin raina ya ɓaci kuma ka yarda ba zaka so gani na rai a ɓace ba."

“Ni da Khadija zamu..."
Katse shi tayi.

“Ni bana son jin komai, ba zan saurare ka ba dan haka kayi tafiyarka kuma kar ka sake dawowa nan ko kuma ka ji maganganun da ba zasu yi maka daɗi ba..."

“Shikenan ba zan yi maganata da Khadija ba, babban abinda ya kawo ni nan shine Amriya." Kamal ya faɗa.

“Meye Amriya?" Zahara ta tambaye shi da mamakin ta inda ya ɓullo.

Dawowa Kamal yayi suna fuskantar juna sannan yace :
“Ina tunanin tana nan...tana ƙoƙarin tarwatsa min rayuwa da kuma ta Khadija. Ba wai ina faɗar haka ba ne domin neman uziri a gare ki amma ina tunanin ita ce silar sa inyi nesa da ke. Ita ce silar rashin lafiyar da nayi ta yi. Ina tsoron ta cutar da ke, da ni da kuma bab...da kuma dangina."

“Bravo... Ka zo ne ka bani wannan labarin kawai dan na yafe maka? Ɓata lokacinka kake, ni ba sakarya ba ce Kamal."

Tafiya Zahara tayi kafin ta waiwayo.

“Da ka samo wani labarin ba wannan ba, tsoho ya riga yayi maganin Amriya kuma wannan layar tana nan koda zata dawo. Yanzu ka koma ka sake ƙirƙiro wani labarin da yafi wannan sannan ka dawo mu gani ko zan yarda da kai." Ta faɗa kafin tayi tafiyarta ta bar Kamal tsaye jiki a sanyaye.

Jiki a sanyaye, yanzu ya fahimci adadin yanda Zahara ke fushi da shi. Abinda yayi mata ba ƙaramin laifi ba ne, daidai idan tayi fushi. Shi ma zai iya shiga wannan yanayin idan Zahara tayi nesa da shi babu wata ƙwaƙwarar sheda.

Ya kamata ya nemo hanyar da zai yi mata bayanin komai cikin kwanciyar hankali kafin ya makara. Ba zai taɓa yafewa kanshi ba idan har Amriya ta cutar da ita.


ƁANGAREN AMMAR

Tun da sassafe ya tashi domin kai Hafsat gida. Ya yiwa ɗan uwansa alƙawarin kula da ita da kyau. Kuma ko babu wannan alƙawarin, ba zai yi komai ba wanda zai cutar da Hafsat. Ya ga halin da take ciki jiya, kuma koda basu jituwa, ya damu da halin da take ciki kuma yana son sanin abinda ya faru da ita.

Bayan ya iso ƙofar gidan Kamal, ya yi knocking ƙofa. Bayan wasu mintuna... yana ta jira amma babu wanda yazo ya buɗe masa. Ƙara nocking yayi, wannan karon sai ga Hafsat ta buɗe masa.

Bai yi mamakin ganin yanda fuskarta duk ta kumbura ba.

“Da sauki jikin naki?" Ya tambaye ta. Ji wata banzar tambaya kuma. Ya faɗa a ransa.

Saidai Hafsat bata bashi amsa ba. Juyawa tayi ta koma cikin ɗaki, kafin ta rufe ƙofa Ammar yace :

“Ni ne zan mayar da ke gida, idan kin shirya ina falo." Ya faɗa mata.

A matsayin amsa, Hafsat ta rufe ƙofar ɗakin da ƙarfi. Ammar yaji kamar sun yi musayar hali. Da fari shi ke yin duk abinda zai yi ganin yayi nesa da yarinyar nan amma yanzu ita ce ke gudunsa. Shi ma ba wani son su zama friend yake ba lokaci guda, saidai yana binta a sannu ne ganin abinda ya faru da ita. Daga ƙarshe sai da ya fara nadamar sakar mata fuska da yayi.

Sai da yayi jiran kusan awa uku kafin Hafsat ta fito daga cikin ɗaki. Sosai ya kai wuya, shi da har aiki ya baro office dan yazo ya taimaka mata, amma duk da hakan ba zai ce komai ba dan kar ransa ya ƙara ɓaci.

“Muje ne?" Ya tambaye ta.

Hafsat bata bashi amsa ba ta nufi ƙofar fita. Rufe gidan Ammar yayi da keys. Ɓude mata ƙofar motar yayi ta shiga ta zauna ba tare da tayi ko tari ba. Ammar bai yi tunanin kasancewa da Hafsat guri ɗaya ban haushi gare shi ba sai yau.

A hankali Ammar ya fara jin sa a takure. Bai san me yasa wannan situation ɗin take sa yake jin sa a takure ba. Kuma abinda Hafsat take yi ba gyara komai yake ba.

