You Cannot Download this book untill you login but you can read it .

---

Login Register

gayya"
Umma ce ta fito da sauri ta kama hannun Farha sukai ɗaki Halifa na zagin farha Babarsu Ruƙayya nayi Habiba nayi dama haka al'adar ƴaƴan gidan da matan gidan take muddin ana faɗa kowa nasa yake karewa sai dai fa a wajene ƙaryarka ka taɓa guda ɗaya gaba ɗayansu sai sun rufu akanka amman acikin gida kamar zasu kashe kansu.

Huci farha take Tana faman Hawaye dama ita akwai saurin kuka in ranta yana ɓace magana ma bata iyayi har sai ta huce tukunna.
"Nace ki daina shiga sabgar yaran gidannan haka kawai ni ba zaki dinga jamin magana ba in ba dama ki wuce gidan Nafisa kawai ki kwana biyu ni bana son tashin hankali"
Farha taiwa umma shuru sai faman ajiyar zuciya take saki.
Kafin ta miƙe ta koma tsakar gidan fitsarin da yake cinta tayo ta ɗauro alwala ta dawo ɗaki.

Har lokacin Umma faɗa take ita dai ta Shige uwar ɗaka ta shinfiɗa darduma ta tayar da sallah, Kwanciyarta tai tana Jin takaicin abin da Habiba da su Halifa sukai mata.

Har wajan La'asar Umma tana leƙa ta kota tashi sabida bacci ne ya ɗauketa ba itace ta farka ba sai wajan magariba a gurguje tai sallah ta fito rumfar Umma ta tuɓe rigar dake jikinta tai saura daga ita sai under skirt taja shi saman ƙirjinta.

Umma data shigo ɗakin zata ɗauki kuka ta dubi Farha.
"Sai yanzu kika tashi? wai ba na hanaki wannan shigar banzar ba tashi kije ki saka kayan ki Kizo ki alwalar magariba ki shirin makarantar dare"
Turo bakinta tai gaba.
"Umma ni gaskiya yau ba zani dare ba sabida ban biya kuɗin wata ba, Malam Alhazai duka na zeyi a banza"
Umma tace mata.
"Bana ce zan bada kuɗin ba nidai tashi kije ki alwalar ga abincin kinan yau ko karyawa baki ba"
Tsananin tausayin umma ne ya kama Farha Umma uwa ce Jajirtacciya akan ƴaƴanta Duk wiya bata bari karatun su ita da Ikram ya salwanta saboda tace su Fa'iza basu yi ba dole ta tsaya akan su Farha Ga mazan su Fa'iza bama su ƙarfi bane duk wata fafutuka ta umma akan Ƴaƴan nata take dan wani bin har aike take bawa Farha takai musu gidajen su duk dan asirinsu ya rufu.

Ta fita tsakar gida bayan ta sanya Hijabi ta ɗebi ruwa ta watsa ajikinta sannan tayo alwala ta koma ɗaki taci abinci Tana kammala cin abincin ta fita tsakar gida bakin Murhun da Umma ke fama da wuta duk idanunta sunyi jajir na hayaƙin itace taimakawa umma tai har wutar ta kama sannan ta soma taimakon ta da tankaɗe sabida kwana biyu Kawu ya kawo abin girki wanda umma ce keda girkin a kwana biyun.

Sai da aka kira sallar magariba sannan ta koma ɗaki Lokacin ankawo wutar nepa sallah tayi bayan ta idar tai azkar ta ɗauko Hajabin dare Ta fito taiwa Umma sallama ta fita makaranta Harta mance ma da maganar Kuɗin wata sai da ta dawo ta karɓa sannan ta koma ƙarfe tara ake taso su tana Zuwa bakin ƙofar gidansu taga Salim zaune saman Babur ɗinsa yana zaman jiranta Da murna ta dube shi.
"Yaushe ka sauka bawan Allah? bara naje na aje kur'anina na dawo"
Gida ta shiga ta aje Jakarta sannan ta shaidawa Umma salim ne ya zo Ta ɗauki tabarma ta fita Ƙofar gida a dakalin Ƙofar gida ta shinfiɗa Tabarmar Salim ya zo ya sauna ta gaishe dashi.

