You Cannot Download this book untill you login but you can read it .

---

Login Register

Maryerm?" Kanta a kasa ta ce "lafiya lau Bobbo, bana jin dadi ne na fito kuma bai san ina rashin lafiyar ba." "Kan ji shashanci kuma shi ne kika fito baki tunanin zai iya shiga wani halin idan?" "A yi hakuri Bobbo da safe a kira shi." Ganin kamar ba cikin nutsuwa take ba yasa Bobbo amincewa. da taimakon Nenne suka shiga ciki, ruwan wanka Nenne ta haɗa mata sai da ta taimaka mata wajen shiga toilet din kafin ta bata waje.

Bata jima ba ta fito ko tsayawa sanya kaya bata yi ba ta kwanta, gaba daya jikinta ya kuma gashewa da dumi, bargo ta ja ta rufe jikinta hakoranta sai haduwa suke da juna, a haka Nenne ta shigo ta sameta "Tashi ki sha tea sai ki sha magani." Kaɗan ta kurba ta watsa maganin kafin ta koma ta kwanta.

A haka suka kwana Ameesha bata jin dadi, zazzaɓin ya sauka sai ciwon da gaɓoɓinta ke yi, sam Nenne bata rintsa ba domin tausayin halin da Ameesha ke ciki, tabbas tasan ba lafiya ya kawo ta gidan cikin daren ba, amma duk tambayar da ta yi mata amsa daya take bata shi ne "Babu komai." Ta ta gaji da tambayar sai ta yi shiru, ta kudiri a zuciyarta in har Dr wani abu ya yiwa Ameesha tazo gidan zai ga ɓacin rai ganin idonsa.

****

Tun bayan tafiyar Ameesha Dr ya kasa samun nutsuwa sai zarya yake a dakin shi kaɗai, tsaki ya yi shi har bai san yawan su ba, daga karshe komawa toilet ya yi ya sakarwa kansa ruwa ko zai samu sauki a zuciyarsa. Bayan ya fita kayan bacci ya sanya ya kwanta sai juyi yake zuciyarsa tana tuno masa yadda Ameesha ke kuka tana rokonsa, mtsww ya ja tsaki tare da juyawa da kyar bacci ɓarawo ya samu nasarar ɗaukan shi, kallo ɗaya zaka masa kasan baya cikin nutsuwarsa.

"Hmmmm! Rukky wallahi bazan ɓoye maki ba ina cikin damuwa." Aneesa ce ke maganar cikin waya bayan ta kule a bedroom ɗinta. Daga ɗaya bangaren Rukky ta ce "kina da matsala Aneesa, yanzu baki ga canji ba ne da kika kai maganin? Ko dai baki sanya inda zai gansa ba?" Mtsww Aneesa ta saki tsaki ta ce "Ni Ko na sanya inda zai gani domin na farko sai da suka yi kwana huɗu basa magana, da kyar ta samu suka daidaita yau kuma abin ya kara gaba ina jin koranta ya yi don naga ta fita." Hehehe! Rukky ta saki dariyar keta, ta ce "Kina wuta Anee, kinga yanzu saura kiris Dr ya zama naki ke kaɗai, idan kin dage gaba kadan komai zai daidaita." Cike da murna ta kammala maganar. Hmmmm! Kawai ta iya faɗa suka yi sallama, tana aje wayar ta buga uban tagumi, a yanzu sam hankalin ya kasa kwanciya.

Washegari da safe sai da ya yi wanka, ruwan zafi kawai ya ɗaura tea ya haɗa bayan ya gama sha ya yi shirin zuwa office, sama sama suka gaisa da Aneesa ya tambayi ko da matsala, ta tabbatar masa babu sannan ya wuce domin akwai masu jiran sa a office din.

*Bangaren Ameesha*

Kamar ciwon na jiran Bobbo ya fita ya dawo sabo, dalilin break ɗin da Nenne ta kawo mata, tunda ta ci hankalinta ya kasa kwanciya sai yunkuri take amma aman yaki fitowa, haka ta wuni aikin abu daya da Nenne ta yi mata maganar Asmad sai ta kuma fashewa da kuka, shi yasa ta zuba mata ido.