Ko kaita wani wurin yake yi ta ci wani abun kafin ya kaita gida? Yanke shawarar kaita restaurant da babu nisa da inda suke ya yi. Wata ƙila bayan taci wani abun ta ɗan saki jiki da shi. Saidai koda ta lura da Ammar ya sauya hanya kuma tashin hankalin yana dab da zuwa restaurant ɗin da ta yiwa farin sani tace

“Me kuma yake ƙoƙarin yi ne?" Hafsat ta faɗa ranta.

Yayi alƙawarin ba zai yi wani scene ba amma wannan guy ɗin ya fara kai mata wuya. Koda yaushe cikin faɗa suke toh me yasa yanzu yake son dole sai yayi kamar su wasu shaƙiƙan abokai ne? Ita ba zata iya munafuncin yin kamar komai bai faru ba tsakaninsu.

Kamar yanda tayi tunani, Ammar ya faka daidai restaurant ɗin.

“Meye haka kake ƙoƙarin yi? Ka yiwa girman Allah ka kaini gidanmu." Ta ƙwalla ƙara tare da jefo masa jaridun da ke gefenta cikin motar.

“Ra'ayi fa kawai nake son canza miki.” Ya faɗa shima da ɗaga murya tare da dukan steering mota.

“Babu abinda nake so daga gare ka, gida kawai nake son zuwa!"

Tunawa yayi da maganar da ɗan uwansa ya faɗa yace
“Kamal.. yayi gaskiya.. ina ɓata komai koda nayi niyyar yin abun ƙwarai. Gwara nayi saurin kaita gidansu kafin ta min hauka anan."

Tayar da motar yayi, fuska a murtuke. Yana nadamar amincewa da kaita gida da yayi. Babu abinda yake tafiya daidai idan suna tare.

“Kana son ka nuna min kai yau mutumin kirki ne, alhali ni da kai mun san ka tsane ni da iya zuciyarka." Hafsat ta faɗa.

Ammar ƙoƙarin share ta yayi, domin yasan idan har ya mayar mata da martani, zai haddasa yaƙin duniya ne na uku. Hafsat ta cigaba
“Ka adana tausayinka, bana buƙata. Zan kasance mafi farin ciki a duniyar da babu kai ! Ni ma na tsane ka amma ni bana pretending. Ka mayar da ni gidanmu babu hayaniya hakan zai sa komai ya je daidai."

Ammar bai kula ta ba ya cigaba da tuki. Bayan kamar mintuna goma kuma sai Hafsat ta cigaba da cewa
“Daga nan kuma sai me? Zaka kai ni gidanmu ne, sannan ka haɗa min abinda zan ci sannan ka cigaba da kula da ni?”

Wani wawan birki Ammar ya taka, da yasa kaɗan ya rage Hafsat ta buga kanta gaban mota ba.

“Are you crazy? So kake ka kashe ni ne ko me?" Cewar Hafsat ta faɗa cikin tsawa.

“Ba abinda kike so ba kenan? Mu kashe junanmu? Bah, gashi kin yi nasara kin tayar da sheɗanin da ke jikina. Sauka !"

.........

“Nace ki sauka !" Ya daka mata tsawa.

Ƙin motsawa Hafsat tayi sai ma kuka da ta fashe da shi.

Dogon numfashi yayi yace “Me kuma na ƙara janyowa kaina?"

“Yanzu faɗa min me yasa kike kuka? Ba so kike na cigaba da nuna ƙetata a kanki kamar yanda nayi yanzu ba.. yanzu kuma da nayi kina kuka? Me yake damunki ne wai ! Kina ta ihun kina son ki sauka yanzu nace ki sauka... Kin ƙi ki sauka. Meye matsalarki?”

“Please ka mayar da ni gidanmu... Ba zan sake magana ba."

“Eh amma ni kuma ina son sanin dalilin wannan sabon sauyin naki?” Ya tambaye ta cikin sanyi wannan karon.

“Bana son yin maganar yanzu.” Ta faɗa bayan ta ɗan nutsu.

“Shikenan kamar yanda kike so." Ya bata amsa kafin ya tayar da motar.

Kamar yanda yace ya kaita har gidansu. Fitowa tayi daga motar ta nufi ƙofar gidansu.

“Hafsat." Ya kira sunanta.

Tsayawa tayi ba tare da ta juyo ba, Ammar yace
“Nasan bai taɓa jituwa ba tsakaninmu amma idan kina buƙatar wani taimako ko kuma kin shirya maganar abinda ya faru da ke zaki iya zuwa ki gan ni. A'a.. kuma ba wai tausayi ba ne... Kawai na gane babu wata fa'ida ne faɗan da babu wani dalili.”

Cigaba da tafiya Hafsat tayi ba tare da ta juyo ba ko tace masa ƙala amma abinda ya faɗa sosai ya shiga kunnenta.