Fuska a sake yace mata.
"Ɗazun nan na dawo sai sauri nake nazo naga Farin ciki na!"
Dariya tai tana rufe fuska Harga Allah tana son Salim kodan yadda yake Nuna mata soyayya mai cike da kulawa da tattali.
"Nidai nayi mamaki tunda a lissafi naji kace sai kayi sati naga kuma yau kwanan ka uku"
Murmushi yayi a karo na barkatai.
"Wallahi Farha ba zan iya kaiwa wannan lokacin ba, Shiyasa na dawo ga wayarki ma nazo miki da ita"
Ya faɗa yana ɗauko ledar wayar daga aljihunsa.
"A,a Salim kabar wayar nan kaga waccan ma Kawu sai da yayi faɗa Ka ajemin idan mukai aure ka bani"
Dariya yayi harda riƙe ciki.
"Idan banda abinki in mukai aure ai wadda tafi wannan zan saya miki, Ni zan sami kawu Na bashi haƙuri Ki riƙe wayar saboda tana taimaka mana wajan jin motsin junanmu"
Fafur Farha taƙi amsar wayar kuma ta hana Salim tunkarar kawu da batun ta riƙe wayar sabida tasan Halin kawu akan hakan zai iya saɓa mata.
Hira suke mai cike da so da ƙaunar Junansu Duk kuma maganar bai wuce akan Salim yana son ya turo Iyayen shi a kawo kuɗin auren su ba sai naci yake mata yana Kwantar da kanshi shidai Allah ya ɗora masa soyayyar Farha a zuciyar shi.
"Salim ka min haƙuri Gobe wannan gidan Radion suka ce muje nasan In sha Allah akwai nasara a zuwan namu Kaga zuwa sati na sama sai Muyi maganar zuwan iyayen naka Nafi son na riƙe aikina ne a hannu sabida ina gudun na aureka kace kai baka san zancen aikin ba"
Yadda tace hakan yabi sabida baya son Ɓacin ranta lallaɓata yake yi Sun kai har wajan ƙarfe Goma suna hira kafin ya mata sallama Dubu Biyar ya bata yace tai kuɗin Mota da ƙyar ta amsa ta shiga cikin Gida.

"Fatimah nifa nagaji da wannan gantalallan zancen naki koki cewa yaron nan ya turo kona sami uban nashi da kaina ai ba baƙona bane ba"
Cewar kawu wanda ya shigo gidan yanzu.
Muryarta cikin tsoro tace.
"Ai abin da yama kawo shi kenan yace in baka haƙuri zasu magana da Baban nashi"
Ta faɗa tana Addu'ar Allah yasa kada Kawu yace ƙarya take.
"To yanzu naji batu danni bana son ai min kallon ƙaranta"
Daga haka ya haska Fitilar shi ya shiga ɗaki saboda Lokacin an ɗauke wuta.
Da sanyin Jiki ta shiga ɗaki umma tana kallonta tace.
"Kin kyauta da kika wa Babanki ƙarya dan nasan ƙarya kike Salim mai jiran ƙiris kedai ki amfani da damarki kada ta wuce ki"
Farha ta kalli umma.
"Munyi magana dashi ai cikin wani satin zasu zo"
Daga haka tai ɗaki ta aje tabarmar Kuɗin ta miƙawa umma.
Umma tabi kuɗin da kallo kamar tana tsoronsu.
"Nifa bana son yawan amsar kuɗin bawan Allan nan taimakon daya miki ma lokacin kina makaranta kaɗai Allah ya saka mai da alkairi"

"Umma tun da shi ya bani yaya zanyi gobe kinga zamu koma screening kinga na sami na zaryar Mota"
Umma ta Ɗaga Filo ta aje kuɗin farha tai Uwar ɗaka ta haye gado ta kwanta bayan tayi sallar isha'i.

