You Cannot Download this book untill you login but you can read it .

---

Login Register

Zuhra ta dan gyara mayafi ta karbi tray din. Sai da suka je kofar falon duk taji kunya kamar kada ta shiga. Izzatu ta turata tare da komawa falo tana sanar da mutane su shirya dariya zata yiwa wata April Fool. Mariya na jin haka ta mike da sauri tace da Ummahani kila yarinyar nan ce. Na rasa abinda ke damun Izzatu. Bata kara magana ba suka ji karar fashewar tangaran.

Lokacin da Zuhra ta shiga falon da sallamarta. Hamza ya taso a fusace yana cewa Izzy kinsan abinda kika jawo min yau? Zuhra tayi saurin daga kai suka hada ido, bata san lokacin da ta saki tray din ba. Mutumin nan da ya kusa marinta ta gani. Bakinta har rawa yake tana cewa yayi hakuri ta durkusa tana tsince sauran jug da kofin da ya fashe. Dama a harzuke yake yace me ya shigo dake falona? Waye ya bude miki? Duk ta kidime tace Anti Izzatu ce. Zuwa lokacin kofar falon ta cika da yan gidansu Izzatu har da ita. Sauran mutane ma jin ana daga murya suka zo kallo. Hamza yace ita Izzatun ce ta bude miki falona tace ki shigo. Zuhra tace eh. Hamza na daga murya yace ba kece mara kunyar yarinyar nan ba, wato sata kika zo yi. Da sauri ta girgiza kai tace a'a wurin Hamza nazo.

Daga shi har Zuhra babu wanda hankalinsa ke bakin kofa bare su ga yadda mutane ke kallonsu. Yan gidansu Izzatu da suka san komai sune suke dariyar yadda jikin Zuhra ke rawa. Yace Hamza? To nine Hamzan ya akayi? Zuhra tace ba kai Hamzan ba. Kannin anti Izzatu ne yace yana sona shine yake min tes. Ita tace na zo nan yana jirana wallahi. Hamza ya runtse idanunsa yace idan na bude baki bace min a wurin nan ba sai na bata miki rai. A gigice ta juya ta hango Izzatu. Ta karasa gabanta tace yi hakuri na fasa miki kaya. Amma ni ban gane ba mijinki yace shine Hamza. To waye kanin naki? Wata irin dariya taji sun kwashe da ita suna cewa APRIL FOOL!!!.

Ko da bata gane me suke nufi ba amma dariyarsu tayi mata ciwo sosai. Hawaye kawai take yi ko gani bata yi sosai yadda hawayen ke zubo mata tace Apre..me? Kanwar Izzatu ta sake cewa April Fool. Da wannan fuskar taki kike tunanin yin saurayi dan gayu. Ina ji kuna hirar da matar da kuka zo. Anti Faiza tace Izzatu wai me yake faruwa ne. Na zata kuskure kikayi da kika ce a nan kanin naki yake jiranta. Ba sai kiyi musu bayani ba. Da kyar Izzatu ta tsayar da dariyarta tace ni nake yin text din.

Hamza kallon Izzatu yake yi tana dariya ita da yan uwanta. Sauran mutanen wurin kuwa kadan ne abin ya basu dariya. Sauran tausayin Zuhra suke yadda rashin sani yasa ta fuskanci wulakanci. Anti Faiza ta rungumo Zuhra wadda bata san inda take jefa kafafunta ba. Sautin dariyar da aka yi mata kawai take ji a kunnuwanta. Izzatu ta cigaba da cewa april fool nayi mata na rinka tura mata text din soyayya. Ta zata saurayi tayi har ta amince. Ta dafa kafadar Zuhra ta sake cewa april fool. Kada ki damu it was just for fun.

Saukar mari taji mai kamar wuta a kumatunta kafin Hamza yace kowa ya fice masa daga gida. Mata suka tsaya kallonsa ya daka musu wata tsawa. Ba shiri suka fara bacewa.

Izzatu na dafe da kumatu ta juya taga ba Hamza, Zuhra da Anti Faiza.