Karfe uku ya taso daga office daret gidan Nenne ya wuce, har yanzu dai ba a cikin nutsuwarsa ya ke ba musamman yadda ya yi parking motar zai nuna maka haka, cikin falon ya shiga bakinsa dauke da sallama. Nenne dake zaune duk abin duniya ya dameta ta saki ajiyar zuciya ganin Asmad ɗin, ta tabbata zata samu rangwame cikin damuwarta, amsawa ta yi da sakin fuska. "Barka da yammaci Nennena fatan kin wuni lafiya?" "Barkammu Asmad lafiya lau ya Aneesa da Ameesha." "Duk suna lafiya." Ya bata amsa fuska babu walwala. "Asmad lafiya kuwa?" "Ummh Nenne me kika gani?" Ya yi tambayar bayan ya kalkalo murmushi dole.

"Babu shakka yau na san babu lafiya a gidanka, domin kallo ɗaya mutum zai yi ya fahimci haka kamar yadda nima na fahimta, me yake faruwa a gidanka?" Tambayar ta yi fuska ba alamar wasa. "Babu komai Nenne kawai bana jin dadi ne." Ya bata amsa yana shirin mik'ewa. Murmushin takaici ta yi ta ce "Na ji lafiya lau ina Ameesha?" Dawowa ya yi baya ba tare da ya shirya ba sai jinsa ya yi yana shirin faduwa, bai iya magana ba sai dafe kansa ya yi dake barazanar tsagewa. "Tambayarka na yi ina Ameesha?" Cikin tsawa ta yi maganar wanda har Ameesha dake bacci sai da ta farka.

"Ku gafarceni Nenne jiya mun sami matsala da ita da dare har na ce mata ta tafi gidansu..." "Kun sami matsala? Asmad dama kana daya daga cikin mazajen nan masu rasa hankulansu idan mayensu sun yi masu laifi? Ka bani mamaki ka tozarta mu a idon duniya, matarka ta aure ka kora da dare don kun samu matsala ko? Ya yi kyau tashi ka bani waje." Da zallar faɗa wanda tunda yake da ita bai taɓa sanin tana da fada ba sai yau ta dire maganar tana nufa hanyar bedroom. Duk yadda Asmad yaso tsayar da Nenne abin ya ci tura domin yadda ta haɗa girar sama da ta kasa, lallai yasan ya batawa mahaifiyarsa rai tunda har ta dau zafi da shi.

Jiki a sanyaye ya fita daga falon, haushin Ameesha ya kuma darsuwa a ransa tunda akanta har Nenne ta yi fushi da shi irin wanda bata taɓa yi ba, bayan kuma kowa ya ji yasan ita ke da laifi. Mtsww ya ja tsaki yana bama motar wuta.

Nenne na ganin Dr ya fita ta ɗauki wayarta layin Hafiz abokin Dr ta kira, ringing biyu ya dauka cikin ladabi ya gaidata kafin ta sanar masa tana son ya zo gidanta ya duba Ameesha amma kar ya sanar da Dr, cikin mintinan da basu gaza talatin ba ya isa gidan, bayan sun gaisa ta kaishi daki inda Meesha ke kwance. Kallo ɗaya ya yi mata ya ɗan saki murmushi domin kamar hasashen da yake ya tabbata. Don haka sai ya shiga mata tambayoyi sannan ya amshi fitsarin ta ya kuma debi jininta.

Kallon Nenne ya yi yana faɗin "Nenne bari na je lab a yi test bazan jima ba." "A dawo lafiya." Nenne ta faɗa cikin sakin fuska. A kalla Dr Hafiz ya yi kusan awa kafin ya dawo fuska cike da fara'a mai tsanani. Mika mata farar takadda ya yi yana faɗin" masha Allah Nenne Meesha na dauke da ci..."

😓 *Ba sai kun faɗa ba walle nima nasan ina da matsala sosai, na rasa abin da yasa nake jin kiwar typing gashi abin ya zo gangara, ku kara hakuri dai kaɗan ya rage in sha Allah.*

Ina son ki har cikin raina my fan's😘😘

*YAR MUTAN RANO*
*SANGARTA*


©
_*ZULAYHEART RANO*_

*Sadaukarwa ga Khadija S Muhammad My Besty*

*47*

"Masha Allah! Nenne Meesha na dauke da ciki har na wata daya da kwanaki." Wani irin farin ciki ne ya ziyarci Nenne wanda rabonta da jin irin wannan farin cikin tun lokacin cikin Asmad "Alhamdulillah! Ta furta a bayyane fuska cike da zallar farin ciki. "Sannu da k'ok'ari Hafiz na gode da wannan kyakkyawan albishir ɗin." Meesha kam tana gama jin bayanin Dr Hafiz sai wasu hawaye na farin ciki suka soma zubowa daga idonta, hakika wannan rana ta zame mata na farin ciki domin daga wannan rana ta fita daga zargin da Dr ke mata, tana son ganin farin cikin da Dr zai yi idan ya ji tana dauke da cikinsa, gaba daya sakin baki suka yi suna kallonta don hawayen da take ba na wasa bane "haba Ameesha ke da zaki yi farin ciki sai kuma ki ke hawaye?" Hafiz ne ya yi maganar cikin sigar lallashi.