*************

Maman mami ta dubi mami bayan ta raka Ammi mota.
"Dole ki kuka Mami nima Dan zuciyata a dake take ne ace sau huɗu kana samun ciki yana ɓarewa babu wani dalili, Ni babban Burina ki haihu da wannan yaro daga nan ƙaryar Hajiya Amina ta ƙare"
Ta faɗa tana cije bakin ta.
"Mama nagaji ne wallahi Nima na matsu na haihu, wallahi duk biyayyar da nakewa Ammi dan dai kawai ban haihu bane Shasha sha suke mayar dani ita da ƴaƴanta nima sai na maida kaina kamar ban san mai nakeyi ba, Amman wallahi da zarar na haihu da Aliyu duk sai na rabasu sai na soke duk wata facaka da suke da dukiyar shi Ta mayar dashi saniyar tatsa duk wata lalurarta akan sa take ƙarewa Hatta Ƴan uwan shi Dashi suke gadara Lamɓo nake musu kada taga ita ta haɗa auren mu wallahi Sabo da kaza baze hana in yanka taba"
Maman mami ta saki dariya.
"To dama mai nace miki, Cewa nai ki mayar da kanki wawiya ki nuna duk abin da yake musu bai dame ki ba har Allah ya baki Ƴaƴa da ɗanta daga nan kashinta ya bushe, Haba Amina kinyi wauta tun da muka taso Mahaifinmu ya fifitaki akaina duk da mune ƴaƴan shi kaɗai a duniya Ya so mahaifiyarki fiye da tawa, Kika fini Da miji kika fini da ƴaƴa to ni kuma nai alƙwarin sai na ƙwace Goriba a hannun yaro Wannan Aliyun da ya zama garkuwarki sai na rabaki dashi wannan shine babban Burin daya sa Nai miki kwanton Ɓauna na Haddasa Auren Mami dashi"
Maman Mami ta faɗa tana wata irin dariya ta basawa.
Mami ta saki murmushi ta koma ta kwanta aranta tana jin soyayyar Aliyu mai tsanani tare da kishin dukkan Biyayya da Hidimar da yakewa Mahaifiyar shi da ƴan uwanshi sun mai dashi kamar bai san ciwon Kuɗin shiba....... *09022260850*

*RABO YA RANTSE...!!*🌹

*NA*
*AUTAR MANYA*

ADABI WRITTER'S ASSOCIATION

*007*

Washe gari Farha da wuri ta shirya cikin riga da skirt na atamfa ja ta yafa baƙin mayafi ta fesa turare ta ɗauki handbag ɗinta ta dubi Umma wadda ta zuba mata ido tana kallon ta.
"Umma ni zan tafi ai min addu'a"
Umma ta dube ta da kulawa.
"Allah ya bada nasara, yau ma baki karya ɗin ba zaki tafi?"
Tai murmushi mai ƙayatarwa.
"Umma sai na dawo zan karya ɗin"
Acikin kuɗin da Salim ya bata jiya umma ta ɗauki dubu ɗaya ta bata tana mata fatan alkairi.
Ta fita tsakar gidansu batare data kalli matan gidan dake hada hadar ɗumaman tuwo da dama koko ba.

"Manyan ma'aikata sai ina?"
Cewar Babarsu Hadiza cikin sigar zolaya.
Farha data sa kanta a soro ta ɗaga murya sosai tace mata.
"Gidan nasara da sa'a na nufa in Allah Ya yarda"
Daga haka tafita daga gidan titi taje ta sami abin hawa sai da ta biya ta ɗauki shema'u sannan suka wuce.
Suna tafe suna hira inda shema'u take bata labarin da ya gali ya bata jiya na cewa ashe Gidan rediyon na wannan mutumin ne anan ya galin su ya fara aiki kafin ya bari wai kuma in dai zaka samo wa md rahoto tofa zai ta ƙara maka albashi.
Farha tai zuru kafin tace.
"Ya Allah kasa mudai muna da rabo"
Haka suka ƙarasa bakin gate ɗin bayan sun sallami mai Adaidata sahun daya ɗauko su, Suka shiga cikin gidan Rediyon zaman jiran Md ɗin sukai har wajan takwas da rabi kafin ya ƙaraso.
Da far'a ya dube su.
"A,a su fatima ne da wuri haka, Ah lallai ba zamu dinga samun matsala daku ba ku biyoni ciki"
Suka miƙe suka shiga office ɗinsa.
Zama sukai a saman kujerun office ɗin shima ya zauna sannan suka soma gaishe dashi.
Ya dube su Yana ɗaga takardun su.
"To Alhamdulillahi duk abin da nake buƙata a tare daku na samu, sai dokar gidan rediyon nan da zan faɗa muku, Bana son fashi sannan labarai na hausa da turanci ko wanne ya faɗo kanku zaku iyayi"
Duk suka bashi nutsuwar su sannan ya ɗora.
"Ni dai fatana duk inda labari yake mai daɗi wanda zai ja hankalin jama'a ina maraba dashi ku kawo mana Mu watsa tashar mu ta sami karɓuwa, Albashin ku dubu ashirin ne a wata, sannan babu taka maiman lokacin tashi ya danganta da yadda duty yazo muku wanda ake kafewa a waje kowa ya duba lokacin shi"
Farha a wannan karon ma sai da ta zube ƙasa tai masa godiya ya umarce su dasu tashi ya rakasu su zaga wajan da yakamata haka suka bishi ya nuna musu ko ina hatta ɗakin yaɗa labarai da sauran su Ma'aitan tashar basu da yawa abin har ya bawa su farha mamaki, Haka suka gaggaisa da sauran ma'aikatan sannan ya baro su anan domin suga yadda ake gudanar da aikin.
Ranar su Farha basu tashi ba sai wajan la'asar kuma ba komai sukai ba kawai ganin yadda ake labarai ne da yadda ake ɗauka da yadda ake yaɗawa Wanda kafin kace me Farha harda daɗa ganewa sosai.