Anti Faiza jan hannun Zuhra kawai take yi har suka fita daga gate din gidan. Ummahani ce tayi musu horn Mariya na gaban motar suka ce su shigo. Anti Faiza tace su tafi kawai. Mariya tace kiyi hakuri ku shigo kada a rinka kallonta kinga an fara fitowa..

Anti Faiza tana ta cewa su tsaya zasu sauka a hanya amma Ummahani taki tsayar da motar. Mariya tace ki kwantar da hankalinki zamu kaiki inda za'a bi muku hakkinku. Anti Faiza ta cije lebe tana kallon yadda Zuhra ke zubar da hawaye tace Allah zai isar mana ku ajiyemu kawai ba sai munje wurin yan sanda ba. Ummahani tace gidansu Hamza zan kaiku. Ni matar kaninsa ce, wannan kuma kanwarsa ce. Sai a lokacin Zuhra tace ku ajiye mu don Allah. Mariya ta juyo ta kalleta. Dole Zuhra ta baka tausayi. Wannan karon Izzatu ta wuce gona da iri. Kiyi hakuri mun kusa zuwa gidan. Anti Faiza tace kunga bama son wani wulakancin ku barmu kawai. Ummahani bata tsaya ba sai a cikin gidan don tayi saa an budewa Alh Nasiru gate zai fita kenan suka shigo. [10/11, 2:27 PM] Mariya u madara: [9/25, 3:40 PM] ‪+234 803 040 6305‬: AL'ADUN WASU 🗿21

Batul Mamman(Mrs)💖




Ummahani na tsayar da motar Mariya ta fita da sauri ta tari Alhaji. Su Anti Faiza kuwa fita suka yi daga motar suka yi hanyar gate zasu fita. Muryar dattijo suka ji yace don Allah su tsaya. Kuka Zuhra ta cigaba tana jan hannun anti Faiza. Mariya ta zo gabansu tace don girman Allah ku tsaya. Ba yadda zasuyi dole suka biyo bayanta. Amma duk yadda aka yi Zuhra ta kafe bazata shiga cikin gidan ba. Kukan da take yi yasa Alh Nasiru yace Anti Faiza da ke mata fada ta kyaleta. Sai a lokacin Zuhra ta kalli dattijon. Ko ba'a fada ba tasan shine baban mijin Izzatu saboda sunyi kama. Da sauri ta durkusa har kasa tace ina wuni? Lafiya kalau ya amsa fuskarsa dauke da murmushi. Kallonta yake yadda take goge hawaye da majinar fuskarta da dankwalin kayanta. Sannan ta nade kanta da jikinta da katon mayafi.

Suna nan tsaye Mama da Hajiya suka fito tare da Mariya. Hajiya tace yanzu Mariya ke fada min munyi baki kuma wai sunki shigowa. Anti Faiza da Zuhra suka gaishe su. Mama ta ce ya naga bakuwar na kuka Allah Yasa lafiya. Alhaji yace Mariya ta dan soma fada min. Ku daure mu shiga ciki. Mama ce tazo ta kama hannun Zuhra ta tayar da ita suka shiga cikin gidan ba don tana so ba.

A falo suka zauna Zuhra da Anti Faiza suka rakube jikin kujera. Mariya ta bada labarin abinda idanunta suka gane mata a gidan Yaya. Mama da Hajiya sai salati suke. Ita kam Hajiya har kunya taji ace wai Hamza danta ne kuma na fari ma. Alhaji ya dubi su Zuhra yace ko zaku yi mana bayanin yadda abin ya samo asali. Nan Zuhra ta soma basu labari. Tana yi tana kuka. Su Ummahani sunji tausayinta sosai. Alhaji yayi murmushin bacin rai Mariya ku tashi ku kaisu gida. Sai ku gane mana gidan. In sha Allah anjima zamu zo gidan nayi magana da mahaifinki. Amma kafin nan don Allah kada ki sanar dasu komai. Zan gyara matsalar in sha Allah. Mama ta matsa kusa dasu ta rike hannun Zuhra ki yi hakuri kinji 'yata. In Allah Ya yarda Alhaji zai share miki hawaye kuma zai hukuntasu daidai da abinda suka yi miki. Zuhra ta gyada kai ni dama dariyar ce ta fi bani haushi. Anti Faiza tace to ba an baki hakuri ba. Tashi mu tafi. Bayan sun fita Mama tace Hajiya ya kika yi shiru? Hajiya tace hmmm to me zan ce? Kina kallo kullum lamarin gidan yaron nan kara lalacewa yake. Wai april fool sai kace wasu kasurguman kafirai. Na rasa yadda ake suke kwakulo duk wata al'adar banza suna dabbaka ta. Alhaji yace ku kyale ni dashi. Alkawari ne tsakaninmu akan idan haka ta sake faruwa zan hukunta shi.....wani murmushi kawai Alhaji Nasiru yayi. Sai na nunawa yaron nan nima ina riko da namu al'adun nagari.