Murmushi ta yi kanta a kasa, bata jin zata iya sanar da kowa sirrinta da mijinta, don haka sai kawai ta ce "Babu komai fa Hafiz farin ciki ne kawai." Ta dire maganar tana sinne kai cikin filo. Murmushi suka yi gaba daya, sannan Dr Hafiz ya mik'e yana faɗin "Nenne zan k'arasa gida anjima zan kawo mata wasu magunguna." "Allah ya kaimu." Nenne ta faɗa da murmushi. Bayan tafiyar Dr Hafiz sai Nenne ta tsare Ameesha akan sai ta faɗi abin da take so.

"Nenne ni fa bana jin cin komai." "A'a Ameesha kin ga ki daure ki faɗa min bana son zama da yunwa balle kuma ba ke daya ba ce yanzu." "Zan rika ci Nenne faten dankalin turawa nake so." "Yawwa Yar Nenne haka nake so." Nenne ta yi maganar tana mik'ewa, da kanta ta shiga kicin ɗin ta soma haɗawa Meesha abin da ta ce tana so, faten ta yi mata mai ruwa ruwa yadda zata ji daɗin sha har da alayyahu ta yanka ciki da hanta, lokacin da ta shiga har bacci ya soma daukar Meesha, don haka cikin hikima da dabara ta tashe ta. "Sannu da k'ok'ari Nenne." Ameesha ta yi maganar tana tashi daga kwanciya. "Yawwa ta shi ki sha da zafinsa." Ruwa ta bata ta kuskure baki sannan ta bata abaki, ba ta wani ci da yawa ba ta ce ta koshi.

Duk yadda Nenne taso ta kara dole ta barta, toilet ta nufa ta sakarwa kanta ruwa masu dan zafi don ta ji dadin jikinta, bayan ta fito kayan jikinta ta mai da domin bata da kaya a gidan, Nenne ne ta shigo ta kalli Ameesha ta ce "Har kin fito?" "Eh" Nenne sai dai "bani da kayan sawa." A shagwaɓe ta yi maganar. "Kuma fa bari na kira Asmad ya kawo maki." To kawai ta amsa tana ci gaba da wasa da zaren rigarta. Tana kallon Nenne ta fita tana waya.

Ba a fi minti talatin ba, tana kwance kewar jikin Dr take tana son ta ji dumin jikinsa, Kamar daga sama ta ji sallamar sa murya ciki ciki, da sauri ta tashi zaune tana amsa sallamar "Sannu da zuwa baby." Ta faɗa tana kallonsa. "Yawwa." ya amsa a takaice fuska babu walwala. "Ga kayanki nan da kika sanya na kawo maki, dama na kula tuni baki son zama da ni shi ne dalilin ki na shan magani, tunda ba ki son zama dani me ya kawo ki gidan iyayena?" Ya kai karshen maganar yana daka mata tsawa.

Tun kan ya gama maganar, hawaye ya soma wanke mata fuska domin maganar sa yana daga mata hankali, murya na rawa ta ce" Ka yi hakuri ba da wata manufa nazo nan gidan ba, kuma wallahi laifin da kake tuhumata da shi bani da masaniya..." Hannun da ya daga mata ne ya sanya ta yi shiru da maganar ta amma hawayen basu tsaya ba.

"Kinga ki yi min shiru ai kin sire min Ameesha yadda na daukeki kin bani kunya, sai an yi magana ki farawa mutane kukan SANGARTA." Mtsww ya ja tsaki kafin ya bar mata dakin. Ragaf ta faɗa kan gadon ta saki sabon kuka sam bata son irin abin da Dr yake mata, duk da yanzu tasan Allah ya wanketa to amma ai muggan kalamai Dr bai daina furta mata ba, haka ta ci gaba da kukan har bata san lokacin da Nenne ta shigo ba sai jin muryar ta ta yi "Ameesha lafiya kike kuka?" Hankali tashe ta yi tambayar.