A gajiye liƙis ta shiga gida wanda tana zuwa ɗakin umma ta zube Fa'iza sai dariya take mata wadda tazo gidan ta wuni Da ƙyar Farha ta miƙe tayo wanka taci abinci dama sunyi sallar su acan Da gayya ta fita tsakar gida ta leƙa ko wani ɗaki ta shaida musu ta sami aiki Sai dariyar yaƙe suke mata Haka ita dai ta koma ɗaki tana bawa su umma labari.
**********

Sadiƙ bayan ya shirya Ya nufi Ɗakin Ammi har ƙasa ya tsugunna ya gaishe da ita sannan yace mata zai je ya Dubo Mami sai ya wuce lagos dan jirgin sha biyun rana yake son yabi Ammi tayi masa fatan alkairi sukai sallama ya shiga mota drivern gidan ya kaishi asibitin da aka kwantar da Mami.
Da sallama ya shiga Ɗakin da mami take Hajiya Tajira maman mami ta saki fuska sosai tana cewa.
"Wa nake gani a cikin asibitinnan kamar Abubakar sannu da zuwa"
Sadiƙ ya zube har ƙasa yana gaida maman mami kafin ya tashi ya zauna kujerar da take kallon Mami wadda take zaune ta miƙe ƙafa tana shan tea fuskarta fayau duk ta rame.
"Sannu Mami yaya jikin ashe haka Allah ya aiko?"
Sadiƙ ya faɗa cikin jajantawa.
Mami tai ƙasa da kanta tana kallon Ƙarfen gado bata ce komai ba.
"Kiyi haƙuri kada ki sanya tunanin komai aranki In sha Allahu zaki sami wani ingantacce"
Maman mami ta karɓe zancen cikin kwantar da murya.
"Haka ne fa Abubakar nima haka nake ta gaya mata, Amman daga ita har Alin sun ɗaga wa kansu hankali musamman ma shi daya ce ya ƙagu yaga magajin shi"
Sadiƙ ya cije leɓe yana murmushi yasan wannan faɗi ne Ba yadda za'ai Aliyu ya faɗi haka amman sabida kada ya ƙaryata ta yasa yace.
"Dama ai haihuwa ita ce ribar aure Mama muma fatan da muke Allah ya bashi ɗan kanshi"
Daga haka ya miƙe ya zaro 20k daga aljihun sa ya direwa Mami yayi mata fatan Allah ya bata lafiya ya fita yana ƙoƙarin Fita daga ward ɗin su Sajeeda suka shigo hannun su ɗauke da ƙaton Basket na Kayan Break fast ya dube su.
"Ku yanzu dan sakarci kun san zaku zo amman baku bari mun tawo tare ba?"
Dariya sukai a tare suka gaishe dashi sannan yayi musu sallama driver ya nufi airport dashi dan yayi jiran jirgin daze bi bai bari maganar Maman mami ta sami gurbi a zuciyar shiba sabida yasan mata basa rabo da kace nace shiyasa ya kawar da maganar bayan yayi wa ɗan uwan shi zato mai kyau.
Su Safna sun gaisa da Maman mami sannan sukaiwa mami sannu suka dire mata Basket ɗin sabida sauri suke suna da lecture suka bar ɗakin Mami ta bisu da harara tana jan tsaki.
"Wallahi Mama na tsani sadiƙ ɗinnan inna ganshi kamar na shaƙe shi sabida a duniya ba maganar wanda Aliyu yake ji sama data sadiƙ komai nashi ya ɗora shi akai"
Hajiya tajira tace.
"Ina sane ai na yaɓa masa magana kuma nasan ya fahimta kedai sha kurumin ki wallahi ba zamu barsu haka ba dole ma mu raba wannan alaƙar"
Mami ta kuma jan tsaki.
"Suma waɗannan ƴan iskan yaran sai iyayi da girman kan tsiya wancan satin fa wayoyi ya sai musu masu uban tsada sannan yace wai ana fara visar umarar azumi zasu tafi Wallahi mama saura kaɗan na faɗi sabida takaici kuma bara na koma nima sai an tafi dasu Hassana"
Haka suka lalace a wajan suna ƙulla sharrin su kafin Likita tazo taga jikin mami jim kaɗan tazo ta basu sallama da yake da driver nan da nan sukai Gida a maimakon ya wuce da ita gidanta sai Hajiya tajira tace su wuce Fagge inta ƙara jin ƙwari sai ta koma Basu bi takan Aliyu ba Bare a tambayi izininshi.
******