Izzatu ta rike kumatu ta soma kuka. Ita Hamza zai mara a gaban mutane. Sai a lokacin ta kula kowa ya watse sai yan gidansu da mamanta. Da sauri ta nufi wurinta zata rungumeta, sai taga maman tata ta matsa. Izzatu ta zaro ido meye ma'anar hakan. Raliya mahaifiyar su Izzatu ta kalli 'yarta fuskarta na nuna alamun rashin jindadi tace Izzatu that was extreme. Ban taba nuna damuwata ba idan kuna wasanku ke da yan uwanki. Kuma ni mutum ce da ta yarda a bar yaro ya sake yayi abinda ransa yake so. Amma ban yarda da cin zarafin wani don nishadi ba. Me yarinyar tayi miki haka da har zaki kirawota har gidanki ki mayar da ita laughing stock(abin dariya) a gaban mutane? Hawaye ne ya cigaba da sauka daga idanun Izzatu tace Mum har me nayi mata? Kawai ba'a fahimceni bane amma yi nayi don ayi dariya. Raliya tace kada ki manta yarinyar nan nan mutum ce kamar kowa. Ya zaki ji idan kika sa rai da abu kamar soyayya sai kawai ace miki wasa ne har a biki da dariya? ta dubi sauran 'ya'yanta ku tashi mu tafi. Laifinmu ne ni da Dad dinku da muka dora ku kan al'adun da basu dace da society dinmu ba. Gashi mun dawo Nigeria kina ta samun matsala da inlaws dinki. Izzatu na kallo duk suka fita jiki a sanyaye.