Saurin share hawaye ta yi ta kalkalo murmushi ta ce "kaina ke min ciwo Nenne kamar zai rabe biyu." "Allah ya baki lafiya, fatan kin sha magani?" Ta yi tambayar badan ta yadda da abin da Meesha ta faɗa ba. "Eh na sha." Ameesha ta bata amsa. "Ki bar kuka zai daina." Nenne ta k'arasa maganar tana fita, cikin zuciyarta tana sanyawa Meesha albarka ta tabbata Ameesha suruka ce ta kwarai tunda har tana iya ɓoye matsalar ta da mijinta, kwafa ta yi a ranta ita kadai tasan abin da zata yiwa Dr.

Ameesha na ganin Nenne ta fita ta kuma sakin wani kukan, tana tausayin kanta da hukuncin Dr. Asmad kuwa yana fita gidan su Hafiz ya yiwa tsinke, har ya karya kwana zai shiga layin ya tuna kila Hafiz din baya gida, don haka sai ya dauko wayarsa ya kira layinsa, ringing biyu ya dauka bayan sun gaisa ne yake tambayarsa Allah yasa yana gida "Eh ina gida ban jima da shigowa ba." "Ok gani nan zuwa." Yana gama faɗin haka ya katse wayar.

Yana fakin motar ya kara kiransa, minti biyu kacal Hafiz ya fito musabaha suka yi kamar yadda suka saba sannan Hafiz ya kalli Asmad da kyau ya ce "mu shiga daga ciki mana abokina?" "A'a ba sai mun shiga ba, sam na rasa jin dadi na gaba daya bana cikin nutsuwa." Da damuwa Asmad ya gama maganar. " Subhanallah! Dr me yake faruwa haka? Mu shiga ciki zai fi." Ciki suka shiga a falo suka yada zango, ruwa mai sanyi Hafiz ya kawo masa bayan ya sha sannan ya soma magana "Wato Hafiz Aneesa da Ameesha suna neman caza min k'wak'walwa, ko kasan duk tsayin lokacin da muka dauka da Aneesa maganin hana daukar ciki take sha?" "Maganin hana daukar ciki?" Da mamaki Hafiz ya yi tambayar. "Sosai kuwa ina tabbatar maka har cikina Aneesa ta zubar wanda take tunanin ban sani ba." "Zubar da ciki?" "Sosai kuwa." Dr ya tabbatar masa.

"Inna lillahi! Wannan wacce irin masifa ce? Kuma kana sane baka dau mataki ba" "Ban ɗauka ba sai yanzu nake son ɗauka akansu duka, domin Ameesha ma sau biyu ina ganin maganin a bangaren ta." "Au har Ameesha din ma?" Hafiz ya yi saurin katse shi. "Tabbas, na farko ranar da ta dawo daga gidansu, na biyu shekaran jiya da dare, wallahi bazan ɓoye maka ba na Ameesha ya fi bani haushi domin yadda na dauketa ba haka ta ɗauke Ni ba, abin haushi kuma tana gaya min bata taɓa sha ba ka ji wani rainin wayau bayan na gani da idona..." "Amma Dr ka binciki na Ameesha kuwa? Ban ji ajikina Meesha zata ma haka ba... Idan har Aneesa ka sameta da laifin dumu dumu Ameesha fa? Bana jin zata iya aikata maka makamancin haka..."

Mtsww Dr ya ja tsaki "ya Ina sanar maka abu kana neman karyatani...? "Ka taɓa ganin ta da maganin a hannu tana sha?" Hafiz ya yo saurin jeho masa tambaya. "Look Hafiz bana son irin wannan tambayar please." "Am sorry to say Dr Asmad amma wallahi na yi rantsuwa Ameesha ba zata iya abin da kake tunani ba, shin ina hankalinka ya ke da baka bincika ba? Shin menene na saurin sanya zargi cikin rayuwar aurenku? Ina mai baka shawara ka je ka yi bincike domin tabbatar da abin dake wakana a gidanka." Wannan karan a zafafe Hafiz ya gama maganar.

"Bincike! Hmmmm ai ba sai na yi bincike ba, domin amsar a fili take na gani da idona, kuma ba sharri na yi mata ba, don haka Hafiz sai anjima." Yana direba maganar ya mike da niyyar barin falon. "Ka je Dr amma ka yi gaggawar daina wannan fushin tun kafin ta kai ka ga dana sani." Bai fasa tafiyar ba sai da ya kai kofa kafin ya juyo ya kalli Hafiz ya ci gaba da tafiyarsa.