Ranar Farha ta wuni ta kwana cikin farin ciki kuma washe gari babu sanya ta fita wajan aikin ta Alhamdulillahi ta sami wani daga cikin ma'aikatan yana ƙara nuna mata komai Taji daɗin Wajan aikin nata Haka ta cigaba da Fita aikin wanda tuni ta goge har tana ƙoƙarin shiga ɗakin watsa labarai Babban Burin Farha ya cika a sati ɗayan datai a Garkuwa Radio Duk inda ka zaga Muryarta ce raurau ke fita cikin labaran Yammaci wanda duk wanda ya kunna Radiyo ya kamo tashar garkuwa zaici Karo da Muryar Fatimah Ɗandago dan sam batai amfani da Abubakar ɗin ba Dole tasa Salim ya ƙara ɗaga mata ƙafar kawo kuɗin sabida da kanta tace yaje ya bawa kawu haƙuri ta roƙe shi daya bari tai kamar wata guda da fara aikin sai ai maganar auren nasu kuma Salim bai musa ba sabida yana sonta haka yaje wajan kawu da batun wanda kawu yay faɗa amman ya ce daga wannan lokacin baze kuma ƙarawa ba damma daga wajan salim ɗinne aka sami tsaikon.

Cikin rufin asiri farha take aikin ta sabida bama kowa ne yasan ita ce fatima ɗandago ba sabida yawanci da farha aka santa Wani bin haka zataji kawu na sauraron labaranta taita dariya tana jin farin ciki sam bata da matsala a wajan aikin ta kuɗin mota kuwa wannan dubu biyar ɗin umma tace ta aje ta dinga ɗauka tana fita aikin Abu ɗaya ne ta kula a wajan aikin shine Md babu ruwan shi da ingancin labari shidai kawai a kawo masa ya ɗora a kafarshi dan Rediyon shi tai farin jini sam ba ruwan shi sabida Allah ya bashi jarabar son kuɗin tsiya sabida yasan In dai Radion shi tai suna da talla ma kaɗai zai iya biyan ma'aikatan shi.
Tana jin ƴan uwanta ma'aikata na ƙorafi da wannan matsala don zata iya jawo wa gidan rediyon barazana Ita dai da yake Allah bai sa taci karo da wata matsala ba yasa ta saki ranta Shema'u tana sashin labaran wasanni na safe ita kuma tana sashen watsa labarai na yamma wannan tasa sam bama sa haɗuwa da shema'u sabida lokacin da shema'u zata tashi ita kuma lokacin take zuwa Daga gidansu ma bata da lokacin kowa kullum tana ɗaki tana Rubuce rubucenta na labarin da aka bata wanda zata watsa shiyasa wani bin ma sai kaji Ana cigiyarta acikin gidan.
*ABUJA*