Share hawayenta tayi ta hau sama. A hankali ta bude kofar dakin ta hango Hamza zaune a kan kujerar gaban madubi ya dafe kansa. Karasa shiga tayi ta tsaya a gabansa, ka kyauta Hamza. You slapped me for no reason. A yadda ya dago kansa sai da ta razana ta matsa baya da sauri. Gani take wani marin zai kai mata. Har wani huci taga yana yi saboda yadda ransa yake a bace. Izzy kinsan abinda kika yi kuwa? Ta dan sha kunu ita a dole bazata nuna masa ta yarda tayi laifi ba. Don kawai nayi april fool shikenan sai ya zama laifi. Har ka manta babu shekarar da bama yiwa juna. Last year kaya ka kawo min wai na fadar kashiya. Sai da na gama yarda nasha kukana sannan kace april fool. Shi inda ya dosa daban da abinda take fada. Saboda tashin hankalin da yake ciki ya manta da wani wasan april fool da tayi. Wannan last year ne, har kin manta nace mun dena duk irin wadannan abubuwan. Tace ban manta ba amma ai wannan ba na kudi bane. Ya rasa yadda zaiyi da ita. Kinga sami wuri ki zauna kin tsaya min a ka. Bakin gado ta zauna tana fuskantarsa. Izzatu ya kira sunanta..... naam. Kin taba goge min text da Inuwa ya turo ranar wedding anniversary dinmu? Dan tunani tayi tace eh, amma na karanta farkon sakon na kuma fada maka abinda nagani. Shine duk ka wani daure min fuska har da mari. To wallahi bazan hakura ba. Ta fadi maganar ne tana tashi. Bata ankara ba taji ya janyota iya karfinsa ya hadata da bango. Da sauri yake numfashi don ji yake kamar zuciyarsa zata iya bugawa. Idanunsa duk sun kankance. Sai a lokacin Izzatu ta ji tsoro tayi tunanin tambayarsa abinda ya same shi. Kafin tayi magana yace daga yau idan kika sake daukar min waya sai nayi miki abinda baki taba tsammani ba. A dalilin wayar karyar da kika yi kika ce Junior ya karye da deleting text dina da kika yi karayar arziki na iya samuna. Ga mamakinta hawaye ta ga ya zubo daga idanunsa, abinda bata taba gani ba. Nan da nan ta rikice, babyna ya zamuyi idan ka talauce? Zamu sami abincin da zamu ci ko sai Daddyna ya taimaka mana? Gashi kayi min alkawarin zaka canja min mota. Innalillahi wa inna ilaihi rajiun ya ke nanatawa. Zancen ace ransa ya baci da maganarta ma bata lokaci ne. Izzatu dama baki da hankali??? Tace bangane ba. Ya daga murya ya soma fada... ina fada miki matsalata kina zancen canjin mota. To hell with canjin motar taki. Ya dauki kujerar gaban madubin yayi wurgi da ita. Wani irin bakinciki yake ji wanda yake tunanin idan ya taba Izzatu kila sai dai ta kwana a asibiti. Ba talauci ba ko me zai sameni tare zamu zauna. Kin jawo min tashin hankali kala kala kinga ina rabuwa dake shine yanzu zan fada miki halin da zamu iya fadawa kiyi zancen damuwarki ta banza. Gefe ta koma don gaba daya ta tsorata da Hamza. Mutum ne wanda da wuya kaga bacin ransa. A hankali ta soma matsowa kusa dashi zata bashi hakuri sai wayarsa tayi kara.

Ita ma wayar ji yayi kamar ya kwadata da kasa sai yaga Alhaji ne yake kiransa. Yana dauka Alh Nasiru yace ana saukowa daga masallaci kazo ina nemanka. Sai kawai ya kashe wayar. Hamza ya rike wayar yana kallonta...Allah Yasa ba gulmar abinda ya faru dazu Mariya ta kai gida ba.
[9/25, 3:41 PM] ‪+234 803 040 6305‬: AL'ADUN WASU 🗿22

Batul Mamman(Mrs)💖





Daga masallaci gidansu ya wuce ya baro Izzatu tana ta aikin kuka a gida. Lokaci daya duk ya birkice mata abinda bata saba gani ba. Allah Ya sa su Khalifa ta hadasu da Tala suna dakinta suna cin abinci duk wannan tashin hankalin da ake yi.

Baiyi mamakin ganin motar Ibrahim ba don yasan kullum sai yazo gidan. Yana ta sallama yaji shiru ba'a amsa ba. Kande mai aikinsu ce ta fada masa suna dakin Alhaji.