BANGAREN KHADIJA

Bayan kwanaki da ta yi tana tunani, ta yanke shawarar aikata abinda Amriya take so. Tana son tseratar da kanta, soyayyarta da kuma cikin da ke gare ta. Kuma yin abinda Amriya take so shine kaɗai mafita. Ta nemi da ta cire layar da ke hannun Zahara.

Khadija bata yi tambaya ba kuma bata san me hakan zai amfanar da Amriya ba amma duk da haka zata aikata abinda take so. Babu wanda zata cutar idan ta aikata hakan. Khadija ta faɗa a zuciyarta, kawai tana son tseratar da familynta ne. Wa zai ji haushinta idan yaji dalilin da yasa ta aikata hakan?

Dan haka ta shirya zuwa gurin Zahara da wani ƙulli a ranta.

To be continued...

AMRIYA ☠️
(Hatsabibiyar Aljana)

Love 💞 and Horror ☠️ story📖

By Malik al-Ashtar 🖋


CHAPTER 32

I just published Amriyar Hatsabibiyar Aljana Chapter 32 of my story “AMRIYA Hatsabibiyar Aljana”

http://www.ashblogg.com.ng/2022/03/amriya-hatsabibiyar-aljana-chapter-32.html

Zahara bata daina yin kuskure ga files ɗin da zata kai ba. Yanayin oganta ba top ba ga kuma kurakuran Zahara da ke ƙara ɓata masa rai. Haɗuwarta da Kamal ta takura ta yanda ta dena baccin dare.

Tunanin jin Amriya ta dawo ya tsorata ta. Bata sani ba ko ta yarda da maganar Kamal ko a'a. Ko ma dai meye yana iya ɓacewa na tsawon kwanaki daga baya ya dawo ya yi mata ƙarya. Me yasa ma ba zai yi mata ƙarya ba dan ta dawo gare shi? Tambayoyi da dama ke mata kai-kawo cikin kai.

Saidai ba su kaɗai ba ne wanda hankalinsu baya jikinsu. Sarat, ita ma ba daidai take ba kwana biyu. Tana jin kamar ta rasa komai. Tana jinta a ƙazanta, wacce aka yi amfani da ita aka jefar. Bata san me zata yi ba dan dawo da mutumin da take so. Komai zulle mata yake.

“Ya isa haka Zahara... Idan kin yi kuskure na farko zan iya karɓa amma nan baki aje hankalinki ba. Idan bakida ra'ayin aiki yau sai ki faɗa min.” Cewar Ammar cikin tsawa gaban ofishin Zahara rai a ɓace.

Batada wani zaɓi da ya wuce ta bashi haƙuri, miƙewa tayi tare da ba ogan nata haƙuri.

“Ka yi haƙuri, zan mayar da hankali daga yanzu.”

“Abinda ya kamata ki yi kenan, matsalolin da ke gare ni sun isa haka.” Ya faɗa kafin ya koma cikin ofishinsa ba tare da ya manta da rufo ƙofar da ƙarfi ba domin nuna rashin jin daɗinsa.

Sarat da gaban idonta aka yi komai, ta yanke shawarar ajiye girman kanta ta nufi ofishin nasa ganin meke faruwa. Ta gaji da zama cikin duhu.

Ta gaban Zahara ta bi da ke ta faman zubar da hawaye amma Sarat bata bi ta kanta ba. Ta kunna kai cikin ofishin Ammar ba tare da tayi knocking ko ta rufe ƙofar a hankali bayan ta shiga ba.

“Na gaji da ajiye ni gefe da kake yi, ba zaka dinga amfani da ni kana yar wa ba duk lokacin da ta raya maka !"

“Saurare ni Sarat, yanzu ba lokacin irin wannan...”

“Ba ruwana ko lokacin ne ko ba lokacin ba ne. Tsawon makonni kenan ban ce komai ba toh ya isa haka. Idan baka son aurena ne ka faɗa min ba wai ka bar ni cikin duhu ba. Na gaji da zaunawa jiran gawon shanu kamar wata sakarya.”

“Domin Allah Sarat, bana son yin aure da ke. Bana son ɓata miki ne shi yasa ban...”

“Ya isa haka, bana son wani tausayi ko wani abu daga gare ka. Amma ka sa wannan a ranka kowa ya ci zomo, ya ci gudu. Ka yi wasa da ni, kuma ina fata zaka cutu kamar yanda nake cutuwa a yanzu.” Sarat ta faɗa tana iya ƙoƙarinta ganin ta rike hawayen da ke son zubo mata.

Miƙewa tsaye Ammar ya yi yana ƙoƙarin zuwa kusa da ita amma ta ja baya. Jiki na mata rawa, ta fice daga ofishin. Koda ta saka ƙafa waje hawaye suka fara zubo mata, da gudu ta shige toilet.

Ammar bai kai ga samun lokaci na tunanin abinda ya faru yanzun ba, wayarshi ta yi ringing na kiran da tun