*09022260850*
*RABO YA RANTSE...!!*🌹
          
           *NA*
*AUTAR MANYA*

ADABI WRITTER'S ASSOCIATION

                     *008*

Ya lumshe idanunshi yana shafa kwantacciyar sumar da take saman kanshi kwance yake a katafaran gadon dake cikin hotel ɗin IBETO  tunda yazo garin Abuja bai sami zama ba zirga zirga yake akan ƙoƙarin ganin Motocin daya yi order daga kwatano sun shigo kamfanin shi.
Wayar shi dake gefen shi ce take ringing ya lalubo ta da dogon hannunshi mai cike da gargasa ya ɗago idanunshi yana duba screen ɗin wayar AMMI sunan dake ta yawo a saman screen ɗin wayar tashi sai da ya bari ta katse sannan ya kirata.

"Assalamu alaikum Ammi ya kuke?"
Daga Ɓangaran Ammi ta ce masa.
"Lafiya lau, Nace Mami fa tana gidan su ashe da aka bata sallama can suka wuce kai ma Babana mai yasa baka leƙa sanda zaka wuce Abujan ba"

Zazzafar iska ya fesar.
"Ammi kinsan Sadiƙ yazo so mun ɗan jima dashi ne na ƙure lokacina"
Ammi tace.
"To naji yakamata Ka dawo sabida ka samu ka leƙata ta dawo ɗakinta"

Kansa a ƙasa yace.
"Dama gobe Nake son na dawo sabida ƙungiyar matasan gwale da suka gayyacen wasan ƙwallon ƙafar su, Amman shi Bashir zai zauna ne har sai anyi clearing ɗin komai"

Daga ɓangaran Ammi fatan alkairi tare da addu'ar nasara tayi masa Ya lumshe idanun shi bayan sunyi sallama da Ammi wata iskar ya kuma fesarwa.
Ya lalubi Numbern Mami.
Tana zaune a ɗaki tana shan farfesun kan rago taji wayarta tana ringing My One and only sunan data masa saved dashi kenan shike yawo a saman screen ɗin wayarta ta kalli Ƴan biyu ƙannenta suka miƙe suka bar ɗakin Da sallama ta ɗaga wayar Muryarta a narke.

Dakakkiyar muryar shi mai cike da taushi ita ta karaɗe cikin kunnenta.
"Mamy waye ya baki izinin tafiya gida?"
Ya tahume ta.
Inda inda ta soma yi tana kame kame.
"Dama Mama ce tace na biyota sabida jikina ba ƙwari"
Aliyu yaji ranshi ya ɓaci da wannan shashancin da mami tayi.
"To ki koma gida"
Daga haka ya katse wayar shi ya cillata can saman gado ya miƙe ya nufi toilet ruwa ya sakarma kanshi kafin ya ɗauro tawul ya fito gaban dressing Mirrow yana goge Ruwan dake ɗigowa daga jikinshi.

Ya shirya cikin ƙananun Kaya Wando Nevy blue mai santsi sai riga Polo kalar wandon ya feshe jikinshi da haɗaɗɗan turare Ya ɗauki wayar shi ya fita daga ɗakin

Kai tsaye Katafaran kamfanin shi dake kan titin Ibrahim Badamasi Babangida dake garki area 11 ya nufa sukai magana da managern shi sannan ya dawo ɗakin Yau gaba ɗaya jin shi yake wani irin kasala da Buƙata Sun taru sun masa katutu shi namiji ne mai lafiya Ya fahimci yawan takurar da yakewa Mami ne yake sanya cikin dake jikinta samin matsala tun sanda Likita yayi masa bayanin nan yaji hankalin shi ya tashi Sabida shi indai zai ci zai sha tofa ba ze taɓa ganin Matarshi ya kauda idanu ba Babban abin daya ɗaga masa hankali shine yadda Likita ya bashi shawara akan cewa inda hali ya ƙara aure sabida Mami ta dinga samun sassauci daga yawan buƙatarshi Wannan bayani da likita yayi mashi tunda yakai Mami asibiti shike damun shi a tsarin shi Babu neman matan banza dan ba'a haɗa arziƙi da zina sannan kuma shi bai da ra'ayin ƙara aure to wama zai aura Dama Najuwa yaso ita kuma da Ammi taƙi Ya haƙura tuni tai aurenta Mami kuwa zaɓin Ammi ce.