Sallama yayi ya shiga ya tarar dasu suna ta hira. A ransa yace babu wanda yasan matsalar da yake ciki. A lokacin da yake jindadi bai kyautatawa iyayensa yadda ya kamata ba saboda haka yanzu bashi da dalilin tada musu hankali ya fada musu halin da kamfaninsa zai iya shiga. Mama na ganinsa ta washe baki ta soma guda. Murmushin yake yayi yace Mama alkhairi muka samu ne? Kwarai kuwa Yaya in sha Allahu alkhairi zamu samu. Ya karasa ciki ya gaishe da iyayensa. Ibrahim ya miko masa hannu suka gaisa suna tambayar juna aiki da iyali. Bayan sun dan nutsu Alh Nasiru yace bayan magriba in Allah Ya yarda zamu je gidan surukan naka. Hamza ya kalli Ibrahim da alamar tambaya. Alh Nasiru yace da kai nake Yaya. Ni kuma Alhaji, wani abin ne ya faru? Mama ta katse shi cike take da murna tace babu komai. Rabon da ta sake masa sosai tun kafin ta karye a gidansa. Alhaji ya ce bani hankalinka nan Yaya. Duk aka yi shiru ana sauraronsa. Dazu Mariya da Ummahani sun zo gidan nan da yarinya tana ta kuka akan cin zarafin da kuka yi mata kai da matarka. Hamza yace wallahi Alhaji ban san da abin ba sai da naje gida. Yau har marin Izzatu nayi akan abinda tayi. Hajiya ta tabe baki sai kace kayi wani abin arziki. Ai ba laifinta bane ita kadai. Alhaji ya cigaba da magana...kasan akwai alkawarinmu na ka amince da duk hukuncin da zan dauka a kanka idan irin haka ta sake faruwa ko? Tuni Hamza ya gano inda Alhaji ya nufa..muryarsa har tana sarkewa yace don girman Allah Alhaji kada kace nema min auren yarinyar nan zaka yi. Kayi min wani hukuncin ba wannan ba. A rana daya abubuwa sai samunsa suke yi. Ba don kada ya nuna karayarsa ba babu abinda zai hana shi fashewa da kuka. Alhaji yayi yar dariya. Dadina da kai akwai hazaka gashi har ka gano inda na nufa. Kamar yadda kuka sawa yarinya rai cewa bayan magariba zaka je gaishe da mahaifinta to tare zamu ayi mai gaba daya. La'ila ha ilallah...Alhaji kayi hakuri. Idan kaga Hamza a lokacin shima sai ya baka tausayi. Yana cikin wannan matsalar ina shi ina aure. Auren ma da wannan kucakar yarinyar mara kunya. Muryar Alhaji ce ta katse masa tunani. Wallahi idan har kaki yarda da auren nan daya hukuncin da zan iya yanke maka shine na zare hannuna daga dukkan abinda ya shafeka. Babana ba fa kai kadai na haifa ba, kuma kaine na fari amma matsalar gidanka ta isheni. Sam ka kasa rike matarka. Hamza yayi shiru yana jinjina kalaman mahaifinsa. Can dabara ta fado masa yace Alhaji nayiwa Izzatu alkawarin bazan taba yi mata kishiya ba. Alhaji ya tashi yana cirw babbar rigarsa yace ashe auren zobe kuka yi bamu sani ba. To kada ka damu yanzu ma alkawarin naka bai tashi ba tunda ba kai ka nemi auren ba. Ita da kanta ta nema maka. Mu nan karashen aikin ta barmu dashi kawai. Ka tashi ka tafi gida ka saka manyan kaya don bazamu gidan surukai da kai a haka ba ka wani ci zanzaro.

Ko kazar da kwai ya fashewa a ciki zata fi Hamza kuzari. Daga kafa yake kamar ba'a jikinsa take ba. Ko da ya koma gida dakinsa ya shiga ya rufe. Izzatu tayi bugun har ta gaji. Bai fito ba sai da aka kira magariba. Yayi wanka ya canja kaya. Ba don kuncin da zuciyarsa ke ciki ba sai ka zata sabon ango ne....kodayake ya kusa zama angon!

Masallaci ya fara zuwa yayi sallah sannan ya wuce gida. Alhaji da Ibrahim ya gani a shirye suna jiransa. Mama har bakin mota ta rakosu tana musu fatan alheri. da ta shiga gida Hajiya tace wato duk gidannan kinfi kowa farinciki da wannan abin. Mama tayi dariya Hajiya bazan taba manta abinda Izzatu tayi mana ba. In Allah Ya yarda yanzu Yaya zai san yayi auren yar da ta dace da addini da al'adarsa.