Tafiya yake a mota maganganun Hafiz na yi masa yawo a k'wak'walwa, ya rasa ta ina zai fara matsalar sam Nenne bata sakar masa fuska balle ya je can ya samu mafita, to kuma idan ya je sangartacciya tana can haka zata sanya shi gaba da kuka mtsww ya ja tsaki a karo na barkatai.
****

Haka kwanaki ke tafiya yau watan Ameesha uku a gidan Nenne, tattali Nenne ke bama Ameesha sam bata barin ta da damuwa, ita dinma tana jin dadin zama da Nenne domin tana samun kula a wajenta har wata kiba Ameesha ta yi, ba lallai ne mutum ya kula tana da ciki ba, bata neman abu ta rasa duk kankantar sa Ummi da Abba sau uku suna zuwa duba ta, sun yi farin ciki da jin Autar su na dauke da ciki Ummi har tana tsokanarta "Oh! Autar Ummi yanzu kuma dole a rage sangarta domin kin kusa zama uwa." "A'a Hajiya Halima Ameesha ai sangarta ba zai barta ba yar gatan Abba da Nenne da Bobbo ne fa, ta ya zata daina sangarta." Gaba daya suka saki dariya Abba ya ce "Faɗa mata dai ai ba a canzawa tuwo suna sangarta kuwa uwata yanzu ta fara ko a gaban kanwata ko kanina (yaron Meesha ko yarta Abba ke nufi.) Kar ki fasa komai uwata. Murmushi ta yi bayan ta gama tunawa.

Dr ya yi na cin duniya Nenne ta bari Ameesha ta koma amma ta ki yarda, da taga zai dameta sai ta soma haɗe girar sama da ta kasa idan ta kasa gaisuwa ma da kyar yake samun ta amsa balle ya samu damar ganin Ameesha, har ya ɗan zama abin tausayi. Duk wannan abin da ake yi Aneesa bata taɓa sanin Ameesha tana gidan Nenne ba, domin ita bata wani damu da zuwa gidan ba kuma ko taje bata dadewa take tafiya, Ameesha kuma kullum cikin bedroom take sai kuma garden in tana son shan iska take zuwa.

A gaggauce ya yi parking motarsa ko tsayawa rufe motar da kyau bai yi ba, domin har ya je asbiti ya yi mantuwa shi ne dalilin dawowarsa, kai tsaye bangaren Aneesa ya yi, yana tura kofar ta buɗe kutsa kai cikin falon ya yi duk sallamar sa bai samu an amsa ba, yasan har matar gidan shi yasa bai damu ba ya yi wucewar sa bedroom ɗinsa, ya ɗauko file har zai fita sai ya fasa don yana son ya sanar mata da ta shirya idan ya dawo su je gidan Nenne, abin da kunnuwan sa suka soma jiyo masa ne yasa shi daskarewa...


*YAR MUTAN RANO*
*SANGARTA*


©
_*ZULAYHEART RANO*_

*Sadaukarwa ga Khadija S Muhammad My Besty*

*48*

Da kyar ya janyo numfashin sa kafin ya gyara tsayuwa yana ci gaba da sauraren maganar Aneesa "Rukky wallahi bazan ɓoye maki ba ina cikin damuwa wacce ta amsa suna damuwa, ɗazun bayan Dr ya fita na sai nima na fita domin dama ina son komawa wajen Dr ya dubani, a halin da ake ciki so nake na samu ciki amma kin san ne Dr Ashrab yake faɗa min?" Daga can bangaren Rukky ta amsa da "A'a." Aneesa ta ci gaba cikin raunin murya "cewa ya yi mahaifata ta yi rauni dalilin magungunan da na rika sha ba za ta iya rike ciki ba." Wannan karon da kuka mai sauti ta gama maganar.

"Ki yi hakuri Anee kuma ai wannan ba wani abin damuwa ba ne da har za ki rika tada hankalin ki..." "Dole na tada hankali Rukky duk ke ce silar shigata duk wata matsala, yanzu ga abin da ya faru na yi nadamar bi yewa shawarar ki..." Tana gama faɗin haka bata jira jin me Rukky za ta faɗa ba ta kashe wayar. Tana ci gaba da kuka. Dr dake tsaye ya share zufar da ya tsatsatsafo masa "Lallai ina cikin masifa da jalala, Aneesa kin cuci kanki yanzu ga abin da ya faru dole ya dau mataki kan Ameesha, domin ba zai taba bari ta yi wa kanta illa irin ta Aneesa ba." Ransa a matukar ɓace ya bar kofar, sai da ya shiga mota kafin ya kirata bayan ya danne duk wani abu dake ransa.