Tsaki yaja lokacin daya miƙe tsaye ya shiga Toilet ya ɗauro alwalar sallar magariba anan ɗakin yayi sallah Ya jima a zaune har akai Kiran sallar isha'i Ya tashi ya gabatar yana idarwa yayi waya a kawo masa Black tea Ba'afi Minti Biyu ba yaji kwonking Ya miƙe ya amso tea ɗin wanda yake ta tururi Ya zauna saman stool yana sha Bayan ya kammala ya cire kayan jikin shi ya kwanta ba jimawa bacci yayi awon gaba dashi.

Da sassafe yayi shirin komawa kano wanda kai tsaye daga airport Gidan mai girma gwamna Driver ya wuce dashi sabida meeting ɗin da aka kirashi na gaggawa akan kawo ƙarshen zaman banza ga matasa wanda gwamnati zata bada tsarin Jari na musamman domin a taimakawa matasan.
*****

Wannan satin aka dawo da Farha tsarin labaran safe kuma cikin Hukuncin Allah an haɗesu da shema'u wanda daga farha har shema'u sunyi murna da wannan abu sai dai yadda Md ya buƙaci su soma fita Kasuwanni da titina dan ɗauko rahoto abin baiwa Farha daɗi ba dan Yau sai ƙafarsu ce ta kawosu sabida Sunje ɗauko Rahoton faɗan daba anan warure wani ɗan daba daya Biyosu da zabira ƙafar kowace ta kaita gida Daran ranar Farha ta kasa bacci tai ta juyin gajiya ga ƙafarta tai tsami.

Umman farha data gama jin labaran ƙarfe Goman dare Wanda Mai bawa Gwamna shawara a Ɓangaran Matasa *Aliyu Audu Madaki* ya sami ganawa da gwamna a yau domin bada jari na musamman ga matasan dan kawo ƙarshen zaman banzan su wanda yace shi kanshi yana buƙatar matasan da suka kammala secondry Guda Hamsin N.c.e zuwa degree guda ɗari gaba ɗaya Ɗari da Hamsin da suzo Kamfanin shi Mai suna *MADAKI MOTORS AND SERVICES* dake kan titin lawan danbazau don a tantance su ya basu aiki a kamfanin don ya tallafa musu wajan rage zaman banza.

Kabbarar Umma ce tasa Farha ta buɗe idanunta da suka ƙanƙance sabida Gajiyar gudu.
"Umma danna mini ƙafata"
Farha ta faɗa tana hamma.
"Ke rabu dani ina jin abin alkairi ya Allah kasa wannan alkairi yazo mana gidannan Su Halifa su sami aikin kamfanin nan tunda har gyaran motoci naji ance ana yi wannan bawan Allah Ubangiji ya biya shi da gidan aljanna"
Farha da bata fahimci Komai ba tace.
"Umma keda wa haka kike ta Kabbara?"
Umma tai murmushi.
"Wallahi farha inda haka za'a sami masu kuɗi masu taimako irin wannan mai bawa gwamna shawara akan matasa da an sami ci gaba sosai naji ance shima matashi ne kuma da kuɗin sa gwamna ya ganshi dan yadda yake taimakon matasa da Kula dasu ne ma ya jawo hankalin gwamna ya haɗa tafiya dashi wanda aka ce da ƙyar ma ya yarda ya karɓi SA ɗin"

Farha bata fahimci komai ba taja Mayafin rufarta bata farka ba sai asubah tana yin sallah tai wanka ta soma shiri Ƙarfe bakwai tabar Gida Har tausayi take bawa umma a sati Biyun datai har ta ƙara ramewa ta koma ƴar firit Kullum takance Umma burina naga Kin daina wahala daga na ɗauki albashi zan baki Ki sai komai na buƙatarki.

Tare da shema'u suka ƙarasa Cikin Gidan rediyon Suna gaisawa da sauran ma'aikata Md ya aiko Kiransu.

Cikin ladabi suka gaishe dashi yana zaune, Yana cike takardu.

Ya dubi Farha.
"Fatima wani labarin Kika ji mai Fusgar