Yadda Ummahani ta kwatanta masa haka Ibrahim ya bi. Hamza yana gaba kamar ruwa ya cinye shi. Alhaji da Ibrahim sai hirarsu suke yi. Daga bakin layin suka ajiye motar Ibrahim yace daga nan na manta kwatancen, Yaya ya ma sunan yayartawa? Wata muguwar harara Hamza yayiwa Ibrahim kafin yace zanci.....Alhaji yayi gyaran murya don yasan karshenta zagi Hamzan zaiyi. Yau ya zama a lallaba auren zamani. Ibrahim dai dariya yayi sannan ya kira Ummahani ta tuna masa sunan. Da tambaya suka sami gidan domin ba wuyar ganewa.
[10/11, 2:27 PM] Mariya u madara: [9/25, 3:42 PM] ‪+234 803 040 6305‬: AL'ADUN WASU 🗿24

Batul Mamman(Mrs)💖




Wurin goma da rabi na safe kukan Nana ya tashi Izzatu daga bacci. Tana bude ido ta kalli agogo. Da sauri ta sauko daga kan gadon ta dauki Nana da ke kawo karar Junior ta tafi dakin Hamza. Abin mamaki a rufe taji dakin. Ta tsaya tana bugawa Khalifa yace Daddy ya fita. Ranta ne ya baci. Tunda suka yi aure ranaku kadan ne suka taba kwana daki daban shima sai da dalili mai karfi. Amma akan abinda bai kai ya kawo ba shine jiya yaki tashinta daga bacci ta koma dakinsa kuma yau harda kulle kofar daki. Kwafa tayi zai dawo ya sameta ne. Bayan tayi wanka ta sauko kasa. Tala ta gyara gidan tas kamar ba'ayi taro a cikinsa ba. Hatta su Khalifa duk tayi musu wanka. Da yake asabar ce babu makaranta. Sabon dakin wasansu suka tafi suna ta tsalle tsalle. Tala ce ta rugu da gudu ta kawowa Izzatu wayarta da ke ringing a daki. Bakuwar number ta gani ta dauka suka gaisa. Da jin gaisuwar kasan bata san da wa take magana ba. Mama tace Haj Kaltume ce daga gidan Alh Nasiru uban mijinki. Izzatu ta dan ji kunya tace yi hakuri Mama bangane ba. Mama tace ah ai babu komai idan kina da lokaci kizo nan gida Alhaji ya bayar da sako. Kafin Izzatu ta amsa Mama ta kashe wayarta.

Duk da babu mutane sosai a office din saboda weekend ne amma can Hamza yaje. Tunani ne yayi masa yawa bai iya yin baccin kirki ba. Shawara daya ya yanke zai basu ribar kamar yadda suka bukata sannan zaiyi kokarin hada kudin da suka bashi ya biyasu. Yana wannan tunanin Izzatu ta kira shi tana sanar dashi kiran Mama. Yace taje shima zai je anjima kadan. Har zai ajiye wayar yaji tace sweetyna kayi hakuri da duk abinda nayi ba daidai ba. Sai yaji ta bashi tausayi. Basa iya dogon fushi da junansu. Babu komai Izzy, love you. Tace love you more.

Dakin Mama ta wuce kai tsaye tunda ita ta kirata. Hamida tana gyaran wardrobe din Mama taji sallamar Izzatu. Wata sabon gani. Anti Izzatu dama kina nan, yaushe rabonki da gidan nan? Izzatu ta dan sunkuyar da kai. Ita kanta tasan tafi wata biyar rabonta da gidan iyayen mijinta. Ko da Mama ta karye kunya da tunanin basa sonta ya hanata zuwa. Kuma Hamza baice taje ba. Mama ta fito daga toilet tace Hamida bana son rashin kunya ko sa'arki ce da zaki zauna ki titsiyeta. Tashi ki fita magana zamuyi. Ki kawo mata dan abinda zata ci. Izzatu ta sami wuri ta zauna tace ki barshi a koshe nake. Hamida ta tabe baki tayi gaba.