Ringing biyu ta dauka cikin muryar kuka "Hello Hamman." Shi ne abin da ta iya faɗa. "Aneesa lafiya kuwa na ji muryar ki kamar wacce ta yi kuka?" "Lafiya lau sai dai ciwon kai ne ya dameni, amma nasha magani." "Ok dama na kira ne in sanar maki ki sameni a asbiti yanzu." "To." Ta amsa jiki a sanyaye.

Cikin mintinan da ba zasu gaza talatin ba Aneesa ta gama shiryawa, doguwar riga ta sanya ta yafa babban gyale, wayarta kawai ta rike a hannu sannan ta nufi asibitin Dr Asmad, bata dauki mota ba sai fita ta yi ta hau a dai dai ta. Mitina goma ta isa asibitin daret ofishin Dr ta nufa nocking ta yi daga ciki Dr ya bata umarnin ta shiga, shiga ta yi tare da yi masa sannu sannan ta zauna suna fuskantar juna.

Sun yi kusan minti biyar a haka idon Dr a kan fuskar Aneesa yana kallonta da nazarin yadda zai fara mata magana. A jiyar zuciya ya yi tare da ambaton sunanta "Aneesa." A ɗan razane ta amsa da "na'am." Muryarta na rawa. "Lafiya kuwa?" Ya jefa mata tambaya." "Lafiya lau Hamman." "Ok dama ina son in duba ki ne..." "Duba Ni Dr? Ai lafiya ta lau." Ta yi saurin katse shi. "Eh na san lafiyar ki lau amma ya zama dole na duba ki Aneesa saboda har yanzu tun bayan aurenmu ban ji alamar ko da ɓatan wata kin yi ba, kin ga ya kamata na duba ki domin gane ko akwai wata matsala." "No! Dr ka barni kawai lafiya lau nake ciki kuma Allah ne bai kawo ba, mu ci gaba da addu'a har Allah ya kawo." Ta dire maganar tana kokarin mai da hawayen ta.

"Na san lafiyar ki lau Aneesa amma ki bari na duba ki." Da kyar ya shawo kanta har aka yi mata komai, jikin Aneesa ban da tsuma babu abin da yake don tsabar farga, ta sa a ranta matukar Dr ya gane gaskiya zamanta ya kare a gidansa nan da nan sai zazzafan zazzaɓi ya saukar mata. Taimakon gaggawa Dr ya bata sannan bacci ya dauketa.

Dr Asmad na zaune ya zuba mata ido cike da takaicin halinta Nurse ta yi nocking, jiki babu kwari ya bata umurnin shigowa, mika masa result ɗin da aka yi wa Aneesa test ta yi. Zuciyarsa ta tsinke lokacin da ya yi karo da irin bayanin da Aneesa kewa kawarta a waya ce ya tabbata, sosai ya yi takaici da ganin sakamakon haka. A dana takaddun ya yi don baya son ta san ya san sanadin rashin lafiyar mahaifarta. Bayan ta farka tea ya Bata da magunguna lokacin biyar har da rabi don haka suka nufi gida, duk yadda ta so ta karanci wani abu game da shi abin bai yiyu ba, ganin har sun shiga gida da kansa ya haɗa mata ruwan wanka da abinci, suna zaune a falon Aneesa ta yi kasa da kai ta ce "Hamman wai me ke damuna ne, har yanzu baka ce min komai ba?" Murmushi ya tattaro don baya son ta ji komai, ya ce "Haba Anee me kike son sa ni bayan wanda kika sa ni kuma?" "Wanda na sa ni Hamman?" A razane ta yi tambayar. "No! Ke kina da saurin daukar zafi, bana son ki tayar da hankali domin baki da matsalar komai kuma rashin samun ciki lokaci ne, da zarar lokacin ya yi za ki samu ki kwantar da hankalin ki kin ji Anee." Da sigar lallashi ya yi maganar. Ganin yadda ya yi maganar yana lallashinta sai ta ɗan saki jiki. Haka dai rayuwa take tafiya musamman ta bangaren Aneesa da yanzu damuwarta ta ɗan ragu.

Yau dai Dr ya dau aniyar komai rintsi sai ya ga matarsa, domin a halin da yake ciki baya jin zai iya kwana a yau ba tare da ya yi arba da Ameesha ba, don haka cikin sauri ya yi wanka ya shirya cikin kananan kaya jeans da T-shirt