Mama ta dubeta, gabadaya Izzatu ta fice mata a rai. Mun sami labarin abinda kuka yiwa yar mutane jiya a gaban jama'a. Izzatu na jin haka tasan kila fada za'ayi mata tace Mama don Allah kuyi hakuri. Itama yarinyar zan kirata na bata hakuri. Maybe bata ji haushi ba saboda bata yi kama da mai daukar abu serious ba. Mama tace ga mahaukaciya ko, dole kice bata daukar abu serious. To sakamakon abinda kuka yi jiya Alhaji yaje neman aurenta wurin iyayenta. Izzatu ta zaro ido harda dafe kirji. Yanzu Alhaji Zuhra zai aura? Karamar yarinya ce fa da kadan zata girmi Hamida. Ikon Allah ai da Nura ya nemarwa aurenta. Mama ta tsaya kawai tana kallon Izzatu ranta na kara baci. Ba shi zai aureta ba mijinki ya nemawa aurenta kamar yadda kika fada mata. What? Tashi Izzatu tayi a gigice... Mama don Allah da gaske kike? Hajiya ce da ta shigo dakin a lokacin tace da kuna yar wasa ne da ita. Kan kace meye wannan Izzatu sai kuka. Ta durkusa gaban Hajiya don Allah ku bawa Alhaji hakuri wallahi bazan iya zama da kishiya ba. Bazan iya sharing mijina ba. Daga Mama har Hajiya kallonta suke yi tana kuka wiwi. Mama tace don baki da kunya Izzatu mu kike gayawa bazaki iya sharing miji ba. In sha Allah aure kamar anyi an gama. Tana kuka tace dama kirana kuka yi kuyi min wulakanci.

KE IZZATU MEYE HAKA. Ta yi saurin juyawa wurin Hamza daya shigo dakin shima. Rungume shi tayi tana kuka. Kaji abinda suke cewa wai Zuhra za'a aura maka. Duk kunya ta kamashi yana kokarin tureta tana dada kankame shi. Ya daka mata tsawa sake ni mana... iyayen nawa kike cewa suna miki wulakanci? Ba kin iya kiranta ki fada mata Hamza na sonta ba. To zan aureta kinga bukatarki sai ta biya. Idanu sharbe da hawaye tace ni kake fadawa haka Hamza....sai kawai ta fice.

Mama tayi murmushi sannan ta nuna masa kofa bita kada tayi wani wurin. Ya yi hanyar kofar Hajiya tace Alhaji yace na fada maka lallai kaje gidansu Zuhra yau ku daidaita. Tsayawa yayi kamar gunki yana kallon yadda su Hajiya ke nishadi saboda za'a kakaba masa auren da baya so. Bai ankara ba yaji tashin motar Izzatu. Da sauri yabi bayanta. Hajiya tace an dai ji jiki. Wallahi Alhaji yayi min daidai. Su Mama za'ayi surika, Allah Ya tabbatar da alkhairi. Mama tace Amin Hajiya tana fadada murmushinta.
[9/25, 3:42 PM] ‪+234 803 040 6305‬: AL'ADUN WASU 🗿23

Batul Mamman(Mrs)💖




Yaron da ya rakasu gidan har soro ya shiga dasu sannan ya karasa ciki ya fadawa Baba yayi baki har su uku. Dama a shirye yake shi da baban su Anti Faiza ne a tsakar gidan suna jiran zuwan suriki. Basu san wainar da ake toyawa ba. Baba yayi wa yaron godiya yace da Umma ta dauko juice din nan da ya tanada domin bakon. Manyan kwalin happy hour ne guda biyu sai ruwan roba babba daya. Akan tray ta jera da cups hudu ya mika hannu zai karba babansu Anti Faiza da ake kira Malam yace haba Baban yara bari na dauka.

Tabarmi biyu Baba ya dauko suka shigo soron. Da yake akwai wuta yana ganin bakin yadan ji faduwar gaba. Irin wadannan mutanen da gani masu arziki ne. Anya sa'anin auren Zuhra ne kuwa. Ibrahim yayi sauran karban tabarmin ya shimfida musu. Suka zazzauna suna gaisawa. Alh Nasiru ya sake dasu sosai suna ta barkwanci kamar sun dade da sanin juna. Idon Hamza kyar akan dungulmin hannun Baba. A ransa tunani yake Allah Yasa ba kuturu bane. Kodayake ya gama tsara yadda zaiyi ya gujewa auren nan. Alh Nasiru ne ya fara magana.